Read Moba Luk 1 Bible Online

Luk 1 - Moba bible

Luk 1

¹Cɑnbɑɑ Teofiil: Niib bonciɑnn din lɑ Yennu nbɑ din tun lin nbɑ t sinsuuk ni l pinpiik ni nɑn mɔtɑɑnɑ.

²Bɑɑ din lɑ lin nbɑ nɑn b ninbinɑ, b biɑ din wɑnn’t. Bin nbɑ din wɑnn’t lin nbɑ nɑ, ŋɑnm e kpɑnt Yennu tuontunnɑ.

³Ŋɑnn e te k n mɔnŋ boi k fiitl bonŋɑnn k lɑ l bonsiɑl kul nbɑ din piin biɑnŋ nbɑ nɑn lɑɑ din sɑɑ biɑnŋ nbɑ. Cɑnbɑɑ, n biɑ dukn nɑn l ŋɑn k n diɑn l kul k tul’ɑ

⁴k ɑ fit bɑnn nɑn lin nbɑ kul k b wɑnn’ɑ nɑ, l set tie bɑlmɔni e.

⁵Yuo nbɑ k *Heluod din tie Suude tinŋ kpɑnbɑl nɑ, k Yennu mɑnntɔsuɑ din be k u sɑnn yi Sɑɑkɑɑli, k u be Abiɑ pɑɑbu ni k tuun, k u ŋɑɑpuo mun din tie mɑnntuɑ *Aɑlɔn yɑɑbuonn e, k u sɑnn yi Eliisɑɑbet.

⁶B bɑnle din mɔk binbenŋ nbɑ gbuot Yennu nunm, k sɑɑk u mɔb *senni kul nyiknyik.

⁷B din k mɔk bik, k mɑɑn Eliisɑɑbet din tie puokɑnmɑtl e, k b bɑnle kul biɑ ponŋ din kpet ɑ.

⁸Dɑsiɑl k Sɑɑkɑɑli tuontun-yuo tɑn bɑɑl u pɑɑbu ni, k u din tɑn yɑɑ wun tun u tuonn k tul Yennu nɑn b pɑɑbu nbɑ tuu tuun biɑnŋ nbɑ nɑ.

⁹L yuo nɑ k b din tɑn tɔ tiɑtiɑ nɑn b mɑnntieb kɑɑl nbɑ din tie biɑnŋ nbɑ, k lukt’ɔ ɑ wun kuɑ Yonmdɑɑnɔ jɑɑnti ŋɑsɑɑkɑk ni k wubn bonnunubt.

¹⁰K nibulciɑɔnŋ nɑ kul din biɑl sie nɑn-yel k mei Yennu, yuo nbɑ k u dɑɑ din wubnt bonnunubt nɑ.

¹¹L yuo nɑ k Yonmdɑɑnɔ *mɑlɑkɑ dɔkt Sɑɑkɑɑli pɑɑk k set bonnunubt binbintl nɑ diitu po.

¹²Sɑɑkɑɑli nbɑ din tɑn lɑ’u yuo nbɑ, k u yɑn put ŋmɑt, k jɑŋmɑɑni suol’ɔ.

¹³Ŋɑɑn k mɑlɑkɑ mɑnŋ yet’ɔ ɑ: «Sɑɑkɑɑli, dɑɑ tiin jɑŋmɑɑni. Yennu ponŋ dɔnŋ gbɑt ɑ miɑlu wɑɑ, k ɑ ŋɑɑpuo Eliisɑɑbet tɑn sɑɑ mɑl bonjɑk k tul’ɑ, k ɑ tɑn sɑɑ pul u sɑnn Sɑn.

¹⁴K l tɑn sɑɑ mɑnŋ’ɑ k ɑ pɑl n penn, k niib bonciɑnn pɑlɑ mun tɑn sɑɑ penn u mɑɑlu mɑnŋ pɑɑk,

¹⁵k mɑɑn u tɑn sii tie tuontunjɑɑnn e Yonmdɑɑnɔ tuɑnn. U kɑn mi k nyu dɑmunŋ ɑmi dɑbuolu kul nbɑ mɔ, k u tɑn sɑɑ gbie nɑn Foŋɑnm ŋɑɑn dɑɑ be u nɑɑ puol ni.

