Read Moba Mɑɑtieo 19 Bible Online

Mɑɑtieo 19 - Moba bible

Mɑɑtieo 19

¹Yiesu nbɑ pɑk mɔbonɑ nɑ k gbenn yuo nbɑ, k u nyii Gɑɑliile k sɑɑn Suude tinŋ nbɑ be *Suulden mɔk-puotl.

²K nibulciɑɔnŋ wɑɑ u puolpo, k u te k bin nbɑ yiɑl nɑ kul ɑ pɑɑk lenŋ.

³K Fɑɑliisiɑnnbɑ siɑb bɑɑl u buol ni k luon bin jɑnm’ɔ, k boi’ɔ ɑ: «Yennu *senni cɑbt nɑn juɑ n yet u ŋɑɑpuo yɑnn ii?»

⁴K u jiin ɑ: «I k lii Yennu lolkpel kɑdɑɑɔk nbɑ yet biɑnŋ nbɑ nɑ ɑɑ? ɑ: ‹Piinu ni wɑɑ, Yennu din nɑn juɑ nɑn puo e,

⁵ŋɑɑn din yet ɑ, Lin nbɑ nɑ pɑɑk e k juɑ tuu sɑɑ nyik u bɑɑ nɑn u nɑɑ, ŋɑɑn k ŋuɑ nɑn u ŋɑɑpuo n kuɑn lieb, k b niib bɑnle n tɑɑn tien gbɑnɑn-yent kuɑ.›

⁶L i tie nnɑ, b ji k tie niib bɑnle kɑɑ, ŋɑɑn b tie niyenɔ kuɑ e. L pɑɑk, bin nbɑ k Yennu jii’b k tɑɑn nɑn lieb, nisɑɑlk i mi k wun bɔkt’b.»

⁷K Fɑɑliisiɑnnbɑ nɑ boi’ɔ ɑ: «Bee k Muois ŋɑnin din tul yiikuo u senni nɑ ni, nɑn juɑ sɑɑ fit tul u ŋɑɑpuo puoyetu kɑdɑɑɔk ŋɑɑn yet’ɔ?»

⁸K Yiesu jiin k yet’b ɑ: «I tonu pɑɑk e te k Muois din tul yiikuo ɑ yii yien i ŋɑɑpuob, ŋɑɑn piinu ni l din k tie nnɑ kɑɑ.

⁹Bɑlmɔni e k n yien’i, wun nbɑ yet u ŋɑɑpuo, k l k tie u tun * boncuncontuonn kɑɑ, ŋɑɑn kuɑn puogɑnɔ, u tun boncuncontuonn ɑ.»

¹⁰K Yiesu *puolpoweitieb yet’ɔ ɑ: «L i tie nnɑ i e juɑ nɑn u ŋɑɑpuo sinsuuk ni, ŋɑnn ŋɑnin juɑ i kii kuɑn puo, l sɔ.»

¹¹K u yet’b ɑ: «Suɑ kul kɑn fit diɑ wɑnnu mɑnŋ. Bin nbɑ k Yennu tul’b l yiikuo nɑ, ŋɑnm kuukuɑ e sɑɑ fit diɑ’l.

¹²K mɑɑn bonɑ bonciɑnn e te k jɑsiɑb k kuɑnt puob. B tuu mɑl siɑb, k b k tie jɑb. Siɑb mun, niib e tuu tien’m jɑtuɑkɑ, k siɑb mun, Yennu nɑɑn pɑɑk e tuu te bin yet puo kuɑnu, ŋɑɑn wun nbɑ sɑɑ fit diɑ wɑnnu mɑnŋ, wun diɑ’l.»

¹³Tɔn, k nisiɑb tɑn bɑɑl nɑn b wɑɑs Yiesu buol ni, ɑ wun yii u nii b pɑɑk, k miɑl Yennu b pɑɑk, ŋɑɑn k u puolpoweitieb tiɑn niib mɑnŋ pɑɑk.

¹⁴K Yiesu yet ɑ: «Ŋɑɑnt mɑn k wɑɑs mɑnŋ i bɑɑt n buol ni nɑ, k dɑɑ tiɑn’m, k mɑɑn b buolu e yen Yennu nɑɑn,»

¹⁵ŋɑɑn jii u nii k yii yii b pɑɑk, ŋɑɑn ji siet sɑɑn.

¹⁶L yuo mɑnŋ k nɑɑsimɔ nnɑ bɑɑl Yiesu buol ni k tɑn boi’ɔ ɑ: «Wɑntuɑ, tuonŋɑnlɑnn po e k n sɑɑ tun, k lɑ mɑnfuol nbɑ kɑɑ gbennu?»

