Read Mmen Etyə̂yn ə paynsêzè 17 Bible Online

Etyə̂yn ə paynsêzè 17 - Mmen bible

Etyə̂yn ə paynsêzè 17

¹Tsì ə̀mɔ̀ʼɔ̂ əfètə̂ sètsì sɛ èsɛ̀mbɛ ə se tè kyi kwaŋ vɛ èsɛ̀mbɛ ə pə̀ pìə sê mi nə, “Pə m tyəyn sê ghò kə nə̀ pɔynsə tsɔ̀yn àkwàlə̀ zɛ, mə za nyi tɔ̂ŋ èghaʼâ ghaʼa zɛ ə pɛ etipìə sètsò se ghaʼâ setsɨəse.

²Fɔ̂yn tekɨ̂m ə mbi ə nə̀yn ghɛ ə nyələghe è vəyn, ghɨə mbighe ghɛ ghe nə̂yn ghɛ ə nyələghe è vəyn ghe tsɨ̂ə kə nyî, ghe ghɛ ghe nə̂yn, ghənə e sè nyi zôyn kə ghɨ ə mɨ lɨ̀m m̀ mɛ m̀ ko ghənə.”

³Ə fètə̂ tèlaynəlayn, Zuʼsə Fezhə̀sè ə njiə ə mì ewìyn, tsì ə pɨ̀aʼà ndûə è mi elùʼ ashəshəve, mə fe wùzhɔyn vîo fu è ve tsɨs etûə nyàm èpamə èpàŋə zhîzè mə ə nyàʼ zəghe ewìyn ə ətəyn nâʼà èkɨ̂m, mə zə təynghe nyi esôylè sê Zhə̀fè. Nyàm èpamə ə̀təyn tè kyi etu èsɛ̀mbɛ è ndɔŋ seghɨm.

⁴Wùzhɔyn ətəyn tè nyi mə è və màʼ ndzɨse paŋəse mə se nyîə tɛ èkɛve, mə è və chɨ̀ŋə̀ fɨate ewìyn, tə mɔ̀ʼɔte e nyi mə ə fɛte ə tə̂ ngôl, təmɔ̀ʼɔte e nyi mə ə fɛte ə chîə nyaynəghe, tə mɔ̀ʼɔ te nyi mə ə fɛte ə tə̂ m̀njìkèta m̀ tɛ èkɛve e tɔŋtə̂ nə pə̂l. È tè kyi wà ə və gho mə ə fɛte ə ngôl mə lɨmè ə lwiyn ətəyn, mə m̀ tyə̀nə̀ ə̀ghɛ ə nyələ ghɛ ə è nə̀, è ndom tepi tɛ ə è kwìə nyɨ̂ŋə̀ è ghɨghe ətəyn.

⁵Ə̀ tè nyi mə ə nyàʼ zə ze ə vəyn cho atu ze tyəm sə eghɛ mə ze ndəte nyi ndò nə, “Papilɔ̀yn èghaʼâ, Ò nyi nyì sê kwàlə̀ vekɨ̂m, fɨyn nyi nyì ə̀ghɛ kwuəmnəghe ə mbi.”

⁶Mə fe mə wùzhɔyn ətəyn ə mɨ ndə̂mè, m̀ mə ko vəyn sə mlɨ̂. Ə mɨ̂nə̀ tè nyi mndəm mə ghɨ Fezhə̀ghè è kɨsè ghɨ ghɛ ə tè zhwi kûmə̀ nə ghənə tè tyəm è təm ə ghənə̂ghè əkɨ̂m sê Njisə̀s. Ə pə̀ kə m fe wùzhɔyn ə̀təyn, nyi èkaynze nâʼà sə ŋaŋ.

⁷Pîza tsì zɛ ə pfɨfə sê mi nə, “Ò nyi è kaynze kûmə̀ ghè? M nə̀ tsâ paynsə̂ èghɛ endətəze sê ghò kûmə̀ wùzhɔyn nə vɨ̂yn è nyàm èpamə zɛ ə è tsɨs etûə ə̀təyn, ə zɛ ə è kyi tuve èsɛ̀mbɛ è ndɔŋse eghɨm.

⁸Nyàm èpamə nə zɨ̀yn ə ò tè fe tè nyiə nyi ètwɔ ə shɨŋ ə̀mɔʼɔ̂, pîza zôyn è kɛse va ètwɔ. Zə̂yn tə fɨə kɔʼɔ pə̂ ə epə zɛ ə ze lɔŋɔ tso ndùə za se ndù nə ə pofse zə̂yn. Ghɨ ghɛ ə ndamə ə mbi mə ə tè paʼà nyàʼ zə ghənə ghè ə ŋwàʼlè ə̀ghɨ̀ endamə tsɔ̀fə kə pom mbi tə pə̂ ə nyi èkaynze ezhoghɛ ə nayne nyàm èpamə ə̀təyn kûmə̀ nə zə̂yn tè nyîə nyi ètwɔ ə shɨŋ ə̀mɔʼɔ̂, zôyn è kɛsə̂ va ètwɔ, pîza nyi se tə kɛsə pə̀yn.

