Read Moba Mɑɑtieo 8 Bible Online

Mɑɑtieo 8 - Moba bible

Mɑɑtieo 8

¹Yiesu nbɑ din tɑn nyii juɑl mɑnŋ pɑɑk k sik yuo nbɑ, k niib bonciɑnn wɑɑ u puolpo.

²K gbɑɑtsuɑ bɑɑl k tɑn gbɑɑn u tuɑnn k yien ɑ: «Yonmdɑɑnɔ, l i tie k ɑ luon, ɑ sɑɑ fit k te k n ŋɑɑɔk nɑ n gbenn.»

³K Yiesu tɑnt u nuu ŋɑɑn sii’u k yet’ɔ ɑ: «N luon. A ŋɑɑɔk mɑnŋ n gbenn.» L tɑɑkpɑɑk ni k u ŋɑɑɔk nɑ set gbenn.

⁴K Yiesu yet’ɔ ɑ: «Ii mi k ɑ yet suɑ mɑɑn nɑ, ŋɑɑn i sɑɑ Yennu mɑnntuɑ buol k jii ɑ mɔnŋ k wɑnn’ɔ, k biɑ mɑnn *mɑlunŋ k tul Yennu nɑn Muois nbɑ din senn bɑnnu nbɑ, ɑ suɑ kul n bɑnn nɑn ɑ ŋɑɑɔk[11] mɑnŋ set gbenn ɑ.»

⁵Yiesu nbɑ din kuɑ Kɑpelnɑunm yuo nbɑ k Luonm tinŋ sejenm yudɑɑnsuɑ cet’ɔ sɔnu ni, k bɑln’mɔ k yien ɑ:

⁶«Yonmdɑɑnɔ, n tuontunsuɑ e yiɑl. U gbɑnɑnt kpo wɑɑ, k l muks’ɔ bonciɑnn, k u duɑ dieok ni.»

⁷K Yiesu yet’ɔ ɑ: «N sɑɑ sɑɑn k sɑɑ te wun pɑɑk.»

⁸K u jiin ɑ: «Yonmdɑɑnɔ, n k ŋɑn nɑn fɑn bɑɑl kuɑ n ŋɑɑk ni, ŋɑɑn pɑkn mɔbonn e, k n tuontunnɔ nɑ n lɑ lɑɑfiɑ.

⁹K mɑɑn n mɔk bin nbɑ gɑl’n k yen’n, k n mun diɑ sejenm k yen’m, k fit yien yenɔ ɑ: ‹Ii sɑɑ,› k u sɑɑ, k yien luɑ ɑ: ‹Bɑɑt,› k u bɑɑt, k biɑ yien n tuontunnɔ ɑ: ‹Tient nnɑ, k u tie.› »

¹⁰Yiesu nbɑ din gbɑt lin nbɑ nɑ, k l yɑɑl ŋɑɑn lit’ɔ, k u jiɑnt got niib nbɑ wɑɑ u puolpo nɑ k yet’b ɑ: «Bɑlmɔni e k n yien’i nɑ, n dɑɑ k mi lɑ yɑdɑ nɑ buolu suɑ buol nɑn Islɑɑeltieb sinsuuk ni wɑɑ.

¹¹N yien’i e, niib bonciɑnn tɑn sɑɑ nyi yendopo nɑn yenbɑɑpo, k ŋɑnm nɑn Ablɑɑhɑɑnm, nɑn Isɑɑk, nɑn Sɑɑkɔb tɑn sɑɑ lɑkn k kɑl k di jɑɑnm Yennu nɑɑn ni,

¹²ŋɑɑn bin nbɑ k tie nɑɑn mɑnŋ ni niib nɑ, b tɑn sɑɑ jii’b k lu’b nɑn-yel po, bunbɔnn ni. Lenŋ mɑnŋ e k niib tɑn sii fɑbn mɔ k nyiitl nyɑnɑ.»

¹³K Yiesu din ŋmɑnt k yet sejenm yudɑɑnɔ mɑnŋ ɑ: «Ii kun. Fɑɑ tien yɑdɑ biɑnŋ nbɑ nɑ, l sɑɑ tun nnɑ e k tul’ɑ.» K u tuontunnɔ nɑ set din pɑɑk l yuo nɑ.

¹⁴Tɔn, k Yiesu din sɑɑn kuɑ Piɑl ŋɑɑk ni k lɑ k Piɑl diɑnpuok duɑ yiɑl gbɑnɑntounŋ.

¹⁵K Yiesu sii u nuu, k u gbɑnɑntounŋ nɑ gbenn, k u fiil k tien’ɔ sɑɑɔnŋ.

¹⁶L dɑɑl mɑnŋ dɑɑjuouk, k b din jii niib bonciɑnn nbɑ k nɑlnbiit be b ni nɑ, k bɑɑl nɑn’m Yiesu buol ni, k u lek pɑk mɑɑn k nɑlnbiit nɑ nyii, k biɑ tul bin nbɑ yiɑl nɑ kul ɑ lɑɑfiɑ.

