Read Mmen Etyə̂yn ə paynsêzè 18 Bible Online

Etyə̂yn ə paynsêzè 18 - Mmen bible

Etyə̂yn ə paynsêzè 18

¹Ə̀ tè nyi kə ghɛ nə ghɨ̂nə̀ tsɛ̀, mə fe tsì ə̀mɔ̀ʼɔ̂ è ze tso pə̂ ekwùtwəyn. E tè kyi nâʼà atyaʼa ghaʼâkè, payn ə zəynze e nyi mə zə kɨytê ke chike akɨ̂m.

²È zə pɨa pìə nâʼà è kyə̀ e tɛ nə, “È zə pfɨ̀! Papilɔ̀yn èghaʼâ ə pfɨ̀. È zə pə̀yn sə elùʼ vɛ ə pamə̂ tə satàyntè ndamə ətəyn, eluʼ vɛ zuʼse pise ndə̂ ətəyn è kɨsè luʼ vɛ nɨ̂ŋ mɛ ə pânə̀ mə̂ynə̀m ndə̀ ətəyn, è kɨsè luʼ vɛ ə nyam sɛ ə se zo va e pânə̀ səynse ndə̂ ətəyn.

³Nâʼà ə̀ghɨ ə tèndâʼà ghəkɨ̂m nə̀ ə̀ghɛ endom enyələve sê Papilɔ̀yn kè kə fɨa ə kwiəke nə̂ lesə̂ wùə nə è mɨ lɨ̀m ə m ko vəyn, ə è nyɨŋə è vəyn. Fɔ̂yn tə mbite ə nə̀yn kepî ghɛ ə nyələghe yîghə̀ ghɨ Papilɔ̀ynghè, ə nyìŋə̀ è vəyn, ghɨ epəʼleghe ə mbi ə pə̀yn kepî sə ghɨ̀ eghaʼlə̂ghè kûmə̀ nə Papilɔ̀ynghè nyîə kɔ̂ŋə̀ tsɛsə̀ èfɨa ekɛ etɛve, zhɔnə sê ghɨ ə pəʼlə ətəynghe.”

⁴Mə ke zɨə kyə̀ ə̀mɔ̀ʼɔ̂, è zə fɨə pə̂ ekwùtwəyn pìə nə, “Ghàyn fɨ pəyn ə ghɨ ghɨmə, ghàyn fɨ pəyn ə Papilɔ̀yn, kə ghàyn ə nə pi kə ghɨə Papilɔ̀ynghè nə̀, famə endom ə Zhə̀fè tə tàʼa pɔynsê ə ghàyn kə fe tə pɔynse ghɨə Papilɔ̀ynghè.

⁵Pisə vəynse ə ndɔŋnê nyiə kɔʼɔ fɨə awulə, Zhə̀fè fɛ fe pɨəytè pisə ghənə̂sè, sè nyi zôyn se pɔynsê əghɨ ə Papilɔ̀ynghè kûmə̀ sèpi sə ghənə̂sè.

⁶Ghàyn nəyn ke ə̀ghɛ ə pighe sê ghɨə Papilɔ̀ynghè ke kə ghənə nyi mə ə nə̀yn sê ghɨə mɔ̀ʼɔghe. Ghàyn nəyn ə Papilɔ̀ynghè zɨ tsôsvè shîŋə̀ tèpɛ̀ sê zɛ ə ghənə tè nə̀yn sê ghɨghe. Ghàyn fo lɨ̀m sê ghɨə Papilɔynghè ə m̀ mə tɛ tsɛ̂ mɛ ə ghənə tè fo sê ghɨə shîŋə̀ tepɛ̀.

⁷Ghàyn fo vəyn ètsôsvè, è təm ə tɨləghe, ə ze ə tsɨ̂ə tsɛ̂ epomsê, è chùŋ zɛ ə è tè kyi. È tè nyiə kɔʼsə̂ tèkwûəmə̀ pîə sê ngɨŋə̂ vəyn nə, ‘M nyi nyìə fɔ̀yn, vɛ ə è tsɨs ə fekyə̀ fə efɔ̀ynfè saʼa m vachi zhwiə kwuə. M tə kyî va təm ə tɨləghe.’

⁸Kûmə̀ nyiəmə, tsôs te kwuəmə nə tɨnə mə tə kotə̂ vəyn sə fetuʼ femɔ̀ʼ. Ə̀ nyi tezaf, è tɨ̂l ətəmze, è chɨ̀ŋ. Ə tə nyɔʼɔ̀ vəyn è wusve kûmə̀ nə Pɛ̂ Zhə̀ fɛ ə fe saʼa vəyn nyiə kyi àtyaʼ, ke kwəynə̂.”

