Read Mmen Etyə̂yn ə paynsêzè 22 Bible Online

Etyə̂yn ə paynsêzè 22 - Mmen bible

Etyə̂yn ə paynsêzè 22

¹Tsì ə̀təyn ə ke chwìtè ə tsò èghaʼâ m̀mò sê mi zɛ ə è fo ndamze, mô mə tə̂ynmè e nyaynə̂ kə anâynè ə ke panə tɔynə, mə m̀ fɨə pə̂ etyə̂ ə̂ fekyə̀ fə efɔ̀yn fɛ ə Zhə̀fè tsɨs ətəyn yî Vâ Ndzè,

²tso pə̂ əfètə̂ èndom etwɔve ə tɔ̂ŋ èghaʼâ. Nâʼàpî àpâs ə tsô èghaʼâ àkè tè nyiə kyi fèkaʼ fɛ ə fe fo ndamze, muə m̀tam shîŋə̀tè eghɨm njò sepɛ̀ ə pîŋ mə fe za muə shîŋə̀ze emɔ̀ʼ nâʼàpî ə njɔŋ èkè. Sɛ̂ tə mkàʼ tə təynte tè nyì sə̂ tsuʼə ə̀ghɨ ə tèndâʼà ghè ətəyn.

³Wùə vîvè kɨ̀sə afɨa kyîke ə Zhə̀fè nyi mə fe ə ti ndi se vəyn tə nə̂ ə ke ə fɨyn va fumə ə tɔ̂ŋ èghaʼâ. Kyə̂ fə efɔ̀yn ə Fezhə̀vè, è fə efɔ̀yn ə Vâ Ndzèvè tə nə̂ ə fe ə nyi ə tɔ̂ŋ èghaʼâ, ə ghɨ ə Fezhə̀ghè ə ngɨmnə̂ vəyn.

⁴Ghənə tə fe èkyâʼ ə Fezhə̀zè shwi m̀shwi, ə zə ə vəynze ə nyi mə ə nyàʼ ə ghənə echo àtu.

⁵Tuʼ echive tə nə̂ ə ve ə fɨyn va, ə ghənə ə kyiŋə pî va lâmsè kɨ̀sə chwì èpanə, kûmə̀ nə Pɛ̂pɛ Zhə̀fè tə nə̂ ə fe ə nyi èpayn ə ghənə̂zè, ə ghənə ə saʼa kə tefɔ̂yn nâʼà kə ghè tə ghayn.

⁶Tsì ə̀təyn ə ke pì sê mi nə, “Ghɛ ghɨ̀nə̀ nyì səmɔʼ, nyi kə samse ghəynghe. Pɛ̂pɛ Zhə̀ fɛ ə fe fo Zuʼsə vəynse sê fɨ̀aʼtèsè, ə tom tsì ə̀ vəyn nə è tyəyn sê ghɨə vəynghe fɨaʼa ghe ghɛ zɛ ə ze kyi se kwùʼə kyàyn.”

⁷Njisə̀s ə pìə nə, “Ghàyn zɨte, M kwuʼə̀ pə̂ kə zôyn! Saŋnêzè nyì sê nâʼàpî ndè vɛ ə è ndə̀m ghɛ ghɛ ə ŋwàʼlè zɨ̀nə tsàyn nə ze nə̀ kyânə̀.”

⁸Ə mi Njɔyn ə tə zɨ ə fe ə̀ghɛ ghɨ̀yn nâʼà ə̀kɨ̂m. Ə pə̀ kə m zɨ, ə fe mɨ̂sə̀ ghəynghe, ə tɨmə ə̀ngwuʼ ə tsì zɛ əshi ə è fə tyəyn ghəynghe sê mi se ngɨmnê ə zə̂ynzè.

⁹Pîza è zə pìə sê mi nə, “Kə ò mɔm! M nyi kepî wùə efɨaʼa kə ghò, è ghɔnɛghè mə za nyi sefɨ̀aʼtè, è ghɨghe əkɨ̂m ghɛ ə tè ndə̀mə ghɛ zɛ ə ze nyi fâ ŋwàʼlè, pɨ̀le ngɨmne Zhə̀fè.”

¹⁰È zə ke pìə sê mi nə, “Kə ò ndəte ghɛ ghɛ nyâʼ fâ ŋwàʼlè nə ghe nə̀ kyânə̀, kûmə̀ nə shîŋə̀kè tɨmsə̂ kə nyi kə ghɛ nə ghɨnə mə kyayn.

