Read Moba Mɑɑtieo 18 Bible Online

Mɑɑtieo 18 - Moba bible

Mɑɑtieo 18

¹L yuo nɑ k Yiesu *puolpoweitieb bɑɑl u buol ni k tɑn boi’ɔ ɑ: «Ŋmee tie nijɑɑnn Yennu nɑɑn ni?»

²K u yiin bik nnɑ k tɑn senn’ɔ b sinsuuk ni,

³ŋɑɑn yet’b ɑ: «Bɑlmɔni e k n yien’i nɑ, wun nbɑ k lebt u binbenŋ k l tie nɑn bik binbenŋ nɑ, u kɑn kuɑ Yennu nɑɑn ni kɑɑ wɑɑ.

⁴Wun nbɑ siknt u mɔnŋ k tie nɑn bik nɑ, ŋuɑ e tɑn sii tie sɑɑkuɑ Yennu nɑɑn ni.

⁵Wun nbɑ gɑɑl bik nɑ buolu n sɑnn pɑɑk, min e k u gɑɑl’n.»

⁶«Wɑɑs nbɑ tien’n yɑdɑ nɑ ŋɑnin, wun nbɑ te k b yenɔ kuɑ tun biit, b i bo i lɑnn nɑɑl l dɑɑnɔ tulu ni k tut’ɔ nɑn’n k lu’u mɔkgbenŋl ni gbɑɑ k u dii nyun, l bo sii sɔ k tul’ɔ.

⁷Bonbiil sii be tingbounŋ nɑ tieb nbɑ kpɑnn b lieb k b tuun tuonbiit nɑ pɑɑk. Jinjɑnmi set sɑɑ bɑɑl, ŋɑɑn l sii bi k tien wun nbɑ te k jinjɑnmi bɑɑt niib pɑɑk.

⁸«L i tie k ɑ nuu ɑmi ɑ tɑɑpɑɔnŋ te k ɑ tuun biit, fɑn pot’l k lu. L i tie k ɑ mɔk nuu yenu kuɑ, ɑmi tɑɑpɑn-yenn kuɑ, k lɑ mɑnfuol nbɑ kɑɑ gbennu, l cie nɑn fii mɔk ɑ nii kul nɑn ɑ tɑɑ kul ŋɑɑn Yennu n tɑn kuɑn’ɑ muu nbɑ kɑn mi kpien nɑ ni.

⁹A ninbinn i te k ɑ tuun biit, fɑn kpɑkl’ɔ k lu bɑnfɔkl ɑ. L i tie k ɑ mɔk ninbin-yenn k lɑ mɑnfuol mɑnŋ, l cie nɑn fii mɔk ninbinɑ ŋɑnle ŋɑɑn Yennu n tɑn kuɑn’ɑ muu mɑnŋ ni.»

¹⁰«Ii mi mɑn k suɑ n siɑn wɑɑs mɑnŋ ni yenɔ kuɑ. K mɑɑn n yien’i e, b *mɑlɑkɑɑnbɑ nbɑ be sɑnpɑɑpo nɑ be n Bɑɑ tuɑnn yuo kul.

¹¹K mɑɑn *Nisɑɑlk Bijɑ bɑɑl ɑ wun tɑn fiel bin nbɑ bot e.

¹²«I duki nlee? L i tie k nilɔ mɔk pei kobk, k yenɔ kuɑ tɑn bot, u kɑn nyik pei piin-yiɑ nɑn bɑn-yiɑ nɑ juɑl pɑɑk, ŋɑɑn sɑɑn k sɑɑ lon pebotkɑɔk nɑ ɑɑ?

¹³U lɑ’u yuo nbɑ, bɑlmɔni e k n yien’i nɑ, u sii mɔk pɑlpienn nɑn mɔni pebotkɑɔk nbɑ k u lɑ’u nɑ pɑɑk, k gɑl pei piin-yiɑ nɑn bɑn-yiɑ nbɑ k bot nɑ pɑɑk.

¹⁴Nnɑ e mun k i Bɑɑ nbɑ be sɑnpɑɑpo nɑ k luon k wɑɑs nɑ ni yenɔ kuɑ n bot.»

¹⁵«A nɑɑ bik i tun siɑl k biil’ɑ, fɑn sɑɑn u buol ni yuo nbɑ k u dɑɑ be u kuukuɑ nɑ, k pɑk wɑnn’ɔ u biit, k l i tie k u bɑnn u biit, i biɑ ŋɑnm tien nɑɑ wɑɑs e nɑ.

¹⁶Ŋɑɑn l i tie k u k sɑk wun gbɑt tul’ɑ ni, fɑn yiin niyenɔ ɑmi niib bɑnle k pukn ɑ pɑɑk k yin sɑɑn u buol ni nɑn Yennu lolkpel kɑdɑɑɔk nbɑ wɑnt bɑnnu nbɑ, ɑ niib bɑnle ɑmi bɑntɑ mɑnŋ n gbɑt mɑɑn mɑnŋ k tien ɑ siɑlɑɑdɑnm.

¹⁷L i tie k u biɑ k sɑk wun gbɑt k tul’b, fɑn pɑk k wɑnn jɑɑnti niib kul ɑ, k l i tie k u biɑ k sɑk nɑn wun gbɑt k tul Yennu niib, yin ji ŋɑɑn k wuu tie nɑn *lɑnpogɑɑltuɑ nɑ ɑmi wun nbɑ k tie Yenweilɔ nɑ.»