¹⁶U tɑn sɑɑ te k Islɑɑeltieb bonciɑnn n ŋmɑt k jen Yonmdɑɑnɔ Yennu buol ni.

¹⁷U sii mɔk siek nbɑ din be Elii ni nɑ nɑn u pɑnŋ k tɑn sɑɑ dɔnŋ liit Yonmdɑɑnɔ ɑ wun ŋɑnm bɑɑnbɑ nɑn b wɑɑs sinsuuk ni, k biɑ tunn mɔyetdɑnm yɑn k lii tie nɑn yentinu dɑnm yɑl nɑ, k biɑ te k niib n tien siil kii guu Yonmdɑɑnɔ.»

¹⁸K Sɑɑkɑɑli ji din boi mɑlɑkɑ mɑnŋ, «N sɑɑ tien nlee k bɑnn nɑn lin nbɑ nɑ tie mɔni? K mɑɑn n kpet ɑ, k n ŋɑɑpuo mun biɑ kpet ɑ.»

¹⁹K mɑlɑkɑ mɑnŋ jiin yet’ɔ ɑ: «Min e tie Gɑbliel! Min e be Yennu tuɑnn k tuun u tuonn, k u tun’n ɑ buol, ɑ n tɑn yet’ɑ ŋɑɑn wɑnn’ɑ lɑbɑmɑnn nɑ.

²⁰Ŋɑɑn ɑ sɑɑ muu k kii fit piɑk i nɑn yuo nbɑ k l tɑn sɑɑ tien mɔni nɑ, k mɑɑn ɑ k tien n mɑɑn nbɑ sɑɑ tien mɔni nɑ yɑdɑ.»

²¹Tɔn, k niib nbɑ din biɑl sie nɑn-yel k guu Sɑɑkɑɑli, k l bɑkt’b k mɑɑn wɑɑ wei Yennu jɑɑnti ŋɑsɑɑkɑk ni biɑnŋ nbɑ nɑ.

²²Wɑɑ ji din tɑn nyii yuo nbɑ, u din k fit piɑk, k b ji din bɑnn nɑn u lɑ yelntu e Yennu jɑɑnti ŋɑsɑɑkɑk nɑ ni, k u ji piɑk muutl k lɑbn nii k tien’m.

²³Yuo nbɑ k u tuonɑ din tɑn gbenn Yennu jɑɑnti ŋɑsɑɑkɑk nnɑ k u kun ŋɑɑk ni.

²⁴L puolpo e k u ŋɑɑpuo Eliisɑɑbet din tɑn suol puol, ŋɑɑn bɔli u mɔnŋ ŋɑɑk ni tɑɑtɑɑtɑ nɑn ŋmɑɑli ŋɑnŋmu,

²⁵k din tɑn yet u mɔnŋ ɑ nnɑ: «Nnɑ e k Yonmdɑɑnɔ tun tul’n k tin’n ninbɑɑɔk k nyinn’n fei ni.»

²⁶Tɔn, Eliisɑɑbet puol suolu ŋmɑɑli ŋɑnluob ni e, k Yennu din tun u mɑlɑkɑ Gɑbliel ɑ wun sɑɑn duo nbɑ be Gɑɑliile tinŋ ni, k b yi duo mɑnŋ Nɑɑsɑɑlet,

²⁷k sɑɑ pɑk tul sɑpɑɑnmunn, wun nbɑ sɑnn tie Mɑɑli nɑ. Sɑpɑɑmɔ mɑnŋ din tie jɑsuɑ sɑlkpenŋ e, k u sɑnn din tie Suosiɑf k u tie kpɑnbɑl * Dɑɑfiid yɑɑbuonn.

