Read Moba Mɑɑtieo 14 Bible Online

Mɑɑtieo 14 - Moba bible

Mɑɑtieo 14

¹L yuo mɑnŋ k Gɑɑliile kpɑnbɑl *Heluod din tɑn gbɑt k b piɑk Yiesu po,

²k u yet u tuontunnɑ ɑ: «Sɑn nbɑ dɑɑn wuul niib Yennu nyunwulu nɑ e nɑ. U fiil kuun ni e. L pɑɑk te k u mɔk yiikuo k tuun bɑktnɔunŋ tuonjɑɑnɑ nɑ.»

³Heluod ponŋ din yet u niib ɑ bin suol Sɑn nɑ, k bɑɑn’ɔ bɑnt k kuɑn’ɔ dɑnsɑlk ni. U din tun nnɑ u ninjɑ Fiiliip ŋɑɑpuo nbɑ k b yi’u Heluodiɑd nɑ pɑɑk e.

⁴K mɑɑn Sɑn din tuu yien Heluod ɑ: «Yennu *senni k cɑb’ɑ nɑn fɑn fɑt Heluodiɑd k kuɑn’ɔ.»

⁵Heluod din luon wun kpi Sɑn, ŋɑɑn tiin niib jɑŋmɑɑni, k mɑɑn suɑ kul ɑ mɑntk din tien yɑdɑ nɑn Sɑn tie *Yennu sɔkni e.

⁶K kpɑnbɑl Heluod mɑɑlu jɑɑnm dɑɑl tɑn bɑɑl, k Heluodiɑd bonpobik bɑɑl k tɑn wɑɑ siɑk jɑɑnm niib tuɑnn, k l mɑnŋ kpɑnbɑl Heluod bonciɑnn.

⁷L pɑɑk, k u pol mɔb ɑ u sɑɑ tul bonpobik nɑ lin nbɑ k u sɑɑ yet ɑ u luon nɑ kul ɑ.

⁸Ŋɑnn e k u nɑɑ Heluodiɑd wɑnn’ɔ wɑɑ sɑɑ boi lin nbɑ po, k bonpobik mɑnŋ yet kpɑnbɑl Heluod ɑ: «Potl Sɑn nbɑ wuul niib Yennu nyunwulu nɑ yul k kpien tɑtlɑɑɔk ni k tul’n.»

⁹Lin nbɑ nɑ din biil kpɑnbɑl nɑ pɑl ni hei, ŋɑɑn wɑɑ sɑt dɔnŋ pol mɔb sɑɑnm nɑ tuɑnn nɑ, k u cɑb ɑ bin sɑɑn tun nnɑ,

¹⁰k tun siɑb ɑ bin sɑɑn dɑnsɑlk ni, k sɑɑ pot Sɑn yul nɑ.

¹¹K b sɑɑn k sɑɑ pot u yul k kpien tɑtlɑɑɔk ni, k tɑn tul bonpobik mɑnŋ, k u mun gɑɑl sɑɑn tul u nɑɑ.

¹²Ŋɑnn e k Sɑn *puolpoweitieb bɑɑl k tɑn jii u gbɑnɑnt k pii, ŋɑɑn ji sɑɑn k sɑɑ yet Yiesu.

¹³Yiesu nbɑ gbɑt Sɑn kpinu po yuo nbɑ, k u fiil lenŋ k kuɑ bulgbetl, k puot kuɑ muuk ni. Nibulciɑɔnŋ nɑ nbɑ lɑ nnɑ mɑnŋ, k b nyii b doi ni k sonm tɑɑtinŋ k wɑɑ’u.

¹⁴Yiesu nbɑ sɑɑ nyii bulgbetl ni k lɑ nibul mɑnŋ nɑ, k ninbɑɑɔk suol’ɔ bonciɑnn, k u te k bin nbɑ yiɑl k be lenŋ nɑ kul ɑ pɑɑk.

¹⁵Yennu nbɑ tɑn mɑɑkt yuo nbɑ, k u puolpoweitieb bɑɑl u buol ni, k tɑn yet’ɔ ɑ: «Nnɑ nɑ tie muuk ni e, k yennu mun yɑɑ wun bɑɑ e. L pɑɑk, ŋɑɑnt k niib nɑ n sɑɑn digbɑnbis nbɑ kpiɑ nɑ k sɑɑ lɑ jiet k dɑɑ.»

¹⁶Ŋɑnn e k u yet’b ɑ: «B dɑɑ sɑɑ. I mɔnŋ n tul’b jiet k bin di.»

¹⁷K b yet’ɔ ɑ: «Pɑɑni ŋɑnŋmu nɑn jɑnbis ŋɑnle kuukuɑ e be t buol ni.»

