Read Mmen Etyə̂yn ə paynsêzè 2 Bible Online

Etyə̂yn ə paynsêzè 2 - Mmen bible

Etyə̂yn ə paynsêzè 2

¹“Nyàʼ ŋwàʼlè sê tsì ə̀ ndɛ ə̀ Fèzhə̀ ə Ɛfesùs nə, ‘Tom zɨnə ndò sê mi vɛ ə m kyi lì mɛ esɛ̀mbɛ ə mìə agho ekɔyn e twɔke kwiə ka əfètə̂ èfɨa vɛ ə fɛte è ngôl sə tomtə̂ sèlâm ətəyn za.

²M nyiə ke èfɨaʼ zɛ ə ò nyi mə o nə̀yn. M nyiə ke kə ò fɨ̂aʼà è tyaʼa è kol ə təmze. M nyîə ke nə ò zà va ghɨ ətəm e piə mɔŋ. M nyiə ke kepî nə o mɔ̀m ghɨ ghɛ ə ghənə pîə nə ghənə nyi əghɨtom ə Njisə̀sghè pîza vachi, ò vɛ ə ò fe kê nə ghənə nyi əghɨ akaŋghe.

³M ke ndô nə ò nyiə kolə ə̀təm, fe ètsôs, ve tsɨ̀ə kə nyî kûmə̀ mi, pɔ va.

⁴Pîza, m ghâmə̀ ghò kûmə̀ èghɛ èmɔ̀ʼ, ze nyi nə ò fɨnə kɔ̂ŋɔ̀ va mi kə ghàyn tè kɔ̂ŋɔ̀ sə shi.

⁵Kwàʼte ndom vɛ ə ò tè nyi ətəyn sə shi tsɔ̀fə kə ò pfɨ ə kə̀mnə̀ ə ghò ə sepi ə kɛsə̂ fɨaʼà kè kə ò tè fɨ̀aʼa səshi. Ə ò tàʼa nə̀yn nyi, ə m pəyn nji tsɨ̂sè kɛke nə àfɨa kɛ ə tomə lâm etuə ə̀təyn elùʼ vɛ ə ke nyi.

⁶Ghɛ echûŋ zɛ ə o nə̀yn nyi nə o pànə̀ èghɛ zɛ ə Nikòlatàynsè nə̀, m pɔŋɔ pânə̀.

⁷Ə̂ kyi pîndè tûŋneve, è və zɨtə̂ èghɛ zɛ ə Zuʼsə Fezhə̀sè pìə sê ndɛ sə Fezhə̀sè. Ə̂ nò zhi pîndè, ə m fo vəyn èndomve kə è kwɨl tam ə fekàʼ fə endam fɛ ə fe ndəmə ə Zhə̀fè afùʼ mtamke.”

⁸“Nyàʼ ŋwàʼlè sê tsì ə̀ ndɛ ə̀ Fèzhə̀ ə Sɨ̀minà nə: ‹Tom zɨnə ndò sê mi vɛ ə m nyi Zhə̀te fɨyn nyi kepî Kwùŋse, ə mi vɛ ə m tè kwu ə kɛsə̂ pə̂ endam.

⁹M nyiə ke tètsôs tɛ ə ò fe, m ke ndô nə ò nyîə fɨfə pîza səmɔʼ e nyi nə wùə eghaʼâ! M ke ndô ghɛ ə pi ghe ə ghɨ ghɨnə ə ghe kaŋa tyə̂nə̀ nə ghənə nyi ə ghɨ Njûsə̀ wâmnə̀ kûmə̀ ghàyn. Ghənə nyi əghɨ anɔ̀yn ə Satàynkè.

