Read Moba Mɑɑtieo 2 Bible Online

Mɑɑtieo 2 - Moba bible

Mɑɑtieo 2

¹Mɑɑli din mɑl Yiesu dosɑu nnɑ ni, k b yi’l Betlehenm, k l be Suude tinŋ ni. U din mɑl’ɔ kpɑnbɑl *Heluod yuo e. L yuo nɑ k bɑntesiɑb[4] din nyii yendopo k bɑɑl Selusɑɑlenm,

²k tɑn boi niib ɑ: «Islɑɑeltieb kpɑnbɑl nbɑ k b mɑl’ɔ nɑ, u be lee? T dɑɑn lɑ u ŋmɑɑbil e yendopo k bɑɑl nɑ ɑ t tɑn jiɑnt’ɔ.»

³Kpɑnbɑl Heluod nbɑ din gbɑt nnɑ mɑnŋ, k l biil ŋuɑ nɑn Selusɑɑlenmtieb kul pɑlɑ ni.

⁴K u din yiin Yennu mɑnntieb yudɑnm nɑn *senniwɑntieb k tɑn boi’b ɑ: «Lee k b sɑɑ mɑl *Klistu nɑ?»

⁵K b jiin’ɔ ɑ: «Betlehenm duo nbɑ be Suude tinŋ ni nɑ, k mɑɑn *Yennu sɔkni nɑ din diɑn ɑ:

⁶‹Fin Betlehenm nbɑ be Suudɑ tinŋ ni nɑ, ɑ k tie tinbik kɑɑ Suudɑ yiɑl ni, k mɑɑn Kpɑnbɑlsuɑ tɑn sɑɑ nyi ɑ ni e, k ŋuɑ e tɑn sii tie n niib Islɑɑeltieb nɑ pekpɑɑlk.›»

⁷Lin nbɑ nɑ puolpo e k kpɑnbɑl Heluod din yiin bɑntieb mɑnŋ wuol ni, k tɑn boi’b k fiit’b fɑnu ɑ wun bɑnn yuo nbɑ k ŋmɑɑbil nɑ dɑɑn nyii,

⁸k din yet’b: «Ii sɑɑ mɑn Betlehenm k sɑɑ lon bik mɑnŋ fɑnu. Yuo nbɑ k i lɑ’u, yin jen ɑ k tɑn yet’n k n mun sɑɑn k sɑɑ jiɑnt’ɔ.»

⁹Kpɑnbɑl nɑ nbɑ din pɑk nnɑ k gbenn yuo nbɑ, k b nyii k suol sɔnu. Bɑɑ din sɑɑ mɑnŋ k b lɑ ŋmɑɑbil nbɑ dɑɑn nyii yendopo nɑ, k l gɑl b tuɑnn po k sɑɑ set bik mɑnŋ nbɑ be ŋɑɑk nbɑ nɑ ni, l sɑnpɑɑpo.

¹⁰Bɑɑ lɑ ŋmɑɑbil mɑnŋ nɑ, k b pɑlɑ ni penn bonciɑnn.

¹¹K b kuɑ ŋɑɑk mɑnŋ ni, k lɑ bik mɑnŋ nɑn u nɑɑ Mɑɑli. Ŋɑnn e k b gbɑɑn k jiɑnt bik mɑnŋ, ŋɑɑn biit b pɑkɑ k nyinn piini k tul’ɔ. Piini mɑnŋ din tie sɑlmɑ nɑn tulɑɑlnyun nɑn tulɑɑlsiɑl nnɑ k b yi’l miil[5].

¹²Tɔn, k Yennu din pɑk k tul’b b dɑmiit ni, ɑ b ji dɑɑ ŋmɑt kpɑnbɑl Heluod buol ni. L pɑɑk, k b ji din tɔkn sɑnjogɑɔnŋ k ŋmɑt kun b duo ni.

