Read Moba Mɑɑlk 8 Bible Online

Mɑɑlk 8 - Moba bible

Mɑɑlk 8

¹L yuo nɑ, k nibulciɑɔnŋ yɑɑn lɑkn lieb Yiesu buol ni. Bɑɑ k mɔk jiet nɑ, k Yiesu yiin u *puolpoweitieb nɑ u buol ni, k tɑn yet’b ɑ:

²«Ninbɑɑɔk suol’n bonciɑnn nibul nɑ pɑɑk, k mɑɑn dɑɑ ŋɑntɑ e nɑ k b be nɑn’n, ŋɑɑn k ji k mɔk jiet nbɑ k b sɑɑ di.

³Mi i mun i cɑb’b nɑn kon, b sɑɑ sɑɑ fib sɔnu ni wɑɑ, k mɑɑn b siɑb sɔnu fɔk ɑ.»

⁴K u puolpoweitieb nɑ boi’ɔ ɑ: «T sɑɑ lɑ jiet lee muuk nɑ ni k lin jɑnŋ nibul nɑ kul i?»

⁵K u boi’b ɑ: «Pɑɑnu kunɑ ŋɑnŋɑ e be i buol ni nnɑ nɑ?» K b yet’ɔ ɑ: «Ŋɑnlole.»

⁶Ŋɑnn e k u te k nibul nɑ kul kɑl tinŋ ni. L puolpo k u jii pɑɑni ŋɑnlole nɑ, k tul Yennu niipuouk l pɑɑk, ŋɑɑn ŋmit ŋmit k tul u puolpoweitieb nɑ ɑ bin tol nibul mɑnŋ.

⁷B biɑ din mɔk jɑnbis wɑɑn b buol ni, k u biɑ tul Yennu niipuouk l pɑɑk, ŋɑɑn yet u puolpoweitieb mɑnŋ ɑ bin jii tol’b biɑk.

⁸K suɑ kul din dii wɑɑ luon biɑnŋ nbɑ. B din tie nɑn jɑb tusɑ ŋɑnnɑ (4 000) nɑ e. K u puolpoweitieb tikl jiet nbɑ tenn nɑ, k l gbie kpɑncubt ŋɑnlole. K u ji cɑb jɑb mɑnŋ,

¹⁰ŋɑɑn k ŋuɑ nɑn u puolpoweitieb kɑkt k kuɑ bulgbetl ni, k sɑɑn Dɑlmɑnutɑ tinŋ ni.

¹¹L puolpo e k Fɑɑliisiɑnnbɑ siɑb bɑɑl Yiesu buol ni k tɑn tie selmi, ɑ bin bikn’ɔ k lɑ u mɔbonkpetl, k tɑn yet’ɔ ɑ wun tien *nyinn k lin wɑnn nɑn u yiikuo mɑnŋ nyii Yennu buol e.

¹²L yuo k u kulnt ŋɑɑn boi’b ɑ: «Bee tien k mɔtɑɑnɑ niib nɑ luon nyinn i? Bɑlmɔni e k n yien’i ɑ n kɑn tun nyinn k tul’b.»

¹³L puolpo k u nyik’b, ŋɑɑn ŋmɑt kuɑ bulgbetl nɑ ni, k puot mɔkgbenŋl puotl nɑ po.

¹⁴Tɔn, Yiesu puolpoweitieb din tɑnm k k diɑ jiet k l yɑb. B din diɑ pɑɑn-yenn kuɑ e bulgbetl nɑ ni.

¹⁵K Yiesu yet’b nɑn ninmɔnn ɑ: «Ii mi mɑn, kii guu i mɔnŋ nɑn Fɑɑliisiɑnnbɑ nɑn Heluod * dɑtinŋ nɑ mɑn.»

¹⁶Ŋɑnn e k b ji piɑk b lieb sinsuuk ni ɑ: «Tɑɑ k diɑ pɑɑnu nɑ e k u piɑk lin nbɑ nɑ.»

¹⁷Ŋɑɑn k u bɑnn bɑɑ piɑk lin nbɑ nɑ, k boi’b ɑ: «Bee k i piɑk k yɑɑ ɑ i k diɑ pɑɑnu? I dɑɑ k bɑnn siɑl biɑk ii? I dudukt ni biɑ dɑɑ k yent ii?

¹⁸I mɔk ninbinɑ, ŋɑɑn bee k i k lɑɑt i? I biɑ mɔk tubɑ, ŋɑɑn biɑ k gbiɑ ɑɑ? I k tiɑn

¹⁹yuo nbɑ k n ŋmit ŋmit pɑɑni ŋɑnŋmu k tul niib tusɑ ŋɑnŋmu nɑ ɑɑ? Kpɑncubt ŋɑnŋɑ e k i tikl pɑɑnbulɑ nbɑ tenn i?» K b jiin ɑ: «Piik nɑn ŋɑnle.»

²⁰K u boi’b biɑk ɑ: «K yuo nbɑ k n ŋmit ŋmit pɑɑni ŋɑnlole k tul niib tusɑ ŋɑnnɑ nɑ, kpɑncubt ŋɑnŋɑ k i tikl pɑɑnbulɑ nbɑ tenn i?» K b jiin ɑ: «Ŋɑnlole.»

