Read Moba Mɑɑtieo 24 Bible Online

Mɑɑtieo 24 - Moba bible

Mɑɑtieo 24

¹Yiesu nbɑ din nyii Yennu jɑɑnti ŋɑsɑɑkɑk ni k sɑɑ nɑ, k u *puolpoweitieb din bɑɑl u buol ni k tɑn wɑnt’ɔ jɑɑnti ŋɑɑk mɑnŋ diet.

²Ŋɑnn e k u boi’b ɑ: «I lɑ lin nbɑ nɑ nbɑ kul ɑɑ? Bɑlmɔni e k n yien’i nɑ, b tɑn sɑɑ tut l kul, k lu tinŋ ni wɑɑ, k l tɑnn yenn kuɑ tɑn kɑn biɑl k pɑɑ liel pɑɑk.»

³Yiesu nbɑ din tɑn sɑɑn k sɑɑ kɑl jɑgbɑɑk nbɑ k b yi’l *Oliifienbɑ jɑgbɑɑk nɑ pɑɑk nɑ, k u puolpoweitieb tɑn bɑɑl u buol ni, b kuukuɑ, k boi’ɔ ɑ: «Yet’t, yuo nbɑ k nɑ kul ɑ tɑn sii tie. Bee tɑn sii tie ɑ bɑɑlu *nyinn nɑn *dulnyɑ gbennu nyinn i?»

⁴K u jiin k yet’b ɑ: «Ii mi mɑn k suɑ n tɑn kpɑnn’i,

⁵k mɑɑn niib bonciɑnn tɑn sɑɑ jii n sɑnn e k bɑɑl k yien ɑ ŋɑnm e tie *Klistu nɑ, k kpɑnn niib bonciɑnn.

⁶I tɑn sɑɑ gbɑt tɔb fuut i kuɑnn ni, nɑn l lɑbɑɑl bɑnfɔkl, ŋɑɑn i dɑɑ jie, k mɑɑn l kpɑɑ tɑlɑs e nɑn lin nbɑ nɑ kul n tun, ŋɑɑn l k wɑnt nɑn dulnyɑ gbennu bɑɑl e nɑ.

⁷Nibuolu nɑn nibuolu tɑn sɑɑ kɔn nɑn lieb, k kpɑnbɑlɑ nɑn kpɑnbɑlɑ mun tɑn sɑɑ tuok k kɔn nɑn lieb. K kon nɑn tinŋ jijekt tɑn sii be lokɑ kul po.

⁸Lin nbɑ nɑ nbɑ kul tɑn sii tie nɑn mɑtyiɑlu pinpiik nɑ e.

⁹«L yuo mɑnŋ k b tɑn sɑɑ suol’i k din’i fɑlɑ biɑk, k kpi’i k buolu kul tɑn sii nɑn’i k mɑɑn yɑɑ wɑɑ’n nɑ pɑɑk.

¹⁰L yuo mɑnŋ, niib bonciɑnn tɑn sɑɑ yet n weiu, k biɑ kuɑt lieb, k biɑ nɑn lieb.

¹¹K fɑɑk sɔkniinbɑ tɑn sɑɑ nyi k kpɑnn niib bonciɑnn.

¹²Biit nbɑ tɑn sɑɑ mɑntk yɑbt tingbounŋ nɑ ni nɑ pɑɑk, k niib bonciɑnn lonm tɑn sɑɑ mɑɑk.

¹³Ŋɑɑn wun nbɑ tɑn gubn nɑn fɑlɑ yuo nɑ juontu tɑn sɑɑ lɑ fielu wɑɑ.

¹⁴K b tɑn sɑɑ muɑnt Yennu nɑɑn lɑbɑmɑnn muɑnti nɑ tingbounŋ nɑ kul po, ɑ lin tien *siɑlɑ k tul niib kul, k dulnyɑ gbennu n yen fit bɑɑl.»

¹⁵«I tɑn sɑɑ lɑ bonbilɑnkɑnt nbɑ k *Yennu sɔkni Dɑniel din yet l po nɑ, k l tɑn sii sie Yennu jɑɑnti ŋɑsɑɑkɑk ni.» (Wun nbɑ kul tɑn lii diɑni nɑ, wun bɑnn lɑɑ wɑnt lin nbɑ.)

¹⁶«L yuo mɑnŋ, bin nbɑ tɑn be Suude tinŋ ni, bin ciɑl kii do juɑt,

¹⁷k wun nbɑ tɑn be u dituɑtuk pɑɑk, u dɑɑ kuɑ u dieok ni ɑ wun sɑɑ jii u siɑl,

¹⁸k wun nbɑ tɑn be u kpɑɑb ni, u dɑɑ ŋmɑt ɑ wun sɑɑ jii u tiɑɔk.

