Read Moba Mɑɑtieo 13 Bible Online

Mɑɑtieo 13 - Moba bible

Mɑɑtieo 13

¹L dɑɑl mɑnŋ k Yiesu din nyii ŋɑɑk nɑ ni k sɑɑn k sɑɑ kɑl mɔkgbenŋl kpinŋ.

²K nibulciɑɔnŋ lɑkn u buol ni. Ŋɑnn e k u sɑɑn kuɑ kɑl bulgbetl ni, k nibulciɑɔnŋ nɑ din sie gbingbɑnn.

³K u din yin’m bɑljokt bonciɑnn k yet ɑ: «Jɑsuɑ din duo kpɑɑb ɑ wun sɑɑ bul tɑn.

⁴Wɑɑ din buul nɑ k bonbuoli nɑ yenn-nbɑ din yɑt bɑɑ sɑnjouk ni, k nuɑni bɑɑl k tɑn dii.

⁵K liel mun din bɑɑ tɑnpuut pɑɑk, siɑn nbɑ k tɑnt k yɑb k l din piɑ k kpɑɑt yiɑn ɑ, k mɑɑn tɑnt k yɑb lenŋ,

⁶ŋɑɑn yennu nbɑ din tɑn tonŋ yuo nbɑ, k l juɑk. Lɑɑ din k fit sikn jiinɑ nɑ pɑɑk, l kul din kpo e.

⁷K liel mun biɑ din bɑɑ kunkoni ni, k tɑn lɑkn piɑ k kpɑɑt, ŋɑɑn k kunkoni ŋmɑbl’l.

⁸Ŋɑɑn k liel mun din bɑɑ tinŋɑnŋ ni, k nɑn nɑɑnŋɑɔnŋ, k siɑb nɑn kobk kobk, k siɑb piinluob luob, k siɑb mun piintɑtɑ.

⁹«Wun nbɑ mɔk tubɑ, wun gbiint.»

¹⁰Ŋɑnn e k Yiesu *puolpoweitieb din bɑɑl u buol ni k tɑn boi’ɔ ɑ: «Bee k ɑ piɑk bɑljokt k tien niib nɑ?»

¹¹K u jiin k yet’b ɑ: «Yinm ŋɑnin, Yennu cɑb ɑ yin bɑnn wuol ni mɑɑn k jii jiin u nɑɑn po, ŋɑɑn ŋɑnm ŋɑnin, u k cɑb’b.

¹²Tɔn, wun nbɑ mɔk siɑl, ŋuɑ e sii lɑɑt k puki, k sii mɔk bonciɑnn, ŋɑɑn wun nbɑ k mɔk, u sɑɑ kɔnŋ lin nbɑ k u mɔk nɑ gbɑɑ.

¹³L pɑɑk e te k n yiin’m bɑljokt, k mɑɑn b goli e, ŋɑɑn k lɑɑt, k biɑ gbiɑ e, ŋɑɑn k bɑnt l pɑɑk.

¹⁴Nnɑ e k b ni, k lin nbɑ k *Yennu sɔkni Esɑɑyi din yet nɑ sɑɑ gbie ɑ: ‹I sɑɑ gbɑt, ŋɑɑn i kɑn bɑnn l pɑɑk. I sii goli, ŋɑɑn i kɑn bɑnn yɑɑ lɑ lin nbɑ nɑ.

¹⁵K mɑɑn niib nɑ yɑn dɔkn, b nyɑl b tubɑ, k biɑ mun b ninbinɑ e, k mɑɑn b k luon bin lɑ siɑl, k biɑ k luon bin gbɑt, k biɑ k luon ɑ b yɑn n dɔkt, k biɑ k luon bin ŋmɑt bɑɑl n buol ni, k min Yennu n tul’b lɑɑfiɑ.›

¹⁶«Tɔn, yinm ŋɑnin, pɑlpienn tie i yɑl e, k mɑɑn i ninbinɑ lɑɑt. Pɑlpienn biɑ tie i yɑl e, k mɑɑn i tubɑ gbiɑ mɑɑn.