²¹Ŋɑnn e k u boi’b ɑ: «Ŋɑɑn k i biɑ lek dɑɑ k gbɑt l pɑɑk ii?»

²²K b din tɑn bɑɑl Betsɑidɑ, k nisiɑb din jii jɑjuɑnsuɑ nnɑ k bɑɑl nɑn’ɔ Yiesu buol ni, k tɑn bɑln’mɔ ɑ wun sii’u.

²³K Yiesu suol u nuu k nyii nɑn’ɔ duo kpinŋ po, k siil mɔsɑnt juɑ nɑ ninbinɑ ni, k jii u nii k yii u pɑɑk, ŋɑɑn boi’ɔ ɑ: «A lɑɑt siɑl ii?»

²⁴Ŋɑnn e k juɑ mɑnŋ gokt got, ŋɑɑn yet ɑ: «Nnn, n lɑɑt niib, ŋɑɑn b nɑɑn nɑn tiini nɑ e k sonm.»

²⁵K Yiesu biɑ jii u nii k yii juɑ mɑnŋ ninbinɑ pɑɑk, l yuo nɑ k juɑ mɑnŋ ji got silll, k suɑ k u ninbinɑ mɔk lɑɑfiɑ, k u ji lɑɑt bonsiɑl kul pul pul pul.

²⁶K Yiesu te k juɑ mɑnŋ kun u ŋɑɑk ni, ŋɑɑn yet’ɔ nɑn ninmɔnn ɑ: «Ii mi k ɑ ŋmɑt duo mɑnŋ ni jik.»

²⁷Ŋɑnn e k Yiesu nɑn u puolpoweitieb din yɑɑt k sɑɑ Sesɑɑle Fiiliip tingbounŋ ni. Bɑɑ dɑɑ be sɔnu pɑɑk k sɑɑ nɑ k u boi’b ɑ: «Niib yɑɑ ɑ n tie ŋmee?»

²⁸K b yet’ɔ ɑ: «Nisiɑb yien ɑ ɑ tie Sɑn, wun nbɑ dɑɑn wuul niib Yennu nyunwulu nɑ e, k nilieb mun yɑɑ ɑ tie Elii e k nilieb mun biɑ yɑɑ ɑ tie *Yennu sɔkniinbɑ yenɔ e.»

²⁹Ŋɑnn e k u boi’b ɑ: «Ŋɑɑn k yinm ŋɑnin yɑɑ ɑ n tie ŋmee?» K Piɑl jiin k yet’ɔ ɑ: «Fin e tie *Klistu nɑ.»

³⁰Ŋɑnn e k Yiesu yɑki nɑn’m ɑ bii mi k bin yet suɑ lɑbɑɑl mɑnŋ.

³¹L puolpo k Yiesu ji din piin k wɑnt u puolpoweitieb ɑ: «Sie k *Nisɑɑlk Bijɑ dii fɑlɑ bonciɑnn, k sɑɑkɑb nɑn Yennu jɑɑnti yudɑnm nɑn *senniwɑntieb n tɑn yet’ɔ, k biɑ kpi’u, ŋɑɑn l dɑɑ ŋɑntɑ dɑɑl k u sɑɑ fiil kuun ni biɑk.»

³²U din pɑk lin nbɑ nɑ k k bɔl siɑl. Ŋɑnn e k Piɑl yiin’ɔ k nyii nɑn’ɔ kpinŋ po k sɑɑ yɑki nɑn’ɔ.

³³Ŋɑɑn Yiesu nbɑ gbiɑ jiɑnt got u puolpoweitieb nɑ, k ji mun yɑki nɑn Piɑl ɑ: «Fin *Sɑɑtɑn nbɑ nɑ, sietl nnɑ nɑ. A k mɔk Yennu dudukt kɑɑ, ŋɑɑn ɑ mɔk nisɑɑlk dudukt e.»

³⁴Ŋɑnn e k Yiesu yiin u puolpoweitieb nɑn nibul nbɑ wɑɑ’u nɑ, k tɑn yet’b ɑ: «Wun nbɑ i luon wun wei’n, sie k u likn u sɑɑŋmɑnŋ, k jii u kuun dɑpunpunn kii wɑɑ’n,

³⁵k mɑɑn wun nbɑ k sɑɑk wun jii u mɑnfuol k tul’n, ŋuɑ e tɑn sɑɑ kɔnŋ’l, ŋɑɑn wun nbɑ likn u sɑɑŋmɑnŋ, min nɑn lɑbɑmɑnn nɑ pɑɑk, ŋuɑ e tɑn sɑɑ lɑ u mɑnfuol.

³⁶Nilɔ i lɑ tingbounŋ nɑ mɔktuk kul ɑ ŋɑɑn kɔnŋ u mɑnfuol, nyɔlɑnt po e k u sɑɑ lɑ?

³⁷Ami nilɔ sɑɑ fit jii bee k kpent u mɑnfuol i?

³⁸K wun nbɑ i tiin fei k jiin min nɑn n mɑɑn nɑ po biitdɑnm nɑn tubkɑngbɑtɑ dɑnm sinsuuk ni, Nisɑɑlk Bijɑ mun sɑɑ tin fei k jiin u po yuo nbɑ k u tɑn sɑɑ jen nɑn u Bɑɑ *yudɑnt nɑn *mɑlɑkɑɑnbɑ nɑ.»