Read Moba Mɑɑlk 5 Bible Online

Mɑɑlk 5 - Moba bible

Mɑɑlk 5

¹L puolpo Yiesu nɑn u *puolpoweitieb din puot Gɑɑliile mɔkgbenŋl nɑ gbingbɑnliel po, Gelɑsetieb tinŋ ni.

²Yiesu nbɑ nyii bulgbetl nɑ ni yuo nbɑ, l tɑɑkpɑɑk ni k jɑsuɑ nyii kɑɑt ni k cet’ɔ. Nɑlnbiiuk din be juɑ nɑ ni,

³k u duɑ kɑɑt nɑ ni. Suɑ ji din kɑɑ k sɑɑ fit bɑɑn’ɔ bɑnt, k biɑ kɑn fit lol’ɔ nɑn jɑluk gbɑɑ,

⁴k mɑɑn b i bɑɑn u nii nɑn u tɑɑ bɑnt, ŋɑɑn u din tuu yɑn bɑnt nɑ kul ɑ k biɑ ciel kut nɑ u tɑɑ ni. Suɑ din k mɔk pɑnŋ nbɑ sɑɑ fit diɑ’u.

⁵Nyiɑɔk nɑn yennu ni kul k u lin kɑɑt nɑn juɑt ni k yikn ŋɑɑn diɑ tɑnɑ k ŋmɑ u mɔnŋ.

⁶Wɑɑ din dɑɑ be bɑnfɔkl ɑ ŋɑɑn lɑ Yiesu yuo nbɑ, k u tin k tɑn gbɑɑn Yiesu tuɑnn ni,

⁷ŋɑɑn yikn sɑnpɑɑpo wɑɑ k yet ɑ: «Yiesu fin nbɑ tie Yɑbnt Yennu Bijɑ, min nɑn fin nlee mɑntk i? Yennu pɑɑk k n bɑln’mɑ, ɑ dɑɑ muksl’n.»

⁸U yet nnɑ e, k mɑɑn Yiesu ponŋ yɑki nɑn nɑlnbiiuk nɑ ɑ: «Fin nɑlnbiiuk nɑ, nyin juɑ nɑ ni.»

⁹L puolpo k Yiesu boi’ɔ ɑ: «A sɑnn ii?» K u jiin ɑ: «N sɑnn yi Bul e, k mɑɑn t yɑb bonciɑnn.»

¹⁰K u bɑln’mɔ ɑ u dɑɑ nyint’b tinŋ nɑ ni.

¹¹L yuo mɑnŋ k duoli bonciɑnn din k fɔk nɑn juɑl k di jiet.

¹²K nɑlnbiit nɑ bɑln Yiesu ɑ: «Cɑb’t k tin sɑɑn kuɑ duoli nɑ ni.»

¹³K Yiesu cɑb’b sɔnu, k b nyii juɑ nɑ ni, k kuɑ duoli nɑ ni. K duoli nɑ nyii juɑl nɑ pɑɑk k tin sik mɔkgbenŋl nɑ ni k sɑɑ dii nyun b kul ɑ. Duoli nɑ kɑnn din tie nɑn tusɑ ŋɑnle nɑ e.

¹⁴K bin nbɑ guu duoli nɑ fiil k ciɑl k sɑɑ muɑnt l lɑbɑɑl duo ni nɑn kpɑɑnt ni. K niib bɑɑl ɑ bin lɑ lin nbɑ tun mɑnŋ kul ɑ.

¹⁵Bɑɑ bɑɑl Yiesu buol ni yuo nbɑ k lɑ juɑ nbɑ k nɑlnbul bo be u ni nɑ, k u ji kɑl lenŋ nɑn lɑɑfiɑ nɑn u dudukt kul ɑ fɑnu k ji liɑ tiɑt, k jɑŋmɑɑni suol’b.

¹⁶K bin nbɑ lɑ’l nɑn b nuni nɑ yet’b lin nbɑ tun k tul juɑ nbɑ k nɑlnbiit din be u ni nɑ, k biɑ yet’b duoli nɑ lɑbɑɑl.

¹⁷Ŋɑnn e k niib nɑ din piin k bɑln Yiesu ɑ wun nyi b tinŋ ni.

¹⁸Yiesu nbɑ din tie siil ɑ wun kuɑ bulgbetl nɑ yuo nbɑ, k juɑ nbɑ k Yiesu nyinn nɑlnbiit u ni nɑ bɑln’mɔ ɑ: «Ŋɑɑnt k min nɑn fin n lɑkn sɑɑn »

¹⁹Ŋɑɑn k Yiesu k sɑk, ŋɑɑn yet’ɔ ɑ: «Ii ŋmɑt kii kun ɑ ŋɑɑk ni ɑ niib buol k sɑɑ wɑnn’b Yonmdɑɑnɔ nbɑ tin’ɑ ninbɑɑɔk k tun lin nbɑ k tul’ɑ.»

²⁰Ŋɑnn e k juɑ nɑ ji lin tingbounŋ nbɑ k b yil Doi-piik nɑ ni, k muɑntl lin nbɑ kul k Yiesu tun tul’ɔ mɑnŋ, k l tien suɑ kul yɑɑl-lituk.

²¹L puolpo k Yiesu biɑ ŋmɑt puot mɔkgbenŋl nɑ gbingbɑnliel. Wɑɑ sɑɑ bɑɑl mɔkgbenŋl gbingbɑnn pɑɑk nɑ, k nibulciɑɔnŋ tikl k lint’ɔ.

