Read Mmen Etyə̂yn ə paynsêzè 9 Bible Online

Etyə̂yn ə paynsêzè 9 - Mmen bible

Etyə̂yn ə paynsêzè 9

¹Tsì ə̀mɔ̀ʼɔ̂ ə tɔŋə esɔŋ ə vəynze, nə se ndu setâyn. Mə fe fèlî mə fe ə pfɨ̀ tso əchi, ə fo àchɔʼ ə echô èpə ke, ke lɔŋɔ̂ tso ndùə kə ndò sê zə̂yn.

²Lî fə ətəynfe ə chɔʼɔ echo epə nə zɛ, ndəʼ fîfe e fɨə kɔʼɔ ətəyn, kyaʼà kə epə tɨm sə̂ nyɔʼə̀ sènyam ətəyn. Ndəʼ kɛ ə ke tè fɨə fumə epə, ə fɨə kɔʼɔ ə fɨ̀msə̀ ezhwi è wuləke.

³Pɨynse ə fɨə əfètə̂ fèndəʼ nə fɛ ə tso ə chi. Ə fo kəpi atyaʼ kɛ ə kwəm kwuve tè kyi se pɨyn nə sɛ

⁴ə pìə sê səynse nə kə se nə ndəmsê ewə̂yn ə chi, kɨ̀sə afɨa mə ə zho ndô kɨ̀sə fekâʼ. Ə pɨlə pìə nə se ə ndəmsə̂ ə̀ghɨ ghɛ ə ghe kyi va chwìə Fèzhə̀ ə ghənə echo àtu.

⁵Pɨynse ə ətəynse tè vachi se zhwi ndò ghɨ nə ghɨ̂yn. Se tè nyi ke se fo etsôs sê ghənə sə senjɔŋ se tâyn. Tɨ̂m zɛ ə ghənə tè nyi se fe nyi kepî kə vɛ ə wùə nə̂ è fe ashìŋə̀ kɛ kəm ekwuke ndom vəyn.

⁶Ə̀ tə pə̂ ə nyi ə mtuʼ nə mɛ, ə ghɨ nə kyiŋə kə nâʼà èkwu ə tàʼa fe, ə kɔ̂ŋɔ̀ kə nâʼà se kwu, ə kwuze tə nə ze ə njîə va ghənə.

⁷Pɨynse ə ətəynse tè kyàʼa kə ekwânyàm ashìŋə̀ kɛ ve pɨaʼte se səʼə eghɔ̀ŋ, tu ətəynve e kyi èfɨa ve kyâʼà kə efɔ ə tefɔ̀ynvè ə fɛte è ngôl, kyâʼ tə tətəynte e kyaʼà kə tekyâʼ tə ghɨ̀tè,

⁸kyi sènyuŋ se tyâfəse mə se ə ngɛ kə sə wûzhɔynse, kyi ə̀sɔŋ ghe ghaʼlə̂ kənyi tɔfə kə kə ghə Pìkəmghe.

⁹Pɨynse ətəynse tè nyi mə se ə kɨ̀ŋtè ngwàŋtèvè è fɨave ve fusə̂ kə̀, mə ə fɛte è anyà ə tə̂ anyà, sè wûlə̀ ghɛ̂ tə ghənə̂tè e kûmə̀ kə teka tə eghɔ̀ŋte ə kwanyàmvè shìnə̀ se səʼ eghɔŋ.

¹⁰Se tè kyi tekwiyn è fɨlte echo ə̀təyn kə tə ekwəm ekwuve. Tyaʼke tè nyi ə ghənə ə tekwìyn mə ke kaʼa ə ndəmse ghɨghe nə ə zɨ tɨ̂mzè sə senjɔŋ setâyn.

¹¹Pɨynse ətəynse tè nyiə kyi fɔ̀yn vɛ ə è saʼa səynse, ə̀ nyi tsì zɛ ə è tɔ̀ʼnə̀ è pə zɛ ə ze lɔŋɔ tso ndùə kə ndô za, zə ə tsì ətəynze e nyi ewàmnè ə Ipilòzè nə Apandòn, nyi ewàmnè ə Nglêkè nə, Apolìyòn, ze tyə̂nə̀ nə, “Wùə è pəfsə.”

