Read Moba Luk 14 Bible Online

Luk 14 - Moba bible

Luk 14

¹Tɔn, fuondɑsiɑl k Yiesu din tɑn kuɑ Fɑɑliisiɑnnbɑ yudɑɑnsuɑ ŋɑɑk ni ɑ wun di jiet, k bin nbɑ be ŋɑɑk mɑnŋ ni din diisl’ɔ.

²L yuo nɑ k bɑɑtsuɑ bɑɑl u tuɑnn, wun nbɑ k bonwuunkɑl wuun’ɔ.

³Ŋɑnn e k Yiesu boi *senniwɑntieb nɑn Fɑɑliisiɑnnbɑ mɑnŋ ɑ: «T *senni sɑk ɑ nilɔ n te k bɑɑtɔ n pɑɑk *Fuondɑɑl ii?»

⁴Ŋɑɑn k b ŋmin ɑ. K Yiesu gɑɑl bɑɑtɔ mɑnŋ k te k u pɑɑk. L puolpo k u cɑb’ɔ ɑ wuu sɑɑ.

⁵Ŋɑnn e k u yet’b ɑ: «I yenɔ i mɔk bijɑ ɑmi nɑɑb k u tɑn bɑɑ bunbunn ni Fuondɑɑl, u kɑn donn’ɔ Fuondɑɑl mɑnŋ i?»

⁶Ŋɑɑn k b k fit jiin’ɔ siɑl.

⁷L yuo nɑ k Yiesu lɑ k bin nbɑ k b yiin’m nɑ luon bin gɑnn yudɑnm kɑɑni buol k kɑl. L pɑɑk, k u yin’m bɑljouk ɑ

⁸«B i yiin’ɑ puociɑnu k ɑ bɑɑl, fɑɑ dɑɑ kɑɑl yudɑɑnɔ kɑɑnu buol, k mɑɑn pɑsiɑl b ponŋ bo yiin suɑ e wɑɑ, wun nbɑ cie’ɑ,

⁹k yiintuɑ mɑnŋ sɑɑ bɑɑl ɑ buol ni k tɑn yet’ɑ ɑ: ‹Fiit ŋɑɑn tul’ɔ u kɑɑnu.› L yuo nɑ, k fɑn ji di fei k ji fiil k sɑɑn kɑl kpinŋ.

¹⁰Tɔn, b i yiin’ɑ puociɑnu k ɑ bɑɑl, fɑn kɑl kpinŋ, k yiintuɑ n tɑn fit k bɑɑl k yiin’ɑ: ‹N yuɑk, bɑɑt nɑ k tɑn kɑl yudɑnm kɑɑni buol.› L yuo nɑ k ɑ sɑɑ lɑ nibɑɑkl ɑ lieb mɑnŋ buol ni.

¹¹K mɑɑn wun nbɑ kul dont u mɔnŋ, b tɑn sɑɑ sikn’ɔ, ŋɑɑn wun nbɑ siknt u mɔnŋ, b tɑn sɑɑ donn’ɔ.»

¹²Ŋɑnn e k Yiesu biɑ yet wun nbɑ yiin’ɔ nɑ ɑ: «L i tie k ɑ yiin jɑɑnm, fɑɑ dɑɑ yi ɑ yuɑsnbɑ ɑmi ɑ yuɑlb ɑmi ɑ ninjɑnm ɑmi ɑ mɔktlieb, k mɑɑn ŋɑnm mɑnŋ tɑn sɑɑ jiin’ɑ b jiinu wɑɑ, k ɑ tɑn sɑɑ gɑɑl lin nbɑ k ɑ dɑɑn tien nɑ pɑnn.

¹³Ŋɑɑn l i tie k ɑ yiin jɑɑnm u e, fɑn yiin tɑlɑs-dɑnm nɑn wɔbi nɑn diɑni nɑn juɑni,

¹⁴k ɑ sii mɔk pɑlpienn. B i kii fit jiin’ɑ ŋɑɑn ɑ sɑɑ gɑɑl ɑ jiinu Yennu buol ni, dɑɑl nbɑ k Yennu tɑn sɑɑ fiin bin nbɑ tie niŋɑnm u buol ni kuun ni.»

¹⁵Bin nbɑ k b din yiin’m k b din di nɑn Yiesu nɑ yenɔ nbɑ gbɑt lin nbɑ k Yiesu pɑk nɑ k u yet’ɔ ɑ: «Wun nbɑ sɑɑ di jiet Yennu nɑɑn ni, pɑlpienn sii tie u yɑl e.»

¹⁶K Yiesu yet’ɔ ɑ: «Jɑsuɑ din be k tɑn yɑɑ wun di u jɑɑngbenŋl, k poi niib bonciɑnn.