²⁸K mɑlɑkɑ nɑ din tɑn bɑɑl Mɑɑli buol ni k fuont’ɔ ɑ: «Fuontu lɑɑ. Yonmdɑɑnɔ pɑl mei ɑ pɑɑk, k u biɑ be nɑn’ɑ.»

²⁹Wɑɑ yet biɑnŋ nbɑ nɑ, k Mɑɑli yɑn ji din put ŋmɑt bonciɑnn k sɑɑ bɑɑ nuɑk ni, k u ji duki fuonti mɑnŋ pɑɑk.

³⁰K mɑlɑkɑ nɑ biɑ yet’ɔ, «Mɑɑli, dɑɑ tiin jɑŋmɑɑni, k mɑɑn Yennu pɑl mei ɑ pɑɑk.

³¹A tɑn sɑɑ suol puol k mɑl bonjɑk, k ɑ sɑɑ pul u sɑnn Yiesu.

³²U tɑn sii tie nijɑɑnn e, k b tɑn sii yi’u Yɑbnt Yennu Bijɑ. Yonmdɑɑnɔ Yennu sɑɑ te k wun di u yejɑ Dɑɑfiid nɑɑn,

³³k u tɑn sii tie Sɑɑkɔb yɑɑbuonɑ ni Kpɑnbɑl nɑn yuo nbɑ kɑɑ gbennu, k u nɑɑn mɑnŋ biɑ tɑn kɑn mi gbenn.»

³⁴K Mɑɑli boi mɑlɑkɑ mɑnŋ ɑ: «N dɑɑ tie sɑpɑɑnmunn e, k nlee k n sɑɑ suol puol i?»

³⁵K mɑlɑkɑ nɑ jiin k yet’ɔ ɑ: «Foŋɑnm sɑɑ sik ɑ pɑɑk, k Yɑbnt Yennu pɑnŋ sɑɑ sik bɑkn ɑ pɑɑk. L pɑɑk, bik nbɑ k ɑ tɑn sɑɑ mɑl’ɔ mɑnŋ tɑn sii tie niŋɑnɔ, k b sii yi’u Yennu Bijɑ.

³⁶Bɑnt nɑn ɑ niipuo Eliisɑɑbet, wun nbɑ kpet ɑ nɑ, mɔtɑɑnɑ u lek suol puol ɑ k sɑɑ mɑl bonjɑk. U puol ŋmɑɑli ŋɑnluob e nɑ, ŋuɑ nbɑ k b tuu yi’u puokɑnmɑtl.

³⁷K mɑɑn siɑl kɑɑ k Yennu kɑn fit tun.»

³⁸K Mɑɑli yet’ɔ, «Tɔn, n tie Yennu tuontunnɔ e. Ŋɑɑnt k lin tien nɑn fɑɑ yet’n biɑnŋ nbɑ nɑ.» K mɑlɑkɑ nɑ ji din yɑɑt ŋɑɑn nyik’ɔ.

³⁹L puolpo k Mɑɑli din tɑn fiil k sɑɑn yiɑn yiɑn k sɑɑ juɑt nbɑ be Suude tingbounŋ ni buol, k sɑɑ bɑɑl dosɑu ni,

⁴⁰k kuɑ Sɑɑkɑɑli ŋɑɑk ni k fuont Eliisɑɑbet.

⁴¹Yuo nbɑ k Eliisɑɑbet gbɑt Mɑɑli fuonti nɑ, k bik nbɑ dɑɑ be Eliisɑɑbet puol ni mɑnŋ ji din dɑnm. L yuo nɑ k Eliisɑɑbet gbie nɑn Foŋɑnm,

⁴²k yikn sɑnpɑɑpo wɑɑ, «Wui wui ɑ: Yennu yetŋɑnm be ɑ pɑɑk k gɑl puolieb kul ɑ, k u yetŋɑnm biɑ be bik nbɑ be ɑ puol ni nɑ pɑɑk.

