Read Moba Luk 12 Bible Online

Luk 12 - Moba bible

Luk 12

¹L yuo mɑnŋ k niib tusɑ tusɑ din muk lɑkn lieb, k tɑn ŋmɑɑt lieb tɑɑgbinɑ, k Yiesu din pɑk nɑn u *puolpoweitieb sinsinn k yɑɑ ɑ: «Ii lɔktl mɑn Fɑɑliisiɑnnbɑ tumiiu nbɑ k tuok nɑ, b tie kpinkpɑnni dɑnm e.

²Bɑlsɑi kɑɑ k duɑk k tɑn kɑn nyi pɑɑnu ni. Siɑl mun k be wuol ni k b tɑn kɑn bɑnn’l.

³L pɑɑk, lɑbɑɑl nbɑ k i pɑk bunbɔnn ni nɑ tɑn sɑɑ nyi yentu ni. Lin nbɑ k i lek lɔkn diet ni, ŋɑɑn l tɑn sɑɑ wuot k muɑnt nyi wɑɑ.»

⁴«N yuɑsnbɑ, n yien’i e, i dɑɑ tiin bin nbɑ kpi gbɑnɑnt kuukuɑ nɑ jɑŋmɑɑni mɑn, k mɑɑn b kpi i gbɑnɑnt kuukuɑ e, k l puolpo b kɑn fit tien’i siɑl.

⁵N sɑɑ wɑnn’i wun nbɑ k i sii tiin’ɔ. Tinin wun nbɑ fit kpi i gbɑnɑnt k biɑ mɔk yiikuo nbɑ k sɑɑ fit lu’i muu nbɑ kɑn mi kpien nɑ ni. N yien’i e, tinin ŋuɑ e mɑn.»

⁶«B k kɔi nuɑnbit bɑnŋmu kujɑ ŋɑnle ee? Ŋɑɑn Yennu k mi tɑnm nɑn b yenɔ kuɑ po wɑɑ.

⁷Setk nɑn mɔni Yennu ponŋ mi i yulɑ pɑɑk yut kɑnn. I dɑɑ tiin jɑŋmɑɑni, k mɑɑn i mɔk nyuɑt k gɑl nuɑnbit bonciɑnn.»

⁸«N yien’i e, wun nbɑ nyint u mɔnŋ pɑɑnu ni niib ni nɑn u tie n weilɔ e, *Nisɑɑlk Bijɑ mun tɑn sɑɑ nyinn’ɔ pɑɑnu ni Yennu *mɑlɑkɑɑnbɑ buol ni, nɑn u tie u yuɑ e,

⁹ŋɑɑn wun nbɑ yɑɑ ɑ u k tie n weilɔ, niib ni, Nisɑɑlk Bijɑ mun tɑn sɑɑ yet ɑ u k mi’u, Yennu mɑlɑkɑɑnbɑ mɑnŋ buol ni.

¹⁰«Wun nbɑ kul pɑk mɔbonn k biil Nisɑɑlk Bijɑ nɑ, Yennu sɑɑ nyik cɑb’ɔ wɑɑ, ŋɑɑn wun nbɑ pɑk biil Foŋɑnm nɑ, Yennu kɑn nyik cɑb’ɔ.

¹¹«B i suol’i k bɑɑl nɑn’i *Suifnbɑ jɑɑnti diet ni ɑmi kpɑnbɑlɑ buol ɑmi tinŋ yudɑnm buol, i dɑɑ te k l dɑɑnm’i nɑn yɑɑ sɑɑ pɑk jiin biɑnŋ nbɑ, ɑmi yɑɑ sɑɑ pɑk lin nbɑ,

¹²k mɑɑn l yuo nɑ e k Foŋɑnm tɑn sɑɑ wɑnn’i biɑnŋ nbɑ k i sɑɑ pɑk.»

¹³L yuo mɑnŋ k jɑsuɑ din yet Yiesu nibul nɑ ni ɑ: «Wɑntuɑ, yetl n yuɑlɔ nɑ k wun bɔkt t bɑɑ fɑɑl k tul’n.»

¹⁴K Yiesu yet’ɔ ɑ: «N yuɑk, ŋmee tien’n bɑlbuulɔ ɑ n bu k bɔkt i fɑɑl mɑnŋ i?»

