Read Moba Mɑɑtieo 20 Bible Online

Mɑɑtieo 20 - Moba bible

Mɑɑtieo 20

¹«K mɑɑn Yennu nɑɑn tie nɑn ŋɑɑdɑɑnɔ nbɑ din nyii sɑn-nyɑpob ni k luon niib ɑ wun jii’b k bin ko u kpɑɑb nbɑ k wuu tilonti nbɑ k b yi *fiinyɑ nɑ e.

²K b dii l dɑɑɔk k u sɑk k sɑɑ pɑ’b dɑɑl pɑɑɔk denie denie. Ŋɑnn e k b din duo k sɑɑ jɑk konu.

³Lɑɑ din tɑn bɑɑl kut mun-yiɑ yuo nbɑ, k ŋɑɑdɑɑnɔ mɑnŋ fiil sɑɑn dɑɑk ni, k sɑɑ lɑ siɑb k b sie k k tuun siɑl.

⁴K u yet’b ɑ: ‹Ii do mɑn n kpɑɑb ni kii sɑɑ i ko, k n pɑ’i lin nbɑ jɑnŋ.›

⁵K b din duo. Lɑɑ din tɑn bɑɑl kut piik nɑn munle yuo nbɑ, k u biɑ ŋmɑt tien nnɑ, k kut muntɑ yuo nɑ, k u biɑ ŋmɑt k biɑ tien nnɑ.

⁶Lɑɑ din tɑn bɑɑl kut munŋmu yuo nbɑ, k u biɑ ŋmɑt sɑɑn k sɑɑ lɑ siɑb k b lɑkn sie, k u boi’b ɑ: ‹Bee k i sie nnɑ yɑnn dɑmunn k k tuun siɑl i?›

⁷K b jiin ɑ: ‹Suɑ k jii’t tuonn.› Ŋɑnn e k u yet’b ɑ: ‹Ii mun i do mɑn n kpɑɑb nɑ ni kii sɑɑ i ko.›

⁸«Lɑɑ din tɑn bɔnt yuo nbɑ, k ŋɑɑdɑɑnɔ nɑ yet u ŋɑɑtuontunnɑ sɑɑkuɑ ɑ: ‹Ii sɑɑ k sɑɑ yiin kpɑɑlɑ mɑnŋ nɑ, k tɑn pɑ’b. A yɑɑ ɑ pɑ’b yuo nbɑ, fɑn piin kii pɑ bin nbɑ bo juont k bɑɑl nɑ, k tɑn juont bin nbɑ bo dɔnŋ bɑɑl nɑ pɑnu.›

⁹K u tuontunnɑ sɑɑkuɑ mɑnŋ piin k pɑ bin nbɑ bo juont k bɑɑl nɑ, denie denie.

¹⁰L pɑɑk, lɑɑ din tɑn bɑɑl bin nbɑ bo bɑɑl sɑn-nyɑpob ni wɑɑ pɑɑk nɑ, k b duki mi ɑ b yɑl sii yɑb e, ŋɑɑn k u pɑ’b denie denie mun biɑk.

¹¹Bɑɑ din gɑɑl b likli gbenn yuo nbɑ, k b piin k buln suki ŋɑɑdɑɑnɔ nɑ,

¹²k yien ɑ: ‹Gotl, bin nbɑ juont k duo kut munŋmu nɑ kuo yuo wɑɑnm-nnɑ e, ŋɑɑn k tinm nbɑ ŋɑnin lɑ fɑlɑ sɑn-nyiɑɔk ni wɑɑ, k yennu fɑɑ’t bonciɑnn nɑ, ŋɑɑn k tinm nɑn ŋɑnm tɑn lɑkn gɑɑl denie denie ee?›

¹³«Ŋɑnn e k ŋɑɑdɑɑnɔ nɑ yet b yenɔ ɑ: ‹N yuɑk, gbiintl, n k ŋmɑb’ɑ ni, k mɑɑn t bo dii dɑɑɔk o k ɑ sɑk denie dɑɑl.

¹⁴L pɑɑk, jiin ɑ yɑl kii sɑɑ. Min e luon k n pɑ fin nɑn bin nbɑ bo juont bɑɑl mɑnŋ yonm.

¹⁵N k mɔk yiikuo nɑn n jii n likli k tun mɑɑ luon biɑnŋ nbɑ ɑɑ? Ami ɑ mɔk *funfunn nɑn mɑɑ k wuun nɑ pɑɑk ee?› »

¹⁶Yiesu nbɑ din yin bɑljouk nɑ k gbenn nɑ puolpo e, k u ji yet’b ɑ: «L pɑɑk, bin nbɑ dɔnŋ gɑl tuɑnn tɑn sɑɑ jil puol, k bin nbɑ juont puol mun biɑ tɑn sɑɑ dɔnŋ gɑl tuɑnn.»

