Read Moba Mɑɑlk 6 Bible Online

Mɑɑlk 6 - Moba bible

Mɑɑlk 6

¹L puolpo e k Yiesu nyii lenŋ k ŋmɑt kun u mɔnŋ duo ni, k u *puolpoweitieb din wɑɑ’u.

²K *Fuondɑɑl k u tɑn kuɑ *Suifnbɑ jɑɑnti dieok ni k wɑnt niib Yennu mɑɑn k l tien nibul nɑ kul yɑɑl-lituk, k b boi b lieb ɑ: «U lɑ dudukt nɑ lee? Yɑnbuol-lɑnn po e k u mɔk mɑn i? K nlee k u tuun bɑktnɔunŋ tuonjɑɑnɑ nɑ?

³Kɑnpintɑ nɑ kɑɑ nɑ ɑɑ? Mɑɑli bijɑ nɑ kɑɑ ɑɑ? Ŋuɑ kɑɑ tie Sɑɑk nɑn Suosiɑf nɑn Suudɑ nɑn Siimɔn ninjɑ nɑ ɑɑ? U niipuob kɑɑ be nnɑ nɑ ɑɑ?» L pɑɑk e te k b ji k tien’ɔ yɑdɑ.

⁴Ŋɑnn e k u yet’b ɑ: «*Yennu sɔkni k kɔnŋt nibɑɑkl sie u mɔnŋ mɔnŋ duo ni nɑn u tiɑɔnŋ niib buol ni, nɑn u mɔnŋ mɔnŋ ŋɑɑk ni.»

⁵U din k fit tun bɑktnɔunŋ tuonjɑɑnɑ lenŋ, sie bɑɑtb bɑnŋɑ nnɑ e k u din yii u nii b pɑɑk, k b lɑ lɑɑfiɑ.

⁶U niib nɑ nbɑ din k tien’ɔ yɑdɑ nɑ pɑɑk, k l yɑɑl ŋɑɑn lit’ɔ bonciɑnn. L puolpo e k Yiesu lin digbɑnbis ni k tumi niib,

⁷k din tɑn lɑkn u tuomiinbɑ piik nɑn bɑnle k tul’b pɑnŋ ɑ bii nyint nɑlnbiit niib ni, k yɑɑ wun tun’m bɑnlele,

⁸k u yet’b ɑ: «I dɑɑ jikt siɑl k sɑɑ, sie pɑtdiɑkɑi kuukuɑ. I dɑɑ diɑ pɑɑnu, i biɑ dɑɑ diɑ sunsonmpɑkɑ, i biɑ dɑɑ wuu likli i jɑfɑɑnbɑ ni.

⁹I pil tɑɑsɑɑt, ŋɑɑn suɑ dɑɑ jikt liɑtfuouk k puki ŋɑnle.»

¹⁰K u biɑ yet’b ɑ: «L i tie k i bɑɑl ŋɑɑk nbɑ ni, k b gɑɑl’i, yii be lenŋ nɑn dɑɑl nbɑ k i tɑn sɑɑ nyi duo nɑ ni.

¹¹L i tie k i bɑɑl duo nbɑ ni, k niib nɑ k gɑɑl’i, k biɑ k gbiintl i mɑɑn, yin nyi duo mɑnŋ ni, k pit i tɑɑpɑnt ni tɑnt bil l duo ni, k lin wɑnn nɑn bin suol b mɔnŋ.»

¹²K u puolpoweitieb fiil sɑɑn muɑntl k yien niib ɑ bin mɔ kuɑŋɑɑn k lebt binbenŋ,

¹³k biɑ nyint nɑlnbiit niib bonciɑnn ni, k biɑ jikt kpɑn k sɔ bɑɑtb bonciɑnn pɑɑk k b pɑɑkt.

¹⁴Tɔn, kpɑnbɑl *Heluod din gbɑt Yiesu lɑbɑɑl k mɑɑn u sɑnn din duo bonciɑnn, k nisiɑb yien ɑ: «Sɑn wun nbɑ dɑɑn wuul niib Yennu nyunwulu nɑ fiil kuun ni. Ŋɑnn e te k u mɔk yiikuo k fit tuun bɑktnɔunŋ tuonɑ nɑ.»

