Read Moba Luk 11 Bible Online

Luk 11 - Moba bible

Luk 11

¹Dɑɑsiɑl k Yiesu din be siɑl po k mei Yennu. Wɑɑ miɑl gbenn yuo nbɑ, k u *puolpoweitieb yenɔ tɑn yet’ɔ ɑ: «Yonmdɑɑnɔ, wɑnt’t tɑɑ sii mei Yennu biɑnŋ nbɑ nɑn Sɑn nbɑ mun din wɑnn u puolpoweitieb biɑnŋ nbɑ nɑ.»

²K Yiesu yet’b ɑ: «Yɑɑ tuu sii mei Yennu biɑnŋ nbɑ e nɑ: Bɑɑ, ɑ sɑnn n lɑ dontl. Ŋɑɑnt k ɑ nɑɑn n bɑɑl.

³Tul’t mɑnn dɑɑl kul

⁴Nyikn cɑb t biit nɑn tɑɑ mun nyikt k cɑbt bin nbɑ biil’t nɑ. A dɑɑ te k t kuɑ jɑnmi ni.»

⁵Yiesu biɑ yet’b ɑ: «T sɑɑ yet ɑ i yenɔ mɔk u yuɑk k sɑɑn u ŋɑɑk ni nyiɑɔk tɑnsuuni k yet’ɔ ɑ: ‹N yuɑk, kpentl’n pɑɑni ŋɑntɑ,

⁶k mɑɑn n yuɑs nbɑ ni yenɔ nyii sɔnu k bɑɑl n ŋɑɑk ni, ŋɑɑn k n k mɔk siɑl k sɑɑ tul’ɔ.›

⁷K wun nbɑ be ŋɑɑk ni jiin ɑ: ‹Dɑɑ muks’n. N ponŋ kpɑl gɑnn ɑ, k min nɑn n wɑɑs biɑ duɑl ɑ. N kɑn fit fiil k tul’ɑ pɑɑnu.›

⁸Gotl, n yien’i e, u kɑn sɑk fiil k tul’ɔ jiet mɑnŋ, wɑɑ tie u yuɑk nɑ pɑɑk, ŋɑɑn wɑɑ k tiin fei k biɑ mei’ɔ nɑ, sie k u tɑn tɑt fiil k tul’ɔ biɑnŋ nbɑ k u luon.

⁹«L pɑɑk, n biɑ yien’i, miɑt mɑn, k b sɑɑ tul’i. Lomin mɑn, k i sɑɑ lɑ wɑɑ. Kpɑɑn gɑnn mɑn, k b sɑɑ luot k tul’i,

¹⁰k mɑɑn wun nbɑ kul mei, gɑɑn e, k wun nbɑ mun luon, u lɑɑt e, k wun nbɑ kpɑɑn gɑnn, b luotl tien’ɔ.

¹¹Yinm bɑɑnbɑ, i ŋmee k u bijɑ sɑɑ miɑl’ɔ jɑnŋ k wun jii wɑɑɔk k tul’ɔ?

¹²Ami ŋmee k u sɑɑ miɑl’ɔ jenn k wun jii nɑnŋ k tul’ɔ?

¹³K l i tie k yinm nbɑ tie biitdɑnm nɑ mi biɑnŋ nbɑ k i sɑɑ tul i wɑɑs bonŋɑnɑ, k i Bɑɑ Yennu nbɑ be sɑnpɑɑpo nɑ ŋɑnin kɑn jii Foŋɑnm k tul bin nbɑ mei’ɔ l po nɑ ɑɑ?»

¹⁴Yiesu din nyint nɑlnbiiuk nbɑ din be jɑsuɑ ni k tien’ɔ muuk nɑ. Yuo nbɑ k nɑlnbiiuk nɑ nyii u ni k gbenn, k juɑ nɑ muut k piin k piɑk. K l bɑkt nibul nɑ bonciɑnn.

¹⁵Ŋɑɑn k yenm din yet ɑ: «Nɑlnbiit bɑt Beelsebuul e tien’ɔ yiikuo k u nyint nɑlnbiit niib ni.»