¹²E za tyə̀nə̀ nə ghɛ ekwəmnə əshize ə tsɛ̀, epàmə təyn, ghɛ ə kwəmnəghe ə pɛ̀ ə pa faŋ se pə̀yn.

¹³Tsì ə̀mɔ̀ʼɔ̂ ə fɨnə tɔŋə esɔŋ ə zə̂ynzè, nə ə̀ ndu tsì setufə. Mə zɨə kə kyə̀ fɨ pə̂yn ə tepòlə̀ tèkyàʼ alàŋ ə fo kɛ ə fɛte è ngôl ke tyəm ə Zhə̀fè əshi.

¹⁴Kyə̀ ə̀təyn ə pìə sê tsì zɛ ə è tè nə nə ə̀ ndu tsì setufə nə, “Zhə̀yn tsì sɛ sèkyàʼ ə nyi mə kol fɛ tsô èghaʼâ zɛ ə tɔŋtə nə, Yufelɛ̀t za.”

¹⁵Ə zhə̂yntə̀ sètsì sɛ sèkyàʼ kûmə̀ nə ə tè ndəm ghənə èpɨaʼtêzè kèpî fa ashìŋə̀, kèpî fa fetuʼ, kèpî fa njɔŋ, kèpî fa pîŋ, kə kaʼa zhwi pâs əghɨ̀ msɔ̀ŋke amɔ̀ʼ ezhoghɛ ə chyâtè pɨ̂as vetwɔ.

¹⁶Ə tsà sê mi nə nɔnə sesokə̀ʼ kɛ ə ke nyiŋə etûə ekwânyàm nyi se malàm ghɨ tepɛ̀.

¹⁷Ə̀ tè nyi ə mì ə telaynəlayn, mə fe ekwânyàm, ghɨ ghɛ ə ghe tè nyɨŋə etûə ə̀təyn e kyaʼà nduə nyi, ghənə tè kyi sekə̀ se pâŋà kə ke ewus, liŋə kə kə chi yîghe ə tɔŋtə nə sàfayà, fɨnə lɛ̂ pâŋà kə afɨa ə tɔŋtə nə sɔlfɔ̀. Tuə ekwânyàm nə vɛ e kyàʼà kə etu ə senyàm sə pìkəmse, wusve, è ndəʼfe è fɨake ke kyâʼà kə sɔlfɔ̀ e fɨə əsəynse əcho.

¹⁸Ə tè zhwi pɨaʼ ə ghɨ̀kè ezhoghɛ ə njî ghɨghe ə chyàtə pɨ̂as vetwɔ, è tsôs te kwəmnə teta tɛ ə te tè fɨ ə kwanyàm vɛ echo, mə za nyi ewus, è ndəʼke, è wus epɛ vîve mə ve fɨə ətə̂ àfɨa e tɔŋtə̂ nə sɔlfɔ̀.

¹⁹Tyaʼ ekwânyàm nə vɛ tè nyi ə ghənə əcho fɨyn nyi kepî ə tekwìyn. Kwiyntə təynte tè nyi kə sembam, kyi ètu, ghənə e ndəmsə̂ ə̀ghɨ è kwiyn tə ghənə̂tè.

²⁰Ghɨə mɔ̀ʼɔ ghɛ ə tsôstè kwə̀mnə tɛ tè tàʼa zhwitə ghənə zâ, ghənə ə tàʼa zà se ngɨmnê efɨaʼsè vɛ ə ghənə tè fɛte è gho ə ghənə̂ghè. Ghənə tə faŋ ngɨmnə kə tè pamə̂ tə satàyntè, e fɨ̂aʼsè vɛ ə fɛte è ngôl è silvà è kas epaŋə kyîke e tɔŋtə̂ nə mblɔ̂ŋs, è chighe, è kàʼam̀ efɨa mə ve vayn kaʼa ə ve fe, vayn kàʼa ve zɨ, vayn kàʼa ə ve kwi.

²¹Ghənə ə tàʼa kwiynê è zhwi ə ghənə̂ zə ə ghɨ̀zè, è nə̂ əghɛ ə fɨyntəghe, è nə̂ ə̀ghɛ ə nyələghe, è chɔŋze.