Read Moba Mɑɑtieo 4 Bible Online

Mɑɑtieo 4 - Moba bible

Mɑɑtieo 4

¹K Foŋɑnm din sɑɑn nɑn Yiesu pɑɑnpieonŋ ni ɑ *Sɑɑtɑn n sɑɑ jɑnm’ɔ.

²U din be lenŋ k k dii siɑl dɑpiinnɑ yennu ni nɑn nyiɑɔk, k kon ji din tɑn suol’ɔ.

³K Jɑnmidɑɑnɔ bɑɑl u buol ni k tɑn yet’ɔ ɑ: «L i tie k ɑ tie Yennu Bijɑ i e, fɑn yet tɑnɑ nɑ k lin kpɑnt pɑɑnu.»

⁴K Yiesu jiin k yet’ɔ ɑ: «L diɑn Yennu lolkpel kɑdɑɑɔk ni ɑ: ‹Pɑɑnu kuukuɑ pɑɑk kɑɑ te k nilɔ fo, ŋɑɑn mɑɑn nbɑ kul nyi Yennu mɔb ni nɑ pɑɑk e te k nilɔ fo.› »

⁵L puolpo k Sɑɑtɑn jii’u k sɑɑn nɑn’ɔ Yennu duo nbɑ k b yi lenŋ Selusɑɑlenm, k sɑɑ donn’ɔ Yennu jɑɑnti ŋɑsɑɑkɑk mɔpinyelk pɑɑk,

⁶ŋɑɑn yet’ɔ ɑ: «L i tie k ɑ tie Yennu Bijɑ i e, fɑn yukl mɔb nnɑ nɑ, k mɑɑn l diɑn Yennu lolkpel kɑdɑɑɔk ni ɑ: ‹U sɑɑ te k u *mɑlɑkɑɑnbɑ i guu’ɑ. B sii diɑ’ɑ nɑn b nii k ɑ tɑɑl kɑn gbiɑt tɑnn k ɑ lɑ dɑnŋ.› »

⁷K Yiesu yet’ɔ: «L biɑ yet Yennu lolkpel kɑdɑɑɔk ni ɑ: ‹Suɑ dɑɑ biki Yonmdɑɑnɔ Yennu.› »

⁸L puolpo k Sɑɑtɑn biɑ din jii’u k duo nɑn’ɔ juɑl nbɑ fɔk bonciɑnn pɑɑk k sɑɑ wɑnn’ɔ tingbounŋ nɑ yent kul kul nɑn l ŋɑnt,

⁹ŋɑɑn yet’ɔ ɑ: «L i tie k ɑ gbɑɑn k jiɑnt’n, n sɑɑ tul’ɑ yent mɑnŋ kul ɑ.»

¹⁰K Yiesu yet’ɔ: «Sietl nnɑ Sɑɑtɑn. L diɑn Yennu lolkpel kɑdɑɑɔk ni ɑ: ‹Nilɔ i jiɑntl Yonmdɑɑnɔ Yennu kuukuɑ e, kii biɑ kii tuun kii tien ŋuɑ kuukuɑ.› »

¹¹Ŋɑnn e k Sɑɑtɑn ji din yɑɑt ŋɑɑn nyik’ɔ, k Yennu mɑlɑkɑɑnbɑ bɑɑl k tɑn cɑnt’ɔ.

¹²Yiesu nbɑ din tɑn gbɑt nɑn *Heluod suol Sɑn kuɑn’ɔ dɑnsɑlk nɑ, k u sɑɑn Gɑɑliile.

¹³Wɑɑ din bɑɑl Nɑɑsɑɑlet nɑ u din k wei lenŋ, ŋɑɑn gɑl k sɑɑn Kɑpelnɑunm duo nbɑ be mɔk-kpinŋ, Sɑɑbuulɔn nɑn Neftɑɑli tinŋ ni nɑ.

¹⁴Lin nbɑ nɑ din tun ɑ lin gbien *Yennu sɔkni Esɑɑyi nbɑ din pɑk lin nbɑ nɑ po e ɑ:

¹⁵«Sɑɑbuulɔn tinŋ nɑn Neftɑɑli tinŋ nbɑ be *Suulden kpenpuotl po, k biɑ be mɔkgbenŋl buol, nɑn Gɑɑliile tinŋ nbɑ k bin nbɑ k tie *Suifnbɑ nɑ kɑl l ni;

¹⁶bin nbɑ be bunbɔnn ni nɑ lɑ yentjɑɑnn; bin nbɑ kɑl kuun bunbɔnn yent ni nɑ lɑ k yentu nɑ yentl k bɑɑt’b.»

¹⁷L yuo mɑnŋ k Yiesu din piin k muɑntl Yennu lɑbɑmɑnn k tien niib ɑ: «Mɔn kuɑŋɑɑn mɑn k lebt binbenŋ, k mɑɑn Yennu nɑɑn pel nɑ.»

¹⁸Yiesu nbɑ din sonm Gɑɑliile mɔkgbenŋl kpinŋ nɑ, k u tɑn lɑ nilɔ, wun nbɑ k b yi’u Siimɔn k biɑ yi’u Piɑl nɑ, nɑn u ninjɑ Andle, k b lubn jɑnlɑɑɔnŋ mɔkgbenŋl ni, k mɑɑn b din tie jɑnsuolɑ e.

¹⁹K u yet’b ɑ: «Ii wɑɑ’n mɑn, k n sɑɑ te k i so niib nɑn yɑɑ so jɑni bɑnnu nbɑ.»

²⁰K b set din nyik b jɑnlɑɑnt l tɑɑkpɑɑk ni ŋɑɑn wɑɑ’u.

²¹Wɑɑ din nyii lenŋ k sɑɑn tuɑnn po, k u lɑ jɑb bɑnle, Sɑɑk nɑn u ninjɑ Sɑn k b tie Sebede wɑɑs. B din be bulgbetl ni nɑn b bɑɑ Sebede k ŋɑnmt b jɑnlɑɑnt k u yiin’m.

²²L tɑɑkpɑɑk ni, k b nyik bulgbetl nɑ nɑn b bɑɑ, ŋɑɑn wɑɑ Yiesu.

²³Yiesu din lin Gɑɑliile tinŋ mɑnŋ kul ɑ po, k tumi niib, Suifnbɑ jɑɑnti diet ni, k muɑntl Yennu nɑɑn lɑbɑmɑnn k tien’m, k te k bin nbɑ mɔk yiɑlbuoli buoli kul nɑn bin nbɑ mɔk gbɑnɑntont kul pɑɑkt.

²⁴K niib din lin k muɑnt u sɑnn Siili tinŋ ni kul ɑ po. K b din jikt bɑɑtbuoli buoli kul ɑ, k bɑɑt nɑn’m u buol ni: bin nbɑ din yiɑl yiɑlbuolu nbɑ kul, gbɑnɑntont, bin nbɑ din gbie nɑn nɑlnbiit, bin nbɑ din bɑɑ gbitgbiɑ, nɑn gbɑnɑnkpienɑ dɑnm, k u din te k b pɑɑk.

²⁵K nibulciɑɔnŋ nbɑ din nyii Gɑɑliile, nɑn Doi-piik[10] cinciɑɔnŋ, nɑn Selusɑɑlenm, nɑn Suude, nɑn *Suulden kpenpuotl din bit k wɑɑ’u.