¹⁶Ŋɑɑn k yenm mun din luon k bin bikn Yiesu, k yɑɑ ɑ wun wɑnn’b *nyinn nbɑ nyii *Yendɔunŋ ni.

¹⁷K Yiesu bɑnn bɑɑ duki lin nbɑ, k yet’b ɑ: «Nɑɑn niib i ŋmɑt k kɔn tuokt b lieb, b nɑɑn mɑnŋ sɑɑ biil ɑ, k ŋɑɑk niib i mun i ŋmɑt kɔn nɑn lieb, l kɑn set.

¹⁸Tɔn, l i tie k *Sɑɑtɑn ŋmɑt kɔn nɑn u lieb, nlee k u nɑɑn sɑɑ set i? N yet nnɑ k mɑɑn i yɑɑ ɑ Beelsebuul e tien’n yiikuo ɑ mii nyint nɑlnbiit niib ni.

¹⁹L i tie k n nyint nɑlnbiit niib ni nɑn Beelsebuul yiikuo nɑ, ŋmee yiikuo ni e k i mɔnŋ mɔnŋ wɑɑs nyint nɑlnbiit niib ni i? Ŋɑnn e k b tuonɑ wɑnt nɑn i k mɔk mɔni.

²⁰Ŋɑɑn l i tie k l tie Yennu yiikuo ni k n nyint nɑlnbiit niib ni, l wɑnt nɑn Yennu nɑɑn ponŋ bɑɑl i buol ni wɑɑ.

²¹«Jɑwɑktl nbɑ tien siil nɑn u jɑtiɑt k guu u ŋɑɑk, u bonsiɑl kul kɑn sii,

²²ŋɑɑn u pɑɑlɔ mun i tɑnŋ i pikn’ɔ k pɑɑk’ɔ, u sɑɑ fɑt u jɑtiɑt nbɑ k u dɑɑn l pɑɑk nɑ e, k biɑ jii u mɔktuk k tol niib.

²³«Wun nbɑ k sie n puol, u kɔn nɑn’n e, k wun nbɑ mun k tiki niib k tien’n, u yɑt’b e.»

²⁴«L i tie k nɑlnbiiuk tɑn nyii nilɔ ni, u tuu yiek e k lin mɔkuounŋ ni, k luon fuonbuol, ŋɑɑn k k lɑɑt. L pɑɑk, u tuu tɑn yet u mɔnŋ e ɑ: ‹N sɑɑ ŋmɑt sɑɑn ŋɑɑk nbɑ ni k n dɑɑn nyii nɑ ni e.›

²⁵U ji kii ŋmɑt tɑn bɑɑl, wun lɑ k b piɑl k ŋɑnm ɑ,

²⁶u ji sɑɑ ŋmɑt nyi e k sɑɑ yiin nɑlnbilieb bɑnlole, bin nbɑ bi k cie u pɑɑk, k bɑɑl nɑn’m, k bin kuɑ k lɑkn be, k nilɔ mɑnŋ binbenŋ ji sii bi bonciɑnn k gɑl wɑɑ dɑɑn tuu be sinsinn biɑnŋ nbɑ nɑ wɑɑ.»

²⁷Yiesu nbɑ din dɑɑ yien nnɑ mɑnŋ, k puosuɑ nnɑ be nibul nɑ ni, k yet sɑnpɑɑpo wɑɑ ɑ: «Puo nbɑ mɑl’ɑ k muɑn’ɑ nɑ, pɑlpienn tie u yɑl e.»

²⁸K Yiesu jiin yet’ɔ ɑ: «Bin nbɑ gbiɑ Yennu mɑɑn k sɑɑk’l, ŋɑnm e k pɑlpienn tie b yɑl.»

²⁹Nibul nbɑ din gbin Yiesu buol ni yuo nbɑ nɑ, k u yet’b ɑ: «Mɔtɑɑnɑ nigbounŋ nɑ tie biitdɑnm e, k mɑɑn b luon bin lɑ nyinn, ŋɑɑn b kɑn lɑ nyinsiɑl, l i kii tie Suonɑ nyinn nɑ i kɑɑ.

