Read Mmen Etyə̂yn ə paynsêzè 8 Bible Online

Etyə̂yn ə paynsêzè 8 - Mmen bible

Etyə̂yn ə paynsêzè 8

¹Ə̀ tè nyi kə Va Ndzè zhòm lɛke, nə ve ndu èsɛ̀mbɛ, luʼte ə kɨmə̂ kə ekwùtwəyn nyiə mɔŋ sə fendiŋə̀.

²Mə ke fe setsì sɛ èsɛ̀mbɛ ə se nə̂ se tyəm ə Zhə̀fè shi mə ə fo sɔŋte sê ghənə esɛ̀mbɛ̂.

³Tsì zhîzè ə pə̀ tyəmə ashiə alaŋ efoke, kyi àkaŋ kɛ ə nyɔ̀ʼɔ ndiŋze ətəyn mə ə fɛte kəynke è ngôl. Ə fo èndiŋ sê zə̂yn ze tsɨ̀ə kə nyî, nə è nyɔʼ zəynze etûə àlaŋ efo kɛ ə tè fɛte è ngôl se paʼsê è tsə̂m tə ghɨ̀ tə Fezhə̀tè, laŋ ə fo ə təynke tè tyəm ashi fekyə̀ fə efɔ̀yn ə Fezhə̀vè.

⁴Ndəʼ kɛ ə ke tè fɨə pə̂ fumə endiŋ zɛ ə tè nyɔʼ e kɔʼɔ ndûə paʼsə̂ è tsə̂m tə ghɨ̀ ə Fezhəghè ətəyn, mə ke fɨə pə̂ tsì zɛ agho ə è tè tyəm ə Zhə̀fè əshi.

⁵Tsì zɛ ə njìə àkaŋ endiŋ nə kɛ ə tsofə èkyî ewùsze alaŋ efo kɛ ə ndə̀mə̀ lwiynsə̂ ətəyn, ə sɨsə̀ tsosə̂ ə chi, kè sə ashìŋə̀ gholze ə zhə̀tə̀ se kə̀m, pɨaytə̂, mɨ̂ayntə̀ chike e nə̂ʼə̀.

⁶Tsì sɛ èsɛ̀mbɛ ə se tè kyi sɔŋ ghɛ esɛ̀mbɛ̂ e sè pfɨ̂tə̀ se tɔŋ ə sɔŋ ə təynghe.

⁷Tsì əshi ə tɔŋə èsɔŋ ə vəynze, ə sɨ̀sə̀ tsosə̂ m̀chichi, è wusve ə chi mə ə fɨə è ndə̂m. Fɨa təynve ə tso za, ə nyɔ̀ʼɔ àpâs ə chike amɔ̀ʼ ezhoghɛ ə chyâtè chike pɨas vetwɔ, ə nyɔ̀ʼə̀ kəpî àpâs m̀kaʼkè ezhoghɛ ə chyâtè pɨ̂as vetwɔ, ə kɛsə̂ nyɔʼə̀ nâʼà ètu ewə̀yn eseve ekɨ̂m.

⁸Tsì ə̀mɔ̀ʼɔ̂ nə se ndu sepɛ̀ ə tɔŋə èsɔŋ ə vəynze, ə màʼa àfɨa ə enjwì ə fengwaŋve, ke nyi kə pfɨ̀yn èghaʼâ ə wusve pɛ ətəyn,

⁹pâskè amɔ̀ʼ əfètə̂ enjwì ə fengwaŋ vɛ ezhoghɛ ə chyâtè pɨ̂asvè etwɔ ə kə̀mnə̀ sə mndəm, pâskè amɔ̀ʼ əfètə̂ èfɨa endamə vɛ ə ve tè nyi ə fètə̂ ènjwì ə fengwaŋ ətəynve ezhoghɛ ə chyâtè pɨas vetwɔ ə kwutə̂. Pâskè amɔ̀ʼ əfètə̂ sèngwùʼ seghaʼâ kwəynə sɛ ə ezhoghɛ ə chyatê pɨ̂as vetwɔ ə pofə.

¹⁰Tsì ə̀mɔ̀ʼɔ̂ ə tɔŋə èsɔŋ ə vəynze, lî fe ghaʼa fîfe ə ndò ekwùtwəyn ə tânə̀ tso ə chi, panə kə nyîə twɔl. Fə tânə̀ ə kɨlə àpâs ə tsô èghaʼâkè amɔ̀ʼ əfètə̂ epɨ̀as è twɔ ə fɨnə kɨlə sètɔŋ sə mmòse apâs amɔ̀ʼ əfètə̂ epɨ̀as ètwɔ.

¹¹Zə ə felî nə fɛ tè nyi (Njìchaʼ) Pasə tsô nə kɛ àmɔ̀ʼ ezhoghɛ ə chyatê pɨ̂as vetwɔ ə kɛsə̂ sè njwîə kə nyî kə njìchaʼ. Ghɨ ə tsɨə ghɛ ə ghe tè mɨ mô mə̂təynmè ə kwutə̂ kûmə̀ nə m tè nyîə njwiə̀.

¹²Tsì ə̀mɔ̀ʼɔ̂ ə tɔŋə èsɔŋ ə vəynze nə ə̀ ndu tsì sekyàʼ. Chwì, è njɔŋ, è lɨ̀mè e nyi mə ə chyàtè pɨ̂as vetwɔ, fɨake ə tsɔ̀sə̀ àpâs ə chwîkè amɔ̀ʼ è pâs ə njɔŋke amɔ̀ʼ, è kɨsè pâs mlɨ̀kè amɔ̀ʼ ə nə̀ nə ve njise payn ə ghənə̂zè pâskè amɔ̀ʼ ezhoghɛ ə chyâtè pɨ̂as vetwɔ. Pâskè amɔ̀ʼ èchwì ezhoghɛ ə chyâtè pɨ̂as vetwɔ, è pâskè amɔ̀ʼ etuʼve ezhoghɛ ə chyâtè pɨ̂as vetwɔ ə njisə̀ epayn ə ghənə̂zè.

¹³Mə ndwisə̀ àtu kɨmke ə naynə̂ ekwùtwəyn ə zɨə kə mbùʼəkè wùlə̀ tsɛ̂ nâʼà ekwùtwəyn, chîə è kyə̀ è tɛ nə, “Ə̀ kwûəmnè, Ə̀ kwûəmnè! Ze nə̀ nə̂ ə ze ə kwuəmə̀ se ghɨ ghɛ ə ghe ndamə ə chi kûmə̀ ə̀sɔŋ ghɛ ə tsì sə mɔ̀ʼɔ sɛ sèta nyi se nə tɔŋ.”