¹⁵Ŋɑnn e k Yiesu ŋɑnm pɑk nibul nɑ ɑ: «Ii mi mɑn mɔktuk lonm po. K mɑɑn mɔktuk bonciɑnn kɑɑ sɑɑ te k nilɔ i mɔk mɑnfuol.»

¹⁶Ŋɑnn e k Yiesu yin’m bɑljouk ɑ: «Mɔktsuɑ din be k mɔk u kpɑɑb, k u kpɑɑb nɑ din tien’ɔ jiet bonciɑnn,

¹⁷k u tɑn dukn dudukt ɑ: ‹N sɑɑ tien nlee, k mɑɑn n k mɔk yiɑl nbɑ k ji sɑɑ tien n jiet nɑ kul lenŋ.›

¹⁸K u yet u mɔnŋ ɑ: ‹N sɑɑ tien nnɑ e. N sɑɑ yiel n bɔkpelɑ nɑ e ŋɑɑn ŋɑnm mɑɑ bɔpɑɑnɑ nbɑ yɑb. Lenŋ e k n ji sɑɑ tien n dii nɑn n bonkokuot kul ɑ,

¹⁹k n biɑ sɑɑ yet n mɔnŋ ɑ: N mɔk jiet nbɑ sɑɑ jɑnŋ nɑn binɑ sɑɑn ɑ. N ji sii foi k di k nyu kii mɔk pɑlpienn.›

²⁰Ŋɑnn e k Yennu yet’ɔ ɑ, ‹Jɑjɑtuk nɑ. Nyiɑɔk nɑ, ɑ mɑnfuol sɑɑ kɑt. Ŋɑɑn lɑɑn, ɑ mɔktuk nbɑ k ɑ mɔk nɑ, ŋmee sɑɑ yent i?›

²¹«Tɔn, wun nbɑ kul tiki mɔktuk k tien u mɔnŋ, ŋɑɑn k mɔk mɔktuk Yennu buol, l mun sii tie nnɑ e k tul’ɔ.»

²²Ŋɑnn e k Yiesu yet u puolpoweitieb biɑk, «L pɑɑk k n yien’i, i dɑɑ te k l muks’i i binbenŋ po nɑn yɑɑ sɑɑ di lin nbɑ, k biɑ dɑɑ te k l muks’i i gbɑnɑnt po nɑn yɑɑ sɑɑ liɑ lin nbɑ,

²³k mɑɑn mɑnfuol gɑl dinu wɑɑ, k gbɑnɑnt mun gɑl tiɑt ɑ.

²⁴Gotl kinkɑɑt, b k buul. B biɑ k jɑɑn. B biɑ k mɔk dii nɑɑpɑɑt ɑmi sukɑ, ŋɑɑn Yennu dint’b. I k mɔk nyuɑt bonciɑnn k gɑl kinkɑɑt ii?

²⁵I ŋmee sɑɑ fit fɔkn u mɑnfuol u dudukt ni nbɑ muks’ɔ nɑ pɑɑk i?

²⁶Yɑɑ k fit tun bonbik nɑ, bee k l sii dɑɑmi’i nɑn bongbenŋl tumu?

²⁷Gotl mɑn tipuuk nɑn l ŋɑnt, ŋɑɑn b k tuun k luu b mɔnŋ cincenɑ, ŋɑɑn n yien’i nɑ, kpɑnbɑl Sɑɑlomɔn nbɑ din lek mɔk tɑŋɑnɑ biɑnŋ nbɑ, u din k mi liɑ tiɑt k l ŋɑn nɑn tipuuk nɑ.

²⁸Muɑt nbɑ be dinnɑ, ŋɑɑn wonn k b sɑɑ juo muu nɑ, Yennu nbɑ te k l fɑn biɑnŋ nbɑ nɑ, k u kɑn lɑnn yinm ii? Yinm yɑdɑ-kɑnpuɑnɑ dɑnm nɑ.

²⁹«I biɑ dɑɑ gbɑɑ nɑn yɑɑ sɑɑ di lin nbɑ ɑmi yɑɑ sɑɑ nyu lin nbɑ, k biɑ dɑɑ muks i dudukt,

³⁰k mɑɑn niib nbɑ k wɑɑ Yennu nɑ tuu muks b dudukt lin nbɑ nɑ pɑɑk e. Ŋɑɑn yinm ŋɑnin, i Bɑɑ ponŋ mi nɑn i luon lin nbɑ nɑ.