⁹Fɔ̂yn tə mbi tɛ ə te tè nə̂ ghɛ ə nyələghe yîghə̀ ghənə, fɨyn kyi èsəmtê atyaʼze sə̂ nyɨ̂ŋə̀ è ghənə, tə nə̂ ə chîə kə ghənə fe kə Papilɔ̀yn pɛ, ndəʼke kɔʼɔ.

¹⁰Ghənə tə tyəmə̂ kə sə aghaf kûmə̀ kə ghənə fânə̀ nə kə tsôs ə vəyn nə vɛ pɔŋ kote ghənə, ghənə e sè pìə nə, “E kwə̂mə̀ ndò! E kwə̂mə̀ sê Papilɔ̀yn ə tɔ̂ŋ èghaʼâ ètɛ zɨ̀yn! Kè sə fendiŋə̀ nyî, Zhə̀fè ə pɔynsê ghò!”

¹¹Ghɨ epəʼleghe ə mbi tə nə̂ ə luŋ luŋə chîə vəyn nyi ètəm ətɨləghe kûmə̀ nə wùə tə nə̂ e və fɨyn va se zhɔyn efɨa ə ghənə̂ ve pəʼləve.

¹²Wùə vîvè tə zhɔnə va fɨa ə ghənə̂vè mə ə̀ nyi, ngôl, silvà, chi ə nyaynəghe, è kɨsè njikètase se tɛ èkɛ e tɔŋtə̂ nə pə̂l; è ndzɨse maʼase kə, se ndzɨs sə etɛ nə ekɛse, è ndzɨse paŋəse se tɛ èkɛve, è ndzɨsə afofse se tɛ èkɛve, è ndzɨse se pâŋə̀ kə nyî; È kyì tə mkàʼ tekɨ̂m mɛ ə m̀ lɨ̂mtə̀ tsɔ̂fə̀; È kyì tə efɨa tekɨ̂m tɛ ə fɛte è sɔŋ ə nyâm ə̀ chìghe, è kàʼm̀ m̀ tɛ èkɛve, kas kɛ ə tɔŋtə nə mblɔ̂ŋs, è anyà, è kyì ə sefîəm shîse e tɔŋtə nə mambə̀l.

¹³Se paʼsê, wùə tə fɨnə zhɔnə va fɨa elɨmtə tsɔfəve kə, sinamò, efɨa ekwuənə nə embàsvè, è ndiŋze, è ngwɨlə̀m, e tɔŋtə nə mâyl, è pfɨ̀ŋə̀m e tɔŋtə̂ nə flaŋkyiŋsèyn; È fɨa ə mɔ̀ʼɔve kə mlɨ̂, è ngwɨ̂l mə olìfmè, è pfɨ̀ŋə̀ m̀ kwuə kə nyi, è sɔ̀fsè, è nyam sə mbɔ̀lɔʼse, è ndzèsè, è kwanyàmvè è kɨsè katə eghɔ̀ŋte mə ə̀ shìnə̀ ekwânyàm, è ghɨ msɔ̀ŋ ghɛ ə pəʼle sə ekɔ̀s.

¹⁴Ghɨ epəʼlə nə ghɨ̀nə̀ tə pìə sê Papilɔ̀yn nə, “Nâʼà efɨa echûŋ vekɨ̂m vɛ ə ò tè nyɨŋə epàm ətəyn ə saŋ, nâʼà èghaʼ zɛze ekɨ̂m, è ndam echûŋ zɛ ə ò tè kyi ə ndò, ò tə fɨnə kyîə va zəynze.”

¹⁵Ghɨ ə pəʼlə nə ghɨnə mə ə ghənə tè kyi ghaʼze kə nə̂ pəʼlè yîghə̀ vəyn tə tyəmə̂ sə aghaf kûmə̀ nə ghənə fànə̀ nə kə tsôs ə vəyn nə vɨ̂yn pɔŋ kote ghənə. Ghənə tə nə̂ ə chîə fɨnə nyi ètɨ̂l ətəmze,

¹⁶pìə nə, “E nyîə kwə̂mə̀! E nyîə kwə̂mə̀ sê tɔ̂ŋ èghaʼâ ghaʼâ zɨ̀yn! È tè nyiə maʼà sendzɨs sechûŋsè, kə sendzɨs se kɛse, è ndzɨse se tɛ è kɛve pâŋə̀ ndò, è ndzɨse se pâŋə̀ nâʼà àchûŋ, wiyn ə vəynve ekɨ̂m e nyi mə è və chɨ̀ŋə̀ fɨave mə ə fɛte è ngôl, è chîə nyaynəghe, è njìkèta se tɛ nə ekɛse mə ə tɔŋtə̂ nə pə̂l!

