Read Moba Mɑɑtieo 16 Bible Online

Mɑɑtieo 16 - Moba bible

Mɑɑtieo 16

¹L puolpo k Fɑɑliisiɑnnbɑ nɑn *Sɑɑdiuseɑnbɑ bɑɑl Yiesu buol ni. Bɑɑ luon k bin jɑnm’ɔ nɑ pɑɑk, k b yet’ɔ ɑ wun tien bɑktnɔunŋ *nyinn k lin wɑnn nɑn u yiikuo set nyii Yennu buol ni e.

²K u jiin ɑ: «Dɑɑjomɑɑsl, l i tie k sɑnpɑgbɑnt mɔn kpein, i tuu yet ɑ: ‹Wonn ŋɑnin, dɑɑl won sii yien.›

³Ŋɑɑn l i tie k sɑnpɑgbɑnt mɔn ŋɑɑn tɑn bɔnt sɑn-nyiɑɔk ni, i tuu yet ɑ: ‹Dinnɑ ŋɑnin, sɑɑk sɑɑ bɑɑ wɑɑ.› I fit buktl sɑnpɑgbɑnt nyinɑ, ŋɑɑn kɑn fit bukt mɔtɑɑnɑ yuo nɑ.

⁴Mɔtɑɑnɑ niib, biitdɑnm nbɑ k wɑɑ Yennu nɑ luon k bin lɑ bɑktnɔunŋ nyinɑ, ŋɑɑn b kɑn lɑ nyinsiɑl l i kii tie Suonɑ nyinbuolu nɑ kuukuɑ i kɑɑ.» L puolpo k u siet k nyik’b ŋɑɑn yɑɑt.

⁵Tɔn, Yiesu nɑn u *puolpoweitieb nbɑ din sɑɑ mɔkgbenŋl puotl nɑ, k u puolpoweitieb nɑ ji tiɑl nɑn b k jii pɑɑnu.

⁶Ŋɑnn e k u yet’b ɑ: «Ii mi mɑn Fɑɑliisiɑnnbɑ nɑn Sɑɑdiuseɑnbɑ * dɑtinŋ po.»

⁷K b ji piin k yien b lieb ɑ: «Tɑɑ k bɑɑl nɑn pɑɑnu nɑ pɑɑk e te k u yien nnɑ mɑnŋ.»

⁸K Yiesu bɑnn bɑɑ yien lin nbɑ mɑnŋ, k u boi’b ɑ: «Yinm yɑdɑ-kɑnpuɑnɑ dɑnm nɑ, bee k i yien i lieb nɑn yɑɑ k bɑɑl nɑn pɑɑnu nɑ pɑɑk e?

⁹I biɑ lek dɑɑ k bɑnn l pɑɑk ii? I k tiɑn mɑɑ dɑɑn jii pɑɑni ŋɑnŋmu k dinn jɑb tusɑ ŋɑnŋmu nɑ ɑɑ? Kpɑncubt ŋɑnŋɑ e k i dɑɑn lɑkn jiet nbɑ tenn nɑ?

¹⁰K i biɑ k tiɑn jɑb tusɑ ŋɑnnɑ nbɑ k n dɑɑn jii pɑɑni ŋɑnlole dinn’b nɑ po oo? I dɑɑn lɑkn jiet nbɑ tenn nɑ k gbien cubt ŋɑnŋɑ e?

¹¹Bee k i k bɑnn nɑn l k tie pɑɑnu po kɑɑ k n piɑk i? Ii mi mɑn Fɑɑliisiɑnnbɑ nɑn Sɑɑdiuseɑnbɑ dɑtinŋ nɑ po.»

¹²Ŋɑnn e k u puolpoweitieb ji bɑnn nɑn l k tie dɑtinmɔnŋ po kɑɑ k u piɑk ɑ bii guu b mɔnŋ, ŋɑɑn l tie Fɑɑliisiɑnnbɑ nɑn Sɑɑdiuseɑnbɑ wɑnnu nɑ e k u piɑk l po.

¹³K Yiesu nbɑ din tɑn bɑɑl duo nbɑ k b yi Fiiliip Seesɑɑle nɑ ni yuo nbɑ, k u boi u puolpoweitieb ɑ: «Niib yɑɑ ɑ *Nisɑɑlk Bijɑ tie ŋmee?»

¹⁴Ŋɑnn e k b jiin ɑ: «Siɑb yɑɑ ɑ, ɑ tie Sɑn wun nbɑ dɑɑn wuul niib Yennu nyunwulu nɑ e, k siɑb yɑɑ ɑ, ɑ tie Elii e, k siɑb yɑɑ ɑ, ɑ tie Selemi e ɑmi *Yennu sɔkniisuɑ.»

