Read Moba Mɑɑtieo 10 Bible Online

Mɑɑtieo 10 - Moba bible

Mɑɑtieo 10

¹K Yiesu din tɑn yiin u tuomiinbɑ *piik nɑn bɑnle nɑ, k tɑn cɑb’b yiikuo ɑ bii nyint nɑlnbiit niib ni, k biɑ te k bin nbɑ yiɑl yiɑlbuoli buoli kul nɑn bin nbɑ mɔk gbɑnɑntont kul n pɑɑk.

²U tuomiinbɑ piik nɑn bɑnle mɑnŋ sɑnɑ e nɑ. Sinsinn pɑɑk Siimɔn, wun nbɑ yɑɑ sɑnn biɑ din yi Piɑl nɑ nɑn u ninjɑ Andle nɑn Sɑɑk nɑn u ninjɑ Sɑn, bin nbɑ din tie Sebede wɑɑs nɑ

³nɑn Fiiliip nɑn Bɑɑltelemi nɑn Tuomɑ, nɑn Mɑɑtieo wun nbɑ din tie *lɑnpogɑɑltuɑ nɑ, nɑn Sɑɑk wun nbɑ din tie Alfe bijɑ nɑ, nɑn Tɑɑde

⁴nɑn Siimɔn wun nbɑ din luon ŋɑnm *Suifnbɑ i yen b mɔnŋ nɑ, nɑn Suudɑ Iskɑɑliɑɔt wun nbɑ din tɑn nyii Yiesu puol nɑ.

⁵K Yiesu din tun u tuomiinbɑ piik nɑn bɑnle mɑnŋ, k kpɑɑn’m k yet ɑ: «I dɑɑ sɑɑ bin nbɑ k tie Islɑɑeltieb nɑ buol ni, k biɑ dɑɑ kuɑ *Sɑɑmɑɑliitieb doi ni,

⁶ŋɑɑn ii sɑɑ Islɑɑeltieb nbɑ tie nɑn pei nbɑ bot nɑ buol ni kuukuɑ e.

⁷Yɑɑ sɑɑ nɑ, ii muɑntl ɑ: ‹Yennu nɑɑn pel nɑ.›

⁸Ii te k bɑɑtb n pɑɑk, kii fiint kpienm, k biɑ te k gbɑɑtɑ ŋɑɑt n gbenn, kii biɑ kii nyint nɑlnbiit niib ni. I gɑɑl tebu yiikuo mɑnŋ yɑnn e, ii mun i biɑ kii tieb k dɑɑ gɑɑn likli.

⁹I dɑɑ jikt likli. Ii mi mɑn k yin jii kuuk k tien i likbuɑli ni.

¹⁰I dɑɑ jikt pɑkɑ k sɑɑ i sɔnu mɑnŋ, ɑmi liɑtfɔkt ŋɑnlele, ɑmi k jii tɑɑsɑɑliet k pukn, ɑmi kii diɑ pɑti, k mɑɑn l ŋɑn k tuontunnɔ n di u tuonɑ ni.

¹¹«Digbɑngbenŋɑ ɑmi digbɑnbis nbɑ yɑɑ ni k i sɑɑ kuɑ, yin boi k lɑ nibulcimɔ ŋɑɑk ɑ, k kuɑ kii be lenŋ nɑn i fiilu dɑɑl.

¹²K yuo nbɑ k i yɑɑ i kuɑ ŋɑɑk nbɑ ni, yin fuont ŋɑɑk mɑnŋ ni tieb fɑnu.

¹³Ŋɑɑk mɑnŋ tieb i tie nibulcinm, i mɑnu n biɑl ŋɑɑk mɑnŋ tieb pɑɑk, ŋɑɑn nibulcinm i kɑɑ lenŋ, i mɑnu mɑnŋ biɑ sɑɑ jen i pɑɑk nɑ.

¹⁴Wun nbɑ sɑɑ yet i gɑɑlu k biɑ yet wun gbɑt i mɑɑn, yuo nbɑ k i nyii ŋɑɑk mɑnŋ ni ɑmi duo mɑnŋ ni, yin pit pit i tɑɑpɑnt ni tɑnt k lu.

