Read Moba Mɑɑtieo 12 Bible Online

Mɑɑtieo 12 - Moba bible

Mɑɑtieo 12

¹L yuo mɑnŋ k Yiesu nɑn u *puolpoweitieb din gɑɑl dii kpɑɑnt ni *Fuondɑɑl, k kon tɑn suol u puolpoweitieb nɑ. Ŋɑnn e k b kɔni dikɑlɑ k pini k ŋmɑn.

²Fɑɑliisiɑnnbɑ nɑ siɑb nbɑ din lɑ nnɑ mɑnŋ, k b yet Yiesu ɑ: «Gotl, ɑ puolpoweitieb tuun lin nbɑ k t *senni k cɑb nɑn tii tuun Fuondɑɑl.»

³K Yiesu jiin k boi’b ɑ: «I k lii Dɑɑfiid nbɑ din tun biɑnŋ nbɑ dɑɑl nbɑ k kon din suol ŋuɑ nɑn u juɑmu uu?

⁴U din kuɑ Yennu jɑɑnti ŋɑsɑɑkɑk ni, k sɑɑ jii Yennu pɑɑnu nbɑ k b din tuu senn k l tie Yennu yɑl nɑ, k ŋuɑ nɑn u juɑmu ŋmɑn, ŋɑɑn k senni nɑ din k cɑb nɑn b nisuɑ n di pɑɑnu mɑnŋ, sie Yennu mɑnntieb kuukuɑ.

⁵Kuo i k lii Muois senni kɑdɑɑɔk ni, mɑnntieb nbɑ din tuun biɑnŋ nbɑ ɑɑ? B din tuu tun tuun tuonɑ Yennu jɑɑnti ŋɑsɑɑkɑk ni Fuondɑɑl kul ɑ k biil senni nɑ, ŋɑɑn kɑɑ biit.

⁶Ŋɑɑn n yien’i e, wun nbɑ cie Yennu jɑɑnti ŋɑsɑɑkɑk be nnɑ.

⁷L i tie k i bo bɑnn mɔbonɑ nɑ pɑɑk, ɑ: ‹Min Yennu, n luon ninbɑtinu e k gɑl *mɑlunŋ,› i bo kii piɑk k biil bin nbɑ kɑɑ biit,

⁸k mɑɑn *Nisɑɑlk Bijɑ e mun biɑ yen Fuondɑɑl.»

⁹K Yiesu din nyii lenŋ k sɑɑn kuɑ *Suifnbɑ jɑɑnti dieok ni.

¹⁰K jɑsuɑ nnɑ mun din be lenŋ, k u nuu kpo k guon. K siɑb din luon bin lɑ Yiesu biit ɑ k tɑɑl’ɔ. L pɑɑk, k b boi’ɔ ɑ: «T senni sɑɑk ɑ nilɔ n te k bɑɑtɔ n pɑɑk Fuondɑɑl ii?»

¹¹K u mun din ŋmɑnt boi’b ɑ: «I yenɔ i mɔk peyeunŋ kuɑ, k pieok mɑnŋ tɑn bɑɑ bunbunn ni Fuondɑɑl, u kɑn donn’ɔ Fuondɑɑl nɑ ɑɑ?

¹²I k mi nɑn nisɑɑlk mɔk nyuɑt k gɑl pieok uu? L pɑɑk, senni nɑ cɑb ɑ tii tuun bonŋɑnn Fuondɑɑl.»

¹³Ŋɑnn e k u din ŋmɑnt yet niikpienn dɑɑnɔ nɑ ɑ: «Tɑntl ɑ nuu mɑnŋ.» K u tɑnt u nuu mɑnŋ, k l nɑɑt k tie nɑn liel nɑ.

¹⁴Ŋɑɑn k Fɑɑliisiɑnnbɑ nɑ nyii nɑn-yel po, k lol lol suol nɑn lieb bɑɑ sɑɑ tien biɑnŋ nbɑ k kpi Yiesu.

¹⁵K Yiesu din bɑnn b lol mɑnŋ po, k din nyii lenŋ. K niib bonciɑnn din wɑɑ u puol, k u te k bɑɑtb kul ɑ pɑɑk,

¹⁶ŋɑɑn yet’b nɑn ninmɔnn ɑ b dɑɑ muɑntl wɑɑ tie wun nbɑ.

¹⁷U din tun nnɑ e, ɑ lin nbɑ k *Yennu sɔkni Esɑɑyi din sɔkn nɑ, lin tien gbien, ɑ

¹⁸«Gotl, min Yennu, mɑɑ lukt n tuontunnɔ nbɑ e nɑ ŋuɑ e k n mɑntk luon’ɔ nɑ; n nunm mɑntk gbuo’u wɑɑ. N sɑɑ jii n Siek k tien u ni. U tɑn sɑɑ muɑnt buut bunu nbɑ tuok k tul niib kul ɑ.