¹⁹L yuo mɑnŋ, podɑnm nɑn bin nbɑ diɑ wɑlɑi tɑn sɑɑ di fɑlɑ bonciɑnn.

²⁰Ii mei mɑn Yennu k u dɑɑ te k fɑlɑ nɑ bɑɑt wonfufuk yuo, ɑmi *Fuondɑɑl.

²¹K mɑɑn l yuo mɑnŋ, fɑlciɑɔnŋ sii be. Yennu nbɑ nɑn dulnyɑ wɑɑ nɑn dinnɑ, l fɑlɑ buolu dɑɑ k mi bɑɑl. L buolu mun biɑ ji kɑn mi k bɑɑl.

²²Yennu i tɑnŋ i kii wɑt dɑɑ mɑnŋ yɑbnt, suɑ tɑn kɑn biɑl, ŋɑɑn u nigɑnnkɑb pɑɑk k u tɑn sɑɑ wɑt dɑɑ mɑnŋ yɑbnt.

²³«L yuo mɑnŋ, suɑ i tɑnŋ i yet’i ɑ: ‹Gotl mɑn, Klistu be nnɑ,› ɑmi: ‹U be nɑ wɑɑ,› i dɑɑ tie’u yɑdɑ,

²⁴k mɑɑn l yuo mɑnŋ, fɑɑk Klistunbɑ nɑn fɑɑk sɔkniinbɑ tɑn sɑɑ nyi k tuun nyinɑ nɑn bɑktnɔunŋ tuonjɑɑnɑ ɑ bin kpɑnn niib. K l i tɑnŋ i fit, b tɑn sɑɑ kpɑnn Yennu nigɑnnkɑb tiɑɔnŋ ɑ.

²⁵Gbiintl mɑn, n ponŋ dɔnŋ yet’i e wɑɑ, k yuo mɑnŋ dɑɑ k bɑɑl.

²⁶«L pɑɑk, b i tɑnŋ i yet’i ɑ: ‹Gotl mɑn, u be muuk ni,› i dɑɑ sɑɑ, ɑmi b i yet’i ɑ: ‹Gotl mɑn, u be dieok ni,› i dɑɑ tie yɑdɑ,

²⁷k mɑɑn *Nisɑɑlk Bijɑ nɑ bɑɑlu tɑn sii tie nɑn sɑɑk nbɑ tuu nyiknt k nyi yendopo k sɑɑ sik yenbɑɑpo nɑ e.

²⁸«Siɑn nbɑ k bonkpienn be, lenŋ e k juut tiki.»

²⁹«Fɑlɑ nɑ puolpo k yennu tɑn sɑɑ bɔnn, k ŋmɑɑlk ji kɑn yent, k ŋmɑɑbilɑ tɑn sɑɑ nyi sɑnpɑɑpo k bɑɑ, k lin nbɑ kul be sɑnpɑɑpo tɑn sɑɑ dɑnm k ŋmɑt ŋmɑt.

³⁰L yuo mɑnŋ k niib tɑn sɑɑ lɑ Nisɑɑlk Bijɑ nyinn sɑnpɑɑpo, k nibuolu buolu nbɑ be tingbounŋ nɑ kul tɑn sii fɑbn, k ji lɑ Nisɑɑlk Bijɑ k u be sɑnpɑgbɑnɑ ni k siik nɑn yiikuo nɑn yentsɑɑkɑl.

³¹Kɑtkɑɑk tɑn sɑɑ bui, k wun tun u *mɑlɑkɑɑnbɑ k bin sɑɑn k sɑɑ tikl u nigɑnnkɑb nbɑ be tingbounŋ nɑ lokɑ ŋɑnnɑ nɑ kul po k bɑɑl.»

³²«I jii fiigie k tumi yɑn mɑn. Yɑɑ tuu lɑ k tiik mɑnŋ bintl yuo nbɑ, i ji tuu bɑnn nɑn siɑɔk pel e nɑ.

³³Nnɑ e mun, yuo nbɑ k i tɑn lɑɑt k lin nbɑ nɑ nbɑ kul tuun, yin bɑnn nɑn lin nbɑ k n piɑk l po nɑ pel e nɑ.

³⁴Bɑlmɔni e k n yien’i nɑ, mɔtɑɑnɑ nigbounŋ nɑ kɑn kpo k gbenn kɑɑ wɑɑ, k lin nbɑ nɑ kul n tun.

