Read Moba Mɑɑtieo 27 Bible Online

Mɑɑtieo 27 - Moba bible

Mɑɑtieo 27

¹Lɑɑ yent sɑn-nyɑpob ni, k Yennu mɑnntieb yudɑnm nɑn sɑɑkɑb lol bɑɑ sɑɑ tien biɑnŋ nbɑ k kpi Yiesu.

²K b lol’ɔ ŋmii k jii’u k sɑɑn nɑn’ɔ tinŋ yudɑɑnɔ nbɑ k b yi’u *Piilɑɑt nɑ buol ni.

³Suudɑ, nbɑ nyii Yiesu puol nɑ nbɑ gbɑt k b bu juont k yɑɑ ɑ Yiesu ŋɑn nɑn kuun e nɑ, k u pɑl din biil bonciɑnn, k u jii likbin piintɑ nɑ k ŋmɑt sɑɑ jiin tul Yennu mɑnntieb yudɑnm nɑn sɑɑkɑb mɑnŋ,

⁴ŋɑɑn yet ɑ: «N tun biit ɑ, k mɑɑn n kuɑt wun nbɑ kɑɑ biit ɑ.» Ŋɑnn e k b jiin k boi’ɔ ɑ: «T bɑkɑ mun ji be lin nbɑ nɑ ni ii? L ji tie ɑ mɑɑn e.»

⁵K Suudɑ jii likli nɑ k lu Yennu jɑɑnti ŋɑsɑɑkɑk ni, ŋɑɑn nyii k sɑɑn sɑɑ jɔnn u mɔnŋ ŋmiiuk.

⁶Ŋɑnn e k Yennu mɑnntieb yudɑnm tɔkl likli mɑnŋ ŋɑɑn yet ɑ: «Lin nbɑ nɑ ji tie sɔn likli e, k t *senni nbɑ tie biɑnŋ nbɑ, t kɑn fit jii pukn Yennu jɑɑnti ŋɑsɑɑkɑk likli ni.»

⁷L pɑɑk, k b kɑl dukn likli mɑnŋ po, k tɑn jii sɑɑn sɑɑ dɑɑ yɔkmɑluɑ tinŋ ɑ bii pii sɑɑnm lenŋ.

⁸L pɑɑk e te k b lek biɑ dɑɑ yi tinŋ mɑnŋ ɑ: «Sɔn Tinŋ» k tɑn tuu dinnɑ.

⁹K l gbien *Yennu sɔkni Selemi nbɑ din pɑk lin nbɑ nɑ k l tien mɔni ɑ: «B jii likbin piintɑ nbɑ k Islɑɑeltieb siɑb din pɑ k l tie u dɑɑɔk nɑ,

¹⁰k dɑɑ yɔkmɑɑlɔ tinŋ, nɑn Yonmdɑɑnɔ nbɑ wɑnn biɑnŋ nbɑ nɑ.»

¹¹K Yiesu sie tinŋ mɑnŋ yudɑɑnɔ Piilɑɑt tuɑnn, k Piilɑɑt boi’ɔ ɑ: «Fin e set tie *Suifnbɑ Kpɑnbɑl nɑ ɑɑ?» K u jiin’ɔ ɑ: «Nnn, fin e yɑɑ.»

¹²Ŋɑɑn Yennu mɑnntieb yudɑnm nɑn sɑɑkɑb nɑ nbɑ tɑɑl’ɔ nɑ, u k jiin’m siɑl.

¹³K Piilɑɑt biɑ boi’ɔ ɑ: «A k gbiɑ bɑɑ tɑɑl’ɑ biɑnŋ nbɑ mɑnŋ ii?»

¹⁴Ŋɑɑn Yiesu ji k pɑk siɑl k jiin u po, k l ji bɑkt Piilɑɑt bonciɑnn.

¹⁵Tɔn, l i tie k *yuktgɑltiɑlu jɑɑnm dinu dɑɑl i tɑnŋ i bɑɑl, tinŋ yudɑɑnɔ mɑnŋ tuu nyinn niyenɔ kuɑ e dɑnsɑlk ni, wun nbɑ k niib nɑ luon’ɔ, k ŋɑɑ’u.

¹⁶Suɑ din be dɑnsɑlk l yuo, k u sɑnn din yi Bɑɑlɑɑbɑɑs, k niib nɑ mi’u fɑnu nɑn u tuonɑ nbɑ tie biɑnŋ nbɑ.

¹⁷Bɑɑ tɑn lɑkn yuo nbɑ k Piilɑɑt boi’b ɑ: «Ŋmee k i luon k n nyinn’ɔ dɑnsɑlk ni k ŋɑɑ’u? Bɑɑlɑɑbɑɑs ɑmi Yiesu nbɑ k b yi’u *Klistu nɑ?»