¹⁹U tɑn kii mɔk mɔniɑɔk, k biɑ tɑn kii tie kpɑyɑɔk dɑɑnɔ, k biɑ tɑn kii mɔk fuut yɑnn yɑnn sɑnjot ni.

²⁰U tɑn kɑn kɔnn tikuɑnn k tont, k biɑ tɑn kɑn kpien fitl nbɑ k di fɑnu. U tɑn sɑɑ te k bɑlbunu nbɑ tuok n lɑ nyɑnnu.

²¹U sɑnn ni e, k niib kul ɑ tɑn sii mɔk dindɑnn.»

²²L yuo nɑ k nisiɑb din bɑɑl nɑn jɑsuɑ k nɑlnbiiuk be u ni k tien’ɔ muuk k biɑ tien’ɔ juɑnŋ, k Yiesu din te k u pɑɑk, k ji nyuɑn, k biɑ piɑk.

²³K l yɑɑl ŋɑɑn lit niib nɑ kul nɑ bonciɑnn, k b boi b lieb Yiesu po ɑ: «Juɑ nɑ e nɔk tie * Dɑɑfiid yɑɑbuonn nɑ ɑɑ?»

²⁴Ŋɑɑn Fɑɑliisiɑnnbɑ nɑ nbɑ din gbɑt nnɑ mɑnŋ, k b yɑɑ ɑ: «Nɑlnbiit bɑt Beelsebuul e tien juɑ mɑnŋ yiikuo ɑ wuu nyint nɑlnbiit niib ni.»

²⁵Yiesu nbɑ din bɑnn bɑɑ duki lin nbɑ nɑ, k u yet’b ɑ: «Nɑɑn niib i ŋmɑt kɔn k tuokt b lieb, b nɑɑn mɑnŋ sɑɑ biil ɑ. K doyenu kuɑ niib ɑmi ŋɑyenŋ kuɑ niib i ŋmɑt kɔn nɑn lieb, l kɑn set.

²⁶L i tie k *Sɑɑtɑn nyint u mɔnŋ, l wɑnt nɑn u kɔn k bɔktl u mɔnŋ e. Nlee k u nɑɑn nɑ sɑɑ set i?

²⁷K l i tie k Beelsebuul tien’n yiikuo ɑ mii nyint nɑlnbiit niib ni, k yinm mun, ŋmee mun cɑb i niib ɑ bii nyint nɑlnbiit i? I mɔnŋ niib mɑnŋ tuonɑ e wɑnt nɑn i k mɔk mɔni.

²⁸Ŋɑɑn min ŋɑnin, Yennu Siek pɑɑk e k n nyint nɑlnbiit niib ni. Ŋɑnn e mun biɑ wɑnt nɑn Yennu nɑɑn bɑɑl i buol ni wɑɑ.»

²⁹«Suɑ kɑn fit kuɑ jɑwɑktl ŋɑɑk ni k bɑkl u bonɑ k nyi nɑn’n, l i kii tie k u dɔnŋ k lol’ɔ ŋmii kɑɑ wɑɑ, ŋɑɑn fit k kuɑ k bɑkl u bonɑ mɑnŋ.

³⁰«Wun nbɑ k sie n puol, u kɔn nɑn’n e, k wun nbɑ k tɑɑnt’n k tiki niib, u yɑɑt’b e.

³¹L pɑɑk te k n yien’i nɑ, Yennu sɑɑ nyik cɑb nifosɑɑlk u biit nɑn bɑlbiit kul ɑ, ŋɑɑn wun nbɑ tɑn suki Foŋɑnm, Yennu kɑn mi k nyik cɑb l dɑɑnɔ.

³²Wun nbɑ piɑk bɑlbiit k tien Nisɑɑlk Bijɑ, Yennu sɑɑ nyik cɑb’ɔ, ŋɑɑn wun nbɑ tɑn piɑk bɑlbiit k tien Foŋɑnm, Yennu kɑn nyik cɑb l dɑɑnɔ *dulnyɑ nɑ ni, ɑmi dulnyɑ nbɑ tɑn sɑɑ bɑɑl nɑ ni.»

³³K Yiesu biɑ din yet ɑ: «L i tie k tiik ŋɑn, u luon tiluɑnŋɑnɑ e, ŋɑɑn l i tie k tiik k ŋɑn, u sii luon luɑnbiit e, k mɑɑn tiik luɑnɑ ni e k b bɑnt’ɔ.

³⁴Yinm wɑɑlɑbli buolu nɑ, yɑɑ tie nifobiit biɑnŋ nbɑ nɑ, nlee k lɑbɑmɑnn sɑɑ fit nyi i mɔi ni? K mɑɑn lin nbɑ k nifosɑɑlk duki u pɑl ni, ŋɑnn e biɑ nyi u mɔb ni.

³⁵Niŋɑnɔ nyint bonŋɑnn u mɔktuk nbɑ ŋɑn nɑ ni e, k nibiiuk nyint bonbiit u mɔktuk nbɑ bi nɑ ni.