¹⁷U din tun lin nbɑ nɑ ɑ *Yennu sɔkni Esɑɑyi nbɑ din pɑk nɑ n gbien ɑ: «U mɔnŋ mɔnŋ gɑɑl t gbɑnɑntounŋ nɑn t yiɑlbuolu buolu k jii yɑɑt.»

¹⁸Yiesu nbɑ din lɑ k nibulciɑɔnŋ tɑn lint’ɔ yuo nbɑ, k u yet u *puolpoweitieb ɑ bin fiil k bin puot mɔkgbenŋl puotl nɑ po.

¹⁹K Yennu *senniwɑntɔsuɑ din bɑɑl k tɑn yet’ɔ ɑ: «Wɑntuɑ, n sɑɑ wei’ɑ siɑn nbɑ kul po k ɑ sɑɑ.»

²⁰K Yiesu yet’ɔ ɑ: «Lunlonɑ mɔk fɔli, k nuɑni mun biɑ mɔk tiɑt, ŋɑɑn *Nisɑɑlk Bijɑ k mɔk dinduɑlbuol.»

²¹Tɔn, k u puolpoweitieb yenɔ mun tɑn yet’ɔ ɑ: «Yonmdɑɑnɔ, ŋɑɑnt k n sɑɑn k sɑɑ pii n bɑɑ sinsinn ɑ.»

²²K Yiesu jiin yet’ɔ ɑ: «Ii wɑɑ’n, ŋɑɑn nyik k kpienm ii pii b kpienlieb.»

²³Yiesu nbɑ din kuɑ bulgbetl ni yuo nbɑ, k u puolpoweitieb mun wei k kuɑ.

²⁴K wonpɑɑluk din fikt k dɑ mɔkgbenŋl mɑnŋ ni, k nyunpɑnɑ din pil k kuɑ bulgbetl nɑ ni k tɑn yɑɑ lin gbie, ŋɑɑn k Yiesu duɑ k guɑnt.

²⁵K u puolpoweitieb din bɑɑl k fiin’ɔ, k yet’ɔ ɑ: «Yonmdɑɑnɔ, fiel’t. T sɑɑ kpo wɑɑ.»

²⁶K Yiesu yet’b ɑ: «Yinm yɑdɑ-kɑnpuɑnɑ dɑnm, bee k i tiin jɑŋmɑɑni?» ŋɑɑn fiil k tiɑn wounŋ nɑn nyunpɑnɑ nɑ pɑɑk ɑ bin ŋmin, k b set ŋmin suon nnɑ.

²⁷K l yɑɑl ŋɑɑn lit’b, k b ji boi b lieb ɑ: «Nilɔ nɑ tie nibuol bee? K wounŋ nɑn nyunpɑnɑ set sɑɑk u mɔb i?»

²⁸Yiesu nbɑ din puot Gɑɑliile mɔkgbenŋl nɑ, k u kuɑ Gɑɑdɑɑlenn[12] tinŋ ni. K jɑb bɑnle nbɑ gbie nɑn nɑlnbiit nɑ din nyii kɑɑt ni k cet’ɔ. B din mɔk jɑŋmɑɑni hei, k suɑ k fit gɑɑl bɑɑ be siɑn.

²⁹K b din yikn sɑnpɑɑpo wɑɑ k yien ɑ: «Fin Yennu Bijɑ, tinm nɑn fin, nlee mɑntk i? A bɑɑl nnɑ ɑ ɑ tɑn din’t fɑlɑ e, ŋɑɑn k l yuo nɑ dɑɑ k bɑɑl ii?»

³⁰Tɔn, k duoli bonciɑnn din sie kpinŋ po nnɑ wɑɑ, k di, k k fɔk nɑn’m.

³¹K nɑlnbiit mɑnŋ din bɑln Yiesu bonciɑnn k yet’ɔ ɑ: «L i tie k ɑ nyinn’t i e, fɑn tun’t k tin sɑɑn k sɑɑ kuɑ duoli nɑ ni.»

³²K Yiesu yet’b ɑ: «Ii sɑɑ mɑn.» K b nyii jɑb mɑnŋ ni, k sɑɑn k sɑɑ kuɑ duoli nɑ ni, k duoli nɑ kul din tin billl, k sik juɑl nɑ pɑɑk k sɑɑ bɑɑ mɔkgbenŋl nɑ ni k dii nyun.

³³K bin nbɑ guu duoli mɑnŋ fiil k ciɑl k sɑɑn duo ni, k sɑɑ muɑnt lin nbɑ kul tien mɑnŋ, nɑn biɑnŋ nbɑ k nɑlnbiit nyii wɑɑtb nɑ ni.

³⁴K duo nɑ niib kul ɑ din bit k sɑɑn k sɑɑ tuok Yiesu. Bɑɑ din lɑ’u yuo nbɑ, k b piin k bɑln’mɔ ɑ wun nyi b tinŋ ni.