¹⁵Bɑlmɔni e k n yien’i nɑ, dɑɑl nbɑ k Yennu tɑn sɑɑ bu niib buut nɑ, duo mɑnŋ niib tubdɑtu tɑn sɑɑ gɑl Suodonm tieb nɑn Guomuɔl tieb yɑl ɑ.»

¹⁶«Gotl mɑn, n tuun’i k i sii tie nɑn pei nbɑ be kinkɑtɑ sinsuuk ni nɑ e. Ii cek mɑn nɑn wɑɑlɑbli nɑ, ŋɑɑn kii be suon nnɑ nɑn ŋmɑnɑ nɑ.

¹⁷Ii mi mɑn niib po, k mɑɑn b tɑn sɑɑ suol’i sɑɑn nɑn’i bɑlbutieb buol ni, k biɑ buo’i lɑnbɑnɑ Suifnbɑ jɑɑnti diet ni.

¹⁸B tɑn sɑɑ sɑɑn nɑn’i tinŋ yudɑnm nɑn kpɑnbɑlɑ buol ni, yɑɑ wɑɑ’n nɑ pɑɑk, i sii tie n siɑlɑɑdɑnm k tul ŋɑnm nɑn bin nbɑ k tie Suifnbɑ nɑ.

¹⁹Ŋɑɑn b i tɑnŋ i sɑɑn nɑn’i buut dɑnm buol, i dɑɑ fɑbn yɑɑ sɑɑ pɑk biɑnŋ nbɑ ɑmi yɑɑ sɑɑ pɑk lin nbɑ yɑɑ pɑɑk. L yuo nɑ e k i sɑɑ lɑ mɔbonɑ nbɑ k i sɑɑ pɑk k jiin’m,

²⁰k mɑɑn l k tie yinm kɑɑ tɑn sɑɑ pɑk, Bɑɑ Siek e tɑn sii be i ni k piɑk.

²¹«L yuo mɑnŋ, nilɔ tuu tɑn sɑɑ kuɑt u mɔnŋ mɔnŋ ninjɑ k bin kpi’u, k bɑɑnbɑ mun tɑn sɑɑ kuɑt b wɑɑs k bin kpi’b, k wɑɑs mun biɑ tɑn sɑɑ kɔn nɑn b dɑnm k cɑb’b nɑn kuun.

²²K suɑ kul tɑn sii nɑn’i k mɑɑn yɑɑ wɑɑ’n nɑ pɑɑk, ŋɑɑn wun nbɑ tɑn gubn nɑn fɑlɑ yuo nɑ juontu tɑn sɑɑ lɑ fielu wɑɑ.

²³B i tɑnŋ i muks’i digbɑn-yenn ni, yin nyi lenŋ k luɑl digbɑnliel ni. Bɑlmɔni e k n yien’i nɑ, i dɑɑ kɑn fit k lin k gbenn Suifnbɑ digbɑnɑ kul, k suɑ *Nisɑɑlk Bijɑ ponŋ jen ɑ.

²⁴«Tɔn, wun nbɑ siɑn k cie u tumiituɑ. Tuontunnɔ mun biɑ k cie u Yonmdɑɑnɔ.

²⁵L jɑnŋ nɑn wun nbɑ siɑn binbenŋ ii tie nɑn u wɑntuɑ binbenŋ nɑ, k tuontunnɔ binbenŋ ii mun ii tie nɑn u Yonmdɑɑnɔ binbenŋ nɑ. B i tɑnŋ i pul ŋɑɑdɑɑnɔ Beelsebuul, nlee k b ji sii yi u ŋɑɑtieb i?»

²⁶«I dɑɑ tiin niib jɑŋmɑɑni, siɑl kɑɑ k be wuol ni k tɑn kɑn wuot k nyi pɑɑnu ni, ɑmi k bɔl k tɑn kɑn nyi pɑɑnu ni.

²⁷Lin nbɑ k n yien’i bunbɔnn ni nɑ, nyint’l mɑn yienin ni, k lin nbɑ k n lɔkn’i nɑ, i do mɔpinyelk pɑɑk kii muɑntl.