¹⁷Ŋɑɑn bɑlmɔni e k n yien’i, Yennu sɔkniinbɑ nɑn yentinnɑ bonciɑnn din luon bin lɑ lin nbɑ k i lɑɑt nɑ, ŋɑɑn din k lɑ, k biɑ din luon bin gbɑt lɑbɑɑl nbɑ k i gbiɑ nɑ, ŋɑɑn din k gbɑt.»

¹⁸K Yiesu din yet u puolpoweitieb ɑ: «Gbiintl mɑn k bɑnn tɑnbultuɑ nɑ bɑljouk pɑɑk.

¹⁹Bin nbɑ gbiɑ Yennu nɑɑn lɑbɑɑl ŋɑɑn k k bɑnn l pɑɑk nɑ tie nɑn sɑnjokpinŋ nbɑ k bonbuoli bɑɑ lenŋ nɑ e, k *Klistu dɑtɑɑk bɑɑl k tɑn nyinn lin nbɑ bo kuɑ b pɑlɑ ni mɑnŋ.

²⁰Wun nbɑ gɑɑl bonbuoli nbɑ bɑɑ tɑnpuut pɑɑk tie wun nbɑ gbiɑ Yennu mɑɑn, k gɑɑl’l yiɑn ɑ nɑn pɑlpienn,

²¹ŋɑɑn k k nyik k l bɑɑ jiinɑ u ni k biɑ kɑn wei, k yuo nbɑ fɑlɑ nɑn muksuk bɑɑl u pɑɑk nɑ, u tuu bɑɑ e.

²²Wun nbɑ gɑɑl bonbuoli nbɑ bɑɑ kunkoni ni nɑ mun tie wun nbɑ gbiɑ Yennu mɑɑn nɑ, ŋɑɑn k tingbounŋ nɑ fɑlɑ nɑn mɔktuk lonm nyɑkn mɑɑn mɑnŋ u pɑl ni, k l kɑn nɑn.

²³Wun nbɑ gɑɑl bonbuoli tinŋɑnŋ ni nɑ tie nɑn wun nbɑ gbɑt Yennu mɑɑn nɑ, k bɑnn l pɑɑk, k l tɑn kpɑɑt k yenn-nbɑ nɑn kobk kobk, k liel nbɑ mun nɑn piinluobluob, liel mun biɑ nɑn piintɑtɑ nɑ e.»

²⁴K Yiesu biɑ din yin’m bɑljouk nɑ k pukn ɑ: «Yennu nɑɑn tie nɑn jɑsuɑ nbɑ din duo u kpɑɑb ni k sɑɑ bul dibuolŋɑni nɑ e.

²⁵K niib tɑn duɑl, k u dɑtɑɑk sɑɑn sɑɑ bul dinɑtimi k kuɑn dibuolŋɑni nɑ ni, ŋɑɑn yɑɑt.

²⁶Dii nɑ nbɑ din tɑn puk k ji mɑɑl yuo nbɑ, k b ji bɑnn nɑn dinɑtimi be lenŋ.

²⁷Ŋɑnn e k u ŋɑɑtuontunnɑ bɑɑl k tɑn boi’ɔ ɑ: ‹Cɑnbɑɑ, dibuolŋɑni kuukuɑ kɑɑ k ɑ dɑɑn bul ɑ kpɑɑb nɑ ni ii? Ŋɑɑn l tien nlee k dinɑtimi tɑn be lenŋ i?›

²⁸K u yet’b ɑ: ‹Dɑtɑsuɑ e tun nnɑ.› K b boi’ɔ ɑ: ‹K ɑ luon tin sɑɑn k sɑɑ ŋɑbl dinɑtimi mɑnŋ ii?›

²⁹Ŋɑnn e k u jiin ɑ: ‹Aɑi, k mɑɑn i yɑɑ yin ŋɑbl, i tɑn sɑɑ kpet ŋɑbl dimɔni e.