¹⁵K u ji boi’b ɑ: «K yinm mun, i yɑɑ ɑ n tie ŋmee?»

¹⁶Ŋɑnn e k Siimɔn Piɑl jiin yet’ɔ ɑ: «Fin e tie mɑnfodɑɑnɔ Yennu Bijɑ *Klistu.»

¹⁷K Yiesu yet’ɔ ɑ: «Fin Siimɔn, Suonɑ bijɑ nɑ, pɑlpienn be ɑ pɑɑk, k mɑɑn nisɑɑlk kɑɑ fiit mɑɑn nɑ wɑnn’ɑ ni, ŋɑɑn n Bɑɑ nbɑ be sɑnpɑɑpo nɑ e fiit k wɑnn’ɑ.

¹⁸Fin Piɑl, min ŋɑnin yien’ɑ e, ɑ tie tɑnn e, k tɑnpiiuk nɑ pɑɑk e k n sɑɑ jii n jɑɑnti[18] k senn, k kuun kɑn fit nyɑnn’l.

¹⁹N sɑɑ tul’ɑ Yennu nɑɑn tɑnmɔb gɑnn pieni. L pɑɑk, lin nbɑ k ɑ tɑn lol tingbounŋ nɑ ni, ŋɑnn e k n Bɑɑ mun biɑ sɑɑ lol *Yendɔunŋ ni, k lin nbɑ k ɑ biɑ lot, ŋɑnn e k n Bɑɑ mun biɑ sɑɑ lot Yendɔunŋ ni.»

²⁰Ŋɑnn e k Yiesu yet u puolpoweitieb nɑ nɑn ninmɔnn ɑ bii mi k bin yet suɑ nɑn ŋuɑ e tie Klistu nɑ.

²¹Lɑɑ din nyii l yuo mɑnŋ k jii sɑɑ, k Yiesu piin k yien u puolpoweitieb ɑ: «Sie k n fɑbl k sɑɑn Selusɑɑlenm, ŋɑɑn t tinŋ ni sɑɑkɑb, nɑn Yennu mɑnntieb yudɑnm, nɑn *senniwɑntieb sɑɑ din’n fɑlɑ bonciɑnn, k biɑ tɑn sɑɑ kpi’n ɑ, ŋɑɑn dɑɑ ŋɑntɑ dɑɑl k n sɑɑ fiil kuun ni.»

²²K Piɑl yiin’ɔ kpinŋ po k sɑɑ kpil’ɔ ɑ: «Yonmdɑɑnɔ, Yennu n bɔl bonbiil nɑ k l dɑɑ bɑɑt ɑ pɑɑk.»

²³Ŋɑnn e k Yiesu jiɑnt yet Piɑl ɑ: «*Sɑɑtɑn nɑ, sietl nnɑ nɑ. A tie tɑngbiɑtkɑl e n sɔnu ni, k mɑɑn ɑ k duki lin nbɑ tie Yennu yɑl po, ŋɑɑn duki lin nbɑ tie nisɑɑli yɑl po,»

²⁴ŋɑɑn yet u puolpoweitieb ɑ: «Wun nbɑ i luon wun wei’n, sie k u yit u mɔnŋ sɑlk k jii u kuun dɑpunpunn kii wɑɑ’n,

²⁵k mɑɑn wun nbɑ k sɑk wun jii u mɑnfuol k tul’n, ŋuɑ e tɑn sɑɑ kɔnŋ’l, ŋɑɑn wun nbɑ yit u mɑnfuol sɑlk n pɑɑk, ŋuɑ e tɑn sɑɑ lɑ’l nɑn bɑlmɔni.

²⁶L i tie k nilɔ yen tingbounŋ nɑ mɔktuk kul ɑ, ŋɑɑn tɑn kɔnŋ u mɑnfuol, nyɔlɑnt po e k u sɑɑ lɑ? Suɑ sɑɑ fit jii siɑl k dɑɑ u mɑnfuol ii?

²⁷K mɑɑn Nisɑɑlk Bijɑ tɑn sɑɑ jen nɑn u Bɑɑ yiikuo, nɑn u *mɑlɑkɑɑnbɑ, k l yuo mɑnŋ u tɑn sɑɑ pɑ suɑ kul nɑn u tuonɑ nbɑ tie biɑnŋ nbɑ.

²⁸Bɑlmɔni e k n yien’i nɑ, siɑb be nnɑ, k dɑɑ kɑn kpo sie k b tɑn lɑ Nisɑɑlk Bijɑ nɑɑn dinu bɑɑlu.»