¹³Bɑntieb nɑ nbɑ din kun nɑ puolpo e k Yonmdɑɑnɔ Yennu *mɑlɑkɑ din bɑɑl Suosiɑf buol u dɑmiit ni, k yet’ɔ ɑ: «Fiit k jii sɑnpɑntk mɑnŋ nɑn u nɑɑ kii tiin kii sɑɑ Ejipt tinŋ ni, k sɑɑ kɑl lenŋ nɑn yuo nbɑ k n tɑn sɑɑ tul’ɑ mɔb biɑk, k mɑɑn kpɑnbɑl Heluod luon k wun lon bik mɑnŋ buol e k kpi’u.»

¹⁴K u din fiil nyiɑɔk k jii bik nɑ nɑn u nɑɑ k ciɑl k sɑɑn nɑn’m Ejipt tinŋ ni.

¹⁵U din be lenŋ e nɑn yuo nbɑ k kpɑnbɑl Heluod din tɑn kpo nɑ. Lin nbɑ nɑ kul din tun ɑ lin gbien lin nbɑ k Yonmdɑɑnɔ Yennu din te k u sɔkniisuɑ pɑk l po nɑ e ɑ: «Min, Yennu, n din yiin n Bijɑ ɑ wun nyi Ejipt tinŋ ni.»

¹⁶Heluod nbɑ din tɑn bɑnn nɑn bɑntieb mɑnŋ kpɑl’ɔ e nɑ, k u wutuol din duo bonciɑnn. K u din tun sejenm ɑ bin sɑɑn Betlehenm nɑn l digbɑnbis ni k sɑɑ kpi bonjɑbis kul, lɑɑ jii sɑnpɑnti k sɑɑ tuu bin nbɑ mɔk binɑ ŋɑnle, nɑn wɑɑ dɑɑn boi bɑntieb mɑnŋ k bɑnn yuo nbɑ k ŋmɑɑbil nɑ dɑɑn nyii nɑ.

¹⁷Nnɑ e k lin nbɑ k *Yennu sɔkni Selemi din pɑk nɑ din gbien ɑ

¹⁸«Lɑɑmɑ[6] duo nuɑk ni e k b gbiɑ kunkɔl, mɔni nɑn fɑbni, k Lɑɑsiɑl[7] mɔ u wɑɑs pɑɑk, k b bɑln’mɔ k tɑn guo, k mɑɑn u wɑɑs kul ɑ kpo wɑɑ.»

¹⁹Tɔn, k kpɑnbɑl Heluod tɑn kpo, k u kuun puolpo k Yonmdɑɑnɔ Yennu mɑlɑkɑ biɑ din sɑɑn Suosiɑf buol u dɑmiit ni, Ejipt tinŋ ni,

²⁰k sɑɑ yet’ɔ ɑ: «Fiit k jii bik mɑnŋ nɑn u nɑɑ, k ŋmɑt sɑɑn Islɑɑel tinŋ ni, k mɑɑn bin nbɑ din lol ɑ bin kpi bik mɑnŋ nɑ kpo wɑɑ.»

²¹K Suosiɑf din fiil k jii bik mɑnŋ nɑn u nɑɑ k din ŋmɑt k sɑɑn Islɑɑel tinŋ ni.

²²Ŋɑɑn wɑɑ din tɑn gbɑt ɑ Alkelɑus dii nɑɑn k kɑl u bɑɑ Heluod nɑɑngbɑnt pɑɑk Suude tinŋ ni nɑ, k jɑŋmɑɑni suol’ɔ nɑn wun kun lenŋ, k Yennu biɑ din kpɑɑn’ɔ u dɑmiit ni, k u din sɑɑn Gɑɑliile tinŋ ni,

²³k din sɑɑn k sɑɑ kɑl duo nbɑ k b yi Nɑɑsɑɑlet nɑ ni. Nnɑ e k l tien gbien mɑɑn nbɑ k Yennu sɔkniinbɑ din yet ɑ: «B tɑn sii yi’u Nɑɑsɑɑlet nilɔ e.»