¹⁰Fekə! Kə ò nə fayn ètsôs vɛ ə ò njiə ndùə ətəyn. Ndə̂plè nə̂ nə ə kyi ghàyn yîghe ə ndəm ə ndɛ̂ chaʼ, ə̀ nyì ke emɔ̂m kə ze pə̂ sê ghàyn. Ghàyn nə fe ètsôs fu sə mtuʼ mghɨm. Mə ə nyi pî se zhwi ə ghàyn, ghàyn e samsə̂ kə ndò mi, ə m tə fo èndam zɛ ə ze tə mîə va sê ghàyn, ə̀ nyi àfɔ kayn kə tefɔ̀ynkè ə ke tyə̂ynə̀ nə ghàyn ə nò ə zhiə.

¹¹Ə̂ kyi pîndè tûŋneve, è və zɨtə̂ èghɛ zɛ ə Zuʼse Ŋwaʼase pîə sê ndɛ sə Fezhə̀sè. Ə̂ nò zhi nâʼàpî ndè, ə è tə tàʼa fe etsôs vɛ ə kòmte ekwuke pə̂ è vəynve.›”

¹²“Nyàʼ ŋwàʼlè sê tsì ə̀ ndɛ ə̀ Fèzhə̀ ə Pengamùm nə: ‹Tom zɨnə ndò sê mi vɛ ə m kyi fɛ̂ eghɔ̀ŋ etɔfə zɛ ə ze tɔfə pɨ̂asvè èpɨ̀a.

¹³M nyiə ke eluʼ vɛ ə ò ndamə ətəyn. Ò ndamə elùʼ Satàyn e saʼa efɔ̂yn ə vəyn fu. O tə fɛte tyə̂m àchuŋ ə gho ekyî epomə̂zè sê mi ə tàʼa ə mɛnê ezə zɨmze nâʼàpî etuʼ vɛ ə tè zhwi Antipàs ətəyn vɛ ə è tè ndàʼa tom kûmə̀ mi è təm ə vəynghe əkɨ̂m. Ə tè zhwi vəyn elùʼ vɛ ə satàyn ndamə.

¹⁴Pîza, m ghâmə̀ ghò ə mghɛlə̀ mə mɔ̀ʼɔmè. Ghɨə mɔ̀ʼɔ nyi fɛ ə ghò anɔ̀yn chûmtə̀ ezaʼlê ə Palàmzè. È və tə zaʼle Palàk kə è kàʼa è nəyn ə ghɨə Isìlâyghè nəyn pi mə ghənə zhiə èfɨa mə màʼtè sê fɨ̂aʼsèvè, è kɨsè mə ə nə̂ ə̀ghɛ ə nyələghe.

¹⁵Ò nyiə kyi kepî ə̀ghɨ mɔ̀ʼɔ ghe chûmtə̀ èzaʼlê ə Nikolatàynzè.

¹⁶Kə̀mne ə gho ghɛ pighe, ə̀ va za, ghafke fɨnə tyâfə̀ va kə m pəyn elùʼ vɛ ə ò nyi ətəyn ə m no ghɨ nə ghɛ è efɛ̂ eghɔ̀ŋ zɛ ə ze tè fɨ ə mì echo.

¹⁷Ə̀ kyi pîndè tùŋneve, è və zɨtə̂ èghɛ zɛ ə Zuʼse Ŋwaʼase pìə sê ndɛ sə Fezhə̀sè. Ə̂ nò zhi pîndè pi, ə m fo fɨazhiə e ndətə vîve se vəyn, e tɔŋtə̂ nə manà, ə m fɨyn fo èchi fɨfə zhîze se vəyn mə ə nyàʼ zə e fe zhîze ətəyn, wùə vîvè e ke va, ə̀ tsɛ̂ kə va wùə vɛ ə m fo chi ətəyn se vəyn.›”

¹⁸“Nyàʼ ŋwàʼlè sê tsì ə̀ ndɛ ə̀ Fèzhə̀ ə Tyàtilà nə: Ə̀ ghɨnə̀ nyi əghɛ mə ə̀ pi Va Fèzhə̀ vɛ ə shiə vəynghe nyi kə andəm ewûske za, gholə vəynghe e nyanə̂ kə nyî kə akas ə chûŋkè kə ə pûŋsè echi.

