Read Moba Mɑɑtieo 6 Bible Online

Mɑɑtieo 6 - Moba bible

Mɑɑtieo 6

¹«I dɑɑ tuun i tuonŋɑnɑ ɑ niib n lɑ k pɑk’i, k mɑɑn ii tuun nnɑ, i kɑn lɑ nyuɑt i Bɑɑ nbɑ be sɑnpɑɑpo nɑ buol ni.

²«L i tie k ɑ yɑɑ ɑ tul tɑlɑs-dɑnm piini e, fɑɑ dɑɑ muɑntl nɑn kpinkpɑnni dɑnm nbɑ tuun biɑnŋ nbɑ *Suifnbɑ jɑɑnti diet ni, nɑn doi ni, ɑ niib n lɑ b tuonŋɑnɑ k pɑk’b nɑ. Bɑlmɔni e k n yien’i nɑ, b ponŋ gɑɑl b nyuɑt ɑ.

³Ŋɑɑn l i tie k ɑ yɑɑ ɑ pi tɑlɑs-dɑɑnɔ e, fɑn pi’u, k dɑɑ te k ɑ niigɑnŋ mi ɑ niidiitu nbɑ tuun lin nbɑ,

⁴k fɑɑ tuun lin nbɑ n biɑl wuol ni, k ɑ Bɑɑ nbɑ lɑɑt wuol ni nɑ sɑɑ pɑ’ɑ pɑɑnu ni.»

⁵«L i tie k ɑ yɑɑ ɑ miɑl Yennu, fɑɑ dɑɑ tuun nɑn kpinkpɑnni dɑnm nɑ nbɑ tuun biɑnŋ nbɑ nɑ, k mɑɑn b luon bii sie Suifnbɑ jɑɑnti diet ni e, nɑn sɔnpɑɑtɑ nbɑ be doi ni, kii mei Yennu ɑ niib i lɑɑt’b. Bɑlmɔni e k n yien’i nɑ, b ponŋ gɑɑl b nyuɑt ɑ.

⁶Ŋɑɑn l i tie k ɑ yɑɑ ɑ miɑl Yennu e, fɑn kuɑ ɑ dieok ni k luon ɑ gɑnn, ŋɑɑn miɑl ɑ Bɑɑ nbɑ be wuol ni mɑnŋ, k ɑ Bɑɑ nbɑ lɑɑt lin nbɑ k ɑ tuun wuol ni nɑ sɑɑ tul’ɑ nyuɑt.

⁷«L i tie k ɑ mei Yennu e, fɑɑ dɑɑ mɑntk mei mɔbonɑ nbɑ yɑb nɑn bin nbɑ k wɑɑ Yennu sɔnu nbɑ mei biɑnŋ nbɑ nɑ. B duki nɑn b miɑlu bonciɑnn pɑɑk e k b sɑɑ lɑ bɑɑ luon lin nbɑ.

⁸I dɑɑ tie nɑn ŋɑnm nɑ, k mɑɑn i Bɑɑ mɔnŋ ponŋ mi lin nbɑ k i luon k i dɑɑ k miɑl’ɔ.

⁹Yɑɑ tuu sii mei Yennu biɑnŋ nbɑ e nɑ: ‹T Bɑɑ nbɑ be *Yendɔunŋ ni, ɑ sɑnn n lɑ dontl,

¹⁰ŋɑɑnt k ɑ nɑɑn n bɑɑl, ŋɑɑnt k ɑ lonm n tien *dulnyɑ nɑ ninŋ, nɑn lɑɑ tie Yendɔunŋ ni nɑ.

¹¹Tul’t mɑnn dɑɑl kul.

¹²Nyikn cɑb t biit nɑn tɑɑ mun nyikt cɑbt bin nbɑ biil’t nɑ.

¹³A dɑɑ te k tin kuɑ jɑnmi ni, ŋɑɑn nyinn’t bonbiil ni.›

¹⁴«L i tie k i nyikt i lieb k cɑbt’b yuo nbɑ k b biil’i nɑ, i Bɑɑ nbɑ be sɑnpɑɑpo nɑ mun sɑɑ nyik k cɑb’i wɑɑ,

¹⁵ŋɑɑn i kii nyikt cɑbt i lieb biit, i Bɑɑ mun kɑn nyik cɑb i biit.»

¹⁶«L i tie k i yɑɑ i lol mɔi e, i dɑɑ biil i nuni po nɑn kpinkpɑnni dɑnm nɑ, k mɑɑn b tuu biil b nuni po, ɑ suɑ kul n lɑ k bɑnn nɑn b lol mɔi e. Bɑlmɔni e k n yien’i nɑ, b ponŋ gɑɑl b nyuɑt ɑ.

¹⁷Ŋɑɑn, l i tie k ɑ lol mɔb i e, fɑn yibl ɑ nunm po k sɑɑt ɑ yut fɑnu.