²⁸I dɑɑ tiin bin nbɑ sɑɑ fit kpi i gbɑnɑnt, ŋɑɑn kɑn fit k kpi i siek, ŋɑɑn ii tiin mɑn Yennu nbɑ sɑɑ fit k biil i gbɑnɑnt nɑn i siek kul ɑ muu nbɑ kɑɑ gbennu nɑ ni nɑ.

²⁹B k kɔi nuɑnbit bɑnle kuuk kuukuɑ ɑɑ? Ŋɑɑn b yenɔ kuɑ kɑn bɑɑ tinŋ ni k i Bɑɑ Yennu k mi u po.

³⁰Yinm ŋɑnin, i yut mɔk kɑnn.

³¹L pɑɑk, i dɑɑ tiin jɑŋmɑɑni, k mɑɑn i mɔk nyuɑt k gɑl nuɑnbit bonciɑnn.»

³²«Wun nbɑ nyint u mɔnŋ pɑɑnu ni niib buol ni nɑn u tie n yuɑ e, nnɑ e k n mun tɑn sɑɑ nyinn’ɔ pɑɑnu ni n Bɑɑ nbɑ be sɑnpɑɑpo nɑ buol, ɑ u tie n yuɑ e.

³³Wun nbɑ yɑɑ ɑ u k mi’n niib ni, nnɑ e k n mun tɑn sɑɑ yet ɑ n k mi’u n Bɑɑ nbɑ be sɑnpɑɑpo nɑ buol ni.»

³⁴«I dɑɑ duki nɑn n bɑɑl nɑn mɑnu tingbounŋ nɑ tieb pɑɑk, n k bɑɑl nɑn mɑnu kɑɑ, ŋɑɑn n bɑɑl nɑn kunkɔnn e.

³⁵N bɑɑl mɑɑ n tɑn tukn bonjɑbik e nɑn u bɑɑ, bonpobik nɑn u nɑɑ, puo nɑn u sipuok.

³⁶Nilɔ mɔnŋ mɔnŋ ŋɑɑtieb e tɑn sii tie u dɑtɑi.

³⁷«Wun nbɑ luon u nɑɑ ɑmi u bɑɑ k gɑl’n, u k ŋɑn nɑn wun tien n yuɑ. Wun nbɑ mun biɑ luon u bijɑ ɑmi u bipuo k gɑl’n, u k ŋɑn nɑn wun tien n yuɑ.

³⁸Wun nbɑ k jii u kuun dɑpunpunn[15] k buk k wɑɑ’n, u k ŋɑn nɑn wun tien n yuɑ.

³⁹Wun nbɑ yɑɑ ŋuɑ deki u mɑnfuol tɑn sɑɑ kɔnŋ’l ɑ, ŋɑɑn wun nbɑ kɔnŋ u mɑnfuol n pɑɑk, u tɑn sɑɑ lɑ u mɑnfuol ɑ.»

⁴⁰«Wun nbɑ gɑɑl’i sɑɑɔnŋ, u gɑɑl min e sɑɑɔnŋ, k wun nbɑ mun biɑ gɑɑl min sɑɑɔnŋ, u gɑɑl wun nbɑ tun’n nɑ e mun biɑk.

⁴¹Wun nbɑ gɑɑl *Yennu sɔkni sɑɑɔnŋ nɑn wɑɑ tie Yennu sɔkni nɑ pɑɑk, u tɑn sɑɑ gɑɑl Yennu sɔkni nyuɑt ɑ. Wun nbɑ gɑɑl niŋɑnɔ sɑɑɔnŋ nɑn wɑɑ tie niŋɑnɔ nɑ pɑɑk, u tɑn sɑɑ gɑɑl niŋɑnɔ nyuɑt ɑ.

⁴²Wun nbɑ finn nyunmɑɑsn wɑɑnm-nnɑ kuukuɑ k tul n *puolpoweituɑ yenɔ nbɑ pɔ i ni, nɑn wɑɑ tie n puolpoweituɑ nɑ pɑɑk, bɑlmɔni e k n yien’i nɑ, u tɑn kɑn mi kɔnŋ l pɑɑɔk u.»