Read Moba Luk 13 Bible Online

Luk 13 - Moba bible

Luk 13

¹L yuo nɑ k nisiɑb din bɑɑl k yet Yiesu k jikt sɑɑ Gɑɑliile tieb nbɑ k *Piilɑɑt din kpii’b yuo nbɑ k b din mɑnn *mɑlunŋ k tien Yennu nɑ.

²K Yiesu boi’b ɑ: «Bɑɑ din kpii Gɑɑliile tieb mɑnŋ biɑnŋ nbɑ nɑ, i duki ɑ b mɑntk din tie biitdɑnm k gɑl b lieb kul nɑ ee?

³Aɑi, ŋɑɑn n yien’i e, l i tie k i k mɔ kuɑŋɑɑn k lebt binbenŋ i kɑɑ, i kul mun tɑn sɑɑ kpo nnɑ e.

⁴Dɔnfuouk nbɑ din be Siiloe k tɑn bɑɑ k nyɑk niib piik nɑn bɑnniin k kpii’b nɑ, i duki ɑ niib mɑnŋ din jiɑ mɑntk tie biitdɑnm k gɑl lieb kul nbɑ be Selusɑɑlenm nuɑk ni ɑmi?

⁵Aɑi, ŋɑɑn n yien’i e, l i tie k i k mɔ kuɑŋɑɑn k lebt binbenŋ i kɑɑ, b mun tɑn sɑɑ kpi’i nnɑ e.»

⁶Ŋɑnn e k Yiesu din yin’m bɑljouk k yet ɑ: «Jɑsuɑ din wuu fiigie u kpɑɑb nbɑ k u wuu tilonti nbɑ k b yi *fiinyɑ nɑ ni, k tɑn bɑɑl ɑ wun puɑl fiignbɑ, ŋɑɑn k k lɑ siɑl.

⁷Ŋɑnn e k u yet u kpɑguulɔ nɑ ɑ: ‹Nnɑlɑ, binɑ ŋɑntɑ e nɑ k n tun bɑɑt fiigie nɑ buol mɑɑ n tuu puɑl fiignbɑ, ŋɑɑn k k lɑɑt siɑl. Cuɑn’mɔ lu. Bee k l sii sie biil tinŋ yɑnn i?›

⁸K u kpɑguulɔ nɑ jiin yet’ɔ ɑ: ‹Cɑnbɑɑ, dɑɑ nyikn binn nɑ dɑɑnn k n gbiil l nyɑkl ni k pii luln.

⁹Pɑsiɑl binn nbɑ wɑɑ nɑ u sɑɑ lon luɑnɑ. L i tie k l k lon i e, fɑn ji tɑn ŋɑɑn k bin cuɑ’u.›»

¹⁰Fuondɑsiɑl k Yiesu din tumi niib *Suifnbɑ jɑɑnti dieok ni,

¹¹k puosuɑ din be dieok mɑnŋ ni, k nɑlnbiiuk din be u ni k tien’ɔ wɑɑgolk binɑ piik nɑn ŋɑnniin, k u k fit nɑɑtl u mɔnŋ fɑb ɑ.

¹²Yiesu nbɑ tɑn lɑ’u, k u yiin’ɔ ɑ wun bɑɑl, k yet’ɔ ɑ: «A yiɑlu mɑnŋ ŋɑɑ’ɑ wɑɑ,»

¹³ŋɑɑn jii u nii k yii puo mɑnŋ pɑɑk, k l tɑɑkpɑɑk ni k u fiil set nɑɑt u mɔnŋ k ji piɑk Yennu.

¹⁴Ŋɑnn e k Suifnbɑ jɑɑnti dieok yudɑɑnɔ wutuol din duo, k mɑɑn Yiesu nbɑ te k puo nɑ pɑɑk *Fuondɑɑl nɑ pɑɑk, k u yet niib nɑ ɑ: «Dɑɑ ŋɑnluob k t sii tuun tuonn. I tuu bɑɑl l dɑɑ ni kii lɑɑt pɑɑku, ŋɑɑn i dɑɑ bɑɑt Fuondɑɑl ɑ wun te k i pɑɑk.»

¹⁵K Yonmdɑɑnɔ jiin yet’ɔ ɑ: «Yinm kpinkpɑnni dɑnm, i kul nɑ tuu k luotl i nei nɑn i boni bonkobloi ni k dɑɑl sɑɑ nɑn’m k sɑɑ nyunt’b Fuondɑɑl ii?

¹⁶K puo nɑ nbɑ tie Ablɑɑhɑɑnm yɑɑbuonn nɑ, ŋuɑ e k *Sɑɑtɑn din tien’ɔ yonmk binɑ piik nɑn ŋɑnniin, l bo k jɑnŋ nɑn k n nyinn’ɔ yomsn nɑ ni Fuondɑɑl ii?»

¹⁷Yiesu nbɑ din pɑk lin nbɑ mɑnŋ, k mɔnɔnoilɑ nɑ kul ɑ ji din dii fei, ŋɑɑn nibul nɑ kul ji din mɔk pɑlpienn nɑn wɑɑ tuun bɑktnɔunŋ tuonɑ kul mɑnŋ.

¹⁸L puolpo k Yiesu boi niib mɑnŋ ɑ: «N sɑɑ bikn Yennu nɑɑn nɑn lɑnn po e? N sɑɑ nɑn’l nɑn biɑ?