²²K jɑsuɑ bɑɑl lenŋ, k u sɑnn yi Sɑilus. U din tie *Suifnbɑ jɑɑnti dieok ni sɑɑkɑsuɑ e. Juɑ nɑ nbɑ lɑ Yiesu yuo nbɑ k u gbɑɑn Yiesu tuɑnn ni,

²³k bɑln’mɔ nɑn u pɑl kul ɑ ɑ: «N bonpobik e yiɑl k pel kuun ɑ. N bɑln’mɑ e. Bɑɑt k tɑn yii ɑ nii u pɑɑk k wun lek lɑ lɑɑfiɑ k biɑl u mɑnfuol ni.»

²⁴Ŋɑnn e Yiesu ji ciɑn’ɔ. K nibulciɑɔnŋ mun biɑ wɑɑ k muk k tut Yiesu

²⁵Puosuɑ nnɑ mun din be k siik fɑbounŋ k tɑn jɑnŋ binɑ piik nɑn ŋɑnle.

²⁶U din lɑ fɑlɑ bonciɑnn wɑɑ tuu lin tebtieb bonciɑnn buol ni ɑ wun teb u mɔnŋ, k tɑn gbenn u likli, ŋɑɑn k yiɑlu nɑ biɑ puki yuo kul.

²⁷Wɑɑ din tɑn gbɑt Yiesu po nɑ, k u bɑɑl nibul nɑ ni, k wei u puolpo k sii u liɑtfuouk, k mɑɑn u din duki u pɑl ni ɑ:

²⁸«Mi i lek i sɑt sii u liɑtfuouk kuukuɑ i e, ŋɑɑn n sɑɑ lɑ lɑɑfiɑ wɑɑ.»

²⁹L tɑɑkpɑɑk ni k u fɑbounŋ nɑ ji din jit, k u bɑnn nɑn u lɑ lɑɑfiɑ wɑɑ.

³⁰L tɑɑkpɑɑk ni k Yiesu bɑnn nɑn pɑnŋ nyii u ni wɑɑ. K u gbiɑ boi niib nɑ ɑ: «Ŋmee sii n liɑtfuouk u?»

³¹K u puolpoweitieb mun ŋmɑnt boi’ɔ ɑ: «Fin lɑ k nibulciɑɔnŋ nɑ muk’ɑ nnɑ, ŋɑɑn k ɑ boi ɑ ŋmee siit’ɑ ni i?»

³²Ŋɑɑn k u lek biɑ goli lintl, ɑ wun lɑ nisuɑ nbɑ e sii’u.

³³Ŋɑɑn puo nɑ nbɑ bɑnn lin nbɑ tun u gbɑnɑnt ni nɑ pɑɑk, k jɑŋmɑɑni suol’ɔ, k u jekl yɔl yɔl, k bɑɑl tɑn gbɑɑn Yiesu tuɑnn ni, ŋɑɑn yet’ɔ bɑlmɔni kul.

³⁴Ŋɑnn e k Yiesu yet’ɔ ɑ: «N bipuo, fɑɑ tien’n yɑdɑ nɑ pɑɑk e te k ɑ lɑ lɑɑfiɑ. Ii sɑɑ nɑn mɑnu k ɑ yiɑlu kul gbenn ɑ.»

³⁵Yiesu nbɑ dɑɑ be piɑk lin nbɑ nɑ k siɑb nyii Suifnbɑ jɑɑnti dieok sɑɑkuɑ nɑ ŋɑɑk ni k bɑɑl k tɑn yet’ɔ ɑ: «A bonpobik nɑ tɑɑn kpo wɑɑ. Bee k ɑ ji muks Wɑntuɑ nɑ?»

³⁶K Yiesu lek k fiin bɑɑ yet lin nbɑ nɑ, ŋɑɑn yet sɑɑkuɑ nɑ ɑ: «Dɑɑ tiin jɑŋmɑɑni. Tient’n yɑdɑ kuukuɑ.»

³⁷Yiesu din k sɑk k suɑ n ciɑn’ɔ, sie Piɑl nɑn Sɑɑk nɑn u ninjɑ Sɑn.

³⁸Bɑɑ din bɑɑl ŋɑɑk nɑ ni yuo nbɑ k Yiesu gbɑt fuut nɑn kumɔni.

³⁹Ŋɑnn e k u kuɑ k boi’b ɑ: «Bee fuut e nnɑ mɑn i? Bee k i bui? Bik nɑ k kpo kɑɑ, ŋɑɑn u guɑnt e.»

⁴⁰Bɑɑ gbɑt u mɑɑn nɑ k b lɑɑ’u. Ŋɑnn e k u bel’b nyinn’b, ŋɑɑn jii bik nɑ bɑɑ nɑn u nɑɑ k pukn bin nbɑ ciɑn’ɔ nɑ po, k b kuɑ siɑn nbɑ k bik nɑ duɑ.

⁴¹Bɑɑ kuɑ yuo nbɑ, k u suol bik nɑ nuu ŋɑɑn yet’ɔ ɑ: «Tɑɑliitɑ kuunm[3].» (L pɑɑk tie: «Bonpobik, mi i yet’ɑ, fiit.»)

⁴²L tɑɑkpɑɑk ni k bonpobik nɑ fiil set kɑkbi, k sonm lin, (U din tie binɑ piik nɑn ŋɑnle bik e.). K l yɑɑl ŋɑɑn lit’b bonciɑnn.

⁴³Ŋɑɑn k Yiesu kpɑɑn’m, ɑ bii mi k bin yet suɑ, k biɑ yet’b ɑ bin tul bik nɑ jiet k wun di.