Read Moba Mɑɑlk 2 Bible Online

Mɑɑlk 2 - Moba bible

Mɑɑlk 2

¹K l din tɑn tien dɑɑ ŋɑnle nnɑ e, k Yiesu biɑ ŋmɑt Kɑpelnɑunm, k niib bonciɑnn gbɑt nɑn u ŋmɑt ŋɑɑpo wɑɑ.

²K b din tikl hɑli nɑn yiɑl bonmintk nnɑ wɑɑ tɑn kɑɑ ŋɑɑk mɑnŋ ni k suɑ sɑɑ fit bɑɑl tɑnmɔb buol ni, k u muɑntl Yennu mɑɑn k tien’m.

³K niib bɑnnɑ din tɑn jii bɑɑtsuɑ k u gbɑnɑnt kpo.

⁴Bɑɑ din k fit bɑɑl Yiesu buol k mɑɑn niib nbɑ din yɑbt nɑ pɑɑk, k b cuɑ luot mɔpinn yul pɑɑk, k sikn bɑɑtɔ nɑ k u duɑ u liɑnŋ pɑɑk k tɑn bil’ɔ Yiesu tuɑnn ni.

⁵Yiesu nbɑ din lɑ bɑɑ tien’ɔ yɑdɑ biɑnŋ nbɑ nɑ, k u yet bɑɑtɔ nɑ ɑ: «N bik, n nyik cɑb ɑ biit ɑ.»

⁶L yuo nɑ k Yennu *senniwɑntesiɑb din kɑl lenŋ mɑnŋ k boi b pɑlɑ ni ɑ:

⁷«Bee tien k juɑ nɑ piɑk nnɑ? U biil Yennu sɑnn. Ŋmee dɑɑ sɑɑ fit nyik cɑb nilɔ biit, k l k tie Yennu kuukuɑ kɑɑ?»

⁸K Yiesu din bɑnn dudukt nbɑ be b pɑlɑ ni, k u boi’b ɑ: «Bee k i mɔk dudukt nɑ buolu?

⁹Mi i yet bɑɑtɔ nɑ ɑ: ‹N nyik cɑb ɑ biit› ɑmi mi i yet’ɔ ɑ: ‹Fiit k jii ɑ liɑnŋ kii sonm,› mɑɑn munle nɑ sinsuuk ni lɑnn po e pɑɑl i?

¹⁰Ŋɑɑn n luon k yin bɑnn nɑn *Nisɑɑlk Bijɑ mɔk yiikuo tingbounŋ nnɑ, k sɑɑ fit nyik cɑb nilɔ biit.» Ŋɑnn e k u jiɑnt yet wun nbɑ k u gbɑnɑnt kpo nɑ ɑ:

¹¹«N yien’ɑ e fiit, k jii ɑ liɑnŋ kii kun ɑ ŋɑɑk ni.»

¹²L tɑɑkpɑɑk ni k gbɑnɑnkpienn dɑɑnɔ nɑ fiil, k jii u liɑnŋ k nyii b kul ɑ ninbinɑ ni, k l bɑkt b kul ɑ, k b piɑk dont Yennu sɑnn k yien ɑ: «T k mi lɑ l buolu.»

¹³L puolpo e k Yiesu biɑ din ŋmɑt mɔkgbenŋl nɑ kpinŋ, k niib bonciɑnn tikl u buol ni k lint’ɔ wɑɑ, k u din wɑnt’b Yennu mɑɑn.

¹⁴Ŋɑnn e k u din gɑl tuɑnn po k sɑɑ lɑ jɑsuɑ nnɑ k u sɑnn din tie Liefi, wun nbɑ din tie Alfe bijɑ nɑ, k u kɑl u tuonn pɑɑk lɑnpogɑɑldieok ni, k Yiesu yet’ɔ ɑ: «Fiit kii wɑɑ’n.» K u fiil k wɑɑ’u.

¹⁵L puolpo e k Yiesu din be Liefi ŋɑɑk k di jiet, k *lɑnpogɑɑltieb bonciɑnn nɑn biitdɑnm bonciɑnn lɑkn kɑl nɑn Yiesu nɑn u *puolpoweitieb k di jiet. Bin nbɑ din wɑɑ’u din yɑb bonciɑnn.

¹⁶K senniwɑntieb, bin nbɑ din tie Fɑɑliisiɑnnbɑ nɑ, lɑ k Yiesu di jiet nɑn biitdɑnm nɑn lɑnpogɑɑltieb nɑ, k b boi u puolpoweitieb nɑ ɑ: «Bee k u lɑkn di nɑn lɑnpogɑɑltieb nɑn biitdɑnm i?»