¹⁹L nɑɑn nɑn kpint tiik nbɑ k b yi’l *muutɑɑld nɑ binn nbɑ k nilɔ jii k bul u gungounŋ ni, k l kpɑɑt k tien tiik, k nuɑni bɑɑt k tiɑ tiɑt l yiini pɑɑk nɑ e.»

²⁰K Yiesu biɑ ŋɑnm boi’b ɑ: «N sɑɑ bikn Yennu nɑɑn nɑn lɑnn po e?

²¹Yennu nɑɑn tie nɑn * dɑtinŋ nbɑ k puo jii k ŋmɑt nɑn pɑɑnu yon nbɑ yɑb, k lin tɑn miik mɔkmɔk nɑn lɑɑ tuu tɑn pukl nɑ e.»

²²Yuo nbɑ k Yiesu din be sɔnu pɑɑk k sɑɑ Selusɑɑlenm nɑ, u din gɑl digbɑngbenŋɑ nɑn digbɑnbis ni, k tumi niib,

²³k suɑ tɑn boi’ɔ ɑ: «Cɑnbɑɑ, niib nbɑ tɑn sɑɑ lɑ fielu nɑ, b tɑn sii tie wɑɑnm-nnɑ ɑmi ii?» K u yet’b ɑ

²⁴«Sie k i muks i mɔnŋ k yebn k kuɑ tɑnmɔyebk nɑ ni. K mɑɑn n yien’i e, niib bonciɑnn tɑn sii luon bin kuɑ lenŋ, ŋɑɑn tɑn gbɑl l kuɑnu.

²⁵Ŋɑɑdɑɑnɔ i tɑnŋ i fiil k luon tɑnmɔb nɑ, i sɑɑ biɑl sie nɑn-yel po, k kpɑɑn tɑnmɔb k yi k yɑɑ: ‹Cɑnbɑɑ, luotl tul’t,› ŋɑɑn l yuo, u tɑn sɑɑ jiin yet’i ɑ: ‹N k mi yɑɑ nyii siɑn nbɑ.›

²⁶K i tɑn sɑɑ jiin yet’ɔ ɑ: ‹T din tuu di k nyu nɑn’ɑ, k ɑ tuu tumi’t t doi ni.›

²⁷K u biɑ tɑn sɑɑ jiin k yet’i ɑ: ‹N k mi yɑɑ nyii siɑn. Yinm biitdɑnm kul nɑ, sietl n buol ni nɑ mɑn.›

²⁸Lenŋ e k i tɑn sii fɑbn mɔ k nyiitl nyɑnɑ yuo nbɑ k i sɑɑ lɑ Ablɑɑhɑɑnm nɑn Isɑɑk nɑn Sɑɑkɔb nɑn sɔkniinbɑ kul ɑ Yennu nɑɑn ni, ŋɑɑn b tɑn sɑɑ jii’i k lu’i nɑn-yel.

²⁹K niib tɑn sɑɑ nyi yendopo nɑn yenbɑɑpo nɑn diitu po nɑn gɑnŋ po[11] k tɑn kuɑ Yennu nɑɑn ni k kɑl k di jiet.

³⁰L yuo nɑ, nisiɑb nbɑ juont tɑn sɑɑ dɔnŋ sɑɑn liik, k siɑb nbɑ mun dɔnŋ sɑɑn liik tɑn sɑɑ juont.»

³¹L yuo nɑ k Fɑɑliisiɑnnbɑ siɑb din bɑɑl Yiesu buol k yet’ɔ ɑ: «Sie k ɑ nyii nnɑ k sɑɑn siɑl po, k mɑɑn *Heluod luon k wun kpi’ɑ.»

³²K Yiesu yet’b ɑ: «Ŋuɑ wonŋ nɑɑnɑɑt nɑ, ii sɑɑ mɑn, k sɑɑ yet’ɔ ɑ: ‹Gotl, dinnɑ nɑn wonn e k n sii biel nɑlnbiit niib ni ŋɑɑn biɑ kii te k bii pɑɑkt, k dɑɑ ŋɑntɑ dɑɑl k n sɑɑ gbenn n tuonn.›

³³Lɑɑ jii dinnɑ nɑn wonn nɑn dɑɑlpo, sie k n lek fɑbl sonm n sonm ɑ, k mɑɑn l k ŋɑn k bin kpi *Yennu sɔkni siɑl po l i kii tie Selusɑɑlenm i kɑɑ.

³⁴«Selusɑɑlenm tieb, nbɑɑyuoo! Yinm nbɑ kpi Yennu sɔkniinbɑ, k biɑ jɑɑt u tuomiinbɑ nbɑ k u tun’m i buol ni nɑ tɑnɑ, biknu biknu tɑɑl munŋɑ e k n gbɑɑ mɑɑ n lɑkn’i yonm nɑn kolk nbɑ tuu lɑkn u kobis u kpinkpɑnt ni nɑ, k i k sɑk.

³⁵Gotl mɑn, i ŋɑɑk sɑɑ duɑl yɑnn e. N yien’i e nɑ, lɑɑ nyii dinnɑ k jii sɑɑ, i ji kɑn mi k lɑ’n k sɑɑ tuu dɑɑl nbɑ k i tɑn sɑɑ yet ɑ: ‹Yennu yetŋɑnm ii be wun nbɑ bɑɑt Yonmdɑɑnɔ sɑnn ni nɑ pɑɑk.› »