¹⁹M nyiə ke ə̀ghɛ ghɛ ə ò nyi mə o nə̀ynə gho tefɨ̀aʼ. M nyiə ke èkɔ̂ŋ zɛ ə o kyi, è ndom vɛ ə ò fɨ̀aʼà è təm ghɛghe əkɨ̂m, è kɨsè təm ə kolə ghɛ ə ò kyi ə ghò efɨ̀aʼ. M nə̂ ke nə ò nyîə fɨaʼà zôyn tsɛ̂ kə ò tè fɨ̀aʼa sə shi.

²⁰Pîza ə̀ zɨnə nyi eghɛ zɛ ə m ghamə̀ ghò sətəyn. O zà Njesepèl wùzhɔyn vɨ̂yn ə è tsà nə zhi nyi fɨ̀aʼtè nyi, tɔynə̂ ə vəyn ezaʼlê, è lesə̂ ə̀ghɨ ghɨmghe fɨaʼa nə ghənə ə nə̂ ə̀ghɛ ə nyələghe kɛsə̂ zhiə èfɨazhiə vɛ ə nyi mə ə fo sə efo sê fɨ̂aʼsèvè.

²¹Mə tè fo shîŋə̀kè nə è kwiyne təm ə vəynghe ə è za pisə vəynse pîza è ve è kwiynse.

²²Ò ke nə m nə̂ nə, ə è zaf nyìŋə̀ faŋ ekwì. M nə̀ fo ètsôs eghaʼâvè sê ghɨ ghɛ ə ghe tè nyiŋə è vəyn ashìŋə̀ kɛ ə ghənə tàʼa kwiynê ətəm ə ghənə̂ghè se pi nə zɨ̂yn ə ghənə tè nə̂ yîghə̀ vəyn.

²³M nə̀ zhwiə kəpî əghɔ vəynghe, ə ndɛ sə Fezhə̀ sekɨ̂m ke nə m nyi wùə vɛ ə m ke kwâʼtè tə ghɨ̀ tekɨ̂m è kɨsè ghɛ zɛ ə ghənə kyiŋə. M nə̀ ndaʼà nâʼàpî ndè kè eghɨ endom vɛ ə è tè fɨ̀aʼa.

²⁴Pîza, ghàyn ghɛ ə ghàyn faŋ ə Tyàtilà ə kwiynsê nə ghàyn chùmtə̀ va zaʼlê ə vəyn ze pi nə zɛ, ə tàʼa zaʼlə əghɛ ə satàyn ghɛ ə tɔŋtə nə əghɛ ə ndətə elɔŋəghe. M tsâ se ghàyn nə m nə̀ fɨnə fo va pɨ̀aʼà ə mɔ̀ʼɔke sê ghàyn.

²⁵M pìə kə nə, ghàyn fɛte kyî èpomə̂ zaynze se zaʼâ kə m kɛse pəyn.

²⁶Ə̂ nò zhi pîndè pi, nə̂ kə ə̀ghɛ ghɛ ə m kyiŋə se zaʼâ əkwùŋse, ə m fo tyaʼa sê vəyn ə è və saʼa tèndaʼ.

²⁷E nə saʼa əghɨ nə ghɨ̂ynə, mə è kyi va kosê esəyn sê ghənə; ə è nyayle ghənə kè kə ə nə̂ e nyaylə̂ sètɔ̀yn sə echaʼse. Tyaʼ kɛ ə m fi sê pɨ̀a vɨm nyì kepî àtyaʼ kɛ ə m nə̀ fo sê ghənə.

²⁸M tə fo kəpî fèlî fə pɨsə̀pɨsə̀fè sê wùə vɛ ə è nò zhi pi

²⁹Ə̂ kyi pîndè tûŋneve, è və zɨtə̂ èghɛ zɛ ə Zuʼsə Ŋwaʼase pîə sê ndɛ sə Fezhə̀sè.”