Read Mmen Etyə̂yn ə paynsêzè 20 Bible Online

Etyə̂yn ə paynsêzè 20 - Mmen bible

Etyə̂yn ə paynsêzè 20

¹Epàm ətəyn, mə fe tsì, è tso pə̂ ekwùtwəyn. È kyi àchɔʼ se chɔʼ epə zɛ ə ze lɔŋɔ tso ndùə kə ndô za fɨyn kyi chaʼ èghaʼâ ə və gho.

²È zə ko nyàm èkwə̀mnə zɛ ə tè tɔŋtə nə ndlangɔ̀yn ə è tè nyi mbam è mɨ za, e tɔŋtə̂ kəpî vəyn nə satàyn ə kolə zə̂yn sə sepìŋ kam.

³Tsì ə̀təyn ə màʼà tsosə̂ ndlangɔ̀yn ə̀təyn fu epə ə fɛtə̂ fâ ə ndə̀mə̀ chwìə fumə se nə̀yn nə ghɨ ke nə wùə kyi va se chɔʼ, ə zà nə è faŋ fu ə è zə fɨyn kyi va ndom se kɛsə lesê əghɨ ə tendaʼàghè se zaʼâ kə pìŋ nə sɨ̂nə̀ kam mi. Epàm ətəyn, tsì ə̀təyn kyi se chɔʼɔ za zə̂ynzè sə fendiŋə̀ fə ashìŋə̀fè.

⁴Mə ke fe mkyə̂ mə tefɔ̀yn mə ghɨ ghɛ ə ghe tè tsɨs ətəyn tè nyi ghɛ Zhə̀fè tè nyiə fo tyaʼke nə ghənə ə saʼa. Mə fɨnə fe àzɨlə ghɨ̀ ghɛ ə tè tsɔyn tuə ghənə̂vè kûmə̀ kə ghənə tè ndàʼa tom ə̀ Fèzhə̀ è kɨsè səmɔʼ zɛ ə Njisə̀s tè tyə̀n paynsê. Ghənə tè nyi əghɨ mə ə kwiynsê nə ngɨmnə va nyàm èpamə zɛ kɨ̀sə afɨâʼsè ətəynke, ə kwiynsə̂ nə kə̂ ə ndəm chwìə nyàm èpamə ə̀təyn ə ghənə echo àtu è kɨsè akɔyn. Ghənə ə tə kɛsê zômə̀ sè saʼa yî ghə̀ Klâys sə sepìŋ kam.

⁵Ghɨə mɔ̀ʼɔ ghəkɨ̂m ghɛ ə tè kwu, tə zômə̀ va se zaʼâ kə pìŋ nə sɨ̂nə̀ kam mi. Zɨnə mə nyi ezomə̀ ə shi zɛ ə ghɨ tə zòmə̀.

⁶Saŋnêzè è pɔsêzè nyì sê nyì sê ghɨ ghɛ ə paʼse sê zômə̀ əshi nə zɨ̂nə̀. Kwu zɛ ə ze nə̂ nə te ndu tepɛ̀ kyi va tyaʼke ə ghənə ətu. Ghənə tə nə̂ ə nyi ə̀ghɨ kɔʼsə nə eshyə̀ sê Zhə̀fè è kɨsè sê Klâys, ə Klâys yî ghə̀ ghənə saʼ sə sepìŋ kam.

⁷Ə̀ tə nə̂ ə nyi kə pìŋ nə sɨ̂nə̀ kam mî, ə fɨse Satàyn fɛ və ndɛ ə̀ chaʼ,

⁸ə è fɨ ndu ə è kyiŋse ghɨ ə te ndaʼ tə mbite tekɨ̂m. Zə tə endaʼ nə tɨ̂nə̀ nyi Ngôgn è Mangòk. Satàyn tə zûŋtə̀ əghɨ ətendaʼ nə tɨ̂yn elùʼ emɔ̀ʼ kə ghənə no. Kɔ̂yn ə ghənə̂kè tə nə̂ ə kə tsɨ̀ə nyiə kə ashishi etipìə tsô.

⁹Ghənə ə chyàsə̀ ndûə kə mbi èkɨ̂m, ə kyìŋə̀ nga eluʼ vɛ ə ghɨə Fezhə̀ghè nyi ətəyn mə za nyi tɔ̂ŋ èghaʼâ zɛ ə Zhə̀fè kɔ̂ŋə̀. Pîza wusve ə ndò ekwùtwəyn ə tso pə̂ zhwitə̂ ghənə.

¹⁰Ə ke njìə ndə̂plè zɛ ə è tè kyìŋse ghənə ə màʼa tsose elùʼ wusve e pɛ̂ ətəyn è fɨake mə ke lɛ̂ pâŋə̀ ndò e tɔŋtə̂ nə sɔlfɔ̀. Ə̀ nyi eluʼ vɛ ə tè màʼa tsosê nyàm èpamə zɛ è kɨsè fɨ̀aʼtè àkaŋ zɛ. Nâʼà ghənə əkɨ̂m tə zɨə m̀lùŋtsuŋ fumə èchwì è tuʼve nâʼà kə ghè tə ghayn.

¹¹Mə ke fe fekyə̀ fə efɔ̀yn fe eghâʼafè, fe fɨfə ndò è wùə vɛ ə è tsɨs ətəyn. Kwutwəyn e chike ə saŋə ə və shi, wùə vîvè ə tàʼa kɛsə tyəmə fe ghənə.

¹²Mə fɨnə fe əghɨ mə ə tə kwutê, yîghe nyi əghɨ ə ghaʼlə̂ghè, yîghe nyi əghɨ ə tətə̂ghè, ghənə e tyəm fu ashi fekyə̀ fə efɔ̀ynfè. Ə ŋaʼsə̂ se ŋwàʼlè ə fɨnə ŋaʼsə̂ ŋwàʼlè zhîzè, ə nyi ŋwàʼlè ə̀ghɨ ə ndaməghe, e sè naynə̂ sè ŋwàʼlè sətəynse, saʼa kə ghənə əghɛ ghɛ ə ghənə tè nə̂ kè kə tè nyàʼ fumə ə seŋwàʼlè.

¹³Ghɨ ghɛ ə ghe tè kwute enjwì ə fengwaŋve ə ndùə nə Zhə̀fè saʼ ghənə. Ghɨə ghɛ ə kwuze è ndaʼ əghɨ ə kwuəze tè kyi ə tə fɨ ndu kepî nə Zhə̀fè saʼ ghənə. Zhə̀fè ə tè saʼ ghənə mə fe chûmtə̀ kə èghɛ zɛ ə nâʼàpî ndè tè nə̂.

¹⁴Ə màʼà tsosə̂ èkwu è ndaʼ ə ghɨ̀ ə kwuəze elùʼ vɛ ə wusve tè pɛ ətəyn. Luʼ vɨnə wus vɨnə pɛ ətəyn nyi ekwu zɛ ə ze nə̂ nə te ndu tepɛ̀.

¹⁵Nâʼàpî ndè vɛ ə zə vəynze tè va əfètə̂ ŋwàʼlè ə̀ghɨ̀ endamə nə ghɛ, ə màʼà tsosə̂ vəyn elùʼ vɛ ə wusve tè pɛ ətəyn.