Read Moba Mɑɑtieo 7 Bible Online

Mɑɑtieo 7 - Moba bible

Mɑɑtieo 7

¹«I dɑɑ kpɑɑn lieb biit nbɑ k i sɑɑ fit tɑɑl’b l pɑɑk, k Yennu mun dɑɑ tɑɑl’i ni,

²k mɑɑn yɑɑ kpɑɑn lieb biit k tɑɑl’b biɑnŋ nbɑ nɑ, nnɑ e k Yennu mun sɑɑ tɑɑl’i, k biɑnŋ nbɑ k i biki k tien i lieb nɑ, nnɑ e k Yennu mun sɑɑ bikn k tul’i.

³Bee k ɑ goli lɑɑt muɑnu nbɑ be *ɑ luɑ ninbinn ni, ŋɑɑn k k lɑ jɑɑntɑlk nbɑ be ɑ mɔnŋ mɔnŋ ninbinn ni nɑ?

⁴Nlee k ɑ sɑɑ yet ɑ luɑ ɑ: ‹Ŋɑɑnt k n nyinn muɑnu nbɑ be ɑ ninbinn ni nɑ,› ŋɑɑn k jɑɑntɑlk e be ɑ mɔnŋ ninbinn ni?

⁵Fin kpinkpɑnni dɑɑnɔ nɑ, nyint jɑɑntɑlk nbɑ be ɑ ninbinn ni nɑ sinsinn, k ji fit lɑ fɑnu k nyinn muɑnu nbɑ be ɑ luɑ ninbinn ni nɑ.

⁶«I dɑɑ jikt lin nbɑ tie Yennu yɑl k tien bɔi, k mɑɑn l i tie k i tun nnɑ b sɑɑ fit ŋmɑt junt’i. I dɑɑ jikt lin nbɑ mɔk nyuɑt bonciɑnn k tien duoli, k mɑɑn l i tie k i tun nnɑ b sɑɑ ŋmɑt ŋmɑt nɑn tɑnt e.»

⁷«Miɑt mɑn, k b sɑɑ tul’i. Lomin mɑn, k i sɑɑ lɑ wɑɑ. Kpɑɑn gɑnn mɑn, k b sɑɑ luot k tul’i,

⁸k mɑɑn wun nbɑ kul mei gɑɑn e, k wun nbɑ mun luon, u lɑɑt e, k wun nbɑ kpɑɑn gɑnn, k b luotl tien’ɔ.

⁹Yinm, i ŋmee k u bik sɑɑ miɑl’ɔ jiet k wun jii tɑnn k tul’ɔ?

¹⁰Ami ŋmee k u bik sɑɑ miɑl’ɔ jɑnŋ k wun jii wɑɑɔk k tul’ɔ?

¹¹L i tie k yinm nbɑ tie biitdɑnm nɑ mi biɑnŋ nbɑ k i sɑɑ tul i wɑɑs bonŋɑnɑ, i Bɑɑ nbɑ be sɑnpɑɑpo nɑ ji kɑn tul bin nbɑ mei’ɔ nɑ bonŋɑnɑ ɑɑ?

¹²«Biɑnŋ nbɑ k ɑ luon lieb ii tuun kii tien’ɑ nɑ, ii mun ii tuun nnɑ kii tien ɑ lieb, k mɑɑn Yennu *senni nɑn u sɔkniinbɑ wɑnnu nɑ ni wɑnt nnɑ e.»

¹³«Kuɑn mɑn tɑnmɔyebk nɑ ni, k mɑɑn tɑnmɔb nbɑ kuɑ muu nbɑ kɑn mi kpien nɑ ni nɑ yɑln hei, k l sɔnu biɑ mɑn nɑn sonml, k niib bonciɑnn e kuɑ tɑnmɔb mɑnŋ ni.

¹⁴K mɑnfuol tɑnmɔb nɑ ŋɑnin tie bon-yebk e, k l sɔnu biɑ pɑɑl nɑn sonml, k niib wɑɑnm-nnɑ e lɑɑt.»