¹⁵K siɑb mun yɑɑ ɑ: «U tie Yennu sɔkni Elii e,» k lieb mun biɑ yɑɑ ɑ: «U tie Yennu sɔkni nɑn yɑɑyuo ni sɔkniinbɑ nbɑ yenɔ nɑ e.»

¹⁶Kpɑnbɑl Heluod ŋɑnin nbɑ gbɑt yuo nbɑ nɑ, k u yet ɑ: «U tie Sɑn wun nbɑ k n dɑɑn te k b pot u yul nɑ e, ŋɑɑn k u jen be u mɑnfuol ni.»

¹⁷Heluod tiɑɔnŋ o din te k b suol Sɑn k bɑɑn’ɔ bɑnt k kuɑn’ɔ dɑnsɑlk. Heluod mɑnŋ din tun nnɑ k mɑɑn wɑɑ din fɑt u ninjɑ Fiiliip ŋɑɑpuo Heluodiɑd k kuɑn’ɔ nɑ pɑɑk.

¹⁸K Sɑn din tuu yien Heluod ɑ Yennu *senni k cɑb’ɔ nɑn wun fɑt u ninjɑ ŋɑɑpuo k kuɑn.

¹⁹Lin nbɑ nɑ pɑɑk Heluodiɑd ji din nɑn Sɑn, k luon wun kpi’u, ŋɑɑn k k fit,

²⁰k mɑɑn Heluod din tiin Sɑn, k biɑ diɑ’u fɑnu k mɑɑn u mi nɑn Sɑn tie niŋɑnɔ k tiin Yennu. Yuo nbɑ k Heluod din gbiintl Sɑn mɑɑn nɑ, fei tuu mɔk’ɔ k l ŋmɑt u yɑn, ŋɑɑn k u lek luon mɑɑn mɑnŋ gbiintu.

²¹L puolpo siɑl din tɑn tien k luot sɔnu tul Heluodiɑd. Heluod mɑɑlu jɑɑnm dɑɑl tɑn bɑɑl, k u yiin u nɑɑn kpɑɑkɑ, nɑn sejenm yudɑnm, nɑn Gɑɑliile tinŋ ni sɑɑkɑb kul.

²²Ŋɑnn e k Heluodiɑd sɑpɑɑnbik bɑɑl k wɑɑ siɑk, k kpɑnbɑl Heluod nɑn u sɑɑnm pɑlɑ penn, k u yet sɑpɑɑnbik mɑnŋ ɑ: «Boi’n lin nbɑ kul k ɑ luon po, k n sɑɑ tul’ɑ.»

²³K Heluod pol ɑ: «N sɑɑ tul’ɑ lin nbɑ kul k ɑ luon, hɑli l i lek i bɑɑl k n tul’ɑ n yent ni bɔkl gbɑɑ.»

²⁴Ŋɑnn e k sɑpɑɑnbik nɑ nyii, k sɑɑ boi u nɑɑ ɑ: «N tɑɑn sɑɑ yet’ɔ ɑ n luon bee nɑ?» K u nɑɑ jiin ɑ: «Yetl’ɔ ɑ ɑ luon Sɑn wun nbɑ wuul niib Yennu nyunwulu nɑ yul e.»

²⁵L yuo nɑ k bonpobik nɑ ŋmɑt yiɑn ɑ k sɑɑn kpɑnbɑl Heluod buol ni k yet’ɔ ɑ: «N luon Sɑn wun nbɑ wuul niib Yennu nyunwulu nɑ yul e k ɑ kpien tɑtlɑɑɔk ni k tul’n mɔtɑɑmɔtɑɑnɑ.»

²⁶K lin nbɑ nɑ tul kpɑnbɑl Heluod pɑlbiil bonciɑnn, ŋɑɑn u ji din k luon wun yet bik mɑnŋ nbɑ luon lin nbɑ nɑ, k mɑɑn wɑɑ pol lin nbɑ sɑɑnm mɑnŋ buol ni nɑ pɑɑk.