⁹Zɨnə mə nyi mə ò tɔfə, ə ò kwaʼte kê. Tu nə vɨnə èsɛ̀mbɛ tè tyə̀nə sepfɨyn esɛ̀mbɛ, ə nyi səynse ə wùzhɔyn nə vɨnə tè tsɨs etùə ə̀təyn.

¹⁰Tuə ətəynve nyi za èsɛ̀mbɛ, tyə̂nə̀ kəpî tèfɔ̂yn èsɛ̀mbɛ. Fɔ̂yn tə təynte ə kwu tètâyn, emɔ̀ʼ e pa saʼa, ve kwuŋsəve e nyi se pə̀yn. È nə pə̂ nâʼàpî ashìŋə̀ àkè ə è və kyi se saʼa kə sə fendiŋə̀ nyî.

¹¹Nyàm èpamə zɛ ə è tè nyi etwɔ ə shɨŋ ə̀mɔ̀ʼɔ̂ za, mə zôyn è ze kɛsê va ètwɔ za, è tə̂ pə̂ ə è zə nyi fɔ̀yn nə te ndu tefamə. È nyi wùə èmɔ̀ʼ ə fètə̂ tèfɔ̀yn tɛ èsɛ̀mbɛ ndô ndûə kə pofse vəyn.

¹²Ndɔŋ sɛ èghɨm ə ò fə fe za tyə̂nə̀ tefɔ̂yn teghɨm, pîza te pa nyi ndɔ̀ʼɔ te kyi tyaʼa sə̂ saʼa. Pîza ghənə nə̀ fiə àtyaʼ se saʼ kə tefɔ̂yn sə chwìə emɔ̀ʼ yîghə̀ nyàm èpamə zɛ.

¹³Ghənə nyî èghɨm tsɨynte kyi kə èkwâʼtè èmɔ̀ʼ, mə ghənə tə tsɨ̂yntə̀ ə pomə̂ se fo eluʼ ə ghənəvè è tyaʼ ə ghənə̂kè se saʼ əghɨ sê nyàm èpamə ə̀təyn nə è zə saʼa ə̀ghɨ.

¹⁴Ghənə tə səʼə̀ àngyə̀s sê Va Ndzè, ə Va Ndzè no zhi ghənə kûmə̀ nə è nyi Pɛ̂pɛ sê ghə Pɛ̂pɛ əkɨ̂m, fɨyn nyi Fɔ̀yn se fɔ̂yntè kè tekɨ̂m, è nyi yî ghə̀ ghɨ vəyn ghɛ ə Zhə̀fè nyi mə fe ə tɔŋə̂, ə chɔʼɔ, ghənə e chûmtə̀ vəyn è təm ə ghənə̂ghè əkɨ̂m.”

¹⁵Tsì nə zɛ ə fɨnə pìə sê mi nə, “Tɔ̂ŋ èghaʼâ ghaʼa zɛ ə pɛ etipîə sètsò setsɨə za tyə̀nə̀ tsɔ̀yn àkwàlə̀ zɛ, tsosə təynse nyi tèndâʼà kè tekɨ̂m, è tâŋ tekɨ̂m, è kyì tə tekyàʼ tekɨ̂m, è ghɨ ghɛ ə wâmnə̀ kə wâmnètè tekɨ̂m.

¹⁶Ndɔŋ sɛ èghɨm ə ò fə fe za tsɨ̂yntə̀ yî nyàm èpam zɛ sə pânə̀ àkwàlə̀ nə kɛ. Ghənə nə̀ fiə nâʼàpî ghɛ vɛ ə è kyi ə chɔʼte ndzɨse ə vəyn ewìyn ə za ke vəyn èsas ezomze. Ghənə nə̀ pofsə̂ njà èwìyn ə̀ vəyn kəpiə kwulə nyàm ə maʼa ewùs.

¹⁷E nyi nyî kûmə̀ nə Zhə̀fè ə ndə̀m ə ə ghənə ətəm nə ghənə ə nə̂ kə èghɛ zɛ ə è kyiŋə, tɔynə̂ ə ghənə etsɨ̀yntè se fo atyaʼ kɛ ə ghənə kyi sə saʼa sê nyàm èpamə nə zɛ se zaʼâ kə wâmnə̀ ə Fezhə̀zè tə pəyn səmɔʼ.

¹⁸Wùzhɔyn vɛ ò fe zâ tyə̀ynə̀ tɔ̂ŋ èghaʼâ èghaʼâ zɛ ə è saʼa fɔ̂yn tə mbi tekɨ̂m.”