Read Mmen Etyə̂yn ə paynsêzè 16 Bible Online

Etyə̂yn ə paynsêzè 16 - Mmen bible

Etyə̂yn ə paynsêzè 16

¹Epàm ətəyn, mə zɨə kyə̀ ètɛ è ze fɨə pə̂ ndɛ ètsə̀mə pîə sê tsì sɛ èsɛ̀mbɛ nə, “Ghàyn ndu ə mbi ə ghàyn sɨs tsosê m̀lɨ mɛ ə m̀ nyi fɛ fètəyn èkwaŋ. Zɨnə mə nyi se tyə̀yn nə Zhə̀fè nyîə nyɔʼsə̀ etɔŋ sê ghɨ ghɛ ə ghe tɛ ètuve, nyi se nə pɔynsə ghənə.”

²Tsì ə̀shi ə ndùə sɨsə̀ tsosə̂ m̀lɨ mɛ m̀ tè nyi ə zə̂ynzè akaŋ ə chi. Chì e kwəmnə vîve ə fɨə ə̀ghɨ ghɛ ewìyn ə ghe tè kyi chwìə ə̀ nyàm èpamə zɛ, è kɨsè ghɨ ghɛ ə ghe tè ngɨmnə̂ fɨaʼsè ə nyàm èpamə ə̀təynke.

³Tsì ə̀mɔ̀ʼɔ̂ nə se ndu sepɛ̀ ə sɨ̀sə̀ tsosə̂ m̀lɨ mɛ m̀ tè nyi ə zə̂ynzè akaŋ ə enjwì ə fengwaŋve, ve ə kə̀mnə̀ sə mndəm kə mə wùə èkwûəm, nâʼàpî àkè ke ndaməke fumə enjwì ə fengwaŋve ə kwuə.

⁴Tsì ə̀mɔʼɔ̂ nə se ndu seta ə sɨsə̀ tsosə̂ m̀lɨ mɛ m̀ tè nyi ə zə̂ynzè akaŋ ə fètə̂ sètsò seghaʼâsè, è tɔŋ sə mmòse, se ə kə̀mnə̀ sə mndəm.

⁵Mə zɨə kə tsì zɛ ə è tɔ̀ʼnə̀ è mose pî nə, “O təyn saʼ kè chichi, ò nyi Fezhə̀ səmɔʼ, ò nyi Fezhə̀ fɛ ə fe nyi zôyn, fɨyn nyi Fèzhə̀ fɛ ə fe nyi shîŋə̀ tekɨ̂m.

⁶Ghɨghe ə tè zhwite ghɨ ghɛ ghe, ə zhwitə sèfɨ̀aʼtè, ò vɛ ò fo ndə̂m zôyn nə ghənə mɨ. Fɨa kɛ ə ò fo sê ghənə nyi kɛ ə ke nyi mə kə kwəyn sê ghənə!”

⁷Mə fɨnə zɨə kə kyə̀ fɨə pə̂ èndomve apàs alaŋ efoke pìə nə, “Pɛ̂pɛ Zhə̀fè, Pɛ̀ àtyaʼ akɨ̂m. Ò nyiə saʼa kə səmɔʼ, fɨnə saʼa kə nâʼà chichize!”

⁸Tsì ə̀mɔʼɔ̂ nə se ndu sekyàʼ ə sɨ̀sə̀ tsosə̂ m̀lɨ̂ mɛ ə m̀ tè nyi ə zə̂ynzè akaŋ etûə èzhwi, ə zà nə e nyɔʼle ghɨghe è wus e tɨməve.

⁹Wus etɛ ətəynve ə nyɔ̀ʼlə̀ ghənə, ghənə ə sôylə̀ èzə Fezhə̀ fɛ ə fe kyi tyaʼa etûə tètsòs tɨ̀yn. Pîza ghənə ə tàʼa kwiynê ə ghənə ə sepi se tsɨ̀tè ə vəyn.

¹⁰Tsì ə̀mɔ̀ʼɔ̂ nə se ndu setâyn ə sɨsə̀ tsosə̂ mlɨ mɛ ə m̀ tè nyi ə zə̂ynzè akaŋ etùə fèkyə̀ fə efɔ̀yn ə̀ nyâm èpamə zɛ. Lɨmke ə fìnə̀ eluʼ efɔ̀yn ə nyâmə̀ èpamə ətəynve, ghɨ ghɛ ə ghe tè nyi ətəyn e ndômnə̀ èndəm ə ghənəvè kûmə̀ m̀lùŋtsuŋ mɛ ə ghənə tè zɨə,

¹¹ghənə e sòylə Fezhə̀ fə ekwùtwəynfe kûmə̀ m̀lùŋtsuŋ mɛ ə chìvè tè fo sê ghənə, pîza ə tàʼa kwiynê ə ghənə ə sepi.