²⁷Ŋɑnn e k u tun yupot-tuɑ l tɑɑkpɑɑk ni, k yet’ɔ ɑ wun jen nɑn Sɑn yul tul’ɔ. K yupot-tuɑ nɑ sɑɑn dɑnsɑlk ni k sɑɑ pot Sɑn yul,

²⁸k kpien tɑtlɑɑɔk ni, k jen nɑn’n k tɑn tul bonpobik mɑnŋ, k u mun jii’l k tul u nɑɑ.

²⁹Sɑn puolpoweitieb nbɑ gbɑt nnɑ yuo nbɑ nɑ, k b bɑɑl k tɑn jii u gbɑnɑnt k pii.

³⁰L puolpo e k Yiesu tuomiinbɑ mɑnŋ ŋmɑt jen u buol ni k tɑn yet’ɔ lin nbɑ kul k b tun k biɑ wɑnn niib.

³¹Nigbounŋ lek din tut, k siɑb bɑɑt k siɑb ŋmɑt, k Yiesu nɑn u puolpoweitieb kɔnŋ yɑɑk nɑn bin di jiet. L pɑɑk k u yet’b ɑ: «Ŋɑɑnt k t yɑɑt sɑɑn muuk ni t kuukuɑ, k foi wɑɑn.»

³²Ŋɑnn e k b kuɑ bulgbetl ni k puot sɑɑn muuk ni, b kuukuɑ.

³³Ŋɑɑn bɑɑ din sɑɑn yuo nbɑ k niib bonciɑnn lɑ’b k bɑnn’b, k nyii doi kul ni k tin k kokn mɔkgbenŋl kpinŋ k dɔnŋ cet’b.

³⁴K Yiesu nbɑ tɑn nyii bulgbetl nɑ ni, k u lɑ k nigbɑnu nɑ ponŋ tikl k muk, k ninbɑɑɔk suol’ɔ bonciɑnn, k mɑɑn b nɑɑn nɑn pei nbɑ k mɔk pekpɑɑlk nɑ e. K u piin l yuo k wɑnt’b bonɑ bonciɑnn.

³⁵K yuo din tɑn gɑl bonciɑnn k u puolpoweitieb tɑn bɑɑl u buol ni k yet’ɔ ɑ: «Yuo gɑl ɑ, k nnɑ nɑ mun tie muuk ni e.

³⁶Nyikn niib mɑnŋ k bin sɑɑn duo ni nɑn digbɑnbis nbɑ kpiɑ nɑ ni k lɑ jiet k dɑɑ k di.»

³⁷Ŋɑɑn k u mun jiin yet’b ɑ: «I mɔnŋ n tul’b jiet k bin di.» K b ŋmɑnt boi’ɔ: «A luon k t jii denienbɑ kobiinle (200) k sɑɑn dɑɑ pɑɑnu k tɑn tul’b ɑ bin di ii?»

³⁸K u boi’b ɑ: «I mɔk pɑɑni ŋɑnŋɑ e? Ii sɑɑn got mɑn.» Bɑɑ sɑɑn got k bɑnn yuo nbɑ k b jen k tɑn yet’ɔ ɑ: «L tie pɑɑni ŋɑnŋmu e nɑn jɑni ŋɑnle.»

³⁹L puolpo k Yiesu yet u puolpoweitieb ɑ bin te k nibul mɑnŋ n bɔkt kɑl mɔpɑɑɔnŋ pɑɑk wolɑ wolɑ nnɑ.

⁴⁰K b bɔkt kobk kobk, nɑn piinŋmuŋmu, k kɑl pɑɑbu pɑɑbu.

⁴¹K u jii pɑɑni ŋɑnŋmu nɑ, nɑn jɑni ŋɑnle nɑ, ŋɑɑn yɑɑt got sɑnpɑɑpo, k tul Yennu niipuouk, ŋɑɑn ŋmit ŋmit pɑɑni nɑ k tul u puolpoweitieb ɑ bin tol niib mɑnŋ, k u biɑ ŋmit ŋmit jɑni ŋɑnle nɑ, k b tol suɑ kul ɑ.