³⁰Biɑnŋ nbɑ k Suonɑ din tien nyinn k tul Niiniif tieb nɑ, l biɑnŋ e mun k *Nisɑɑlk Bijɑ mun sɑɑ tien nyinn k tul mɔtɑɑnɑ nigbounŋ nɑ.

³¹Buut dɑɑl, puosuɑ nbɑ din tie kpɑnbɑl nbɑ din nyii gɑnŋ po nɑ tɑn sɑɑ set wɑnn nɑn mɔtɑɑnɑ tingbounŋ nɑ niib mɔk biit, k mɑɑn u din nyii digbɑnbɑnfɔkl e wɑɑ k tɑn bɑɑl ɑ wun gbiint kpɑnbɑl Sɑɑlomɔn yɑnfuon nɑ pinpɑɔk, k gotl mɑn, wun nbɑ cie Sɑɑlomɔn nɑ be nnɑ.

³²Buut dɑɑl, Niiniiftieb[8] tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn Suonɑ muɑnti pɑɑk k b din mɔ kuɑŋɑɑn k lebt binbenŋ, k gotl mɑn, wun nbɑ cie Suonɑ be nnɑ.»

³³«B k jokt fitl ŋɑɑn jikt k tie wuol ni, ɑmi k liknt bokt l pɑɑk. Sie k b jii’l k tuɑnn bonsiɑl nbɑ fɔk nɑ pɑɑk k lin yent, k niib i jik i kuɑ yuo nbɑ, bii lɑɑt yentu nɑ.

³⁴A ninbinɑ e tie ɑ gbɑnɑnt fitl. A ninbinɑ i ŋɑn, ɑ gbɑnɑnt kul sii mɔk yentu, ŋɑɑn ɑ ninbinɑ i kii ŋɑn, ɑ gbɑnɑnt kul sii be bunbɔnn ni e.

³⁵Ii mi mɑn k yentu nbɑ be i ni nɑ dɑɑ kpɑntl tie bunbɔnn.

³⁶Tɔn, ɑ gbɑnɑnt kul i yien bonŋɑnn k siɑl po k be bunbɔnn ni, l sii yien e k nyili pilpilpil, k nɑɑn nɑn fitl nbɑ yien k tien’ɑ yienŋɑnu nɑ.»

³⁷Yuo nbɑ k Yiesu pɑk gbenn nɑ, k Fɑɑliisiɑnsuɑ din yet’ɔ ɑ wun wei’ɔ k bin sɑɑ di jiet. K u din wei sɑɑn k sɑɑ kuɑ k kɑl ɑ wun di.

³⁸K l din tien Fɑɑliisiɑn mɑnŋ bɑktnɔunŋ wɑɑ lɑ k Yiesu k fobt nɑn b kɑɑl nbɑ tie bɑnnu nbɑ nɑ, ŋɑɑn yɑɑ wun di nɑ.

³⁹K Yonmdɑɑnɔ yet’ɔ ɑ: «Yinm Fɑɑliisiɑnnbɑ nɑ, i tuu soki ŋmɑni nɑn seni puolpo kuukuɑ e, ŋɑɑn k i pɑlɑ ni gbie nɑn fɑtu nɑn bonbiil.

⁴⁰Yinm jɑtt nɑ. Wun nbɑ din nɑn puolpo nɑ, ŋuɑ kɑɑ din nɑn nuɑk ni mun ii?

⁴¹Tuln tɑlɑs-dɑnm lin nbɑ be i ŋmɑni ni nɑn i seni ni, k i nɑn-yel po nɑn nuɑk ni kul sii yien.

