Read Moba Mɑɑtieo 21 Bible Online

Mɑɑtieo 21 - Moba bible

Mɑɑtieo 21

¹Bɑɑ din tɑn pel Selusɑɑlenm k bɑɑl Betfɑɑje duo nbɑ biɑk jɑgbɑɑk nbɑ k b yi’l *Oliifienbɑ jɑgbɑɑk nɑ, k Yiesu tun u *puolpoweitieb nɑ ni bɑnle u tuɑnn po,

²ŋɑɑn yet’b ɑ: «Ii sɑɑ mɑn digbɑnbik nbɑ be i tuɑnn po nɑ ni. I sɑɑ sɑɑ lɑ k b lol bonnɑɑnŋ nɑn u bik, k yin lot’b k bɑɑl nɑn’m n buol ni nɑ.

³L i tie k suɑ boi’i siɑl i e, yin yet’ɔ Yonmdɑɑnɔ e luon’m, k u sɑɑ cɑb’i k yin bɑɑl nɑn’m.»

⁴Lin nbɑ nɑ din tun k tien nnɑ ɑ lin gbien lin nbɑ k *Yennu sɔkni Esɑɑyi din sɔkn nɑ po e, ɑ:

⁵«Yetl *Siiɔn duo tieb ɑ: ‹Gotl mɑn, i Kpɑnbɑl nɑ e bɑɑt i buol ni nɑ. U tie wun nbɑ siknt u mɔnŋ e k jɑk bonnɑɑnŋ nɑn bonbik.› »

⁶K Yiesu puolpoweitieb bɑnle nɑ set din sɑɑn k sɑɑ tun nɑn wɑɑ yet’b biɑnŋ nbɑ nɑ.

⁷K b din bɑɑl nɑn bonnɑɑnŋ nɑ nɑn u bik, k tɑn jii b tiɑt k pɑɑn b buɑnɑ pɑɑk k Yiesu jɑk’b.

⁸K niib nɑ bonciɑnn din lɑt b tiɑt sɑnjouk pɑɑk, k lieb mun cuɑn tiini yiini nɑn tutuut k lɑt sɑnjouk nɑ pɑɑk.

⁹K nibulciɑɔnŋ nbɑ din gɑl u tuɑnn po nɑn bin nbɑ din wɑɑ u puolpo ji din yikn k yien ɑ: «Hosɑnɑ[20]. Ii piɑk mɑn * Dɑɑfiid yɑɑbuonn mɑnŋ. Yennu yetŋɑnm ii be wun nbɑ bɑɑt Yonmdɑɑnɔ sɑnn ni nɑ pɑɑk. Ii wuot mɑn hosɑnɑ sɑnpɑɑpo.»

¹⁰Wɑɑ din tɑn kuɑ Selusɑɑlenm yuo nbɑ, k duo mɑnŋ niib kul fiil, k b boi b lieb ɑ: «Ŋmee e nɑ?»

¹¹Ŋɑnn e k nibul nɑ jiin ɑ: «Yiesu, wun nbɑ tie Yennu sɔkni nbɑ nyii Nɑɑsɑɑlet nbɑ be Gɑɑliile tinŋ ni nɑ.»

¹²K Yiesu din kuɑ Yennu jɑɑnti ŋɑsɑɑkɑk ni k sɑɑ bel nyinn bin nbɑ dɑɑ nɑn bin nbɑ kɔi nɑ kul ɑ, k lɑbl cibn lik-kpentɑ tiebulɑ nɑn ŋmɑnkɔitieb koki k lɑbl cibn cibn,

¹³ŋɑɑn yet’b ɑ: «L diɑn Yennu lolkpel kɑdɑɑɔk ni ɑ: ‹N ŋɑɑk nɑ sii tie Yenmiɑlu ŋɑɑk e,› ŋɑɑn yinm e kpint’l k tien nɑn-yukb kinkɑl buol.»

¹⁴K juɑni nɑn wɔbi din bɑɑl u buol ni Yennu jɑɑnti ŋɑsɑɑkɑk ni, k u din te k b kul ɑ pɑɑk.