¹⁸Lin nbɑ nɑ e sɑɑ te k lieb kɑn bɑnn nɑn ɑ lol mɔb ŋɑɑn ɑ Bɑɑ nbɑ be wuol ni nɑ kuukuɑ e sii mi, k ɑ Bɑɑ nbɑ lɑɑt lin nbɑ k ɑ tuun wuol ni nɑ sɑɑ tul’ɑ nyuɑt.»

¹⁹«Dɑɑ kpɑɑn mɔktuk tingbounŋ nɑ ni, siɑn nbɑ k bonŋmiŋmɑbt nɑn tintɑni sɑɑ biil, k nɑn-yukb biɑ sɑɑ kuɑ k jɑn,

²⁰ŋɑɑn mɑntk kpɑɑn Yendɔunŋ ni, siɑn nbɑ k bonŋmiŋmɑbt nɑn tintɑni kɑn fit k biil, k nɑn-yukb biɑ kɑn fit kuɑ k jɑn,

²¹k mɑɑn siɑn nbɑ k ɑ mɔktuk be nɑ, ɑ dudukt mun be lenŋ e.»

²²«A ninbinɑ e tie ɑ gbɑnɑnt fitl. L pɑɑk, ɑ ninbinɑ i ŋɑn, ɑ gbɑnɑnt kul po sii be yentu ni e,

²³ŋɑɑn ɑ ninbinɑ i kii ŋɑn, ɑ gbɑnɑnt kul sii be bunbɔnn ni e. L pɑɑk, l i tie k yentu nbɑ be ɑ ni nɑ tɑn bɔnn, bunbɔnciɑɔnŋ i nɑ.»

²⁴«Suɑ kɑn fit tun k tul yonmdɑnm bɑnle. U sii nɑn yenɔ ŋɑɑn kii luon luɑ, ɑmi u sii niɑn yenɔ e, ŋɑɑn kii jɑkn luɑ nɑ. I kɑn fit wɑɑ Yennu nɑn tingbounŋ nɑ mɔktuk biɑk.

²⁵«L pɑɑk e te k n yien’i, i dɑɑ fɑbn i binbenŋ po nɑn yɑɑ sɑɑ di lin nbɑ ɑmi k nyu lin nbɑ, k biɑ dɑɑ fɑbn i gbɑnɑnt pɑɑk nɑn yɑɑ sɑɑ liɑ lin nbɑ. Mɑnfuol k gɑl jiet ii? K gbɑnɑnt mun biɑ k gɑl tiɑt ii?

²⁶Gotl nuɑni nbɑ yuuk k lin nɑ. B k buul. B biɑ k jɑɑn k wu sukɑ nɑn nɑɑpɑɑt ni, ŋɑɑn k i Bɑɑ nbɑ be sɑnpɑɑpo nɑ dint’b. I k mɔk nyuɑt k gɑl nuɑni ii?

²⁷I ŋmee sɑɑ fit fɔkn u mɑnfuol u dudukt nbɑ muksl’ɔ nɑ pɑɑk i?

²⁸«Bee k i fɑbn i mɔnŋ liɑnt pɑɑk i? Gotl mɑn tipuuk nɑn l ŋɑnt, ŋɑɑn b k tuun siɑl k fɑnŋt b mɔnŋ,

²⁹ŋɑɑn n yien’i e, kpɑnbɑl Sɑɑlomɔn nbɑ lek din mɔk tɑŋɑnt biɑnŋ nbɑ, u din k mi liɑ liɑnt k l ŋɑn nɑn tipuut nɑ.

³⁰Muɑt nbɑ be dinnɑ, ŋɑɑn wonn k b juo muu wɑɑ nɑ, Yennu nbɑ fɑnŋt’l biɑnŋ nbɑ nɑ, k u kɑn lɑnn yinm ii? Yinm yɑdɑ-kɑnpuɑnɑ dɑnm nɑ.

³¹«L pɑɑk, i dɑɑ fɑbn k duki ɑ: ‹T sɑɑ di bee?› ɑmi: ‹T sɑɑ nyu bee?› ɑmi: ‹T sɑɑ liɑ bee?›

³²Bin nbɑ k wɑɑ Yennu sɔnu nɑ bɑkɑ tuu be lin nbɑ nɑ kul ni e, ŋɑɑn i Bɑɑ nbɑ be sɑnpɑɑpo nɑ set mi nɑn i luon lin nbɑ nɑ kul ɑ.

³³Ŋɑɑnt mɑn k i ninbinɑ i mɔn Yennu nɑɑn nɑn lin nbɑ tuok k Yennu yɑɑ yii tuun nɑ pɑɑk, k u sɑɑ jii bonɑ nbɑ nɑ kul k tul’i.

³⁴L pɑɑk, dɑɑ te k wonn mɑɑn muks’i ni, k mɑɑn wonn e sɑɑ muks u mɔnŋ. Dɑɑl kul mɔk u fɑlɑ k l jɑnŋt’ɔ e.»