¹²Tsì ə̀mɔ̀ʼɔ̂ nə se ndu setufə ə sɨsə̀ tsosə̂ m̀lɨ mɛ ə m tè nyi ə zə̂ynzè akaŋ ə tsô e tɛ zhîzè, e tɔŋtə̂ nə Yufelɛ̀t. Tsò èghaʼâ ə̀təyn ə zomə nâʼà èkɨ̂m se fo endom sê fɔ̂yn tɛ ə te fɨə pə̂ ndom apàs kɛ ə cho ezhwi sa ətəyn nə te tyaŋ.

¹³Mə ke fe sezuʼ sepi shise seta, se kyaʼà kə echàmə̀kwə̀s. Amɔ̀ʼ tè fɨə pə̂ ə ndlangɔ̀yn echo, amɔ̀ʼ e fɨə pə̂ ə nyàm èpamə zɛ echo, amɔ̀ʼ e fɨə pə̂ ə fɨ̀aʼtè àkaŋ echo.

¹⁴Zuʼ nə sɨ̂nə̀ tè nyi tepamə̂ tə satàyntè kə se nə̂ ghɛ ə kayntəghe. Zuʼse ətəynse tè kwìə ndùə nâʼà sê fɔ̂yntè tekɨ̂m ə mbi, ə zùŋtə̀ ghənə luʼ emɔ̀ʼ kə ghənə ə nyi èpɨaʼtêzè se tə nò ə fetuʼ fɛ ə Zhə̀fè, Pɛ̀ àtyaʼ akɨ̂m tə saʼa ghɨghe ətəyn.

¹⁵Pɛ̂pɛ pi nə, “Ghàyn zɨte! M nə̀ pə̂ kə wùə èchɔŋɔ. Saŋnêzè nyì sê wùə vɛ ə è tsɨs, pfɨ̂tə̀ è ndzɨse ə vəyn ewìyn, kə è tə tàʼa fɨ è sas ezomze ə ghɨghə shi, kə è və ghomə̂.”

¹⁶Zuʼse pi sɛ ə zùŋtə̀ tèfɔ̂yn nə tɨ̂nə̀ elùʼ vîvè, e tɔŋtə̂ ewàmnè ə Ipilòzè nə Àmangendòn.

¹⁷Tsì ə̀mɔ̀ʼɔ̂ nə se ndu esɛ̀mbɛ ə waŋə m̀lɨ mɛ ə m̀ tè nyi ə zə̂ynzè akaŋ awulə. Kyə̀ ètɛ zhîzè ə fɨə pə̂ əfekyə̀ fə efɔ̀ynfè ə ndɛ̂ ètsə̀mə nə, “Ghɛghe əkɨ̂m ə mì!”

¹⁸Gholze tè nyîə mɨ̂anə̀, kə̂mə̀, fɨnə pɨaytə̂, chike e nə̂ʼə̀ nâʼà sə ŋaŋ. Chike paʼà tyəmə̂ nəʼə̀ nyiəmə se zhə̀tə pə̀yn etuʼ vɛ ə tè pom wùə m̀sɔ̀ŋ. Ə̀ kɨnə tè nyi kàyntè àchi ə nəʼsəke ə fètə̂ èchi enəʼsəve ekɨ̂m.

¹⁹Ə chyâtə̀ tɔ̂ŋ èghaʼâ ghaʼâ pɨ̂as vetwɔ, ə pofsə̂ sètɔ̂ŋ sə eghaʼâsè ə tendaʼ tə mbite nâʼà sèkɨ̂m. Zhə̀fè tè paʼà lèsè Papilɔ̀yn, nyiəmə, è te nyiə nyɔʼsə̀ ètɔŋ sê ghənə nâʼà sə ŋaŋ ə nə̀ nə ghənə mɨ wà m̀lɨ̀ mə ə ndə̀m ndim ətəyn mə za nyi epɔynsê ə vəyn sê ghənə.

²⁰Luʼ tɛ ə tsôsvè tè nyi mə ve ə kyɨ̀ŋ nga ə saŋə, pfɨynse ə pɔŋɔ saŋə kə sèkɨ̂m.

²¹Chichîme ghaʼlə̂ me tso əghɨghə tu, shize emɔ̀ʼ e tɨ̂lə̀ zaʼâ ngɔ̀ʼ mghɨm m̀kyàʼ njòse tâyn. Ghɨghe ə kə̀mnə̀ sè sôylə̀ Fèzhə̀ nə ə̀ pəyn vəyn è tsôs ekwuəmnə mchichi nə vɨnə̀, kûmə̀ nə tsôs ekwuəmnə nə vɨnə mə tè nyi ve tɛve.