³⁰L pɑɑk, nyikn mɑn k lii be nɑn dijɑɑn-yuo, k dijɑɑn-yuo e k n tɑn sɑɑ yet dijɑɑntieb nɑ k bin cuɑ dinɑtimi nɑ sinsinn k puo’n k juo muu, ŋɑɑn kpen nɑn diŋɑni nɑ k tɑn wuun n dii sinsonŋ ni.› »

³¹K Yiesu biɑ din yin’m bɑljouk nɑ k pukn ɑ: «Yennu nɑɑn tie nɑn kpint tiik nbɑ k b yi’l *muutɑɑld nɑ binn nbɑ k nilɔ din jii k bul u kpɑɑb ni nɑ e.

³²L wɑɑl k gɑl bonbuoli kul sɑɑk ɑ, ŋɑɑn k l tɑn piɑ k kpɑɑt k yɑb kpint tiini kul ɑ, k tɑn tien tiik, k nuɑni bɑɑl k tɑn tiɑ tiɑt l yiini nɑ pɑɑk.»

³³K Yiesu biɑ din yin’m bɑljouk nɑ k pukn ɑ: «Yennu nɑɑn tie nɑn * dɑtinŋ nbɑ k puo jii k ŋmɑt nɑn pɑɑnu yon nbɑ yɑb, k lin tɑn miik k tɑn pukl nɑ e.»

³⁴Yiesu din yiin bɑljokt e k piɑk lin nbɑ nɑ kul ɑ k tien nibul mɑnŋ. U din k pɑk siɑl k tul’b k l k tie bɑljokt ni kɑɑ.

³⁵U din tun nnɑ, ɑ lin nbɑ k Yennu sɔkniisuɑ din sɔkn nɑ, lin tien gbien. Sɔkni nɑ din yet ɑ: «N tɑn sɑɑ yɑɑt n mɔb k yet nɑn bɑljokt e, k pɑk fiit wɑnn wuol ni bonɑ nbɑ din wuon k k nyii pɑɑnu *dulnyɑ piinu ni wɑɑ, k tɑn tuu mɔtɑɑnɑ nɑ.»

³⁶Ŋɑnn e k Yiesu din nyik nibul mɑnŋ lenŋ, ŋɑɑn sɑɑn kuɑ u ŋɑduɑtk ni. K u puolpoweitieb bɑɑl u buol ni k tɑn yet’ɔ ɑ: «Yet’t dinɑtimi bɑljouk nɑ pɑɑk.»

³⁷K u yet’b ɑ: «*Nisɑɑlk Bijɑ e tie wun nbɑ bul dibuolŋɑni nɑ.

³⁸Tingbounŋ nɑ e tie kpɑɑb nɑ, k dibuolŋɑni nɑ tie Yennu nɑɑn ni niib, ŋɑɑn k dinɑtimi nɑ mun tie Klistu dɑtɑɑk niib.

³⁹Dɑtɑɑk nbɑ bul dinɑtimi nɑ mun tie *Sɑɑtɑn, k dijɑɑn-yuo nɑ tie dulnyɑ nɑ gbennu yuo, k dijɑɑntieb nɑ mun tie Yennu *mɑlɑkɑɑnbɑ.

⁴⁰Biɑnŋ nbɑ k b tikl dinɑtimi nɑ k juo muu nɑ, nnɑ e k l tɑn sii tie dulnyɑ gbennu dɑɑl.

⁴¹Nisɑɑlk Bijɑ tɑn sɑɑ tun u mɑlɑkɑɑnbɑ k bin gɑnn nibiit kul nbɑ te k lieb tuun biit, nɑn biitdɑnm kul nbɑ be u yent ni,

⁴²k lu’b musɑɑkɑu ni. Lenŋ e k niib tɑn sii fɑbn mɔ k nyiitl nyɑnɑ.

⁴³Ŋɑɑn l yuo mɑnŋ, bin nbɑ tuun Yennu nbɑ luon bɑnnu nbɑ nɑ kul tɑn sii be b Bɑɑ nɑɑn ni e wɑɑ k nyili nɑn yennu nɑ. Wun nbɑ mɔk tubɑ, wun gbiint.»

⁴⁴«Yennu nɑɑn tie nɑn mɔktuk nbɑ din pii tinŋ ni suɑ kpɑɑb ni nɑ e, k jɑsuɑ tɑn bɑɑl lɑ k ŋɑnm gbiil tɑnt piin’l, ŋɑɑn sɑɑn nɑn pɑlpienn k sɑɑ kɔi wɑɑ mɔk lin nbɑ kul ɑ, k jen tɑn dɑɑ kpɑɑb mɑnŋ.»

