Read Moba Mɑɑtieo 28 Bible Online

Mɑɑtieo 28 - Moba bible

Mɑɑtieo 28

¹K *Suifnbɑ *Fuondɑɑl nɑ gɑl, ŋɑɑn k lɑsl dɑɑl sɑn-nyɑfɑɑl k Mɑgdɑɑlɑ puo Mɑɑli nɑn luɑ nbɑ k b mun yii’u Mɑɑli nɑ nyii sɑɑn, ɑ bin sɑɑ gɔn kɑɑɔk nɑ.

²K tinŋ din dɑnm bonciɑnn, k mɑɑn Yennu *mɑlɑkɑ nyii sɑnpɑɑpo sik, k tɑn bikt kɑtɑngbenŋl nɑ kɑmɔb nɑ pɑɑk, k kɑl l pɑɑk.

³K u gbɑnɑnt din nyili nɑn sɑnyiknti nɑ, k u liɑnt pien nɑn sɑnpɑgbɑnpieonŋ nɑ.

⁴K jɑŋmɑɑni din suol guutieb nɑ bonciɑnn, k b ji jekl k tɑn bɑɑ k duɑ duɑ nɑn kpienm nɑ.

⁵K mɑlɑkɑ nɑ yet puob mɑnŋ ɑ: «I dɑɑ tiin jɑŋmɑɑni mɑn. N mi nɑn i luon Yiesu nbɑ k b kpɑɑ’u dɑpunpunn pɑɑk nɑ e.

⁶U kɑɑ nnɑ, u fiil kuun ni nɑn wɑɑ dɑɑn yet biɑnŋ nbɑ nɑ. Ii sɑɑ nɑ mɑn k tɑn got wɑɑ dɑɑn duɑ siɑn nbɑ nɑ.

⁷Ii sɑɑ mɑn yiɑn yiɑn, k sɑɑ yet u *puolpoweitieb ɑ, u fiil kuun ni k gɑl sɑɑn Gɑɑliile wɑɑ. Lenŋ e wɑɑ k i sɑɑ lɑ’u. Bɑlmɔni e k n yien’i nɑ.»

⁸K puob nɑ nyii kɑɑɔk mɑnŋ penŋ k ciɑl sɑɑ ɑ bin sɑɑ yet u puolpoweitieb, k jɑŋmɑɑni lek mɔk’b, ŋɑɑn k b biɑ mɔk pɑlpienn bonciɑnn.

⁹Bɑɑ din sɑɑ nɑ, k Yiesu cet’b sɔnu pɑɑk k fuont’b, k b gbɑɑn u tuɑnn k suol u tɑɑ k jiɑnt’ɔ.

¹⁰K u yet’b ɑ: «I dɑɑ tiin jɑŋmɑɑni. Ii sɑɑ mɑn k sɑɑ yet n nɑɑ wɑɑs mɑnŋ ɑ bin sɑɑn Gɑɑliile. Lenŋ e wɑɑ k b sɑɑ lɑ’n.»

¹¹Puob mɑnŋ nbɑ din sɑɑ nɑ, k guutieb nbɑ guu kɑɑɔk nɑ siɑb ŋmɑt sɑɑn duo ni, k sɑɑ wɑnn Yennu mɑnntieb yudɑnm nɑ lin nbɑ tien mɑnŋ kul ɑ.

¹²Yennu mɑnntieb yudɑnm mɑnŋ nɑn sɑɑkɑb nbɑ lɑkn kɑl k lol lol nɑ, k b tul guutieb nɑ likli bonciɑnn,

¹³ŋɑɑn yet’b ɑ: «I yet ɑ Yiesu puolpoweitieb e bɑɑl tɑnsuuni, yuo nbɑ k i duɑl k guɑnt nɑ, k tɑn jɑn piit u gbɑnɑnt.

¹⁴k l i tie k tinŋ yudɑɑnɔ nɑ gbɑt nnɑ i e, tinm sɑɑ dɔkn i pɑɑk u buol ni k nyinn’i.»

¹⁵K guutieb mɑnŋ gɑɑl likli nɑ, ŋɑɑn ŋmɑt k sɑɑ yet niib nɑn bɑɑ wɑnn’b biɑnŋ nbɑ nɑ. K Suifnbɑ gɑɑl mɑɑn nɑ k l tien bɑlmɔni mɔkmɔk nɑn dinnɑ.

¹⁶K Yiesu tuomiinbɑ piik nɑn yenɔ kuɑ nɑ sɑɑn Gɑɑliile jɔsiɑl pɑɑk, siɑn nbɑ k Yiesu din wɑnn’b ɑ bin sɑɑn nɑ.

¹⁷Bɑɑ tɑn lɑ’u yuo nbɑ k b gbɑɑn k jiɑnt’ɔ, ŋɑɑn b siɑb din bils u pɑɑk.

¹⁸Ŋɑnn e k u cɑt k nɑkn’m, ŋɑɑn yet ɑ: «Yennu tul’n sɑnpɑɑpo nɑn tinŋ ni yiikuo kul ɑ wɑɑ.

¹⁹L pɑɑk, ii sɑɑ mɑn tingbounŋ nɑ ni, nibuolu kul ɑ buol ni, k sɑɑ tien’m n puolpoweitieb, k wul’b Yennu nyunwulu, Bɑɑ, nɑn Bijɑ, nɑn Foŋɑnm sɑnn ni,

²⁰k wɑnn’b k bin sɑk lin nbɑ k n wɑnn’i nɑ kul. Ii tiɑn mɑn nɑn n be nɑn’i yuo kul ɑ, mɔkmɔk nɑn *dulnyɑ gbennu.»