¹⁸k mɑɑn Piilɑɑt mi nɑn nɑnŋ pɑɑk e te k b suol Yiesu k tien u nuu ni.

¹⁹Piilɑɑt nbɑ dɑɑ kɑl buut kok pɑɑk nɑ, k u ŋɑɑpuo tun *tuomi k tɑn yet’ɔ ɑ: «Nyint ɑ nuu nifopiemɔ nɑ mɑɑn ni, k mɑɑn nyiɑɔk nɑ n won lɑ dɑɑmuk bonciɑnn n dɑmiit ni u pɑɑk.»

²⁰K Yennu mɑnntieb yudɑnm nɑn sɑɑkɑb mɑnŋ biil niib nɑ ɑ bin yet Piilɑɑt ɑ wun nyinn Bɑɑlɑɑbɑɑs ŋɑɑn kpi Yiesu.

²¹K Piilɑɑt biɑ ŋɑnm k boi’b ɑ: «Niib bɑnle nɑ ni, i luon k n nyinn ŋmee ŋɑɑ’u?» K b jiin ɑ: «Bɑɑlɑɑbɑɑs e.»

²²K Piilɑɑt biɑ ŋɑnm boi’b ɑ: «K Yiesu nbɑ k b yi’u Klistu nɑ ŋɑnin, i luon k n tien’ɔ nlee?» K b kul ɑ jiin ɑ: «Kpɑɑn’mɔ k tɑbn’ɔ dɑpunpunn pɑɑk.»

²³K Piilɑɑt boi’b ɑ: «Bee pɑɑk e? U biit mɑntk tie lɑnn po e?» K b ŋɑnm tien guoluk, ŋɑɑn jiin sɑnpɑɑpo wɑɑ ɑ: «Kpɑɑn’mɔ tɑbn dɑpunpunn pɑɑk.»

²⁴Piilɑɑt nbɑ bɑnn nɑn wuu piɑk l kɑɑ nyuɑt, k biɑ sɑɑ pukn guoluk nɑ, k u jii nyun k wuul wuul u nii, niib nɑ ninbinɑ ni, ŋɑɑn yet ɑ: «N nuu kɑɑ juɑ nbɑ kɑɑ biit nɑ sɔn nyinu ni. I mɑɑn e nɑ.»

²⁵K niib nɑ jiin ɑ: «Nnn, u sɔn n jii tinm nɑn t wɑɑs yulɑ pɑɑk.»

²⁶Ŋɑnn e k Piilɑɑt nyinn Bɑɑlɑɑbɑɑs ŋɑɑ’u, ŋɑɑn te k b buo Yiesu gbɑnn, k jii’u tul’b ɑ bin sɑɑ kpɑɑ’u dɑpunpunn pɑɑk.

²⁷K tinŋ yudɑɑnɔ Piilɑɑt nɑ sejenm jii Yiesu k kuɑ nɑn’ɔ dundounŋ ni, k b sejenm mɑnŋ kul ɑ tikl k lint’ɔ.

²⁸B din liɑt u liɑnt nɑ e, ŋɑɑn jii liɑtfomunŋ nnɑ k lɑnn’ɔ,

²⁹ŋɑɑn luu kunkoni foklk k yiln’mɔ, k jii pɑtu k kubn’ɔ u niidiitu ni, k gbɑɑn u tuɑnn, k sɑlkt’ɔ k yien ɑ: «Suifnbɑ Kpɑnbɑl, t fuont’ɑ.»

³⁰K b piin k siin mɔsɑnt u pɑɑk, ŋɑɑn gɑɑn pɑtu nbɑ k b bo kubn’ɔ nɑ k fɑɑ u yul pɑɑk.

³¹Bɑɑ tɑn sɑlk’ɔ gbenn yuo nbɑ, k b liɑt liɑtfomunŋ nɑ, ŋɑɑn jii u mɔnŋ liɑnt nɑ k lɑnn’ɔ, ɑ bin ji sɑɑn k sɑɑ kpɑɑ’u k tɑbn’ɔ dɑpunpunn pɑɑk.

³²Bɑɑ din sɑɑ nɑ, k b cet Siilenn tinŋ ni jɑsuɑ nbɑ k u sɑnn yi Siimɔn, k suol’ɔ, k miɑ’u jinn’ɔ Yiesu kuun dɑpunpunn nɑ.