¹⁷Yiesu nbɑ gbɑt nnɑ k u yet’b ɑ: «Bin nbɑ mɔk lɑɑfiɑ k luon tebtuɑ, ŋɑɑn bin nbɑ yiɑl, ŋɑnm e luon tebtuɑ. L k tie bin nbɑ tie niŋɑnm Yennu buol nɑ pɑɑk kɑɑ te k n bɑɑl, biitdɑnm pɑɑk e k n bɑɑl.»

¹⁸Dɑsiɑl k Sɑn puolpoweitieb nɑn Fɑɑliisiɑnnbɑ din loln mɔi. K nisiɑb din bɑɑl k boi Yiesu ɑ: «Sɑn puolpoweitieb nɑn Fɑɑliisiɑnnbɑ puolpoweitieb loln mɔi. Bee tien k ɑ puolpoweitieb k loln i?»

¹⁹K Yiesu boi’b ɑ: «Puociɑnu i be, sɑɑnm sɑɑ fit lol mɔi yuo nbɑ k puoyuokl sɔlɔ dɑɑ be b buol ni nɑ wɑɑ ɑɑ? Aɑi. Puoyuokl sɔlɔ nbɑ dɑɑ be b buol ni nɑ, b kɑn fit lol mɔi.

²⁰Ŋɑɑn siɑn-yuo bɑɑt nɑ k b tɑn sɑɑ jii puoyuokl sɔlɔ nɑ b buol. L yuo mɑnŋ e k b sɑɑ lol mɔi.

²¹«Suɑ kɑn sɑk jii cɑbpɑɑnn k lik tɑkpel[1]. L i tie k u tien nnɑ i e, cɑbpɑɑnn nɑ sɑɑ pɑt tɑkpel nɑ e, k l pɑtmin nɑ sɑɑ ŋɑnm pukn.

²²Nnɑ e mun k suɑ kɑn jii dɑpɑɑnin k liɑk dɑlenkpel[2] ni. L i tie k u tien nnɑ i e, k dɑpɑɑnin nɑ tɑn mɔ yuo nbɑ l sɑɑ yiel dɑlenkpel nɑ e, k dɑɑn mɑnŋ n muɑn yɑnn k *linlenn nɑ n mun yiel. L pɑɑk b tuu jikt dɑpɑɑnin k liɑkt linlenpɑɑnn ni e.»

²³Tɔn, Suifnbɑ fuondɑsiɑl, k Yiesu nɑn u puolpoweitieb din gɑɑl dii kpɑɑnt ni. Bɑɑ din sɑɑ mɑnŋ k u puolpoweitieb nɑ toktl dikɑlɑ k pini k ŋmɑn ŋɑɑn sɑɑ.

²⁴Ŋɑnn e k Fɑɑliisiɑnnbɑ nɑ boi’ɔ ɑ: «Gotl, bee k b tuun lin nbɑ k t *senni k cɑb ɑ bii tuun *Fuondɑɑl i?»

²⁵K Yiesu yet’b ɑ: «I k mi lii Yennu lolkpel kɑdɑɑɔk ni Dɑɑfiid nbɑ din tun biɑnŋ nbɑ yuo nbɑ k kon din gbɑt ŋuɑ nɑn u juɑmu, k b din k mɔk jiet nɑ ɑɑ?

²⁶U din kuɑ Yennu ŋɑɑk ni, k sɑɑ jii pɑɑnu nbɑ k b bil Yennu tuɑnn k ŋmɑn yuo nbɑ k Abiɑtɑ din tie mɑnntieb yudɑɑnɔ nɑ. K senni nɑ din k cɑb nɑn suɑ n di pɑɑnu mɑnŋ sie Yennu mɑnntieb kuukuɑ e. Ŋɑɑn Dɑɑfiid mɑnŋ din ŋmɑn e, k biɑ tul u juɑmu nɑ gbɑɑ k b mun ŋmɑn.»

²⁷Ŋɑɑn k Yiesu ŋɑnm k yet’b ɑ: «Nisɑɑlk sonml pɑɑk e k Yennu senn Fuondɑɑl. L k tie Fuondɑɑl pɑɑk kɑɑ k u din nɑn niib.

²⁸L pɑɑk Nisɑɑlk Bijɑ e tie Fuondɑɑl Yonmdɑɑnɔ biɑk.»