Read Moba Mɑɑtieo 17 Bible Online

Mɑɑtieo 17 - Moba bible

Mɑɑtieo 17

¹L puolpo e k l tɑn tien dɑɑ ŋɑnluob, k Yiesu jii Piɑl, nɑn Sɑɑk nɑn u ninjɑ Sɑn, k duo nɑn’m juɑl nbɑ fɔk bonciɑnn pɑɑk, b kuukuɑ.

²L yuo nɑ k b lɑ k u lebt, k u nunm po kpint nyili nɑn yennu nɑ, k u tiɑt penn k nyilk nɑn yentu nɑ.

³K b lɑ Muois nɑn Elii lekt yonm, k sie piɑk nɑn’ɔ.

⁴Ŋɑnn e k Piɑl yet’ɔ ɑ: «Yonmdɑɑnɔ, l ŋɑn nɑn tii be nnɑ nɑ. L i tie k ɑ bo sɑɑ sɑk, n bo sɑɑ fɑɑ lɑnbont ŋɑntɑ e, k yenn i tie ɑ yɑl, k liel i tie Muois yɑl, k liel i mun i tie Elii yɑl.»

⁵K Piɑl mɔb dɑɑ k bɑɑ tinŋ, k sɑnpɑgbɑnpieonŋ sik bɑkn b pɑɑk, k b gbɑt kunkɔsiɑl nyii sɑnpɑgbɑnn nɑ ni, k yet ɑ: «N Bilonkɑk e nɑ, wun nbɑ k n nunm gbuo’u nɑ. Gbiintl u mɔb mɑn.»

⁶K Yiesu *puolpoweitieb nɑ nbɑ gbɑt kunkɔl mɑnŋ nɑ, k jɑŋmɑɑni suol’b, k b bɑɑ wokn tinŋ ni.

⁷K Yiesu bɑɑl k tɑn yii yii’b, ŋɑɑn yet’b ɑ: «Fiit mɑn. I dɑɑ tiin jɑŋmɑɑni.»

⁸K b gokt b yulɑ, ŋɑɑn ji k lɑ suɑ b buol, sie Yiesu kuukuɑ.

⁹Bɑɑ nyii juɑl nɑ pɑɑk k sik yuo nbɑ, k Yiesu yet’b nɑn ninmɔnn ɑ: «I dɑɑ yien suɑ lin nbɑ k i lɑ nɑ, k sɑɑ tuu yuo nbɑ k *Nisɑɑlk Bijɑ nɑ tɑn sɑɑ fiil kuun ni.»

¹⁰Ŋɑnn e k u puolpoweitieb boi’ɔ ɑ: «Bee k *senniwɑntieb yɑɑ ɑ sie k *Yennu sɔkni Elii bɑɑl *Klistu sinsinn i?»

¹¹K u jiin yet’b ɑ: «L set tie mɔni e nɑn sie k Elii mɑnŋ bɑɑl sinsinn k tɑn ŋɑnm bonsiɑl kul k senn’l l sɔnu ni.

¹²Ŋɑɑn min e yien’i nɑ, Elii ponŋ bɑɑl nɑ, ŋɑɑn b k bɑn nɑn l tie ŋuɑ e, k diɑ’u gbɑkɑ gbɑkɑ nnɑ, nɑn bɑɑ luon biɑnŋ nbɑ. Nnɑ e k b mun biɑ sɑɑ tien Nisɑɑlk Bijɑ nɑ, k din’ɔ fɑlɑ.»

¹³Ŋɑnn e k u puolpoweitieb ji bɑnn nɑn u piɑk Sɑn wun nbɑ dɑɑn wuul niib Yennu nyunwulu nɑ po e.

¹⁴K Yiesu nɑn u puolpoweitieb bɑntɑ mɑnŋ tɑn bɑɑl nibulciɑɔnŋ nɑ buol, k jɑsuɑ bɑɑl k tɑn gbɑɑn Yiesu tuɑnn, ŋɑɑn yet’ɔ ɑ:

¹⁵«Yonmdɑɑnɔ, tinin n bijɑ nɑ ninbɑɑɔk, k mɑɑn u bɑɑ gbitgbiil e. L dɑɑmi’ɔ bonciɑnn k u tun bɑɑ muu ni, k biɑ tun bɑɑ nyun ni yuo kul ɑ.