⁴⁵«Tɔn, Yennu nɑɑn biɑ tie nɑn dɑɑkuɑlɔ nbɑ din kɑk lin luon pelilnbɑ nbɑ ŋɑn ɑ wun dɑɑ nɑ e.

⁴⁶U din sɑɑ lɑ yenn k l dɑɑɔk pɑɑl bonciɑnn, k u ŋmɑt sɑɑ kɔi wɑɑ mɔk lin nbɑ kul ɑ, k sɑɑn sɑɑ dɑɑ pelilnbɑ mɑnŋ.»

⁴⁷«Yennu nɑɑn biɑ tie nɑn jɑnlɑɑɔnŋ nbɑ k b tuu jii k lu nyun ni k suol jɑnbuolu buolu nɑ e.

⁴⁸L i gbie yuo nbɑ bin dɑt donn gbingbɑnn, k kɑl gɑnn jɑnŋɑni k tien kpɑncubt ni, ŋɑɑn lu jɑnbiit nɑ.

⁴⁹L tɑn sii tie nnɑ e dulnyɑ nɑ gbennu dɑɑl. Yennu mɑlɑkɑɑnbɑ tɑn sɑɑ bɑɑl e k gɑnn nifoŋɑnm, ŋɑɑn nyik nibiit.

⁵⁰B tɑn sɑɑ jii nibiit mɑnŋ k lu’b musɑɑkɑu ni. Lenŋ mɑnŋ e wɑɑ, k niib tɑn sii fɑbn mɔ k nyiitl nyɑnɑ.»

⁵¹Ŋɑɑn k Yiesu boi’b ɑ: «I bɑnn bɑljokt mɑnŋ kul pɑɑk ɑɑ?» K b sɑk ɑ: «Nnn.»

⁵²K u yet’b ɑ: «L pɑɑk, Yennu *senniwɑntuɑ nbɑ kul tumi Yennu nɑɑn po wɑnnu nɑ, u tie nɑn ŋɑɑdɑɑnɔ nbɑ nyint bonkpelɑ nɑn bonpɑɑnɑ u mɔktuk ni nɑ e.»

⁵³Yiesu nbɑ din yin bɑljokt nɑ k gbenn yuo nbɑ, k u nyii lenŋ

⁵⁴k kun u mɔnŋ mɔnŋ duo ni Nɑɑsɑɑlet, k sɑɑ tumi niib *Suifnbɑ jɑɑnti dieok ni. U wɑnnu mɑnŋ din tien niib nɑ bɑktnɔunŋ bonciɑnn, k b boi b lieb ɑ: «Lee k juɑ nɑ lɑ yɑnbuolu nɑ? Lee k u lɑ yiikuo k tuun bɑktnɔunŋ tuonjɑɑnɑ nɑ?

⁵⁵Kɑnpintɑ bik nɑ kɑɑ nɑ ɑɑ? U nɑɑ kɑɑ tie Mɑɑli nɑ ɑɑ? U ninjɑnm kɑɑ tie Sɑɑk nɑn Suosiɑf nɑn Siimɔn nɑn Suudɑ nɑ ɑɑ?

⁵⁶U niipuob kɑɑ k tinm nɑn ŋɑnm lɑkn be duo nɑ nɑ ɑɑ? U lɑ lin nbɑ nɑ kul lee?»

⁵⁷Lin nbɑ nɑ pɑɑk b din k tien’ɔ yɑdɑ. Ŋɑnn e k u din yet’b ɑ: «Yennu sɔkni k kɔnŋt nibɑɑkl, sie u mɔnŋ mɔnŋ duo ni, nɑn u ŋɑɑtieb buol ni.»

⁵⁸L pɑɑk, u din k tun bɑktnɔunŋ tuonjɑɑnɑ bonciɑnn lenŋ, k mɑɑn niib mɑnŋ nbɑ k tien’ɔ yɑdɑ nɑ pɑɑk.