¹⁷Yiesu nbɑ din tɑn do Selusɑɑlenm nɑ, k u yiin u tuomiinbɑ *piik nɑn bɑnle nɑ k tɑn bɔl k yien’m ɑ:

¹⁸«Gotl mɑn, t do Selusɑɑlenm e nɑ, k b tɑn sɑɑ jii *Nisɑɑlk Bijɑ k tien Yennu mɑnntieb yudɑnm nɑn *senniwɑntieb nuu ni, k b sɑɑ bu u buut k yet ɑ u ŋɑn nɑn kuun e.

¹⁹B tɑn sɑɑ jii’u k tul bin nbɑ k tie *Suifnbɑ ɑ bin fiɑk’ɔ, k buo’u gbɑnn, k kpɑɑ tɑbn’ɔ dɑpunpunn pɑɑk k wun kpo, ŋɑɑn k l dɑɑ ŋɑntɑ dɑɑl, u biɑ sɑɑ fiil kuun ni wɑɑ.»

²⁰L yuo nɑ k Sebede ŋɑɑpuo din jii u wɑɑs k bɑɑl nɑn’m Yiesu buol ni, k tɑn gbɑɑn u tuɑnn, ŋɑɑn miɑl’ɔ sonml po.

²¹K Yiesu boi’ɔ ɑ: «A luon bee?» K u jiin ɑ: «Tul’n mɔsonn nɑn n wɑɑs nɑ yenɔ tɑn sɑɑ kɑl ɑ diitu po, k luɑ nɑ mun sɑɑ kɑl ɑ gɑnŋ po, yuo nbɑ k ɑ tɑn sɑɑ di ɑ nɑɑn nɑ.»

²²K Yiesu jiin yet’b ɑ: «I k mi yɑɑ mei lin nbɑ po. I sɑɑ fit nyu *kɔp nbɑ ni k n yɑɑ n nyu lenŋ nɑ wɑɑ ɑɑ?» K b jiin ɑ: «T sɑɑ fit ɑ.»

²³K Yiesu yet’b ɑ: «Tɔn, i set sɑɑ nyu lenŋ ɑ. Ŋɑɑn min kɑɑ sɑɑ lukt wun nbɑ tɑn sɑɑ kɑl n diitu po ɑmi n gɑnŋ po, k mɑɑn n Bɑɑ mɔnŋ mɔnŋ e lukt bin nbɑ tɑn sɑɑ kɑl l kinkɑɑni pɑɑk.»

²⁴Yiesu *puolpoweitelieb nɑ nbɑ din gbɑt nnɑ mɑnŋ yuo nbɑ, k b wutuol duo b bɑnle mɑnŋ pɑɑk.

²⁵K Yiesu din yiin b kul ɑ k lɑkn’m u buol ni, k tɑn yet’b ɑ: «I mɔnŋ mi nɑn tingbounŋ nɑ ŋɑɑtieb yudɑnm dont b mɔnŋ e, k nijɑɑnɑ biɑ diɑ b niib nɑn ninmɔnn e,

²⁶ŋɑɑn yinm ŋɑnin, l dɑɑ tie nnɑ kɑɑ i sinsuuk ni. L i tie k suɑ luon wuu tie nijɑɑnn i sinsuuk ni, l ŋɑn wun kpɑnt tuontunnɔ kii tuun kii tien i kul ɑ.

²⁷K l i biɑ tie k suɑ luon wun tɑn gɑl sinsinn, wun kpɑnt i tuontuunɔ.

²⁸K i tie nɑn Nisɑɑlk Bijɑ nbɑ tie biɑnŋ nbɑ nɑ, k mɑɑn u k bɑɑl ɑ niib n tun tul’ɔ kɑɑ, ŋɑɑn u bɑɑl ɑ wun tun k tul niib e, k biɑ kpo k te k niib bonciɑnn n lɑ fielu.»

²⁹Tɔn, Yiesu nɑn u puolpoweitieb nbɑ din tɑn nyi Seliiko yuo nbɑ k nibulciɑɔnŋ wɑɑ Yiesu puolpo.

³⁰K juɑni bɑnle din kɑl sɑnjokpinŋ k gbɑt ɑ Yiesu bɑɑt ɑ wun tɑn gɑl lenŋ. K b piin k yikn sɑnpɑɑpo wɑɑ ɑ: «Yonmdɑɑnɔ nbɑ tie * Dɑɑfiid yɑɑbuonn, tin’t ninbɑɑɔk.»

³¹Ŋɑnn e k nibulciɑɔnŋ nɑ din tiɑn b pɑɑk ɑ bin ŋmin. Ŋɑɑn k b ŋɑnm yikn sɑnpɑɑpo wɑɑ ɑ: «Dɑɑfiid yɑɑbuonn, tin’t ninbɑɑɔk.»

³²K Yiesu din set ŋɑɑn yiin’m k tɑn boi’b ɑ: «I luon k n tun bee k tul’i ni?»

³³K b jiin’ɔ ɑ: «Yonmdɑɑnɔ, t luon k ɑ nyuɑnt t ninbinɑ e.»

³⁴K ninbɑɑɔk din suol’ɔ, k u sii sii b ninbinɑ mɑnŋ, k l nyuɑnt nyuɑnt, k b ji din wɑɑ’u k sɑɑ.