³⁵Sɑnpɑɑk nɑn tinŋ tɑn sɑɑ bot ɑ, ŋɑɑn n mɑɑn ŋɑnin kɑn mi k bot fɑb ɑ.»

³⁶«Suɑ k mi dɑɑl mɑnŋ ɑmi yuo nbɑ k l kul sɑɑ tien. L sɑnpɑɑpo mɑlɑkɑɑnbɑ, ɑmi Bijɑ mɔnŋ k mi, sie Bɑɑ kuukuɑ e mi.

³⁷Lɑɑ din tien biɑnŋ nbɑ Noe yuo nɑ, l mun biɑ tɑn sii tie nnɑ e Nisɑɑlk Bijɑ jenu yuo.

³⁸Noe yuo mɑnŋ, yuo nbɑ k nyunciɑɔnŋ din dɑɑ k bɑɑl, k niib din di jiet k nyu, k kuɑnt puob, k jikt b wɑɑs k tien’m jɑb, k tɑn tuu dɑɑl nbɑ k Noe din kuɑ ŋɑlngbenŋl ni.

³⁹K niib mɑnŋ din biɑ dɑɑ k bɑnn lin nbɑ tuun, k tɑn tuu dɑɑl nbɑ k nyunsɑɑkɑn din bɑɑl k tɑn dii b kul sɑɑk ɑ. L biɑ tɑn sii tie nnɑ e yuo nbɑ k Nisɑɑlk Bijɑ tɑn sɑɑ jen.

⁴⁰L dɑɑl mɑnŋ, jɑb bɑnle tɑn sii buɑ kpɑɑb ni k ko, k b tɑn sɑɑ jii yenɔ ŋɑɑn nyik luɑ.

⁴¹Puob bɑnle tɑn sii lɑkn buɑ nɑɑn dii, k b tɑn sɑɑ jii yenɔ ŋɑɑn nyik luɑ.

⁴²«L pɑɑk, i cekn i mɔnŋ pɑɑk mɑn, k mɑɑn i k mi dɑɑl nbɑ k t Yonmdɑɑnɔ sɑɑ jen.

⁴³Ŋɑɑn bɑnt mɑn nɑn l i tie k ŋɑɑdɑɑnɔ ponŋ mi yuo nbɑ k nɑn-yukɔ yɑɑ wun bɑɑl u ŋɑɑk ni nyiɑɔk, u sii kɑl e k guu. U kɑn sɑk k nɑn-yukɔ n tɑn kuɑ k jɑn’ɔ.

⁴⁴L pɑɑk, l ŋɑn k i mun n tien siil yuo kul ɑ, k mɑɑn Nisɑɑlk Bijɑ mun biɑ tɑn sɑɑ jen yuo nbɑ k i k duki u jenu nɑ po nɑ e.

⁴⁵«Tuontunlɑnɔ e tie yɑndɑɑnɔ k tuun u Yonmdɑɑnɔ nbɑ wɑnt’ɔ biɑnŋ nbɑ? Ŋuɑ e tie wun nbɑ k u Yonmdɑɑnɔ sɑɑ tien’ɔ tuontunnɑ yudɑɑnɔ ɑ wuuu goli u tuontunlieb, kii tien’m mɑnn nɑn l sɔnu.

⁴⁶L i tie k u Yonmdɑɑnɔ tɑn kpen k lɑ k u tuun nnɑ, pɑlpienn sii tie tuontunnɔ mɑnŋ yɑl e.

⁴⁷Bɑlmɔni e k n yien’i nɑ, ŋɑɑdɑɑnɔ mɑnŋ sɑɑ jii u mɔktuk kul k tien tuontunnɔ mɑnŋ nuu ni, ɑ wuu goli.

⁴⁸Ŋɑɑn l i tie k tuontunnɔ mɑnŋ tie tuontun-yuonn k dukn u pɑl ni ɑ, n Yonmdɑɑnɔ kɑn kpen yiɑn,

⁴⁹ŋɑɑn piin k buo u tuontunlieb, k ŋuɑ nɑn dɑnyuulɑ biɑ lɑkn k nyu k di,

⁵⁰Yonmdɑɑnɔ mɑnŋ tɑn sɑɑ kpen dɑɑl nbɑ k u ŋɑɑ u kpenu tɑmɑ e, nɑn yuo nbɑ k u k mi.

⁵¹Yonmdɑɑnɔ nɑ sɑɑ dɑt u tubl bonbiil, k tien’ɔ nɑn bɑɑ tuu tien kpinkpɑnni dɑnm biɑnŋ nbɑ nɑ. Lenŋ mɑnŋ e k niib tɑn sii fɑbn mɔ k nyiitl nyɑnɑ.»