Read Mmen Etyə̂yn ə paynsêzè 19 Bible Online

Etyə̂yn ə paynsêzè 19 - Mmen bible

Etyə̂yn ə paynsêzè 19

¹Epàm ətəyn, mə zɨə kyə̀ è kô kə anɔ̂yn əghɨ̀kè awulə, è ze pîə nə, “Tsɨ̀tèzè nyì sê Zhə̀fè kûmə̀ nə Sɔzaze, è pomsêzè, è tyaʼke nyi sê Zhə̀fè ghasènìfe.”

²Fe saʼa kə səmɔʼ fɨnə saʼa kə nâʼà chichi. Zhə̀fè ə kà saʼ ə pɔynsə̂ àkwàlə̀ kɛ ə ke tè lesə̂ mbi è ndamə vəyn ze nyələze. Zhə̀fè ə pɔynsê vəyn kûmə̀ nə è və tə zhwi ghɨə fɨaʼa ə vəynghe.

³Ghənə ə fɨnə pɨa pìə nə, “Tsɨ̂tèzè nyì sê Zhə̀fè kûmə̀ nə ndəʼ fɛ ə fe fɨə ewùs vɛ ə ve nyɔ̂ʼə̀ tɔ̂ŋ èghaʼâ ghaʼa tə nə̂ ə fe ə fɨə kɔʼɔ nâʼà kə ghè tə ghayn.”

⁴Chəʼ sɛ m̀ghɨm pɛ̀ njòse kyàʼ è fɨa endamə vɛ è kwàʼ ə tɨmə ə̀ngwuʼ ngɨmnə̂ Fèzhə̀ fɛ ə fe tè tsɨs ə fekyə̀ fə efɔ̀ynfè. Ghənə tè pìə nə, “Ə zə nyi ke zamə! Tsɨ̀tèzè nyì sê Zhə̀fè!”

⁵Epàm ətəyn, mə zɨə kə kyə̀ fɨ pə̂yn elùʼ əfekyə̀ fə efɔ̀ynfè pîə nə, “Ghàyn tsɨte Zhə̀fè ghasènìfe, ə ghàyn ghɨə vəynghe fɨaʼa ghe əkɨ̂m, è ghɨə vəyn ghəkɨ̂m ghɛ ə zɨə vəyn, ə ghɨ ə ghaʼlə̂ghè è ghe tətə̂ghè.”

⁶Mə zɨə àfɨa ke kûmə̀ kə anɔ̂yn, kô kə epɨ̂apɨa, è kɨsè kə eghol epɨatəze, pɨa pîə nə, “Tsɨ̂tèzè nyì sê Zhə̀fè! Kûmə̀ nə Pɛ̂pɛ, Pɛ̀ àtyaʼ akɨ̂m Zhə̀fè ghasènìfe nyi fɔ̀yn!

⁷Ə ghâsènì ə saŋnə̂, sɨŋnə̂; ə ghâsènì ə tsɨ̂tə̀ Fèzhə̀ kûmə̀ nə shîŋə̀kè ə kwəyn kə Va Ndzè malə, mə zhwìə vəyn se nyi mə è və pɨaʼtê ngɨŋ ə vəyn.

⁸Ə nyi mə fo ndzɨse zose, se tɛ èkɛve nə è maʼ.” (Ndzɨse tɛ nə ekɛ sə təynse tyə̂nə̀ ə̀ghɛ ə nə ə chûŋ ə Fezhə̀ghè.)

⁹Tsì ə ke pì sê mi nə, “Nyàʼ ghɛ zɨ̂nə̀: Saŋnêzè nyì sê ghɨ ghɛ ə ndâmnè nə ghənə pəyn zhiə malə̂ ə̀ Vâ Ndzèkè.” Tsì ə̀təyn ə zomtə̂ nə, “Ə̀ zɨnə nyi ewâmnè ə səmɔʼɔ ə Fezhə̀zè.”

¹⁰Mə tɨmə ə̀ngwuʼ ə və shi se ngɨmnə vəyn, pîza è zə pìə sê mi nə, “Kə ò mɔm! M fɨaʼà sê Zhə̀fè kèpi kə gho è ghɔnɛghè, è ghɨ ghəkɨ̂m ghɛ ə ghe fɛte kyi səmɔʼ zɛ ə Njisə̀s tè tyə̀yn paynsê. Ngɨmne Zhə̀fè! Kûmə̀ nə ghɛ zɛ ə Njisə̀s tyə̀ynə̀ paynsə̂ nyi zəynze ə ze nə̂ nə fɨ̀aʼtèsè ə nə̂ èfɨaʼ ə ghənə̂zè.”

¹¹Mə fe èkwutwəynve mə ə chwìe, mə fe àkenyàm efɨfəkè fumə ə mì əshi. Ə tè tɔŋtə wùə vɛ ə è tè nyɨŋə etûə ə̀təyn nə, Fɨ̂aʼ e təmghe əkɨ̂m, è nə Pì səmɔʼ. È tè nyi chichi endom vɛ ə è saʼa ghɨghe ətəyn, è kɨsè endom vɛ ə è tè no ghɔŋze ətəyn.