⁴²«Yinm Fɑɑliisiɑnnbɑ, l sii bi i pɑɑk. I jikt ment nɑn luu[9] nɑn kpinliet nbɑ k b buul gungounŋ ni l buolu kul ni bɔktu piik ni bɔkyenn kuɑ, k tien Yennu, ŋɑɑn bɑkn lin nbɑ tuok, k biɑ k luon Yennu. L bo sii ŋɑn k yii tuun ŋɑnn, k dɑɑ nyikt lin nbɑ tenn.

⁴³«Yinm Fɑɑliisiɑnnbɑ, l sii bi i pɑɑk, k mɑɑn i luon nijɑɑnɑ kinkɑɑni boɑ *Suifnbɑ jɑɑnti diet ni, k biɑ luon niib i fuont’i nɑn nibɑɑkl fuonti dɑi ni.

⁴⁴L sii bi i pɑɑk. I tie nɑn kɑɑt nbɑ k niib tuu ŋmɑɑ k do l pɑɑk ŋɑɑn kɑn bɑnn’l nɑ e.»

⁴⁵Ŋɑnn e k *senniwɑntɔyenɔ yet’ɔ ɑ: «Wɑntuɑ, fɑɑ yet nnɑ nɑ, ŋɑnn ɑ sukl’t e nɑ mun.»

⁴⁶K Yiesu jiin yet’ɔ ɑ: «Yinm *senniwɑntieb, l sii bi i pɑɑk mun, k mɑɑn i jint niib jik-kpiɑtɑ nbɑ pɑɑl nɑn bin jii, ŋɑɑn i mɔnŋ k sɑɑk k yii siin jikɑ mɑnŋ kii sonmt’b.

⁴⁷L sii bi i pɑɑk, k mɑɑn i mɑɑ sɔkniinbɑ kɑɑt k sent bonŋɑnn. Ŋɑnm mɑnŋ e tie sɔkniinbɑ nbɑ k i yejɑnm din kpii’b mɑnŋ.

⁴⁸Yɑɑ tuun lin nbɑ mɑnŋ, ŋɑnn e wɑnt niib nɑn i set sɑk i yejɑnm nbɑ din tun biɑnŋ nbɑ nɑ wɑɑ. Ŋɑnm e din kpii sɔkniinbɑ mɑnŋ, k i mun sɑɑn sɑɑ mɑɑ b kɑɑt mɑnŋ.

⁴⁹L pɑɑk, k Yɑndɑɑnɔ Yennu din yet ɑ: ‹N sɑɑ tun sɔkniinbɑ nɑn tuomiinbɑ b buol ni, k b sɑɑ kpi siɑb ŋɑɑn muks lieb,›

⁵⁰ɑ mɔtɑɑnɑ nigbounŋ n tɑn lɑ tubdɑtu sɔkniinbɑ kul kpinu nɑ pɑɑk. Kpinu mɑnŋ din piin *dulnyɑ nɑmu yuo e wɑɑ,

⁵¹Kɑɑen nbɑ din kpii Abel[10] yuo nbɑ nɑ, k l jii k tɑn bɑɑl Sɑɑkɑɑli kpinu, wun nbɑ k b din kpii’u Yennu *mɑnnu binbintl nɑn Yennu jɑɑnti ŋɑsɑɑkɑk sinsuuk ni nɑ. N yien’i nɑn bɑlmɔni e, mɔtɑɑnɑ nigbounŋ nɑ tɑn sɑɑ lɑ tubdɑtu lin nbɑ nɑ kul pɑɑk.

⁵²«Yinm *senniwɑntieb, l sii bi i pɑɑk, k mɑɑn i mɔk pienu nbɑ sɑɑ fit luot minu gɑnn. I k kuɑ lenŋ k i biɑ k cɑb bin nbɑ luon bin kuɑ.»

⁵³Yiesu nbɑ siet lenŋ mɑnŋ, k senniwɑntieb nɑn Fɑɑliisiɑnnbɑ wutuol ji din duo bonciɑnn, k b ji din piin boi’ɔ buboit k jikt sɑɑ lɑbɑɑl bonciɑnn po,

⁵⁴k b lek din kol ɑ bin lɑ u mɔbonkpetl k fit tɑɑl’ɔ.