⁴³L tien’n nlee nɑ k n Yonmdɑɑnɔ nɑɑ tɑn bɑɑl n buol nnɑ?

⁴⁴Mɑɑ gbɑt ɑ fuonti yuo nbɑ nɑ, k bik nbɑ be n puol nnɑ dɑnm nɑn pɑlpienn.

⁴⁵Fin nbɑ tien yɑdɑ nɑn Yennu mɑɑn nbɑ k u pɑk tul’ɑ nɑ tɑn sɑɑ tien mɔni, pɑlpienn tie ɑ yɑl e.»

⁴⁶Ŋɑnn e k Mɑɑli ji din yet ɑ «N dont Yennu sɑnn n pɑl ni,

⁴⁷k mɔk pɑlpienn bonciɑnn Yennu wun nbɑ tie n Fietuɑ nɑ pɑɑk,

⁴⁸k mɑɑn u tin min nbɑ tie u tuontunpuok nɑ ninbɑɑɔk, Lɑɑ jii dinnɑ k sɑɑ, nigbounŋ kul tɑn sii yien ɑ n tie pɑlpienn dɑɑnɔ e,

⁴⁹k mɑɑn Yennu tun bɑktnɔunŋ tuonjɑɑnɑ k tul’n, k u sɑnn tie sɑn-yienŋ.

⁵⁰U biɑ mɔk ninbɑtinu nɑn nigbounŋ kul nbɑ tiin’ɔ lɑɑ nyii yejɑnm ni k sɑɑ tuu bɑɑnbɑ nɑn yɑbuontuɑt-tuɑt ni.

⁵¹U tɑnt u nuu k tun pɑnŋ tuonɑ, k yɑt kɑlnbɑɑndɑnm k biil b lolɑ,

⁵²k liɑt kpɑnbɑlɑ b nɑɑn ni, ŋɑɑn donn sikn-n-mɔnŋ dɑnm,

⁵³k u nuɑb bonŋɑnɑ k tul tɑlɑs-dɑnm, ŋɑɑn te k mɔktɑ ŋmɑt nɑn niikuoni.

⁵⁴U bɑɑl k sonm u tuontunnɑ Islɑɑeltieb, u k tɑnm u ninbɑtinu nbɑ k u din senn mɔsonn ɑ u sɑɑ tul

⁵⁵Ablɑɑhɑɑnm nɑn u yejɑŋɑɑk nɑn yuo nbɑ kɑɑ gbennu, k l tie nɑn wɑɑ din senn mɔsonn k tul t yejɑnm nɑ.»

⁵⁶Tɔn, l din tien nɑn ŋmɑɑli ŋɑntɑ nɑ k Mɑɑli dɑɑ be Eliisɑɑbet buol ni k tɑn ŋmɑt kun.

⁵⁷Eliisɑɑbet mɑtuk yuo din tɑn bɑɑl, k u mɑl bonjɑk.

⁵⁸K b ŋɑkpiɑsnbɑ nɑn u ninjɑnm din gbɑt biɑnŋ nbɑ k Yonmdɑɑnɔ tin’ɔ ninbɑɑɔk bonciɑnn nɑ, k b kul mɔk pɑlpienn.

⁵⁹Tɔn, k l dɑɑ ŋɑnniin dɑɑl e k b din bɑɑl ɑ bin pot bik mɑnŋ punn, k luon bin pul u sɑnn Sɑɑkɑɑli, nɑn u bɑɑ sɑnn nɑ,

⁶⁰ŋɑɑn k u nɑɑ jiin k tul’b ɑ: «Aɑi, u sɑnn sii yi Sɑn e.»

⁶¹K b yet’ɔ ɑ: «A dɑnm ni, suɑ sɑnn k yi Sɑn.»

