Read Mmen Etyə̂yn ə paynsêzè 6 Bible Online

Etyə̂yn ə paynsêzè 6 - Mmen bible

Etyə̂yn ə paynsêzè 6

¹Zôyn, mə fe kə Va Ndzè vɛ zhòm lɛ ə shike ə fètə̂ èlɛ vɛ èsɛ̀mbɛ. Mə zɨə kə fɨa endamə kyîke əfètə̂ èfɨa endamə vɛ ekwàʼ pɨa èkyə̀ è kûmə̀ kə eghol epɨaze ə pìə nə, “Pə fe kə!”

²Mə piə m naynə̂ ndò ə fe àkenyàm ə fɨfə kyîke, wùə e nyi etùə ə̀təyn kyi fèchə. Ə fo àfɔ ə efɔ̀ynkè sê vəyn, è və nyɨŋə tsɛ̂ fɨə kə wùə ə è ndamə tɨmə zhiə kə ndô ghɔŋze, mə è səʼə èghɔŋ se tɨmə zhi.

³Va Ndzè vɛ ə fɨnə zhômə̀ àlɛ ə mɔ̀ʼɔke nə ve ə nyi èpɨ̀a, kè sə ashìŋə̀, mə fɨnə zɨə kə fɨa endamə ə mɔ̀ʼɔke nə ve ndu èpɨ̀a pì nə, “Pə fe kə!”

⁴Kenyàm əmɔ̀ʼɔke ə fɨnə fɨə, pâŋà kə nyî. Ə fo àtyaʼ sê wùə vɛ ə è tè tsɨs etûə ə̀təyn nə è səʼ chàm ə mbi, əghɨghe ə zhwitə̂ ə̀ghɔ nyìghe. Ə fo vəyn è fɛ eghɔ̀ŋ eghaʼâzè.

⁵Ə̀ tè nyi kə è fɨyn zhôm lɛ ə mɔ̀ʼɔke nə ve ndu etwɔ, mə zɨə kə fɨa endamə əmɔ̀ʼɔke nə ve ndu etwɔ pî nə, “Pə fe kə!” Mə fe àkenyàm ə fɨməke ə mì əshi, mə wùə vɛ ə è nyiŋə etûə ə̀təyn kyi fɨ̂aʼ ètɨ̀l ə və gho.

⁶Mə zɨə èghɛ, ze kô kəpiə ə̀ nyi kyə̀ ə̀ wùə əfètə̂ èfɨa endamə vɛ è kwàʼ, è zə pìə nə, “Kɛ efɨaʼa əfetuʼve nə kwəynə kə se zhɔyn ə ngɔ̀ʼ ə̀ wît èmɔ̀ʼ kɨ̀sə se zhɔnə sengɔ̀ʼ sə palì seta. Pîza kə ò pofse kàʼ mə olìfmè, è kɨsè fûʼ ə mkàʼ mə̂ mlɨ̀kè!”

⁷Vâ Ndzè ə̀təyn ə zhòmə̀ àlɛ əmɔ̀ʼɔke nə ve ndu ekwàʼ. Mə zɨə kə fɨa endaməke nə ve ndu èkwàʼ pî nə, “Pə fe kə!”

⁸Mə naynə̂, ə fe àkenyàm ke lɛ̂ fɨfə ndò. Zə ə wùə vɛ ə è tè nyiŋə etûə ə̀təyn tè nyi nə Kwuze, mə ndaʼ ə ghɨ ekwuəze tè nyì kwuʼsê ke ə vəyn epàm. Ə chyàtə̀ mbi pɨ̂asvè ekwàʼ ə fo àtyaʼ sê ghənə nə ghənə zhwi pâskè amɔ̀ʼ, è fɛ eghɔ̀ŋze, è chɨ̀ŋ, è zafte, è kɨsè nyamsə mbvɨynse.

⁹Vâ Ndzè vɛ ə zhòmə̀ àlɛ ə mɔ̀ʼɔke nə ve ə nyi ètwɔ̂yn. Mə tè fe etyə̂ àlaŋ efoke zuʼsə ghɨ̀ ghɛ ə tè zhwite kûmə̀ nə ghənə tè ndàʼa eghɛ Fezhə̀zè fɨyn tyəm kə tsɛ̀ èsaʼ è təm ə ghənə̂ghè əkɨ̂m.

¹⁰Ghənə ə pɨa nâʼà è kyə̀ ètɛ nə, “Pɛ̂pɛ, Pɛ̀ Àtyaʼ Akɨ̂m, ò nyi èŋwaʼve, wâmnə̀ səmɔʼ! Ò nə̀ tsɨsə tânə̀ zàyn tsɔ̀fə kə ò saʼ ghɨ ghɨ̀nə̀ ə chi se fo etsôs sê ghənə kə ghənə tè zhwite ghàs ə?”

¹¹Zhə̀fè ə fo sèndzɨs se fɨfə̂sè sê nâʼàpî ndè ə ghənə ə fètəyn nə ghənə maʼ ə pìə nə ghənə mote kwəynsê tso ke se chə se zaʼâ kə ghɨ ətəynghe zhwite ghɨə fɨaʼa mɔ̀ʼɔghe, è ghɔnyì ə ghənə̂ghè, kè kə tè zhwi ghənə kə kɔ̂yn ətəynke kɔʼ kwəyn.

¹²Mə naynə̂ ə fe kə Va Ndzè vɛ zhòm lɛ ə mɔ̀ʼɔke nə və ndu etufə, kè sə ashìŋə̀, chike ə nə̂ʼə̀ nâʼà sə ŋaŋ, mə ə fɨnə fe kə cho ezhwize kɛse sè fɨ̂mə̀ kə kə sendzɨs se kwuse, njɔŋ ə kɛsə sè pâŋə̀ kə mndəm,

¹³lìme tâyntə̀ ə chi kə etwɔm ə fɨ̂kvè ə ve tâyntè mə ə̀ nə̀ʼse afof ə tɛke kâʼ fə ghənə̂fè.

¹⁴Wuləke ə saŋə kə ŋwàʼlè èngɛ zɛ ə ngɛ, pfɨynse ghaʼlə̂sè sekɨ̂m è luʼ tɛ ə tsò nyi mə è zə kyìŋ ka ə saŋə ətelùʼ tɛ ə te tè nyi ətəyn.

¹⁵Fɔ̂yn tə mbite è tu ə tendâʼàvè, è tu ə se sesôkə̀ʼve, è ghɨghaʼaghè, è ghɨ ghɛ ə ghe kyi tyaʼa, nâʼà è ghɨ mɔ̀ʼɔ ghə kɨ̂m, kɨ̀sə ekɔ̂s, kɨ̀sə əghɨ ghɛ ə ghe kyi ngɨŋ sə ghənə̂sè, ə tə njiə ndə̂ ə setɔŋ, ə ndə̂ kəpî etyə̀ ènyɔyn vɛ ə ve tè nyi ə sepfɨ̀yn,

¹⁶ə pɨa pìə sê pfɨynse è nyɔyn vɛ nə, “Ghàyn pfɨ ə ghàs ətu ə ndətə ghàs kə wùə vɛ ə è tsɨs əfekyə̀ fə efɔ̀ynfè fe ghàs, ə Va Ndzè tàʼa fo ètsôs sê ghàs kûmə̀ etɔŋ e zafəve.

¹⁷E nyi səmɔʼ nə tuʼfe kwəmnə fɛ kə ghənə tyəyn tɔŋ e zafəve ətəyn ə kwəyn, mə nâʼà wùə èmɔ̀ʼ vayn kàʼa è ndo tə.”