¹¹Nâʼàpî ndè vɛ ə è nə̀ pi ndu ke èshike sə̂ nə̂ pi, ə nâʼàpî ndè vɛ ə è nə̀ ghɛ ə liŋghe, ndu ke èshike sə̂ nə̂ ə̀ghɛ ə liŋghe, nâʼàpî ndè vɛ ə è nə̀ chùŋ, ndu ke èshike sə̂ nə̂ chùŋ, nâʼàpî ndè vɛ ə è nyi èŋwaʼe ndu ke èshike sə̂ nyi èŋwaʼze.”

¹²Njisə̀s ə pìə nə, “Ghàyn zɨte, m kwûʼə̀ pə̂ kə zôyn! Ə m piə m pə̂ ndò, ə m pəyn èmaʼte zɨmze əgho, ə m maʼte nâʼàpî ndè kè eghɛ zɛ ə è nyi mə è və nə̀yn.

¹³M nyi Alfà fɨyn nyi Òmengà, Ashi è Kwùŋseke, ə Zhə̀te è Mɨ̀se.”

¹⁴Saŋnêzè nyì sê ghɨ ghɛ ə ghe ndə̂mə̀ lwɔ̂ŋ ə vəynve, kə ghənə ə kyi èndom se zhi ə fekàʼ fə endaməfe, è kɨsè se tsɛ̀ echô mbàyn se njiə ndù ə tɔ̂ŋ èghaʼâ.

¹⁵Pîza ghɨ ghɛ ə ghe nyi əpɨəyn ə tɔ̂ŋ èghaʼâ nyi ghɛ ə nyi mə ə nə̀yn ghɛ ə kwəmnəghe kə; ghɛ ə nə̂ ghɛ ə pfɨyntəghe, è ghɛ ə nə̂ ghɛ ə nyələghe, è ghɛ ə ghe zhwiə ghɨghe, ghɛ ə ghe ngɨmnə fɨ̂aʼsèvè, è ghɛ ə wamə kwaŋve, nə̂ ə̀ghɛ akaŋghe.

¹⁶“Mi Njisə̀s ə tom tsì zɨ̂mzè nə è ndaʼa ghɛ ghɨ̀nə sê ndɛ sə Fezhə̀sè. M nyi wùə ètɔ̀ŋ ə ndɛ ə Ndàfîtzè, nyi fèlî fe panə fə pɨ̂sə̀ pɨ̂sə̀fè.”

¹⁷Zuʼse yî Zhwìə ndom pi nə, “Pə.” Naʼapi ndè vɛ ə è zɨ ghɛ zɨ̂nə̀ kyi kepî ndò se pì nə, “Pə.” Ə pfɨ̀ŋ m̀mò zuʼsə nâʼàpî ndè e kyiŋə se mɨ mmo, è və pə̀ fiə m̀mo mɛ ə m̀ fo ndamze, ə mɨə səndô.

¹⁸M fo fɨ̀as nâʼà sə ŋaŋ se nâʼàpî ndè vɛ ə è zɨ ghɛ ghɛ ə tsâyn fâ ŋwàʼlè nə ghe tə kyânə̀: Ə̂ paʼse nâʼàpî ndè ghɛze ətəyn, ə Zhə̀fè tə paʼsê sê wùə ə̀təyn tsôs te kwəmnə tɛ èsɛ̀mbɛ ə nyi mə ə təynse fa ŋwàʼlè.

¹⁹Mə ə̀ fàftè nâʼàpî ndè ghɛ ghɛ ə nyi mə ə tsàyn fa ŋwàʼlè nə ghe tə kyanə̀, ə Zhə̀fè tə fi tsɨsè kə vəynke nə atam ə fekàʼ fə endamfe, è kɨsè luʼ ə vəyn ə tɔ̂ŋ èghaʼâ èŋwaʼa zɛ ə nyi mə ə təynsê fa ŋwàʼlè.

²⁰Vɛ ə è tsàyn kə ghɛ ghɨ̀nə nə tè kyayn, pi nə, “E nyi səmɔʼ. M pə̂ kə zôyn!” ə zə nyi ke zamə. Pə ə Pɛ̂pɛ vâsvè Njisə̀s!

²¹Ə Pɛ̂pɛ Njisə̀s tyən fùʼ ə vəynke sê ghɨə fe Zhə̀ghè. Ə zə nyi ke zamə.