Read Moba Mɑɑtieo 5 Bible Online

Mɑɑtieo 5 - Moba bible

Mɑɑtieo 5

¹Yiesu nbɑ din lɑ nibulciɑɔnŋ mɑnŋ nɑ, k u duo juɑl pɑɑk k sɑɑ kɑl, k u *puolpoweitieb lɑkn u buol ni.

²K u yɑɑt u mɔb k piin k tumi’b k yien ɑ:

³«Bin nbɑ mi b mɔnŋ nɑn b nɑmi, pɑlpienn tie b yɑl e, k mɑɑn Yennu nɑɑn tie b yɑl e.

⁴Bin nbɑ mɔ k fɑbn, pɑlpienn tie b yɑl e, k mɑɑn Yennu sɑɑ mɑɑn b pɑlɑ wɑɑ.

⁵Bin nbɑ sikn b mɔnŋ, pɑlpienn tie b yɑl e, k mɑɑn ŋɑnm e tɑn sii yen tingbounŋ nɑ.

⁶Bin nbɑ yɑɑ ninbinɑ mɔn ɑ bii be binbenŋ nbɑ gbuot Yennu nunm nɑ ni pɑlpienn tie b yɑl e, k mɑɑn Yennu sɑɑ gbuo’m ɑ.

⁷Bin nbɑ tiin b lieb ninbɑɑɔk nɑ, pɑlpienn tie b yɑl e, k mɑɑn ŋɑnm e k Yennu mun biɑ sɑɑ tin’m ninbɑɑɔk.

⁸Bin nbɑ yɑɑ pɑlɑ ni yien, pɑlpienn tie b yɑl e, k mɑɑn ŋɑnm e sɑɑ lɑ Yennu.

⁹Bin nbɑ tie sɑndɑntinnɑ nɑn kunkɔnpɑt-tieb, pɑlpienn tie b yɑl e, k mɑɑn ŋɑnm e k Yennu sɑɑ yii’m u wɑɑs.

¹⁰Bin nbɑ k b muks’b bɑɑ tuun Yennu lonm nɑ pɑɑk, pɑlpienn tie b yɑl e, k mɑɑn Yennu nɑɑn tie b yɑl e.»

¹¹«Niib i suki’i k muks’i, k fɑ fɑɑk buoli buoli kul k biil’i, k mɑɑn yɑɑ tie n puolpoweitieb nɑ pɑɑk, pɑlpienn tie i yɑl e.

¹²Ii mɔk pɑlpienn mɑn bonciɑnn, k i pɑlɑ ii mɑn, k mɑɑn i nyuɑt tɑn sii yɑb *Yendɔunŋ ni. Nnɑ e k b ponŋ din muks *Yennu sɔkniinbɑ nbɑ din be yɑɑyuo ni nɑ.»

¹³«I tie nɑn yɑɑln nɑ e tingbounŋ nɑ ni. Yɑɑln i tɑnŋ i biil k ji k mɑn, nlee k b biɑ sɑɑ fit mɑnŋ’ɔ ɑ? L ji kɑɑ nyuɑt. Sie k b kpɑɑl k yɑl nɑn-yel po k niib sonm l pɑɑk.

¹⁴«Yinm e tie tingbounŋ nɑ yentu. Duo nbɑ k b mɑɑ k senn kunkonn pɑɑk, l kɑn fit bɔl.

¹⁵Suɑ mun k jokt fitl ŋɑɑn jikt bokt k cibnt l pɑɑk. Sie k u jii’l k tuɑn bonsiɑl nbɑ fɔk nɑ pɑɑk, k lin tul ŋɑɑk niib kul ɑ yentu.

¹⁶Yinm mun, ii be nnɑ. Ŋɑɑnt k i yentu n yent tul nifosɑɑli, ɑ bii lɑɑt i tuonŋɑnɑ kii dont i Bɑɑ nbɑ be Yendɔunŋ ni nɑ.»

¹⁷«I dɑɑ duki nɑn n bɑɑl mɑɑ n tɑn piin Yennu *senni nɑn u sɔkniinbɑ mɑɑn nɑ kɑɑ. N k bɑɑl mɑɑ n tɑn kpien’n kɑɑ, ŋɑɑn n bɑɑl mɑɑ n sɑk’l nɑn bɑlmɔni e.

¹⁸Bɑlmɔni e k n yien’i nɑ, sɑnpɑɑk nɑn tinŋ nɑ tɑn sɑɑ bot, ŋɑɑn Yennu senni kɑn mi bot nɑn bonmintk nnɑ wɑɑ, sie k l kul ɑ tɑn tun k gbenn.