¹⁵Ŋɑɑn Yennu mɑnntieb yudɑnm nɑn *senniwɑntieb nbɑ din lɑ bɑktnɔunŋ tuonɑ nbɑ k u tun nɑ, k biɑ gbɑt k wɑɑs yikn Yennu jɑɑnti ŋɑsɑɑkɑk ni k yien ɑ: «Hosɑnɑ. Ii piɑk mɑn Dɑɑfiid yɑɑbuonn nɑ,» k l donn b wutuol.

¹⁶K b boi’ɔ ɑ: «A gbɑt bɑɑ yien lin nbɑ nɑ wɑɑ ɑɑ?» K u jiin ɑ: «Nnn, ŋɑɑn l diɑn Yennu lolkpel kɑdɑɑɔk ni ɑ: ‹A te k wɑɑs nɑn sɑnpɑnti piɑk’ɑ fɑnu.› I k mi lii ii?»

¹⁷Ŋɑnn e k u din nyik’b ŋɑɑn nyii Selusɑɑlenm k sɑɑn Betɑɑni k sɑɑ duɑ.

¹⁸Lɑɑ din yent k Yiesu nyii lenŋ k ŋmɑt Selusɑɑlenm. K kon sɑɑ suol’ɔ,

¹⁹k u lɑ fiigie, k l sie sɑnjokpinŋ. K u sɑɑn k sɑɑ bɑɑl ɑ wun puɑl fiignbɑ, k suɑ siɑl kɑɑ fiigie nɑ pɑɑk, sie fɑɑt kuukuɑ. Ŋɑnn e k u yet tiik nɑ ɑ: «Lɑɑ nyii dinnɑ k jii sɑɑ, ɑ kɑn mi k lon luɑnɑ.» L tɑɑkpɑɑk ni nɑ, k tiik nɑ kuol.

²⁰U puolpoweitieb nɑ nbɑ din lɑ nnɑ yuo nbɑ, k l bɑkt’b, k b boi b lieb ɑ: «L tien nlee k fiigie nɑ tɑɑn kuol yiɑn ɑ nɑ?»

²¹Ŋɑnn e k u jiin k yet’b ɑ: «Bɑlmɔni e k n yien’i nɑ, l i tie k i mɔk yɑdɑ nɑn bɑlmɔni k k bils, i mun sii tuun nɑn mɑɑ tun tiik nɑ biɑnŋ nbɑ nɑ e. Ŋɑɑn l k tie nnɑ kuukuɑ kɑɑ k i sɑɑ tun. L i tie k i yet juɑl nɑ ɑ wun fikt k sɑɑ bɑɑ mɔkgbenŋl nɑ ni, l sɑɑ tun ɑ.

²²L i tie k i mɔk yɑdɑ, i sɑɑ lɑ lin nbɑ kul k i boi l po i yenmiɑlu ni wɑɑ.»

²³Yiesu nbɑ din sɑɑn k sɑɑ kuɑ Yennu jɑɑnti ŋɑsɑɑkɑk ni k wɑnt niib Yennu mɑɑn yuo nbɑ nɑ, k Yennu mɑnntieb yudɑnm nɑn tinŋ mɑnŋ ni sɑɑkɑb bɑɑl u buol ni, k tɑn boi’ɔ ɑ: «Yiikuo lɑnn po e k ɑ mɔk k tuun lin nbɑ nɑ kul i? K ŋmee cɑb’ɑ l yiikuo?»

²⁴K Yiesu jiin ɑ: «N mun mɔk buboit k sɑɑ boi’i. L i tie k i fit k jiin, n mun sɑɑ wɑnn’i yiikuo buolu nbɑ k n diɑ k tuun lin nbɑ nɑ:

²⁵Sɑn wun nbɑ dɑɑn wuul niib Yennu nyunwulu nɑ, Yennu e cɑb’ɔ l yiikuo ɑmi nisɑɑlk e?» Ŋɑnn e k b ji din fɑɑ b lieb lɑbɑɑl k yien ɑ: «T i yet ɑ Yennu e cɑb’ɔ l yiikuo, u sɑɑ boi’t ɑ k bee te k t k tien u mɑɑn nɑ yɑdɑ?