¹⁷K Yiesu jiin’ɔ ɑ: «Bee k ɑ boi’n lin nbɑ ŋɑn po? Yenɔ kuɑ e ŋɑn, l i tie k ɑ luon k ɑ kuɑ mɑnfuol ni, ii diɑ Yennu senni nɑ.»[19]

¹⁸K nɑɑsimɔ nɑ boi Yiesu ɑ: «Senlɑni po e?» K u yet’ɔ ɑ: «Dɑɑ kpi nilɔ. Dɑɑ tuun boncuncontuonɑ. Dɑɑ jɑɑn. Dɑɑ tie fɑɑk siɑlɑ.

¹⁹Ii tien ɑ bɑɑ nɑn ɑ nɑɑ nibɑɑkl, ŋɑɑn kii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.»

²⁰K nɑɑsimɔ nɑ yet’ɔ ɑ: «N ponŋ wei senni nɑ kul ɑ. Lɑnn po e k n biɑ sɑɑ tun pukn lin nbɑ nɑ pɑɑk i?»

²¹K Yiesu jiin’ɔ ɑ: «L i tie k ɑ luon k ɑ binbenŋ i tie fɑnu nɑn bɑlmɔni, fii sɑɑ k sɑɑ kɔi fɑɑ mɔk lin nbɑ k jii l likli mɑnŋ k tul tɑlɑs-dɑnm, k ɑ tɑn sɑɑ lɑ mɔktuk sɑnpɑɑpo. L puolpo k ɑ jen nɑ kii wɑɑ’n.»

²²K nɑɑsimɔ nɑ nbɑ gbɑt nnɑ yuo nbɑ, k u siet nɑn pɑlbiil, k mɑɑn u din mɔk mɔktuk bonciɑnn.

²³Ŋɑnn e k Yiesu ji yet u puolpoweitieb ɑ: «Bɑlmɔni e k n yien’i nɑ, l sii pɑɑl bonciɑnn nɑn mɔktɔ n kuɑ Yennu nɑɑn ni.

²⁴L pɑɑl nɑn yuyouk n kuɑ kpɑlpienu miɑl ni, ŋɑɑn l biɑ mɑntk pɑɑl k cie nɑn mɔktɔ n kuɑ Yennu nɑɑn ni.»

²⁵K u puolpoweitieb nbɑ gbɑt nnɑ mɑnŋ, k l yɑɑl ŋɑɑn lit’b bonciɑnn, k b piin k boi b lieb ɑ: «L i tie nnɑ i e, ŋmee ji sɑɑ fit k lɑ fielu?»

²⁶Ŋɑnn e k Yiesu got’b ŋɑɑn yet ɑ: «Nisɑɑlk kɑn fit tun lin nbɑ nɑ, ŋɑɑn siɑl k pɑɑl Yennu buol ni.»

²⁷L yuo nɑ k Piɑl yet’ɔ ɑ: «Gotl, tinm ŋɑnin nyik t bonsiɑl kul ɑ ŋɑɑn wɑɑ’ɑ. T nyuɑt tɑn sii tie bee?»

²⁸Ŋɑnn e k Yiesu jiin k yet’b ɑ: «Bɑlmɔni e k n yien’i nɑ, yuo nbɑ k *Nisɑɑlk Bijɑ nɑ tɑn kɑl u nɑɑngbɑnt pɑɑk nɑn pɑnŋ bonciɑnn *dulnyɑ pɑɑnn nɑ ni, yinm nbɑ tie u tuomiinbɑ nɑ mun tɑn sɑɑ kɑl nɑɑngbɑnt piik nɑn ŋɑnle pɑɑk e, kii bu Islɑɑeltieb buolu piik nɑn ŋɑnle nɑ buut.

²⁹K wun nbɑ kul nyik u ŋɑɑk, ɑmi u yuɑlb, ɑmi u wɑɑli, ɑmi u bɑɑ, ɑmi u nɑɑ, ɑmi u wɑɑs, ɑmi u kpɑɑnt, n pɑɑk, u tɑn sɑɑ lɑ bonɑ buolu buolu tɑɑl fuunu kobk kobk, k biɑ lɑ mɑnfuol nbɑ kɑɑ gbennu.

³⁰Ŋɑɑn niib bonciɑnn nbɑ dɔnŋ gɑl tuɑnn mɔtɑɑnɑ nɑ, b tɑn sɑɑ jil puol ɑ, k bonciɑnn nbɑ mun biɑ juont puol mɔtɑɑnɑ nɑ tɑn sɑɑ dɔnŋ gɑl tuɑnn ɑ.»