Read Mmen Etyə̂yn ə paynsêzè 21 Bible Online

Etyə̂yn ə paynsêzè 21 - Mmen bible

Etyə̂yn ə paynsêzè 21

¹Epàm əghɛ nə ghɨyn, mə fe ekwùtwəyn efeve è chi ə feke; kûmə̀ nə kwùtwəyn ə shive è chi ə shike se nyi mə və tè saŋ, njwî ə fengwaŋve ə saŋə kəpî.

²Mə ke fe kə Zhə̀fè tiynsê Tɔ̂ŋ e Ŋwaʼa mə za nyi Njèlusalɛ̀m èfe, è ze tso pə̂ ekwùtwəyn mə ə fɛte lafsê zə̂yn kə ə lafse zhwîə ndom nə è ndu fe ndom ə̀ vəyn.

³Mə fɨnə zɨə kyə̀ è tɛ zhîzè kə è fɨ pə̂yn əfekyə̀ fə efɔ̀yn fɛ̂, è zə pìə sê mi nə, “Fekə, Zhə̀fè ndamə yî ghə̀ ghɨ zôyn. Fe nə nyi yî ghə̀ ghənə, ghənə e nyi ə̀ghɨ vəynghe. Zhə̀fè è ngɨŋ vəyn nə nyi yî ghə̀ ghənə, nyi Fèzhə̀ fə ghənə̂fè.

⁴Fe tə zə̂sə̀ m̀shi nâʼà m̀kɨ̂m ə ghənə shi. Kwuze tə pə̂ ə ze ə fɨyn va, tɨ̂l ətəmze e va, chîze va, fɨake nə fɨnə zafə va wùə kûmə̀ nə ghɛ ə mɨ ghə tsɛ̀.”

⁵Wùə vɛ ə è tè tsɨs əfekyə̀ fə efɔ̀yn nə fɛ ə ke pì nə, “M nə̀ nə̂ ə ghɛghe əkɨ̂m kɛse ə nyi ke ə̀ fe.” È və fɨnə pìə sê mi nə, “Nyàʼ ghɛ nə ghɨ̂nə̀. Nâʼàpî ndè kàʼa è samse ghəynghe kûmə̀ nə ghe nyi səmɔʼ.”

⁶È və pìə kəpi sê mi nə, “Mə nə̀yn ghɛ ghɨ̀nə̀ ə̀kɨ̂m! M nyi Alfà fɨyn nyi Òmengà, ə zhə̀te, è kwùŋse. Nâʼàpî ndè vɛ ə pfɨ̀ŋ m̀mò zuʼsə vəyn, m nə̀ fo èndom nə è mɨ môm ə tɔŋ m̀mò zɛ ə è fo mô mɛ ə m̀ fo ndamze ndɔ̀ʼɔ è ndaʼ.

⁷Ə̀ nò zhi nâʼà pîndè, m fo fɨa vɨ̀nə sê vəyn, m mə nyi Fezhə̀ fə vəynfe, è ve nyi vayn vɨ̂m.

⁸Pîza sê ghɨ ghɛ ə ghe fànə è ghɨ ghɛ ə ghe tàʼa pomə sê mi, è ghɨ ghɛ ə ghe nə̂ ghɛ ə kwənəghe, è ghɨ ghɛ ə ghe zhwiə ghɨghe, è ghɛ ə ghe nə̂ ghɛ ə nyələghe, è ghɨ ghɛ ə nə̂ ghɛ pfɨtəghe, è ghɛ ə ghe ngɨmnə fɨ̂aʼsèvè, è ghɨ ə wamə nâʼà ə̀kɨ̂m, ə tə ndə̂mə̀ ghənə elùʼ vɛ ə wusve pɛ ətəyn è fɨa kɛ ə ke lɛ̂ pâŋə̀ za e tɔŋtə̂ nə sɔlfɔ̀. Kwu nə zɨnə mə nyi zɛ ə ze tə nə̂ nə te ndu tepɛ̀.”

⁹Tsì èmɔ̀ʼ əfètə̂ sètsì sə Fezhə̀ sɛ èsɛ̀mbɛ ə se tè kyi kwaŋ vɛ èsɛ̀mbɛ mə ə lwiynse lɨ̀mè ətəyn za, ə̀ nyi mə̂ynmè ə m̀ pə̀ ètsôs tekwəmnə tekwuŋsə tɛ èsɛ̀mbɛ, ə pə̀ pìə sê mi nə, “Pə, m tyən zhwîə ndom sê ghò vɛ ə è nyì se njiə Va Ndzè.”