³¹L pɑɑk, ŋɑɑnt k i bɑkɑ ii be Yennu nɑɑn ni, k u sɑɑ jii bonɑ nbɑ nɑ k tul’i.

³²«N niib nbɑ k yɑb nɑ, i dɑɑ tiin jɑŋmɑɑni, k mɑɑn i Bɑɑ lɑ nɑn l ŋɑn wun tul’i nɑɑn mɑnŋ ɑ.

³³Kɔin i bonɑ nbɑ k i mɔk k jii l likli k tul tɑlɑs-dɑnm. Lomin mɑn likbuɑli nbɑ kɑn biil, kii biɑ kii mɔk mɔktuk *Yendɔunŋ ni, siɑn nbɑ k l kɑn wɑt, k nɑn-yukɔ kɑn kpiɑn lenŋ, k bonŋmiŋmɑbt biɑ kɑn muɑ’l.

³⁴Siɑn nbɑ k ɑ mɔktuk be nɑ, ɑ dudukt mun be lenŋ e.

³⁵«Siknt gbounŋ siɑk ni mɑn, k ŋɑɑn k i fitɑ ii di,

³⁶kii tie nɑn niib nbɑ tuu guu b cɑnbɑɑ nbɑ tuu nyi puociɑnu k kpen k tɑn bɑɑl yiin ɑ bin luot gɑnn tul’ɔ, k bin luot gɑnn yiɑn ɑ nɑ.

³⁷Tuontunnɑ nbɑ k b cɑnbɑɑ kpen k lɑ’b k b guu u kpenu nɑ, pɑlpienn tie b yɑl e. Bɑlmɔni e k n yien’i nɑ, b cɑnbɑɑ nɑ sɑɑ te k u dɑɑbɑ n kɑl k wun bɑɑl nɑn jiet k tul’b k bin di.

³⁸L i tie k b cɑnbɑɑ tɑn kpen tɑnsuuni ɑmi kojomuɑk, k lɑ k b guu’u, pɑlpienn sii tie tuontunnɑ mɑnŋ yɑl e.

³⁹«Nnɑlɑ, l i tie k ŋɑɑdɑɑnɔ ponŋ mi yuo nbɑ k nɑn-yukɔ sɑɑ bɑɑl i e, u kɑn ŋɑɑn k wun bɑɑl kuɑ.

⁴⁰Yinm mun n tien siil kii guu, k mɑɑn Nisɑɑlk Bijɑ tɑn sɑɑ jen yuo nbɑ k i k duki ɑ u sɑɑ jen e.»

⁴¹Ŋɑnn e k Piɑl boi Yiesu ɑ: «N Yonmdɑɑnɔ, ɑ yiin tinm e bɑljouk nɑ ɑmi suɑ kul ee?»

⁴²K Yonmdɑɑnɔ jiin k yet’ɔ ɑ: «Tuontunlɑnɔ e tie yɑndɑɑnɔ k tuun u cɑnbɑɑ nbɑ wɑnt’ɔ biɑnŋ nbɑ? Ŋuɑ e tie wun nbɑ k u cɑnbɑɑ sɑɑ tien’ɔ tuontun-yudɑɑnɔ ɑ u goli tuontunnɑ kul nbɑ be u ŋɑɑk ni, kii tien’m mɑnn yuo kul nbɑ jɑnŋ.

⁴³L i tie k u cɑnbɑɑ tɑn kpen k lɑ k u tuun nnɑ, pɑlpienn sii tie tuontunnɔ mɑnŋ yɑl e.

⁴⁴Bɑlmɔni e k n yien’i nɑ, ŋɑɑdɑɑnɔ mɑnŋ sɑɑ jii u mɔktuk kul k tien tuontunnɔ mɑnŋ nuu ni ɑ wuu goli’l.

⁴⁵Ŋɑɑn l i tie k tuontunnɔ mɑnŋ yet u mɔnŋ ɑ u cɑnbɑɑ kɑn jen yiɑn, k ji piin k buo u tuontunliɑ nɑ, jɑb, puob, k u buo’b, k biɑ di k nyu dɑɑn k tɑn yib,

⁴⁶u cɑnbɑɑ tɑn sɑɑ jen dɑɑl nbɑ nɑn yuo nbɑ k tuontunnɔ mɑnŋ k duki ɑ u sɑɑ jen, k tɑn sɑɑ dɑt u tubl bonbiil, k tien’ɔ nɑn wɑɑ tuu tien mɔyetdɑnm biɑnŋ nbɑ nɑ.

