Read Moba Mɑɑlk 16 Bible Online

Mɑɑlk 16 - Moba bible

Mɑɑlk 16

¹*Fuondɑɑl nbɑ din tɑn gɑl nɑ, k Mɑgdɑɑlɑ puo Mɑɑli, nɑn Sɑɑlome, nɑn Mɑɑli wun nbɑ din tie Sɑɑk nɑɑ nɑ, din sɑɑn k sɑɑ dɑɑ tulɑɑlnunubt ɑ bin sɑɑn but Yiesu gbɑnɑnt pɑɑk.

²*Suifnbɑ Fuondɑɑl nbɑ din gɑl k l yent sɑn-nyɑpob ni k b din sɑɑ kɑɑɔk mɑnŋ buol ni.

³Bɑɑ dɑɑ din be sɔnu ni yuo nbɑ, k b fɑɑ nɑn lieb lɑbɑɑl ɑ: «Ŋmee sɑɑ sɑɑ bilnt kɑtɑnu kɑɑɔk mɑnŋ mɔb pɑɑk k tul’t i?» L kɑtɑnu din gbenŋ bonciɑnn. Ŋɑɑn k b tɑn pel lenŋ, k got lɑ k kɑtɑnu mɑnŋ ponŋ bilnt k duɑ l kuɑ.

⁵Bɑɑ kuɑ kɑɑɔk mɑnŋ ni nɑ, b lɑ nɑɑsimɔ nnɑ, k u liɑ bɑɑnpieounŋ k kɑl niidiitu po, k l tien’m jijiet bonciɑnn.

⁶K nɑɑsimɔ mɑnŋ yet’b ɑ: «I dɑɑ jie siɑl mɑn. I luon Nɑɑsɑɑlet nilɔ Yiesu nbɑ k b kpii’u dɑpunpunn pɑɑk nɑ e. U fiil kuun ni wɑɑ. U kɑɑ nnɑ. Gotl mɑn, bɑɑ dɑɑn bilɔ siɑn nbɑ nɑ.

⁷Ŋɑɑn i ŋmɑt k sɑɑ yet Piɑl nɑn *puolpoweitelieb ɑ u gɑl i tuɑnn po k sɑɑn Gɑɑliile wɑɑ. Lenŋ e k i sɑɑ sɑɑ lɑ’u nɑn wɑɑ ponŋ dɑɑn yet’i biɑnŋ nbɑ nɑ.»

⁸K l yɑɑl ŋɑɑn lit puob mɑnŋ, k b gbɑnɑnt jek bonciɑnn, k b nyii kɑɑɔk nɑ ni, k ciɑl. B lek k fɑɑ suɑ l lɑbɑɑl, k mɑɑn jɑŋmɑɑni din suol’b bonciɑnn.

⁹[Tɔn, Yiesu nbɑ din fiil kuun ni lɑsl dɑɑl sɑn-nyiɑɔk ni nɑ, u din dɔnŋ dɔkt Mɑgdɑɑlɑ puo Mɑɑli pɑɑk e, wun nbɑ k u din nyinn nɑlnbiit bɑnlole u ni nɑ.

¹⁰K puo mɑnŋ sɑɑn sɑɑ yet Yiesu wei-nɑn-lieb nbɑ mɔ k fɑbn nɑ.

¹¹Ŋɑɑn bɑɑ gbɑt ɑ Yiesu jen u mɑnfuol ni k u lɑ’u nɑ, b k sɑk tien’ɔ yɑdɑ.

¹²Lin nbɑ nɑ puolpo e k Yiesu puolpoweitieb bɑnle siɑb din tɑn nyii duo nɑ ni k sonm sɔnu ni k sɑɑ siɑl buol, k u lebt u mɔnŋ k dɔkt b pɑɑk.

¹³K b ŋmɑt jen duo nɑ ni k tɑn yet b lieb, ŋɑɑn k b lek k tien’m yɑdɑ.

¹⁴L puolpo e biɑk k Yiesu tuomiinbɑ piik nɑn yenɔ kuɑ nɑ din kɑl k di jiet, k Yiesu tɑn dɔkt b pɑɑk, k kpil’b b yɑdɑ puɑln pɑɑk nɑn b tubɑ nbɑ kpɑɑ biɑnŋ nbɑ nɑ pɑɑk, k mɑɑn b k tien bin nbɑ lɑ nɑn u fiil kuun ni nɑ yɑdɑ.

¹⁵K u biɑ yet’b ɑ: «Ii sɑɑ kii muɑntl lɑbɑmɑnn nɑ k tul suɑ kul tingbounŋ nɑ kul sɑɑk ɑ po.

¹⁶Wun nbɑ kul tien yɑdɑ, k b wul’ɔ Yennu nyunwulu, u sɑɑ lɑ fielu, ŋɑɑn wun nbɑ kul k tien yɑdɑ, Yennu sɑɑ bu u buut k biil’ɔ wɑɑ.

¹⁷Ŋɑɑn bin nbɑ tien yɑdɑ sɑɑ tun yɑɑl-lituk tuonɑ nɑ e: b sii tɑɑn n sɑnn k nyint nɑlnbiit niib ni, k biɑ piɑk mɑɑn nbɑ k b k mi pɑk.

¹⁸B i tɑnŋ i suol wɑi, ɑmi b i tɑnŋ i nyuu bonbiil, l kɑn tien’m siɑl. B biɑ sɑɑ yii b nii bɑɑtb pɑɑk k b sɑɑ lɑ lɑɑfiɑ.»

¹⁹Tɔn, Yonmdɑɑnɔ Yiesu nbɑ pɑk mɑɑn nɑ k gbenn yuo nbɑ, k Yennu te k u duo sɑnpɑɑpo k sɑɑ kɑl ŋuɑ Yennu niidiitu po.

²⁰L puolpo k u puolpoweitieb sɑɑn k sɑɑ muɑntl u lɑbɑmɑnn lokl kul po, k Yonmdɑɑnɔ din be nɑn’m, k te k b tuun yɑɑl-lituk tuonɑ, k l tuonɑ nɑ din wɑnn *siɑlɑ ɑ b muɑnti mɑnŋ set tie bɑlmɔni e.]