²⁶K t mun biɑ tiin nibulciɑɔnŋ nɑ jɑŋmɑɑni nɑn tin yet ɑ: ‹Niib e cɑb’ɔ l yiikuo,› k mɑɑn suɑ kul tien yɑdɑ nɑn Sɑn set dɑɑn tie Yennu sɔkni e.»

²⁷Ŋɑnn e k b jiin k yet Yiesu ɑ: «T k mi.» K Yiesu mun yet’b ɑ: «Tɔn, n mun kɑn yet’i wun nbɑ cɑb’n l yiikuo k n tuun lin nbɑ nɑ.»

²⁸L puolpo e k Yiesu din boi’b ɑ: «I duki nlee lin nbɑ nɑ po? Jɑsuɑ nnɑ mun din mɔk u wɑɑs bɑnle, k tɑn yet wun nbɑ tie sɑɑkuɑ po nɑ ɑ: ‹N bik, don kpɑɑb nbɑ k n wuu tilonti nbɑ k b yi *fiinyɑ nɑ ni k sɑɑ ko dinnɑ,›

²⁹k u yet u bɑɑ ɑ u kɑn do. Ŋɑɑn l puolpo e k u ji tɑn lebt u dudukt k duo.

³⁰Ŋɑnn e k u bɑɑ din nyik’ɔ ŋɑɑn yet u ninjɑ nɑ nɑn wɑɑ bo yet u yuɑlɔ biɑnŋ nbɑ nɑ, k ŋuɑ ŋɑnin sɑk k jiin ɑ: ‹N bɑɑ, min sɑɑ do wɑɑ,› ŋɑɑn k k duo.»

³¹Yiesu nbɑ din yim’m bɑljouk mɑnŋ k gbenn nɑ, k u ji boi niib nɑ ɑ: «Wɑɑs bɑnle nɑ ni, ŋmee tun u bɑɑ lonm u?» K b jiin ɑ: «Sɑɑkuɑ po nɑ.» K Yiesu yet’b ɑ: «Bɑlmɔni e k n yien’i nɑ, *lɑnpogɑɑltieb nɑn boncunconɑ tɑn sɑɑ dɔnŋ’i Yennu nɑɑn ni kuɑnu wɑɑ,

³²k mɑɑn Sɑn dɑɑn bɑɑl i buol ni k wɑnn’i yɑɑ sii be binbenŋ nbɑ k l gbuot Yennu nunm, ŋɑɑn k i k tien u mɑɑn nɑ yɑdɑ, ŋɑɑn k lɑnpogɑɑltieb nɑn boncunconɑ tien u mɑɑn mɑnŋ yɑdɑ. Yɑɑ lek lɑ lin nbɑ nɑ nbɑ kul puolpo, ŋɑɑn i k mɔ kuɑŋɑɑn k lebt binbenŋ k tien mɑɑn mɑnŋ yɑdɑ.»

³³K Yiesu biɑ din yet’b ɑ: «Gbiintl mɑn bɑljolieok. Ŋɑɑdɑɑnsuɑ nnɑ e din be k wuu tilonti nbɑ k b yi fiinyɑ nɑ u kpɑɑb ni, ŋɑɑn cɑɑn gungounŋ k lint tiini mɑnŋ, k biɑ gbiil buotuk nbɑ k b tuu sii ŋmɑki tilonti mɑnŋ luɑnɑ nyun lenŋ, k biɑ mɑɑ siɑl k b sii do l pɑɑk k guu kpɑɑb nɑ, ŋɑɑn jii kpɑɑb nɑ k tien kpɑɑlɑ nii ni ɑ bii goli. L i tɑnŋ i jɑnŋ nɑn puɑlu, bin puɑl k tul’ɔ, ŋɑɑn mun tɑn puɑl b yɑl. L puolpo e k u din yɑɑt k sɑɑn digbɑnsiɑl.