¹⁹L pɑɑk, wun nbɑ tɑn tun k kpet Yennu senni mɑnŋ yenn kuɑ, k biɑ wɑnn lieb bonkpetl mɑnŋ, u tɑn sɑɑ juont tɑlk e Yennu nɑɑn ni, ŋɑɑn wun nbɑ wɑɑ senni mɑnŋ fɑnu, k biɑ wɑnt u lieb fɑnu, ŋuɑ e tɑn sii tie nijɑɑnn Yennu nɑɑn ni.

²⁰K mɑɑn min yien’i nɑn sie k i tuun Yennu nbɑ luon bɑnnu nbɑ k cie *senniwɑntieb nɑn Fɑɑliisiɑnnbɑ yɑl, l i kii tie nnɑ i kɑɑ, i kɑn mi k kuɑ Yennu nɑɑn ni.»

²¹«I ponŋ gbɑt k b din yien yɑɑyuo ni niib ɑ: ‹Dɑɑ kpi nilɔ, k mɑɑn wun nbɑ tɑn kpii nilɔ tɑn sii be mɑɑn ni,›

²²ŋɑɑn min ŋɑnin yien’i e lɑɑ, wun nbɑ dont wutuol u nɑɑ bik pɑɑk, u tɑn sii be mɑɑn ni, k wun nbɑ sukl u nɑɑ bik ɑ: ‹Bon-yɑnn nɑ,› u tɑn sii be mɑɑn ni, k wun nbɑ mun biɑ sukl u nɑɑ bik ɑ: ‹Bonjɑtl nɑ,› u tɑn sii be mɑɑn ni k kuɑ muu nbɑ kɑn mi kpien nɑ ni.

²³L pɑɑk, wun nbɑ tɑn kuɑ Yennu jɑɑnti ŋɑsɑɑkɑk ni ɑ wun pi Yennu piini binbintl buol, ŋɑɑn tiɑl nɑn u mɔk biit nɑn u nɑɑ bik,

²⁴wun nyik u piini mɑnŋ lenŋ, ŋɑɑn ŋmɑt sɑɑn u nɑɑ bik nɑ buol k bin sɑɑ ŋɑnm b mɑɑn k gbenn ɑ, k wun jen k tɑn pi u piini mɑnŋ k tul Yennu.

²⁵«Fin nɑn suɑ i mɔk mɑɑn, k sɑɑ mɑɑn mɑnŋ buut, fɑn ŋɑɑn k yin tɑɑn mɔyenm kuɑ k ŋɑnm i mɑɑn mɑnŋ yuo nbɑ k i dɑɑ be sɔnu ni nɑ. L i kii tie nnɑ i kɑɑ, dɑɑnɔ nɑ sɑɑ jii’ɑ k sɑɑn nɑn’ɑ bɑlbuulɔ buol ni, k bɑlbuulɔ nɑ n mun jii’ɑ k tien’ɑ dɑnsɑlguulɔ nuu ni k wun kuɑn’ɑ dɑnsɑlk.

²⁶Bɑlmɔni e k n yien’ɑ nɑ, ɑ kɑn mi nyi lenŋ, sie k ɑ tɑn pɑ likli kul nbɑ k b jiɑl’ɑ, k kuuk kɑn tenn.»

²⁷«I ponŋ biɑ gbiɑ k b din yien ɑ: ‹I mi k ɑ tun boncuncontuonɑ,›

²⁸ŋɑɑn min ŋɑnin yien’i e, nɑn wun nbɑ got puo k u niɑɔnŋ kuɑ’u, u tun * boncuncontuonn u pɑl ni wɑɑ.

²⁹L i tie k ɑ diitu po ninbinn i e te k ɑ tuun biit, fɑn kpɑkl’ɔ k lu’u bɑnfɔkl ɑ, k mɑɑn l i tie k ɑ kɔnŋ siɑl buol gbɑnɑnt, l cie nɑn k Yennu n tɑn kuɑn ɑ gbɑnɑnt kul muu nbɑ kɑn mi kpien nɑ ni.

³⁰L i tie k ɑ niidiitu e te k ɑ tuun biit, fɑn pot’ɔ k lu’u bɑnfɔkl ɑ, k mɑɑn l i tie k ɑ kɔnŋ ɑ nuuyenŋ kuɑ, l cie nɑn k ɑ gbɑnɑnt kul n tɑn kuɑ muu mɑnŋ ni.»

³¹«B biɑ din yien ɑ: ‹Wun nbɑ luon k wun yet u ŋɑɑpuo, wun tul’ɔ puoyetu kɑdɑɑɔk,›

³²ŋɑɑn min ŋɑnin yien’i e, nɑn wun nbɑ kul tɑn yet u ŋɑɑpuo, k l k tie u tun boncuncontuonn kɑɑ, ŋuɑ e te k puo mɑnŋ tun boncuncontuonn, k wun nbɑ kuɑn puo nbɑ k b yet’ɔ nɑ mun biɑ tun boncuncontuonn ɑ.»