¹⁸Ŋɑnn e k u yet’b ɑ: «Jiin nɑ mɑn k tul’n.»

¹⁹K u yet nibul nɑ ɑ bin lɑkn kɑl kɑl muɑt pɑɑk, ŋɑɑn jii pɑɑni ŋɑnŋmu nɑ, nɑn jɑnbis ŋɑnle nɑ, k gokt u yul sɑnpɑɑpo, ŋɑɑn tul Yennu niipuouk l pɑɑk, ŋɑɑn ŋmit ŋmit pɑɑni nɑ k tul u puolpoweitieb, k b jii tol nibul nɑ.

²⁰K b kul dii gbuo k tenn. K u puolpoweitieb lɑkn jiet nbɑ tenn nɑ, k l gbie kpɑncubt piik nɑn ŋɑnle.

²¹Niib nbɑ dii mɑnŋ din tie nɑn jɑb tusɑ ŋɑnŋmu nɑ, ŋɑɑn k puob nɑn wɑɑs kɑnn k pukn lenŋ.

²²L puolpo k Yiesu din te k u puolpoweitieb kuɑ bulgbetl nɑ ni k liit k sɑɑ u tuɑnn po puotl, ŋɑɑn k u biɑl ɑ wun cɑb nibul nɑ.

²³Wɑɑ cɑb nibul nɑ k gbenn yuo nbɑ, k u duo juɑl pɑɑk ɑ wun sɑɑ miɑl Yennu. K dɑɑjuouk tɑn bɑɑl k u biɑ dɑɑ be lenŋ u kuɑ.

²⁴L yuo k u puolpoweitieb ŋɑnin ji be bulgbetl nɑ ni e, k biɑ fɔk nɑn gbingbɑnn ɑ, k nyunpɑnɑ diɑ k lɑb’m, k mɑɑn b din toki wounŋ o.

²⁵L puolpo e k Yiesu tɑn sik nyun pɑɑk k sonm kojomuɑk, k sɑɑ b buol ni.

²⁶U puolpoweitieb nbɑ tɑn lɑ k u sonm nyun pɑɑk k bɑɑt nɑ, k jɑŋmɑɑni suol’b bonciɑnn, k b yɑɑ ɑ: «Gotl mɑn, funfɔntuk o.» ŋɑɑn yikn jɑŋmɑɑnwuyikni.

²⁷L tɑɑkpɑɑk ni k u yet’b ɑ: «Cien i pɑlɑ mɑn, l tie min e. I dɑɑ tiin jɑŋmɑɑni.»

²⁸K Piɑl jiin k yet’ɔ ɑ: «Yonmdɑɑnɔ, l i set kii tie fin i e, fɑn te k n sonm nyun nɑ pɑɑk k cet’ɑ.»

²⁹K u mun jiin yet Piɑl ɑ: «Bɑɑt nɑ.» K Piɑl nyii bulgbetl nɑ ni k sik nyun nɑ pɑɑk, k piin sonm ce Yiesu.

³⁰Wɑɑ lɑ k wounŋ pil nyunpɑnɑ k bɑɑt yuo nbɑ, k jɑŋmɑɑni suol’ɔ, k u piint kpii l yuo, ŋɑɑn yikn ɑ: «Yonmdɑɑnɔ, fiel’n.»

³¹L tɑɑkpɑɑk ni k Yiesu tɑnt u nuu k suol’ɔ, ŋɑɑn boi’ɔ ɑ: «Fin yɑdɑ-kɑnpuɑn-dɑɑnɔ nɑ, bee k ɑ bils’n i?»

³²Bɑɑ ŋmɑt sɑɑ kuɑ bulgbetl nɑ ni yuo nbɑ, k wounŋ nɑ nyik dɑnu.

³³K bin nbɑ din be bulgbetl nɑ ni bɑɑl k tɑn gbɑɑn jiɑntl Yiesu ŋɑɑn yien ɑ: «Bɑlmɔni e, ɑ set tie Yennu Bijɑ e.»

³⁴Yiesu nɑn u puolpoweitieb nbɑ sɑɑ bɑɑl mɔkgbenŋl nɑ puotl yuo nbɑ, k b nyii duo Genesɑɑlet.

³⁵Duo mɑnŋ tieb nbɑ din bɑnn Yiesu nɑ pɑɑk, k b muɑnt lenŋ mɑnŋ niib kul ɑ, k b tikl b bɑɑtb kul k bɑɑl nɑn’m u buol ni,

³⁶k tɑn bɑln’mɔ ɑ wun sɑk k bɑɑtb mɑnŋ n sii u liɑtfuouk mɔgbɑnn. K bin nbɑ sii’l nɑ kul ɑ din lɑ lɑɑfiɑ wɑɑ.