⁶²Ŋɑnn e k b pɑk muutl ni nɑn bik mɑnŋ bɑɑ, ɑ bin boi k lɑɑn u luon bii yi u bik mɑnŋ sɑnn ɑ bee,

⁶³k u wɑnn muutl ni ɑ bin jii dɑpɔuk tul’ɔ. Bɑɑ jii k tul’ɔ k u diɑn ɑ: «Bik mɑnŋ sɑnn e tie Sɑn.» K l ji din bɑkt b kul ɑ.

⁶⁴L tɑɑkpɑɑk ni nɑ k Sɑɑkɑɑli muut k ji din piin mɑɑn pɑku k piɑk Yennu.

⁶⁵K jɑŋmɑɑni din suol b duo niib kul ɑ, k lɑbɑɑl nɑ din muɑnt yɑt digbɑnɑ kul nbɑ be Suude juɑt pɑɑk,

⁶⁶k l tul bin nbɑ kul din gbɑt nnɑ mɑnŋ dudukt, k b boi b lieb, «Bik nɑ tɑn sii tie nibuol bee nɑ?» k mɑɑn Yennu pɑnŋ ponŋ din be nɑn’ɔ.

⁶⁷L tɑɑkpɑɑk ni k Foŋɑnm din gbie nɑn bik mɑnŋ bɑɑ Sɑɑkɑɑli, k u sɔknt Yennu mɑɑn k yien ɑ:

⁶⁸«Ŋɑɑnt mɑn k tin pɑk Yonmdɑɑnɔ wun nbɑ tie tinm Islɑɑeltieb Yennu nɑ, k mɑɑn u bɑɑl ɑ wun sonm u niib k fɑt’b ŋɑɑ’b.

⁶⁹U tul’t Fietuɑ nbɑ mɔk pɑnŋ k u nyii Dɑɑfiid yɑɑbuonɑ ni.

⁷⁰Yɑɑyuo ni k Yennu din pɑk mɑɑn u sɔknŋɑnm mɔi ni k tul’t,

⁷¹k yien ɑ u tɑn sɑɑ nyinn’t t dɑtɑi nii ni, k biɑ tɑn sɑɑ nyinn’t bin nbɑ kul nɑn’t nɑ nii ni.

⁷²U biɑ din yet ɑ u sii mɔk ninbɑtinu nɑn t yejɑnm, k kɑn tɑnm u *lol

⁷³nbɑ k u din lol k tul t yejɑ Ablɑɑhɑɑnm nɑ.

⁷⁴U din senn ɑ u sɑɑ nyinn’t t dɑtɑi nii ni, k tin fit jiɑnt’ɔ k jɑŋmɑɑnsɑi sii kɑɑ,

⁷⁵k t sii tie niŋɑnm nɑn niŋɑnm u buol ni nɑn t mɑnfuol gbennu.

⁷⁶N bik nɑ, b tɑn sii yi’ɑ: ‹Yɑbnt *Yennu sɔkni e.› A sɑɑ liit Yonmdɑɑnɔ tuɑnn k sɑɑ ŋɑnm u sɔni k tul’ɔ,

⁷⁷k wɑnn u niib k bin bɑnn nɑn u tɑn sɑɑ fiel’b wɑɑ sɑɑ nyik cɑb b biit nɑ pɑɑk,

⁷⁸k mɑɑn t Yennu mɔk ninbɑtinu nɑn bulcint, k l pɑɑk, k u sɑɑ te k yentgbenŋl n nyi sɑɑnpɑɑpo k dɔkt t pɑɑk k tie nɑn yenduol nɑ,

⁷⁹k l tɑn sɑɑ yent sɑnpɑɑpo k tul bin nbɑ be bunbɔnn ni nɑn bin nbɑ be kuun miɑl ni, k l biɑ tɑn sɑɑ yent t tɑɑ ni k tin tɔkn mɑnu sɑnjouk ni.»

⁸⁰K Sɑn din kpɑɑtl k puki pɑnŋ u siek ni, k be muuk ni tɑɑtɑɑ nɑn dɑɑl nbɑ k u din tɑn dɔkt Islɑɑeltieb buol ni nɑ.