¹⁸«Bɑlmɔni e k n yien’i nɑ, lin nbɑ k i tɑn lol tingbounŋ nɑ ni, ŋɑnn e k n Bɑɑ mun biɑ sɑɑ lol *Yendɔunŋ ni, k lin nbɑ k i biɑ lot, ŋɑnn e k n Bɑɑ mun biɑ sɑɑ lot Yendɔunŋ ni.

¹⁹«N biɑ yien’i e nɑ, i ni bɑnle i tɑɑn mɔb tingbounŋ nɑ ni k mei n Bɑɑ nbɑ be sɑnpɑɑpo nɑ siɑl pɑɑk, u sɑɑ tun yɑɑ luon biɑnŋ nbɑ k tul’i wɑɑ.

²⁰K mɑɑn siɑn nbɑ k niib bɑnle ɑmi bɑntɑ tɑɑn lɑkn n sɑnn ni, n be b sinsuuk ni.»

²¹Ŋɑnn e k Piɑl bɑɑl Yiesu buol ni k tɑn boi’ɔ ɑ: «Yonmdɑɑnɔ, l i tie k n nɑɑ bik tun’n biit, tɑɑl munŋɑ e k n nyik cɑb’ɔ? Tɑɑl munlole ee?»

²²K Yiesu jiin ɑ: «Aɑi, tɑɑl munlole kuukuɑ kɑɑ, ŋɑɑn tɑɑl piinlole k sɑɑ jɑnŋ tɑɑl munlole.

²³L pɑɑk, Yennu nɑɑn tie nɑn kpɑnbɑlsuɑ nbɑ din tɑn yiin u ŋɑɑtuontunnɑ ɑ wun gɑɑl u pɑnɑ nɑ e.

²⁴Wɑɑ piin kɑnu yuo nbɑ k b kuɑ nɑn jɑsuɑ nnɑ, k u diɑ kpɑnbɑl nɑ pɑnn tɑɑlɑnnbɑ tusɑ piik (10.000).

²⁵K u kɑn fit lɑ k pɑ, k kpɑnbɑl nɑ tul mɔb ɑ bin kɔi ŋuɑ nɑn u ŋɑɑpuo nɑn u wɑɑs, nɑn wɑɑ mɔk lin nbɑ kul ɑ, k tɑn pɑ pɑnn mɑnŋ.

²⁶Ŋɑnn e k juɑ mɑnŋ gbɑɑn kpɑnbɑl nɑ tuɑnn ni nɑn bɑlunŋ, ŋɑɑn yien ɑ: ‹Cɑnbɑɑ, n sɑɑ pɑ l kul ɑ. Lek din suklu.›

²⁷K ninbɑɑɔk suol kpɑnbɑl nɑ bonciɑnn, k u cɑb’ɔ nɑn pɑnn mɑnŋ, ŋɑɑn ŋɑɑ’u.

²⁸«Juɑ mɑnŋ nbɑ ŋɑnin nyii yuo nbɑ, k u cet u tuontunluɑ, k u mun diɑ u pɑnn denienbɑ kobk (100), k u cek u kunkɔl ni k ŋmɑki, ŋɑɑn yien’ɔ ɑ: ‹Pɑn n pɑnn nɑ.›

²⁹K u luɑ nɑ mun gbɑɑn u tuɑnn ni nɑn bɑlunŋ, k yien ɑ: ‹Din suklu, k n sɑɑ pɑ’ɑ wɑɑ.›

³⁰K juɑ nɑ ŋɑnin ji k sɑk u luɑ nɑ bɑlunŋ nɑ, ŋɑɑn te k b jii’u k kuɑn’ɔ dɑnsɑlk, ɑ sie k u tɑn pɑ pɑnn nɑ wɑɑ, k wun nyinn’ɔ.

³¹K u tuontunlieb nɑ nbɑ lɑ nnɑ yuo nbɑ, k l biil b pɑlɑ ni bonciɑnn, k b ŋmɑt k sɑɑ yet kpɑnbɑl nɑ lin nbɑ kul tun mɑnŋ.

³²K kpɑnbɑl nɑ tun ɑ bin yiin juɑ mɑnŋ nɑ, ŋɑɑn piin u sukt ɑ: ‹Fin bon-yuonn nɑ, fɑɑ bo bɑln’n nɑ pɑɑk, k n cɑb› ɑ fɑɑ diɑ n pɑnn nbɑ kul.

³³L mun bo ŋɑn nɑn fɑn cɑb *ɑ luɑ nɑ k tin’ɔ ninbɑɑɔk, nɑn mɑɑ bo cɑb’ɑ biɑnŋ nbɑ nɑ.›

³⁴K kpɑnbɑl nɑ wutuol nbɑ duo bonciɑnn biɑnŋ nbɑ nɑ, k u jii juɑ mɑnŋ k sɑɑn kuɑn’ɔ dɑnsɑlk ɑ bin ŋmɑnn u tubl k wuu be lenŋ k sɑɑ tuu dɑɑl nbɑ k u tɑn sɑɑ pɑ pɑnn nɑ kul.»

³⁵Bɑljouk nɑ puolpo k Yiesu ji yet ɑ: «L i tie k i k nyikt cɑbt i lieb nɑn i pɑlɑ kul, nnɑ e k n Bɑɑ nbɑ be sɑnpɑɑpo nɑ sɑɑ tien yinm mun.»