³³«I ponŋ biɑ gbiɑ k b din yien yɑɑyuo ni niib ɑ: ‹I mi k ɑ pol mɔb nɑn fɑɑk, ŋɑɑn l i tie k ɑ pol mɔb Yennu sɑnn ni, l ŋɑn k ɑ tun k gbenn ɑ mɔpol mɑnŋ,›

³⁴ŋɑɑn min ŋɑnin yien’i e, nɑn i mi k i pol mɔb. Dɑɑ yien ɑ: ‹N pol sɑnpɑɑk,› k mɑɑn l tie Yennu nɑɑngbounŋ o.

³⁵Dɑɑ yien ɑ: ‹N pol tingbounŋ,› k mɑɑn l tie Yennu tɑɑpɑnŋmɑɑtl e. A biɑ dɑɑ yien ɑ: ‹N pol Selusɑɑlenm,› k mɑɑn l tie Yɑbnt Yennu duo e.

³⁶A biɑ dɑɑ yien ɑ: ‹N pol n yul,› k mɑɑn ɑ kɑn fit te k ɑ yukobuk yenn kuɑ n penn ɑmi k bɔnn,

³⁷ŋɑɑn ŋɑɑnt mɑn k i jiinu i tie ‹Nnn,› ɑmi ‹Aɑi,› k mɑɑn l i tie k i pɑk siɑl k pukn lin nbɑ nɑ pɑɑk, l ji nyii Biit dɑɑnɔ mɑnŋ buol e.»

³⁸«I ponŋ biɑ gbiɑ k b din yien ɑ: ‹Suɑ i kpɑkl ɑ ninbinn, fɑn mun kpɑkl u yɑl k jiin pɑnn. Suɑ i fɑɑ’ɑ k fokt ɑ nyɑnn, fɑn mun fɑɑ’u k fokt u yɑl k jiin pɑnn,›

³⁹ŋɑɑn min ŋɑnin yien’i e nɑn, i dɑɑ jiint lieb pɑnɑ. Suɑ i peb’ɑ tɑnpɑk ɑ niidiitu po kpiɑnu, fɑn ŋmɑnt ɑ gɑnŋ po mun k wun peb.

⁴⁰Suɑ i yɑɑ wun sɑɑn nɑn’ɑ buut buol k sɑɑ gɑɑl ɑ suot, fɑn sɑk k wun tont ɑ liɑtfuouk biɑk kii sɑɑ.

⁴¹Suɑ i miɑ’ɑ ɑ, ɑ jii u jik-kpiɑtl k sɑɑn nɑn’n kiiluomiɑtl yenn, fɑn jii k sɑɑn nɑn’n kiiluomiɑtɑ ŋɑnle.

⁴²Wun nbɑ miɑl’ɑ siɑl, fɑn tul’ɔ, k wun nbɑ mun biɑ luon k ɑ kpent’ɔ siɑl, fɑn kpent’ɔ k dɑɑ miin’ɔ.»

⁴³«I ponŋ biɑ gbiɑ k b din yien ɑ: ‹Ii luon *ɑ luɑ ŋɑɑn kii nɑn ɑ dɑtɑɑk,›

⁴⁴ŋɑɑn min ŋɑnin yien’i e, nɑn ii luon i dɑtɑi mɑn, kii mei Yennu kii tien niib nbɑ muks’i nɑ.

⁴⁵Ŋɑnn e sɑɑ te k i set kii tie i Bɑɑ nbɑ be sɑnpɑɑpo nɑ wɑɑs, k mɑɑn ŋuɑ e te k yennu do nifobiit nɑn nifoŋɑnm pɑɑk, k biɑ te k sɑɑk bɑɑ nifobiit nɑn nifoŋɑnm doi ni.

⁴⁶L i tie k i luon bin nbɑ luon’i nɑ i e, nyɔlɑnt po e k i sɑɑ lɑ Yennu buol ni? L k tie nnɑ kɑɑ k *lɑnpogɑɑltieb mun tuun ii?

⁴⁷K l i tie k i fuont i nɑɑ wɑɑs kuukuɑ i e, tuonŋɑnlɑnn po e k i tun k gɑl lieb i? Nnɑ kɑɑ k bin nbɑ k wɑɑ Yennu sɔnu nɑ mun tuun ii?

⁴⁸L pɑɑk, ii tuun bonŋɑnɑ kii tien niib kul nɑn i Bɑɑ nbɑ be sɑnpɑɑpo k tuun k tien niib kul nɑ.»