³⁶«N yien’i e nɑ, bɑlbunu dɑɑl, Yennu tɑn sɑɑ bu niib buut nɑn bɑɑ din piɑk bɑlyɑnɑ kul nbɑ nɑ pɑɑk,

³⁷k mɑɑn suɑ kul pinpɑɔk o tɑn sɑɑ nyinn’ɔ dɑɑl mɑnŋ ni. Suɑ kul pinpɑɔk o mun biɑ tɑn sɑɑ biil’ɔ.»

³⁸Ŋɑnn e k *senniwɑntieb nɑn Fɑɑliisiɑnnbɑ din yet Yiesu ɑ: «Wɑntuɑ, t luon k ɑ tun bɑktnɔunŋ *nyinn e k wɑnn’t.»

³⁹K u din jiin k yet’b ɑ: «Mɔtɑɑnɑ nigbounŋ nbɑ tie biitdɑnm k biɑ k tuun Yennu nbɑ luon lin nbɑ nɑ luon k bin lɑ bɑktnɔunŋ nyinn, ŋɑɑn b kɑn mi lɑ nyinsiɑl. Yennu sɔkni Suonɑ nyinbuolu nɑ kuukuɑ e k b sɑɑ lɑ.

⁴⁰K mɑɑn Suonɑ mɑnŋ nbɑ din be jɑngbenŋl puol ni yennu nɑn nyiɑɔk k sɑɑn jɑnŋ dɑɑ ŋɑntɑ nɑ, nnɑ e k min Nisɑɑlk Bijɑ mun tɑn sii be tinŋ ni yennu nɑn nyiɑɔk k sɑɑ jɑnŋ dɑɑ ŋɑntɑ.

⁴¹Yennu buut dɑɑl, Niiniif[16] tieb tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn Suonɑ mɑnŋ nbɑ din muɑnt Yennu mɑɑn k tul’b nɑ, b din mɔ kuɑŋɑɑn k lebt binbenŋ, k gotl mɑn, min nbɑ cie Suonɑ be nnɑ.

⁴²Yennu buut dɑɑl, puo nbɑ din tie kpɑnbɑl nɑ nbɑ din nyii gɑnŋ po nɑ mun biɑ tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn u din nyii digbɑnbɑnfɔkl e wɑɑ, k tɑn bɑɑl ɑ wun gbiint kpɑnbɑl Sɑɑlomɔn yɑnfuon nɑ pinpɑɔk, k gotl mɑn, min nbɑ cie Sɑɑlomɔn be nnɑ.»

⁴³«L i tie k nɑlnbiiuk tɑn nyii nilɔ ni, u tuu yiek e k lin mɔkuounŋ ni, k luon fuon buol, ŋɑɑn k k lɑɑt.

⁴⁴L pɑɑk, u tuu tɑn yet u mɔnŋ e ɑ: ‹N sɑɑ ŋmɑt sɑɑn ŋɑɑk nbɑ ni k n dɑɑn nyii ni e.› Yuo nbɑ k u tɑn bɑɑl, k lɑ k l duɑ yɑnn, k b piɑl k ŋɑnm ɑ,

⁴⁵u ji sɑɑ ŋmɑt nyi e k sɑɑ yiin nɑlnbiliet bɑnlole, bin nbɑ bi k cie u pɑɑk, k bɑɑl nɑn’m, k bin kuɑ k lɑkn kii be. Nilɔ mɑnŋ binbenŋ ji sii bi bonciɑnn k gɑl wɑɑ dɑɑn tuu bi sinsinn biɑnŋ nbɑ nɑ wɑɑ. L tɑn sii tie nnɑ e mɔtɑɑnɑ biitdɑnm nɑ pɑɑk.»

⁴⁶Yiesu nbɑ din dɑɑ piɑk k tien niib nɑ yuo nbɑ, k u nɑɑ nɑn u ninjɑnm bɑɑl k tɑn sie nɑn-yel po, k luon bin pɑk nɑn’ɔ.

⁴⁷Ŋɑnn e k suɑ din yet’ɔ ɑ: «Gotl, ɑ nɑɑ nɑn ɑ ninjɑnm sie nɑn-yel po, k luon k bin pɑk nɑn’ɑ.»

⁴⁸K Yiesu boi nilɔ nbɑ yet’ɔ lin nbɑ nɑ ɑ: «Ŋmee tie n nɑɑ? k lɑnm e biɑ tie n ninjɑnm i?»

⁴⁹ŋɑɑn din tɑnt u nuu k wɑnn u puolpoweitieb ŋɑɑn yet ɑ: «Gotl ii, n nɑɑ nɑn n ninjɑnm e nɑ.

⁵⁰K mɑɑn wun nbɑ kul tuun n Bɑɑ nbɑ be sɑnpɑɑpo nɑ lonm, ŋuɑ e tie n ninjɑ, nɑn n niipuo nɑn n nɑɑ.»