Read Mmen Etyə̂yn ə paynsêzè 7 Bible Online

Etyə̂yn ə paynsêzè 7 - Mmen bible

Etyə̂yn ə paynsêzè 7

¹Epàm ətəyn, mə fe sètsì sèkyàʼ, se tyəm ə tepòlə̀ tə chi te kyàʼ, mə se ə ko kyi fofve ekwàʼ nə kə ve tsɛ̂ ə chi, è kɨsè enjwì ə fengwaŋve, è kɨsè nə kə ve nəʼse kâʼfè.

²Mə fɨnə fe tsì zhîzè è ze fɨə pə̂ apàs kɛ ə zhwize fɨə ətəyn è ze kyi àlɛ ə Fezhə̀ fɛ ə fe ndamə ə və̂ gho. È zə pɨa nâʼà è kyə̀ è tɛ se tsì sə Fezhə̀ sɛ sè kyàʼ ə Zhə̀fè fo tyaʼa sê səynse nə se pofse chike è kɨsè njwî ə fengwaŋ vɛ

³ə pìə nə, “Kə ghàyn pofse chike, kɨ̀sə ènjwî ə fengwaŋve, kɨ̀sə mkâʼ se zaʼâ kə ghàs ndə̀m chwìə echo àtu ə ghɨ ghɛ ə ghe fɨaʼà sê Zhə̀fè ghasènìfe è lɛke.”

⁴Mə zɨə kə tsâ kɔ̂yn ə ghɨ kɛ ə nyi mə ə tə ndə̀m chwìə. Ghənə tè nyi əghɨ kamse wəve è kam m̀ghɨm kyàʼ njòse kyàʼ, mə ghe fɨ ə tetàŋ tə Isìlâytè njò sepɛ̀.

⁵Ə fɨə kamse njò sepɛ̀ etàŋ ə Njondàzè kə ndə̂m lɛke, ə fɨə kamse njò sepɛ̀ etàŋ ə Lupènzè kə ndə̂m lɛke, ə fɨə kamse njò sepɛ̀ etàŋ ə Ngatzè kə ndə̂m lɛke.

⁶Ə fɨə kəpi kamse njò sepɛ̀ etàŋ ə Ashàzè kə ndə̂m lɛke, ə fɨə kamse njò sepɛ̀ etàŋ ə Naftalìzè kə ndə̂m lɛke, ə fɨə kamse njò sepɛ̀ etàŋ ə Mànasèzè kə ndə̂m lɛke,

⁷ə fɨə kamse njò sepɛ̀ etàŋ ə Shimùynzè kə ndə̂m lɛke, ə fɨə kamse njò sepɛ̀ etàŋ ə Levìzè kə ndə̂m lɛke, ə fɨə kamse njò sepɛ̀ etàŋ ə Ìsakàze kə ndə̂m lɛke,

⁸ə fɨə kamse njò sepɛ̀ etàŋ ə Zepulùnzè kə ndə̀m lɛke, ə fɨə kamse njò sepɛ̀ etàŋ ə Njosɛ̀fzè kə ndə̂m lɛke, ə fɨnə fɨə kamse njò sepɛ̀ etàŋ ə Penjamə̀ynzè kə ndə̂m lɛke.

⁹Epàm ətəyn, mə fe anɔ̂yn əghaʼâ əghɨ̀kè mə ə màʼ ndzɨse fɨfə̂sè, mə ə vayn kàʼa taŋ mɨsè, kyi ə̀kyì əghɨ̀ ghəkɨ̂m, mə ə fɨ pə̂yn ke tâŋ tekɨ̂m, ə fɨnə fɨə ndaʼa tèkɨ̂m, wàmnə̀ kə tewâmnè tèkɨ̂m. Ghənə tè nyi mə ə tyəm ashiə fèkyə̂ fə efɔ̀ynfè è kɨsè ə Va Ndzè əshi, kyi èchwɔ̂ ə ghənə ə gho,

¹⁰sè pɨa nâʼà è kyə̀ e tɛ pìə nə, “Ghâsènì ə kyi sɔzaze sê Zhə̀ Fɛ ə fe tsɨs əfekyə̀ fə efɔ̀ynfè è kɨsè sê Va Ndzè.”

¹¹Tsì sekɨ̂m ə tyəmə ə kyìŋə̀ nga fèkyə̂ fə efɔ̀yn fɛ, ə fɨnə kyìŋə̀ nga sè chəʼ sɛ, ə tyəmə̂ ka kəpi èfɨa endamə vɛ èkwàʼ ə tɨmə ə̀ ngwùʼ ə pfɨsə̂ tèkyaʼ tə ghənə̂tè ə chi ngɨmnə̂ Fèzhə̀,

¹²pìə nə, “Ə zə nyi ke zamə, ə tsîtèzè, è pɔmsê, è tɔf eghaʼâzè, è zɔ̀ŋnèkè ə foke, è kɔʼsêzè, tyaʼke, è tyaʼ ewìynke, nyi sê Zhə̀fè ghasènìfe nâʼà kə ghè tə ghayn, ə ze ə nyi ke zamə.”

¹³Chəʼ zhîzè ə feʼtə̂ ə pfɨfə sê mi nə, “Ə̀ ghɨnə nyi ghə̀ ndè ə mâʼ ndzɨse fɨfə̂sè nyiə, ghənə ndo pə̂yn ghayn zə?”

¹⁴Mə pə̀ynsə̀ sê vəyn nə, “M ke va ə Pɛ̀ apɨəyn, ə̀ ke ke ghò.” È və ke pì sê mi nə, “Ə̀ ghɨ̂nə nyi əghɨ ghɛ ə ghe tè mɔ̀mse, ə tsɛ̀ fɨə e tsə̀fsè ekwəmnə zɛ. Ghənə shù ndzɨs sə ghənə̂sè è ndə̂m mə Va Ndzèm, se fɨfə kə nyî.

¹⁵Ə̀ za nyi eghɛ zɛ ə ghənə tyəm ashi fèkyə̂ fə efɔ̀yn ə Fezhə̀fè, fɨ̂aʼà sê fəynfe èchwì è tuʼve ə ndɛ ètsə̀mə. Wùə vɛ ə è tè tsɨs əfekyə̀ fə efɔ̀ynfè tè nyì yî ghənə, kɨ̂ŋtə̀ ghənə.

¹⁶Chɨ̀ŋ tə fɨnə zafə va ghənə, ə pfɨ̀ŋ ə̀ m̀mò tə tàʼa fɨnə zuʼse ə ghənə. Zuʼə̀ ə chwîkè tə fɨnə zuʼə va ghənə,

¹⁷kûmə̀ nə Va Ndzè vɛ ə è tsɨs əfètə̂ fèkyə̀ tə nə̂ ə è və nyi ngyəyn ə̀ ghənə̂. È tə njìə ndùə è ghənə ə setɔŋ sə mmò sɛ ə se fo ndamze, ə Zhə̀fè zəs shîmè m̀kɨ̂m ə ghənə əshi.”