³³Bɑɑ sɑɑ bɑɑl siɑn nbɑ k b yi’l Golgotɑ nɑ, k l pɑɑk tie ɑ: «Yukpɑbuk buol,»

³⁴k b jii dɑɑn nbɑ ŋmɑt nɑn bonkobuk yɑn k tul’ɔ ɑ wun nyu, ŋɑɑn wɑɑ lenm yuo nbɑ k u yet nyunu.

³⁵Bɑɑ kpɑɑ’u k tɑbn’ɔ dɑpunpunn pɑɑk gbenn yuo nbɑ, k b tɔ tiɑtiɑ k cent cent u tiɑt nɑ,

³⁶ŋɑɑn ji kɑl lenŋ k guu’u.

³⁷K b diɑn bɑɑ yɑɑ ɑ u tun biit nbɑ nɑ, k tɑbn u dɑpunpunn nɑ yul pɑɑk. Bɑɑ din diɑn lin nbɑ e nɑ, k l wɑnt ɑ: «Yiesu nbɑ tie Suifnbɑ Kpɑnbɑl nɑ e nɑ.»

³⁸B mun biɑ din kpɑɑ fɑt-tieb bɑnle dɑpunpunɑ pɑɑk lenŋ, k pukn Yiesu po, k yenɔ din be u niidiitu po, k luɑ mun din be u niigɑnŋ po.

³⁹Bin nbɑ din sonm gɑɑl lenŋ nɑ pɑkn b yulɑ e ŋɑɑn suki’ɔ,

⁴⁰k yien ɑ: «Fin nbɑ yɑɑ ɑ ɑ sɑɑ fit bet Yennu jɑɑnti ŋɑsɑɑkɑk nɑ ŋɑɑn biɑ mɑɑ’l dɑɑ ŋɑntɑ sinsuuk ni nɑ, fin e nɑ, fiet ɑ mɔnŋ. L i tie k ɑ set tie Yennu Bijɑ i e, fɑn nyi dɑpunpunn nɑ pɑɑk k sik nɑ.»

⁴¹Nnɑ e biɑk k Yennu mɑnntieb yudɑnm nɑn *senniwɑntieb nɑn sɑɑkɑb kul ɑ mun din sɑlkt’ɔ

⁴²k yien ɑ: «U tuu fie lieb e, ŋɑɑn kɑn fit k fiel u mɔnŋ. Tɔn, u tie Islɑɑeltieb Kpɑnbɑl e. Wun sikn u mɔnŋ dɑpunpunn nɑ pɑɑk nɑ, k tin fit tien’ɔ yɑdɑ mɑntk.

⁴³U tien Yennu yɑdɑ wɑɑ, k yɑɑ ɑ u tie Yennu Bijɑ e. Tɔn, l i tie k Yennu set luon’ɔ, ŋɑɑnt tii goli mɑn k lɑɑn u sɑɑ fiel’ɔ mɔtɑɑnɑ wɑɑ.»

⁴⁴Nnɑ e mun fɑt-tieb bɑnle nbɑ k b kpɑɑ’b k pukn u po nɑ mun biɑ sɑlkt’ɔ.

⁴⁵Lɑɑ tɑn bɑɑl yensuuk ni, k tinŋ nɑ kul ji din bɔnn k sɑɑ bɑɑl yenlekl kut muntɑ.

⁴⁶Kut muntɑ yuo po e, k Yiesu yikn sɑnpɑɑpo wɑɑ ɑ: «Elii Elii lemɑ sɑɑbɑɑktɑɑni?» (L pɑɑk tie ɑ: «N Yennu, n Yennu, bee k ɑ nyik’n i?»)

⁴⁷K bin nbɑ sie lenŋ nɑ nbɑ gbɑt u yiini mɑnŋ k b siɑb yet ɑ: «U yi Elii e nɑ.»

⁴⁸K b ni yenɔ tin sɑɑ jii sɑɑpo k suunt dɑmiituk nnɑ ni, k jii sɑkn dɑɑɔk pɑɑk, k donn tul’ɔ ɑ wun nyu.

⁴⁹K u lieb nɑ yien’ɔ ɑ wun nyik’ɔ, ɑ k lɑɑn Elii sɑɑ bɑɑl k tɑn fiel’ɔ wɑɑ ɑɑ?

⁵⁰K Yiesu ŋɑnm yikn sɑnpɑɑpo wɑɑ ŋɑɑn ji kpo.