¹⁰Zuʼse Ŋwaʼase ə fɨnə njiə ə mì ewìyn, tsì ə̀təyn ə njìə kɔʼɔ è mi etùə pfɨ̀yn zhîzè, è tyàfə̀ kə nyî, ə tyə̀nə̀ Njèlusalɛ̀m sê mi, mə fe tɔ̂ŋ èghaʼâ ə̀ Fèzhə̀ è tso pə̂ ekwùtwəyn mə è ndò sê Zhə̀fè.

¹¹Tɔ̂ŋ eghaʼâ nə zɨnə tè nyiə panə è paynze, ze ngə̂sê nyi mə ze ndo sê Zhə̀fè. È tè panə kə nyi kə echi enyaynəze, panə, payn ətəynze e liŋə, pâŋə̀, tsɔ̂fə̀ kə nyî, kɛsə̂ zo kə kə anâynè ə fe tɔynə.

¹²Tɔ̂ŋ ə̀təyn e kyi mbàyn ètɛ zhîzè, è tyâfə̀ kə ə pom kyiŋ nga, è kyi ə̀cho njò sepɛ̀, nâʼàpî ècho èkè e kyi tsì ətəyn kə è tsɨ̀ŋnə̀. Cho ə se mbàyn ə təynghe tè nyi mə ə nyàʼ zə ə tetàŋ tə Isìlâytè ətəyn njò sepɛ̀. Nâʼàpî ècho èkè e kyi èzə emɔ̀ʼ.

¹³Mbàyn nə zɛ tè kyi əcho ə̀ ta apàs kɛ ə cho ezhwi sa ətəyn, kyi ə̀ ta apàs Ekwùkè, kyi ə̀ ta apàs etyə̀kè, kyi ə̀ ta apàs kɛ ə cho ezhwi sâŋà ətəyn.

¹⁴Mbàyn ə̀ tɔ̂ŋ èghaʼâ ə̀təyn tè nyi mə ə pɛ etûə ə̀chi ə ghaʼlə̂ echi ə ndɛve njò sepɛ̀. Zə əghɨ̀ ə tom ə Vâ Ndzèghè tè nyi mə ə nyàʼ etûə ə̀chi nə ghɛ, nâʼàpî èchi èkè è kyi ezə emɔ̀ʼ.

¹⁵Tsì zɛ ə è tè wàmnə̀ sê mi tè nyiə kyi fèmbàŋ fîfe e fɨaʼà èfɨa ətəyn mə ə fɛte è ngôl. Mbàŋtə̀ fə təynfe tè nyi nə ə fɨaʼse tɔ̂ŋ èghaʼâ ətəyn, è cho ətəynghe, è mbàyn ə̀ tɔ̂ŋ nə zɛ.

¹⁶Tɔ̂ŋ nə zɛ tè nyi pɨ̂as ətəynve ekɨ̂m e nyi ke èghɨ. Ghaʼ ətəynze tè nyi kepî kə etyâf ətəynze. Tsì nə zɛ ə fɨ̀aʼà tɔ̂ŋ ə̀təyn è mbàŋ ə̀ vəyn nə zɛ, e tè tyàfə tɛ̂ sə sèmâyl kam è ghɨte tâyn, tyâfə̀ kɔʼɔ kepî za.

¹⁷Tsì ə̀təyn ə fɨ̂aʼsə̀ kəpi àfôf ə mbàyn ətəynke ə̀ nyi sètàm mghɨm tufə njòse tufə chûmtə̀ endom vɛ əghɨ fɨ̂aʼsə̀ fɨave ətəyn.

¹⁸Wiynə mbàyn ətəyn tè nyi mə ə pom è chi yîghe, ghe liŋə, pâŋə̀ mə ə tɔŋtə̂ nə Njaspà, nâʼàpî ghè fu ə tɔ̂ŋ e nyi mə ə fɛte è kàyntè ngôl, e panə tɔynə̂ kə kə anâynè.

