Read Mmen Etyə̂yn ə paynsêzè 4 Bible Online

Etyə̂yn ə paynsêzè 4 - Mmen bible

Etyə̂yn ə paynsêzè 4

¹Ə̀ tè nyi kə ghɛ nə ghɨnə tsɛ, mə kɛsə̂ naynə̂ ə mì əshi, ə fe cho ə ndɛve ə chwìə ekwùtwəyn. Kyə̀ zɛ ə m fə zɨ è ze wâmnə̀ se mi za, kô kə esɔŋ ə tɔŋɔ pìə se mi nə, “kɔʼ pə̀yn fâyn ə m tyəyn ghɛ sê ghò mə ze kyi se kyàyn ezhoghɛ ə ghɛ ghɨ̀nə nə̀ tsɛ̀.”

²Kè nyi, Zuʼse ə Fezhə̀sè ə njiə ə mì ewìyn, mə fe fèkyə̂ fə efɔ̀ynfè ekwùtwəyn, wùə e tsɨs ətəyn,

³nyanə tsɔ̂fə̀ kə nyî kə sengɔ̀ʼ sechûŋ shîse ə tɔŋtə nə Njaspà è Kanilyà, mə kòəngyəynze ə kyɨ̀ŋ nga kyə̂fə ətəynfe pɔŋɔ nyanə tsɔ̂fə̀ kə nyi.

⁴Kyə̀ mə tefɔ̀yn mîmè e nyi m̀ghɨm pɛ̀ njòse kyàʼ mə m̀ mə kyɨ̀ŋ ka kyə̂ fə efɔ̀yn nə fɛ, chəʼse tsɨs ətəyn mə sə màʼ ndzɨse fɨfə̂sè ə sò efɔ ə tefɔ̀ynvè mə ə fɛte è ngôl.

⁵Gholze e mɨ̂anə̀, kô, pɨatə̂ pə̂ fumə ə fekyə̀ fə efɔ̀ynfè. Tɔ̂s shîse e panə pə̂ fumə ashi ə fekyə̀ fə efɔ̀ynfè, ə̀ nyi sèzuʼ sə Fezhə̀sè esɛ̀mbɛ.

⁶Ə̀ tè nyi kepî ashi fèkyə̂ nə fɛ, fɨake e nyi fu kyaʼà kə ènjwî ə fengwaŋve panə tɔynə̂ kə echi zhîze ə tɔŋtə nə klistà. Fɨa endaməve ekwàʼ tè nyi mə ve ə kyìŋ ka kyə̂ fə təynfe, nâʼàpî kɨynke nyi ə fètəyn fètəyn pɨ̂as ətəynve ekwàʼ. Kyi ə̀shi kè wiynve kɨ̂m, kyi ə shi, kyi kepî epàm.

⁷Fɨa endamə ə shike tè kyàʼa kə pìkəm, komtèkè kyaʼà kə mbɔ̀ŋə̀ titiyà, ta e kyi èkyâʼ, ze nyi kə ekyâʼ ə wûəzè, ke kwûŋsə̀ ke nyi kə ambùʼə̀ kə ke wûlə̀.

⁸Fɨa endamə nə vɨnə tè nyi, nâʼàpî kɨ̂yn e kyi tèghɛ tètufə, kyi ə̀shi wiynve ekɨ̂m, nâʼàpî ə ghənə etîə tèghɛ̀. Ve tè zhəmə senjàŋ shîŋə̀ tekɨ̂m, zhəmə èchwì zhəmə etuʼve pìə nə, “È nyi Èŋwaʼe, È nyi Èŋwaʼe, È nyi Èŋwaʼe, Pɛ̂ mə nyi Fezhə̀ pɛ̀ àtyaʼ akɨ̂m. È tè nyiə nyi, è nyì ndô zôyn fɨyn nyi se tə pə̀yn!”

⁹Fɨa endamə nə vɨnə ekwàʼ tè zhəmə senjàŋ, pomsə̂, ngɨmnə̂, fo àzɔ̀ŋnè sê wùə vɛ ə è tsɨs əfekyə̀ fə efɔ̀yn nə fɛ, ə vəyn vɛ ə è ndamə sə teshɨ̀ŋə̀ tèkɨ̂m. Nâʼàpî ashìŋə̀ àkè ə ghənə nə̂yn nyiəmə,

¹⁰chəʼ sɛ mghɨm pɛ̀ njòse kyàʼ ə tɨmə ə̀ngwuʼ ə wùə vɛ əshi ə è tsɨs əfekyə̀ fə efɔ̀ynfè za ngɨmnə̂ vəyn vɛ ə è ndamə sə teshìŋə̀ tekɨ̂m. Ghənə tè màʼà kepî fɔ ə ghənə̂ və tefɔ̀ynvè ashi ə fèkyə̂ fə efɔ̀yn nə fɛ, pìə nə,

¹¹“Pɛ̂pɛ vâsvè, è Zhə̀ Fasfe, ò nyiə kwəynə̂ se kyi epomsê, è kɔʼsêzè è tyaʼke, kûmə̀ nə ə̀ pom ghô fɨave ekɨ̂m, mə tɔynə̂ ə ghò ekɔ̀ŋ, ə pomə vəynve ə nə̀ nə və ndamə.”