¹²Shi ə vəynghe tè nyi kə andəm ewûske, è ve nyi mə è və sò fɔ ə tefɔ̀yn etsɨəve ə və atu. È tè nyîə kyi èzə kə ə nyâʼ ə vəyn wìyn, nâʼà wùə vîvè e ke va ghɛ zɛ ə ze tyə̂nə̀, ə̀ tsɛ̂ kə va vəyn.

¹³È tè nyi mə è və màʼ pfɨ̂fè mə ə tsɨ̀ mndəm, zɨə vəynze e nyi nə, “Tom ə̀ Fèzhə̀.”

¹⁴Sokə̀ʼ sə ekwùtwəynse tè nyîə chûmtə̀ vəyn. Ghənə tè nyɨŋə etûə ekwânyàm efɨfə̂vè, mə ghənə ə màʼ ndzɨse fɨ̂fə̂ se zose, se tɛ èkɛve.

¹⁵Ghɛ zɛ ə è tè pî tè nyi kə efɛ̂ eghɔ̀ŋze ə è nə̀ njîə se no zhi əghɨ ə tɛ nə atu ə tendaʼàghè. È nə saʼa ghənə nâʼà è tyaʼ eghaʼâkè kəpiə è njìə mbàŋə̀ anyà se saʼ ə ghənə ətəyn. È tə kamə sèpàyn sə vəynse kepî endom vɛ ə kamə lɨ̀m epə ekamə nə mlɨ̀zè. È tə nə̂ zɨnə mə sê Zhə̀fè Pɛ̀ àtyaʼ akɨ̂m vɛ è zafsə̂ ndwɔ̂vè nâʼà sə ŋaŋ kûmə̀ sèpi sə ghənə̂sè.

¹⁶Ə̀ tè nyi mə ə nyàʼ zəze apàs ə fepfɨ̀ kɛ ə ke tè kɨytə pî ə vəynke nə, “Fɔ̀yn sê fɔ̂yntè, è Pɛ̂pɛ sê Pɛ̂pɛse.”

¹⁷Mə ke fe tsì e ze tyəm ezhwi, pɨa pîə è kyə̀ ètɛ sê nɨ̂ŋmè m̀kɨ̂m mɛ m kwɨlə pfɨyn tə ghɨ̀tè mə m̀ wùlə̀ nâʼà ekwùtwəyn ekwùtwəyn nə, “Ghàyn pəyn zûŋtè ə ghàyn tsɨynte zhi etuʼ èghaʼâ ə Fezhə̀vè.

¹⁸Ghàyn pəyn kwɨl sènjyà se wìynse ə tefɔ̀yntè, è njàse wìynsə etuə sesokə̀ʼve, è sokə̀ʼse, è njà sə ewìyn sə ekwânyàmsè è ghɨ ghɛ ə nyɨŋə etûə ə̀təyn, è njà sewìyn sə ghɨ̀ ə̀kɨ̂m sè, è sə ghɨ ghɛ ə nyi ekɔ̂s, è ghɛ ə va ekɔ̂s, è sə ghɨ̀ ə ghaʼâsè è sə ghɨ ə tətə̂ghè!”

¹⁹Mə ke fe nyàm epamə è fɔ̂yn tə mbite è sokə̀ʼ sə ghənə̂sè mə se ə zùŋtè luʼve mɔ̀ʼ se nò vɛ ə è tè nyɨŋə etûə àkenyàm è sokə̀ʼ sə vəynse.

²⁰Ə kyîə nyàm e kwə̀mnə zɛ̂, ə fɨnə kyîə kəpi fɨ̀aʼtè àkaŋ zɛ ə è tè tyə̀nə chwìə se və shi. Ə̀ nyi sechwìə nə sɨ̂nə̀ mə ə è tè njì se lesê əghɨ ghɛ ə tè kyi chwìə ə̀ nyàm èpamə zɛ è kɨsè ghɛ ə ghe tè ngɨmnə fɨaʼsè ə nyâm èpamə ətəynke. Ə màʼa nyàm èpamə ə̀təyn è fɨ̀aʼtè àkaŋ əfètəyn èlùʼ wusve fuə ətəyn è fɨa kyîke mə ke lɛ̂ pâŋə̀ ndò e tɔŋtə̂ nə sɔlfɔ̀.

²¹Sokə̀ʼ sə ghənə̂sè ə kwuə mə ə̀ zhwi fenyi fə eghɔ̀ŋ fɛ ə fe tè fɨ ə wùə vɛ ə echo ə è tè nyɨŋə etûə àkenyàm; nɨ̂ŋmè m̀kɨ̂m ə kwɨlə sènjyà sə ewìyn sə ghənə̂sè ə pɔ.