¹⁵«Ii mi mɑn fɑɑk sɔkniinbɑ nɑ po, bin nbɑ bɑɑt i buol ni k nɑɑn nɑn pei nɑ, ŋɑɑn tie kinkɑtɑ nɑn bɑlmɔni nɑ.

¹⁶B tuonɑ ni e k i sɑɑ bɑnn bɑɑ tie bin nbɑ. B k lɑɑt luɑnɑ nbɑ k b yi *lɑɑsen penn pɑɑk k pɔ, k biɑ k lɑɑt luɑnɑ nbɑ k b yi *fiignbɑ nɑ kunkoni pɑɑk k pɔ.

¹⁷Nnɑ e k tiŋɑnŋ kul luon luɑnŋɑnɑ, k tibiiuk mun luon luɑnbiit.

¹⁸Tiŋɑnŋ kɑn lon luɑnbiit. Tibiiuk mun biɑ kɑn lon luɑnŋɑnɑ.

¹⁹Tiik kul nbɑ k luon luɑnŋɑnɑ, b sɑɑ cuɑ’l e k lu’l muu ni.

²⁰L pɑɑk, fɑɑk sɔkniinbɑ tuonɑ ni e k i sɑɑ bɑnn’b.»

²¹«L k tie bin nbɑ yi’n ‹Yonmdɑɑnɔ, Yonmdɑɑnɔ› nɑ kul kɑɑ tɑn sɑɑ kuɑ Yennu nɑɑn ni, sie bin nbɑ sɑk n Bɑɑ nbɑ be sɑnpɑɑpo nɑ mɔb.

²²*Dulnyɑ cɑɑtu mɑnŋ dɑɑl i tɑnŋ i bɑɑl, niib bonciɑnn e tɑn sii yi’n k yien ɑ: ‹Yonmdɑɑnɔ, Yonmdɑɑnɔ, t din k sɔknt Yennu mɑɑn ɑ sɑnn ni ii? A sɑnn ni e k t din nyint nɑlnbiit niib ni, ɑ sɑnn ni e k t biɑ tuun bɑktnɔunŋ tuonjɑɑnɑ.›

²³L yuo k n mun tɑn sɑɑ jiin k yet’b ɑ: ‹N k mi’i ni, yinm biitdɑnm nɑ, sietl nnɑ mɑn.› »

²⁴«L pɑɑk, wun nbɑ kul gbiɑ n mɑɑn nɑ k wɑɑ’l fɑnu, n sɑɑ nɑnn’ɔ nɑn yɑndɑɑnsuɑ nbɑ din mɑɑ u ŋɑɑk tɑnpiiuk pɑɑk nɑ e,

²⁵k sɑɑk tɑn bɑɑ, k nyun gbie k yɑt nɑn duo, k wounŋ dɑ k tut ŋɑɑk mɑnŋ dikpinɑ, ŋɑɑn k l lek sie kenken k k bɑɑ, k mɑɑn u din mɑɑ’l tɑnpiiuk pɑɑk e.

²⁶«Wun nbɑ kul gbiɑ n mɑɑn nɑ, ŋɑɑn yet l weiu, nɑɑn nɑn jɑjɑtsuɑ nbɑ din mɑɑ u ŋɑɑk tɑnbiini ni nɑ e,

²⁷k sɑɑk tɑn bɑɑ, k nyun gbie k yɑt nɑn duo, k wounŋ dɑ tut ŋɑɑk mɑnŋ dikpinɑ, k l kul bet bɑɑ, k nɑn siɑl ɑ k tenn.»

²⁸Yiesu nbɑ din pɑk mɔbonɑ nɑ k gbenn yuo nbɑ, k u wɑnnu mɑnŋ din bɑkt nibul nɑ bonciɑnn,

²⁹k mɑɑn u din wɑnt’b nɑn minu e, k k wɑnt’b nɑn *senniwɑntieb nbɑ wɑnt’b biɑnŋ nbɑ nɑ.