⁴²K suɑ kul dii gbuo k biɑ tenn.

⁴³K u puolpoweitieb lɑkn pɑɑnbulɑ nɑn jɑni nbɑ tenn nɑ, k l gbie kpɑncubt piik nɑn ŋɑnle.

⁴⁴Jɑb nbɑ din dii jiet mɑnŋ din tie tusɑ ŋɑnŋmu e (5 000).

⁴⁵Lin nbɑ nɑ puolpo, l tɑɑkpɑɑk ni k Yiesu miɑ u puolpoweitieb k b kuɑ bulgbetl nɑ ni k gɑl u tuɑnn po k puot mɔk-puotliel po, k sɑɑn Betsɑidɑ, ŋɑɑn k ŋuɑ biɑl ɑ wun cɑb nibul mɑnŋ.

⁴⁶Wɑɑ cɑb’b gbenn yuo nbɑ k u duo jɔsiɑl pɑɑk k mei Yennu.

⁴⁷Nyiɑɔk nbɑ din tɑn bɑɑl yuo nbɑ, k bulgbetl nɑ dɑɑ be mɔkgbenŋl sinsuuk ni, ŋɑɑn k u mun tɑn dɑɑ be juɑl mɑnŋ pɑɑk u kuukuɑ,

⁴⁸k tɑn lɑ k u puolpoweitieb gbɑɑ nɑn bulgbetl kɑnnu, k mɑɑn b din kɑn k tuokt wounŋ o. Ŋɑnn e k u din cet’b kojomuɑk sɑn-nyɑfɑɑl k sonm nyun pɑɑk k bɑɑl b buol ni k yɑɑ wun gɑl’b. Wɑɑ tɑn bɑɑl yuo nbɑ, k u tien nɑn u yɑɑ wun gɑl’b nɑ.

⁴⁹K b lɑ k u sonm nyun pɑɑk k b mi ɑ l tie funfɔntuk o, k b yikn sɑnpɑɑpo wɑɑ,

⁵⁰k mɑɑn b kul lɑ’u wɑɑ, k jɑŋmɑɑni suol’b bonciɑnn. L tɑɑkpɑɑk ni k u yet’b ɑ: «Cien i pɑlɑ mɑn. Min e. I dɑɑ tiin jɑŋmɑɑni mɑn.»

⁵¹Ŋɑnn e k u kuɑ k pukn’m bulgbetl mɑnŋ ni, k wounŋ nɑ ji ŋmin suon nnɑ. K l bɑkt’b bonciɑnn,

⁵²k mɑɑn b dɑɑ din k bɑnn wɑɑ dɑɑn jii pɑɑnu nɑ k tun bɑktnɔunŋ tuonn biɑnŋ nbɑ nɑ pɑɑk. B dudukt dɑɑ din k fit suol’l fɑnu.

⁵³Bɑɑ tɑn nyii mɔkgbenŋl nɑ ni k duo kunkonn pɑɑk Genesɑɑlet tinŋ nnɑ, k b lol b bulgbetl k senn.

⁵⁴Bɑɑ nyi bulgbetl ni yuo nbɑ nɑ, k l tɑɑkpɑɑk ni k niib bɑnn Yiesu,

⁵⁵k tiin sɑɑ tingbounŋ mɑnŋ lokɑ kul po k jikt b bɑɑtb liɑni pɑɑk k bɑɑt nɑn’m u buol ni, siɑn nbɑ kul k b din tuu gbɑt nɑn u be lenŋ.

⁵⁶Wɑɑ tuu dɔkt doi nɑn digbɑnbis nbɑ kul ɑ ni, k niib bonciɑnn diɑ b bɑɑtb k bil’m dɑi ni, k bɑln’mɔ ɑ wun ŋɑɑn k bin lek sii u tiɑt mɔgbɑnɑ, k bin nbɑ siin nɑ kul tuu lɑ lɑɑfiɑ.