⁵¹L yuo nɑ k cincenn nbɑ tuu juɑn k puun Yennu jɑɑnti ŋɑsɑɑkɑk ni nɑ ji bɔkt l yul pɑɑk k tɑn sik tinŋ ni, k tinŋ dɑnm, k tɑnpiit bɔktl,

⁵²k kɑɑt biɑ luotl, k kpienm nbɑ din kpo k din tie Yennu niib nɑ bonciɑnn fiil kuun ni,

⁵³k nyii b kɑɑt ni, k Yiesu kuun fiilu puolpo k b kuɑ Selusɑɑlenm, k niib bonciɑnn lɑ’b nɑn b ninbinɑ.

⁵⁴K sejenm yudɑɑnɔ nɑ, nɑn u sejenm nbɑ pukn u pɑɑk k b guu Yiesu nɑ nbɑ lɑ nnɑ yuo nbɑ, nɑn tinŋ dɑnmu nɑ, k jɑŋmɑɑni suol’b bonciɑnn, k b yien ɑ: «Bɑlmɔni e, juɑ nɑ set tie Yennu Bijɑ e.»

⁵⁵Puob nbɑ din tuu wɑɑ Yiesu k nyii Gɑɑliile k sonmt’ɔ nɑ ji wokl k sie bɑnfɔkl ɑ ŋɑɑn goli lin nbɑ tuun mɑnŋ.

⁵⁶B yenm e din tie Mɑgdɑɑlɑ puo Mɑɑli, nɑn Sebede wɑɑs nɑɑ nɑ, nɑn Mɑɑli nbɑ din tie Sɑɑk nɑn Suosiɑf nɑɑ nɑ.

⁵⁷Lɑɑ tɑn bɔnt yuo nbɑ k Aliimɑɑte duo mɔktsuɑ bɑɑl, k u sɑnn din tie Suosiɑf. U mun biɑ din tie Yiesu puolpo juɑ e.

⁵⁸K u sɑɑn yudɑɑnɔ Piilɑɑt buol ni, k sɑɑ miɑl’ɔ ɑ wun cɑb’ɔ k wun kpɑɑt Yiesu gbɑnɑnt k pii. K Piilɑɑt tul yiikuo ɑ bin sɑɑn k sɑɑ jii Yiesu k tul’ɔ.

⁵⁹K Suosiɑf sɑɑn k sɑɑ jii Yiesu gbɑnɑnt k pɔbn’ɔ kɑtin-yienŋ ni,

⁶⁰k jii’u sɑɑn sɑɑ pii’u u mɔnŋ mɔnŋ kɑpɑɑɔnŋ nbɑ k u din gbiil’l tɑnpiiuk lokl ni nɑ, ŋɑɑn bilnt kɑtɑngbenŋl k tɑn biin kɑmɔb, ŋɑɑn ji ŋmɑt kun.

⁶¹K Mɑgdɑɑlɑ puo Mɑɑli, nɑn luɑ nbɑ k b mun yii’u Mɑɑli nɑ ji kɑl kpiɑ lenŋ k goli kɑɑɔk mɑnŋ.

⁶²Lɑɑ yent sɑn-nyiɑɔk, dɑɑl nbɑ tie ŋɑnm Suifnbɑ *Fuondɑɑl nɑ, k Yennu mɑnntieb yudɑnm nɑn Fɑɑliisiɑnnbɑ sɑɑn Piilɑɑt buol ni, k sɑɑ yet’ɔ ɑ:

⁶³«Cɑnbɑɑ, t tiɑn nɑn fɑɑk dɑɑnɔ mɑnŋ nbɑ dɑɑn be nɑ, u dɑɑn yet ɑ l i tie k u tɑn kpo, ɑ ŋɑɑn dɑɑ ŋɑntɑ dɑɑl u biɑ sɑɑ fiil kuun ni wɑɑ.

⁶⁴L pɑɑk, tuln sejenm mɔb k bin sɑɑn kii sɑɑ i guu u kɑɑɔk mɑnŋ bonŋɑnn k sɑɑ tuu dɑɑ ŋɑntɑ mɑnŋ dɑɑl. L i kii tie nnɑ i kɑɑ, u *puolpoweitieb tɑn sɑɑ bɑɑl k jɑn’ɔ e, ŋɑɑn yet niib ɑ u fiil kuun ni e. K kpinkpɑnni mɑnŋ tɑn sɑɑ gɑl sinsinn yɑl nɑ pɑɑk ɑ.»

⁶⁵K Piilɑɑt yet’b ɑ: «Jiin guutieb mɑn k bin sɑɑn kii sɑɑ i guu kɑɑɔk mɑnŋ nɑn yɑɑ sɑɑ fit guul biɑnŋ nbɑ.»

⁶⁶K b jii guutieb k b sɑɑn sɑɑ guu kɑɑɔk nɑ, ŋɑɑn buun tɑnt k pɔl’l fɑnu.