¹⁶K n bɑɑl nɑn’ɔ ɑ puolpoweitelieb buol ni, k b gbɑl u tebu.»

¹⁷K Yiesu boi’b ɑ: «Yinm mɔtɑɑnɑ niib nbɑ mɑntk kɑɑ yɑdɑ, k biɑ k wɑɑ Yennu fɑnu nɑ, n sɑɑ wei nɑn’i nlee? Yuo nlee k n sɑɑ di suklu nɑn’i mɑntk i? Bɑɑt mɑn nɑn bik mɑnŋ nnɑ.»

¹⁸K Yiesu tiɑn nɑlnbiiuk nɑ pɑɑk, k u ciɑl nyii ŋɑɑn nyik bik nɑ, k u pɑɑk kenken l yuo nɑ.

¹⁹L puolpo, k Yiesu puolpoweitieb bɑɑl u buol, b kuukuɑ, k tɑn boi’ɔ ɑ: «Bee k tinm ŋɑnin bo k fit nyinn nɑlnbiiuk mɑnŋ i?»

²⁰K u jiin yet’b ɑ: «I yɑdɑ kɑɑln pɑɑk. Bɑlmɔni e k n yien’i nɑ, l i tie k i tien Yennu yɑdɑ k l yɑb nɑn junjukl binn nɑ, i sɑɑ fit yet juɑl nɑ ɑ: ‹Fiit k sɑɑ bɑɑ nɑ wɑɑ,› k l set sɑɑ fiil e. I bo sɑɑ fit tun bonsiɑl kul ɑ.

²¹Ŋɑɑn nɑlnbiiuk nɑ buolu ŋɑnin, i kɑn fit nyinn’l, sie k i lol mɔi k mei Yennu.»

²²Tɔn, Yiesu puolpoweitieb nbɑ tɑn lɑkn lieb Gɑɑliile tinŋ ni nɑ, k u yet’b ɑ: «B tɑn sɑɑ jii Nisɑɑlk Bijɑ k kubn’ɔ niib nuu ni

²³k b sɑɑ kpi’u, ŋɑɑn dɑɑ ŋɑntɑ dɑɑl k u biɑ sɑɑ fiil kuun ni.» K l ji biil u puolpoweitieb pɑlɑ ni bonciɑnn.

²⁴K Yiesu nɑn u puolpoweitieb nbɑ tɑn bɑɑl Kɑpelnɑunm yuo nbɑ, k Yennu jɑɑnti ŋɑsɑɑkɑk likgɑɑltieb bɑɑl k tɑn boi Siimɔn Piɑl ɑ: «A wɑntuɑ k pɑ likli mɑnŋ ii?»

²⁵K Piɑl jiin ɑ: «U pɑ,» ŋɑɑn kuɑ ŋɑɑk ni. L yuo nɑ k Yiesu dɔnŋ piin l mɑɑn k boi’ɔ ɑ: «Siimɔn, ɑ duki nlee? Lɑnm e tuu pɑ lɑnpo k tien tingbounŋ nɑ kpɑnbɑlɑ, b mɔnŋ buolu ni niib ɑmi sɑɑnm i?»

²⁶K u jiin ɑ: «Sɑɑnm e.» K Yiesu yet’ɔ ɑ: «Tɔn, l i tie nnɑ i e, l wɑnt nɑn b mɔnŋ buolu ni nuu kɑɑ l ni.

²⁷Ŋɑɑn tɑɑ k luon k tin donn b wutuol nɑ pɑɑk, i sɑɑ mɔkgbenŋl nɑ ni, k sɑɑ lu jɑnpienu k dɑt jɑnŋ nbɑ k ɑ suol’ɔ sinsinn nɑ k donn. L i tie k ɑ yɑɑt u mɔb, ɑ sɑɑ lɑ likli nbɑ sɑɑ fit pɑ min nɑn fin pɑɑk, k fɑn jii k pɑ’b.»