Read Mmen Etyə̂yn ə paynsêzè 5 Bible Online

Etyə̂yn ə paynsêzè 5 - Mmen bible

Etyə̂yn ə paynsêzè 5

¹Mə fe ŋwàʼlè èngɛ ə fètə̂ àgho ekɔyn etwɔ wûə vɛ ə è tè tsɨs ə fekyə̀ fə efɔ̀ynfè. Ə tè nyi mə ə nyàʼ fumə ə ŋwàʼlè pɨas vekɨ̂m, ə ngɛ̂, ə ndàtə̀ è lɛve esɛ̀mbɛ.

²Mə fe tsì è kyi àtyaʼ se pì eghɛ nə ze kyayn, è ndâʼà è kyə̀ ètɛ nə, “Ə̀ nyì nâʼà ndè ə è kɔʼnə̂ kwənə se zhòm alɛ kɨ̂nə̀ è kɨsè se zhə̀yn ə ŋwàʼlè èngɛ zɨ̂nə ə?”

³Pîza wùə e va ekwùtwəyn, va ə chi, va endaʼ ə ghɨ ekwuəze kə è tè kàʼa ə è zhəyn ŋwàʼlè èngɛ ə̀təyn ə è naynə fe eghɛ zɛ ə ze nyi əfètə̂ ə̀təyn.

⁴Mə chîə nâʼà àchûŋ kûmə̀ nə wùə tè kwəynə va se zhə̀yn ə ŋwàʼlè èngɛ ə̀təyn kɨ̀sə se fe eghɛ zɛ ə ze nyi əfètə̂ ə̀təyn.

⁵Chəʼ emɔ̀ʼ fumə əfètə̂ sèchəʼ nə sɛ mə ə ke pì sê mi nə, “Kə fɨyn chi, Fekə, pìkəm ètàŋ ə Njondàzè, mə za nyi vâ èsas ə ndɛ ə Ndàfîtzè ə nò zhi sè nyi mə è kàʼa è zhom lɛ ətəynve èsɛ̀mbɛ se zhə̀yn ə ŋwàʼlè èngɛ ə̀təyn.

⁶Mə ke fe Va Ndzè è ve tyəm ə fètəyn fètəyn ə fəkyə̀ fə efɔ̀ynfè, mə fɨa endamə vɛ èkwàʼ è chəʼ sɛ ə kyɨ̀ŋ nga Va Ndzè ə̀təyn. Va Ndzè ə̀təyn tè kyaʼà kəpi nyi mə ə zhwi zə̂ynzè. È tè kyi sendɔŋ èsɛ̀mbɛ è shiə ə sɛ̀mbɛ, ə nyi sèzuʼ sə̂ Fezhə̀sè esɛ̀mbɛ kə ə tom chike akɨ̂m.

⁷Va Ndzè ə̀təyn ə ndùə fiə ŋwàʼlè èngɛ ə̀təyn ə wùə vɛ agho ə nə̀zhiəke ə è tè tsɨs ə fekyə̂ fə efɔ̀ynfè.

⁸È və fiə pə̀ pîə ashìŋə̀ àkè, fɨa endamə vɛ è kwàʼ è chəʼ sɛ mghɨm pɛ̀ njòse kyàʼ ə tɨmə ə̀ngwuʼ ə Vâ ndzè ə̀təyn əshi. Naʼapi ndè e kyi ènduŋ è kaŋa mə ə fɛte è ngôl, è endiŋze ə ətəyn mə zə lwiyn. Ndiŋ ətəynze tè nyi tetsə̂m tə ghɨə Fezhə̀.”

⁹Ghənə tə fɨyn zhəm njàŋ e fe, è pìə nə: “O kwəyn se fiə ŋwàʼlè èngɛ, è kɨsè se zhòm alɛ se ŋaʼsə zə̂ynzè, kûmə̀ nə ə tə zhwi gho, ndə̂m mɛmè ə zhɔnə ètu əghɨ̀vè ə fo se Zhə̀fè əghɨ mə ə fɨ pə̂yn ke tâŋ tekɨ̂m, wàmnə̀ tèwâmnè tekɨ̂m, ə fɨə pə̂ ndaʼ tekɨ̂m, ə fɨə pə̂ kəpî luʼ tekɨ̂m ə nyi əghɨ ətendaʼ tèkɨ̂m ə mbi, kyaʼà tèkyaʼ tèkɨ̂m. Ò tè zhɔyn àtuə ghənə̂kè è ndə̂m mɛ̂m, ə kɛsə̂ fo ghənə sê Zhə̀fè.

¹⁰O nə̀yn ghənə e nyi əghɨ elùʼ efɔ̀ynvè mə ghənə nyi əghɨ ə kɔʼsə nə eshyə̀ ghɛ ə fɨaʼà sê Zhə̀fè mə ghənə tə saʼa èfɔ̂yn ə mbize.”

¹¹Mə ke piə m naynə̂ ndò ə zɨə sèkyə sə setsìsè, kamse etûə sèkam, è mâlàmsè. Ghənə tè nyi mə ə tyəm ə kyìŋə̀ nga fèkyə̂ fə efɔ̀yn fɛ, paʼsə̂ è fɨa endamə vɛ è kwàʼ è chəʼ sɛ.

¹²Ghənə tè zhəmə njàŋ nâʼà è kyə̀ e tɛ, pìə nə: “Va Ndzè vɛ ə tè zhwi nyiə kwəynə̂ se fi atyaʼ, è ghaʼze, è tɔf eghaʼâze, è tyaʼ ewìynke, è kɔʼsêzè, è pomsêzè, è tsîtèzè!”

¹³Mə zɨə nâʼàpî àkè kɛ ə pom ndô kəynke ekwùtwəyn è kɨsè etyə̂ m̀chi, è kɨsè əfètə̂ ènjwì ə fengwaŋve, paʼsə̂ è fɨa endaməve ekɨ̂m ə ghənə ə fètəyn e zhəmə njàŋ pìə nə: “Sê vəyn vɛ ə è tsɨs ə fekyə̂ fə efɔ̀ynfè è kɨsè sê Vâ Ndzè, ə nyi ètsîtè, è kɔʼsêzè, è pomsêzè, è kɨsè faŋkoze, ə ze ə nyi ke zamə nâʼà kə ghè tə ghayn!”

¹⁴Fɨa endamə vɛ è kwàʼ ə pə̀ynsə̀ nə, “Ə zə nyi ke zamə!” Nyiəmə, chəʼ sɛ ə ngwuʼə̂ əchi ə ngɨmnə̂ Fèzhə̀ yî Va Ndzè.