⁴⁷«Tuontunnɔ i mi lin nbɑ k u cɑnbɑɑ luon wun tun, ŋɑɑn k tien u mɔnŋ siil, k biɑ k tun, b sɑɑ buo’u gbɑnn bonbiil.

⁴⁸Tuontunnɔ nbɑ k mi lin nbɑ k u cɑnbɑɑ luon wun tun, ŋɑɑn kpet tun bonkpetl nbɑ jɑnŋ nɑn buot, b sɑɑ buo’u wɑɑnm-nnɑ. «Wun nbɑ k b tul’ɔ sɑɑn, ŋuɑ e k b tɑn sɑɑ boi gɑɑl sɑɑn. Wun nbɑ k b kubn’ɔ sɑɑn ɑ, ŋuɑ e k b tɑn sɑɑ boi k gɑɑl bonciɑnn mun.»

⁴⁹«Min Yiesu, n bɑɑl mɑɑ n lu muu e tingbounŋ nɑ ni, ŋɑɑn n sunmɑn k l ponŋ yinn ɑ mɑn.

⁵⁰Wulsɑu be k n sɑɑ wul, ŋɑɑn l muks n dudukt e mɔkmɔk nɑn lɑɑ tɑn sɑɑ gbenn.

⁵¹I duki mi ɑ n bɑɑl nɑn mɑnu tingbounŋ nɑ ni ee? Aɑi. N yien’i e, n bɑɑl nɑn bɔktu e.

⁵²Lɑɑ jii dinnɑ k sɑɑ, niib bɑnŋmu tɑn sii be ŋɑɑk ni, k b tɑn sɑɑ bɔkt. Bɑntɑ sɑɑ kɔn nɑn bɑnle, k bɑnle mun sɑɑ kɔn nɑn bɑntɑ.

⁵³Bɑɑ tɑn sɑɑ kɔn nɑn u bijɑ, k bijɑ mun tɑn sɑɑ kɔn nɑn u bɑɑ. Nɑɑ tɑn sɑɑ kɔn nɑn u bipuo, k bipuo mun tɑn sɑɑ kɔn nɑn u nɑɑ. Siponɑɑ tɑn sɑɑ kɔn nɑn u sipopuok, k sipopuok nɑ mun tɑn sɑɑ kɔn nɑn u siponɑɑ.»

⁵⁴L yuo mɑnŋ k Yiesu pɑk tul nibul nɑ k yet ɑ: «Yuo nbɑ k i tuu tɑn lɑ sɑnpɑgbɑnt k lin do yenbɑɑpo, k i tuu yet yiɑn ɑ, ɑ sɑɑk sɑɑ bɑɑ wɑɑ, k u set tɑn bɑɑ.

⁵⁵Yuo nbɑ k i lɑɑt k gɑnŋ po wounŋ dɑ, i tuu yɑɑ ɑ nɑɑɔk sii be, k l set tɑn ton.

⁵⁶Yinm kpinkpɑnni dɑnm nɑ, i fit gbɑt lin nbɑ tien tingbounŋ ni nɑn sɑnpɑɑpo nɑ pɑɑk ɑ, ŋɑɑn bee tien k i kɑn fit bɑnn mɔtɑɑnɑ yuo nɑ pɑɑk i?

⁵⁷«Bee tien k i kɑn fit dukn i mɔnŋ k senn lin nbɑ tuok i?

⁵⁸L i tie k fin nɑn suɑ mɔk mɑɑn k sɑɑ bɑlbuulɔ buol, yɑɑ dɑɑ be sɔnu pɑɑk k sɑɑ nɑ, l ŋɑn k ɑ kot ɑ mɔnŋ k ŋɑnm fin nɑn ŋuɑ sinsuuk ni. L i kii tie nnɑ i kɑɑ, u sɑɑ dɑt’ɑ bɑɑl nɑn’ɑ bɑlbuulɔ buol, k bɑlbuulɔ nɑ mun sɑɑ jii’ɑ k tien’ɑ dɑnsɑlguulɔ nuu ni, k dɑnsɑlguulɔ nɑ mun sɑɑ kuɑn’ɑ dɑnsɑlk.

⁵⁹N yien’ɑ e, b kɑn mi ŋɑɑ’ɑ ni, sie k ɑ tɑn pɑ likli kul nbɑ k b jiɑl’ɑ nɑ, k kuuk kɑn tenn.»