¹⁷Kè sə chwìə emɔ̀ʼ fɨa nə vɨnə̀ ə saŋ nâʼà èkɨ̂m.” Ghə̀pɛ̀ ə sengwùʼ se ghaʼa kwəynəse, è ghɨ ghɛ ə ghe kwiə ə sengwùʼ se ghaʼa kwəynə nə sɨ̂yn è ghɨ ghɛ ə ghe fɨaʼà ətəyn è ghɛ ə ghe zhiə kə kûmə̀ ènjwî ə fengwaŋ tə tyəmə̂ kə sə aghaf.

¹⁸Ghənə tə nə̂ ə pɨa chîə eghoghɛ ghənə fe ndəʼ kɛ ə ke fɨə kɔʼɔ ewùs vɛ ə ve nyɔ̂ʼə̀ tɔ̂ŋ èghaʼâ ghaʼâ ə̀təyn. Ghənə tə pə̂ ə tsamə pîə nə “Nâʼà tɔ̂ŋ èghaʼâ zhîzè paʼà tyəmə pə̂ nyi kə tɔ̂ŋ èghaʼâ ghaʼâ zɨ̀yn!”

¹⁹Ghənə tə fuʼə̀ àpɨ̂l ə ghənə etu se tyə̀yn etɨ̂l ətəmze, ə ghənə chîə nyi ètɨ̂l ətəmze pîə nə, “E nyîə kwə̂mə̀! E kwə̂mə̀ ndò se tɔ̂ŋ èghaʼâ ghaʼâ zɨ̀yn, ə zɛ ghɨ ghɛ ə tè kyi ngwùʼ se ghaʼa kwəynəse enjwì ə fengwaŋve tè kyiə ghaʼze tɔynə̂ èghaʼâ tɔ̂ŋ èghaʼâ ghaʼâ nə zɛ. È və tsɨ̂yntè njìsè fɨave ekɨ̂m kè sə chwìə emɔ̀ʼ!”

²⁰“Ghàyn ghɛ ə ghàyn ndamə ekwùtwəyn, ghàyn e saŋnə̂. Ghàyn e saŋnə̂ ə ghɨə Fezhə̀ è ghɨətomə, è fɨ̀aʼtèsè kûmə̀ nə Zhə̀fè ə kà saʼ ə̀ Papilɔ̀yn pɔynsə̂ vəyn əghɛ ghɛ ə è tè nə̀yn sê ghàyn!”

²¹Tsì àtyaʼ zhîzè ə ke njì echi, ze ghaʼə kə nyî ə màʼa tsosə̂ ə enjwì ə fengwaŋve, ə pìə nə, “Ə̀ za nyi kə Zhə̀fè tə njìə Papilɔ̀yn ə tɔ̂ŋ èghaʼâ ghaʼa zɨ̀yn ə màʼa tsose nâʼà è tyaʼa, ə tə tàʼa fɨnə fe.

²²Wùə tə fɨnə zɨə va famə tɔ̂ŋ èghaʼâ ghaʼâ kə puʼə nduŋte, è kɨ̀sə kə ghɨ m̀sɔ̀ŋghe zhəmə njàŋsè, è kɨsè kə tɔŋə ndɔŋse, pî se zɨ kə tɔŋə sɔŋte. Nâʼàpî ndè vɛ ə è fɨaʼà fɨake è ghoghe tə nə̂ ə è və fɨyn va ə tɔ̂ŋ èghaʼâ ghaʼâ. Ə tə tàʼa fɨnə zɨə kəpiə kyə̀ m̀shɨ̂ŋ zɛ ə è kwûə sɔ̀fsè ə zə̂ynzè ə fètəyn.

²³Wùə tə fɨnə fe va kə lâm panə ə è tàʼa fɨnə zɨ ə kyə̀ ə̀ghɨ ə maləghe, ə fetə̂ tɔ̂ŋ èghaʼâ ghaʼâ. Ghɨə pəʼlə ghɛ ə ghənə tè nyi ə Papilɔ̀yn tè nyi sekàyntè sə ghɨ̀sè ə mbi. Papilɔ̀yn ə kɛsə̂ njìə kəpi ə̀ghɛ ə fɨyntə akaŋghe ə lesə̂ mbi èkɨ̂m ətəyn.”

²⁴“Ə tə pɔynsê Papilɔ̀yn kûmə̀ nə è zə tə zhwi fɨ̀aʼtèsè, è ghɨə Fezhə̀ghè fumə ə tɔŋ èghaʼâ ghaʼa; E nyi səmɔʼ nə Papilɔ̀yn ə zhwite ghɨə mbi èkɨ̂m.”