³⁴K tiluɑnɑ mɑnŋ punpuɑlyuo tɑn bɑɑl, k ŋɑɑdɑɑnɔ nɑ tun u tuontunnɑ, ɑ bin sɑɑn kpɑɑlɑ nɑ buol ni ɑ k sɑɑ gɑɑl u tiluɑnɑ nɑ.

³⁵Ŋɑɑn k kpɑɑlɑ nɑ din suol u tuontunnɑ mɑnŋ, k buo yenɔ bonciɑnn, ŋɑɑn kɔt luɑ, ŋɑɑn jɑɑt luɑ nɑ mun tɑnɑ kpii’u.

³⁶Ŋɑnn e k u biɑ ŋɑnm tun tuontunlieb, k b yɑb k gɑl sinsinn yɑb nɑ, k kpɑɑlɑ nɑ biɑ tien’m nnɑ.

³⁷Lin nbɑ nɑ puolpo k u ji tun u mɔnŋ mɔnŋ bijɑ, ŋɑɑn yien ɑ: ‹N mi nɑn b sɑɑ bɑɑk n bijɑ nɑ wɑɑ.›

³⁸Ŋɑɑn kpɑɑlɑ nɑ nbɑ din tun ninbinn k lɑ u bijɑ nɑ k u bɑɑt nɑ, k b yet lieb ɑ: ‹U fɑdiilɔ e nɑ. Ŋɑɑnt tin kpi’u mɑn, ŋɑɑn k fɑɑl nɑ n kpɑnt t yɑl.›

³⁹K b din suol’ɔ k nyii nɑn’ɔ kpɑɑb nɑ kpinŋ po k sɑɑ kpii’u.»

⁴⁰Yiesu nbɑ yin bɑljouk nɑ k gbenn nɑ k u boi’b ɑ: «L pɑɑk, kpɑdɑɑnɔ mɑnŋ i tɑn bɑɑl, u sɑɑ tien kpɑɑlɑ mɑnŋ nlee?»

⁴¹Ŋɑnn e k b jiin k yet’ɔ ɑ: «U sɑɑ kpi kpɑɑyuonɑ mɑnŋ gbenn ɑ, ŋɑɑn biɑ jii u kpɑɑb mɑnŋ k tul lieb nbɑ sɑɑ sɑk kii tun kii tien’ɔ l luɑnɑ l punpuɑlyuo.»

⁴²K Yiesu boi’b ɑ: «I dɑɑ k mi lii lɑɑ diɑn Yennu lolkpel kɑdɑɑɔk ni biɑnŋ nbɑ ɑɑ? L diɑn ɑ: ‹Tɑnn nbɑ k tɑnmɑɑlɑ yet’ɔ nɑ, ŋɑnn e set tien ŋɑɑk nɑ pɑnŋ, k Yonmdɑɑnɔ Yennu e tien nnɑ, k l tien’t bɑktnɔunŋ nɑ.› »

⁴³K Yiesu ji yet’b ɑ: «Bɑlmɔni e k n yien’i nɑ, Yennu tɑn sɑɑ gɑɑl u nɑɑn i buol ni k tul nibuolu nbɑ sɑɑ te k wun di u nɑɑn nyuɑt.

⁴⁴Ŋɑɑn wun nbɑ tɑn bɑɑ tɑnn mɑnŋ pɑɑk, u sɑɑ but but e, ŋɑɑn tɑnn mɑnŋ i bɑɑ wun nbɑ pɑɑk, sie k l nɑn’ɔ buk buk nɑn yon nɑ.»

⁴⁵K Yennu mɑnntieb yudɑnm nɑn Fɑɑliisiɑnnbɑ nɑ nbɑ din gbɑt bɑljokt nɑ k gbenn, k b bɑnn nɑn Yiesu yin bɑljokt nɑ k denn ŋɑnm e.

⁴⁶K b ji din luon bin suol’ɔ, ŋɑɑn tiin nibulciɑɔnŋ nɑ jɑŋmɑɑni, k mɑɑn suɑ kul din tien yɑdɑ nɑn u set tie Yennu sɔkni e.