¹⁹Chi ə ndɛ kɛ ə tè pɛ mbàyn ə̀təyn etûə ə̀təyn tè nyi mə ə lafsê è kyì tə chîə chûŋghè əkɨ̂m. Chi ə shi tè nyi echi mə ze liŋə ndò pâŋə̀ e tɔŋtə̂ nə Njaspà, zə mɔ̀ʼɔze nə te ndu tepɛ̀ kyaʼà liŋə ndò, e tɔŋtə̂ nə, sàfayà, zəmɔ̀ʼɔze nə te ndu teta e kyi tèkyì techwìəte tekɨ̂m e tɔŋtə̂ nə, àngatè, zəmɔ̀ʼɔze nə te ndu tekyàʼ e tɔŋtə̂ nə, emelà,

²⁰zəmɔ̀ʼɔze nə te ndu tetâyn mə ze pâŋə̀ ndò e tɔŋtə̂ onìk, zəmɔ̀ʼɔze nə te ndu tetufə e nyi kànelìyà, zəmɔ̀ʼɔze nə te ndu tesɛ̀mbɛ̂ mə ze kyâʼà liŋə ndûə ndò e tɔŋtə̂ nə kɨ̀lisolìt, zəmɔ̀ʼɔze nə te ndu tefamə e kyi tèkyì tə chwìəte te tsɨ̂ə e tɔŋtə̂ nə pelîl, zemɔ̀ʼɔze nə te ndu tepoləmɔ̀ʼ e lɛ pâŋə̀ ndò e tɔŋtə̂ nə topàs, zəmɔ̀ʼɔze nə te ndu teghɨm e tɔŋtə̂ nə nyi kɨ̀lisolàs, zəmɔ̀ʼɔze nə ghe ndu njò èmɔ̀ʼ kyaʼà ndûə kə felamâs e tɔŋtə̂ nə, njasìn, zəmɔ̀ʼɔze nə ghe ndu njòse pɛ̀ e nyi ametìs.

²¹Ə tè nji əshi ə tefɨa ekɛ etɛve njò sepɛ̀ ə fɛtə̂ ə̀cho ə mbàyn ətəynghe ətəyn eghɨm njò sepɛ̀. Shi efɨa ekɛ etɛze emɔ̀ʼ nâʼàpî sê cho ə mbàyn èkè. Ndom e twɔ vɛ ə ve tè nyi fu ə tɔ̂ŋ èghaʼâ tè nyi mə ə fɛte è kàyntè ə̀ ngôl, è panə tɔynə̂ kə nyî kə anâynè.

²²M tè paʼà fe ndɛ̂ ètsə̀mə fumə ə tɔ̂ŋ èghaʼâ kûmə̀ nə ndɛ̂ ètsə̀mə fu tè nyi ke nâʼà Pɛ̂pɛ Zhə̀fè, ə Pɛ̀ àtyaʼ akɨ̂m, è ngɨŋ ə vəyn yî Va Ndzè.

²³Ə̀ tè fo chîə va chwì kɨ̀sə njɔŋ paynze fumə ə tɔ̂ŋ èghaʼâ, kûmə̀ nə ə̀ tè panə epomsê ə Fezhə̀zè ətəyn, Vâ Ndzè e panə kəpî ətəyn kəpiə ə̀ nyi lâm.

²⁴Ghɨ te ndaʼ ghəkɨ̂m tə nə̂ ə kwiə epayn nə zɨ̂yn, ə fɔ̂yntə tə mbite nji ghaʼə ə ghənə̂zè ə pəyn è zəynze ətəyn.

²⁵Ə tə nə̂ ə kyîŋə̀ va cho ə mbàyn nə ghɛ kûmə̀ nə tuʼve tə nə̂ ə ve fɨnə chîə va fumə.

²⁶Ndaʼ tekɨ̂m tə njìə èfɨa ə ghənə̂ ve chûŋvè, è ghaʼ tə ghənə̂tè ə pəyn è təynte ə tɔ̂ŋ èghaʼâ nə zɨ̂yn.

²⁷Pîza fɨake tə njiə va əfètə̂ tɔ̂ŋ èghaʼâ nə zɨ̂yn, mə ke zo va. Wùə vɛ è nə̂ ghɛ eliŋə kɨ̀sə wùə àkaŋ tə njiə va ətəyn. Ə̀ tə njiə kə ə̀ghɨ ghɛ ə nyâʼ zə ə ghənə̂ghè ə ŋwàʼlè èndamə ə̀ Va Ndzè famə ə tɔ̂ŋ èghaʼâ.