¹⁷Jɑɑnm nɑ yuo nbɑ tɑn bɑɑl k u tun u tuontunnɔ ɑ wun sɑɑn yiin niib nbɑ k u dɑɑn yiin’m nɑ, ɑ bin bɑɑl nɑ, ɑ k jiet nɑ kul tien siil ɑ.

¹⁸K b kul tɑɑn dukn dudukyent, k mei’ɔ ɑ wun cɑb’b k b dɑɑ bɑɑt, k sinsinn yuɑ nɑ yet tuontunnɔ nɑ ɑ: ‹N dɑɑ kpɑpɑɑnŋ. L pɑɑk, cɑb min k n sɑɑn sɑɑ got,›

¹⁹k luɑ yet’ɔ ɑ: ‹N dɑɑ nɑɑkuoki piik. L pɑɑk, cɑb min k n sɑɑn bikn’m,›

²⁰k luɑ mun biɑ yet’ɔ ɑ: ‹N dɑɑ yonn n puopɑɑnŋ e, k l pɑɑk e te k n kɑn fit bɑɑl.›

²¹«Ŋɑnn e k tuontunnɔ mɑnŋ ŋmɑt k sɑɑ yet u cɑnbɑɑ lin nbɑ nɑ kul. K u cɑnbɑɑ mɑnŋ wutuol duo bonciɑnn, k u yet u tuontunnɔ nɑ ɑ: ‹Nyimin k sɑɑn duo ni yiɑn yiɑn, k sɑɑ got sɔni ni, k yiin tɑlɑs-dɑnm nɑn wɔbi nɑn diɑni nɑn juɑni k jen nɑn’m nɑ.›

²²L puolpo e k u tuontunnɔ nɑ yet ɑ: ‹Cɑnbɑɑ, n tien fɑɑ yet lin nbɑ nɑ wɑɑ, ŋɑɑn k yiɑl dɑɑ be.›

²³Ŋɑnn e biɑk k u cɑnbɑɑ nɑ yet u tuontunnɔ nɑ ɑ: ‹Nyimin biɑk k sɑɑ got pɑnɑ pɑɑk nɑn sɑnjobis ni nɑn kpɑɑnt ni, k mɑbn niib k bin bɑɑl, k n ŋɑɑk n gbie.

²⁴N yien’ɑ e, bin nbɑ k n dɑɑn yiin’m nɑ, b suɑ ponŋ tɑn kɑn lenm n jɑɑnm nɑ jiet nɑ kɑɑ wɑɑ.› »

²⁵Nibulciɑɔnŋ din wɑɑ Yiesu, k u tɑn jiɑnt k yet’b ɑ

²⁶«Wun nbɑ luon k wuu be nɑn’n, sie k u luon’n bonciɑnn k gɑl wɑɑ luon u cɑnbɑɑ, nɑn u nɑɑ, nɑn u puo, nɑn u wɑɑs, nɑn u yuɑlb, nɑn u wɑɑli, nɑn u mɔnŋ mɑnfuol biɑnŋ nbɑ nɑ. L i kii tie nnɑ i kɑɑ, u kɑn fit k tien n *puolpoweituɑ.

²⁷Wun nbɑ k jii u kuun dɑpunpunn k buk k wɑɑ’n, u kɑn fit k tien n puolpoweituɑ.

²⁸«Wun nbɑ luon k wun mɑɑ detuɑtuk, sie k wun kɑl sinsinn, k dukn wɑɑ sɑɑ tien biɑnŋ nbɑ k suol l mɔb, k lɑɑn u likli sɑɑ jɑnŋ ɑmi l kɑn jɑnŋ,

²⁹k mɑɑn l i tie k u fɔkn fiɑkl nɑ ŋɑɑn tɑn k fit kɑɑl mɑɑlu mɑnŋ, niib ji sii lɑɑ’u e k sɑlkt’ɔ.

³⁰B ji sii yien ɑ: ‹Juɑ nɑ dɑɑn fɔkn u dɔunŋ ŋɑɑn tɑn gbɑl kɑɑlu.›

³¹«Kpɑnbɑl i mɔk niib tusɑ piik (10.000) k sɑɑn nɑn’m ɑ wun tuok u kpɑnbɑl luɑ nɑn u niib tusɑ piinle (20.000) mun, nlee k kpɑnbɑl nbɑ mɔk niib tusɑ piik (10.000) nɑ sɑɑ tien i? Sie k u kɑl sinsinn k dukn k bɑnn bɑɑ sɑɑ jɑnŋ nɑn bɑɑ kɑn jɑnŋ nɑn u tuoku.

³²B i kii jɑnŋ i e, sie k wun tun *tuomi k bin ŋɑk fɑɑɔk, wɑɑ dɑɑ be bɑnfɔkl nɑ.

³³«Tɔn, nilɔ i kii nyik u mɔktuk kul, u kɑn fit tien n puolpoweituɑ.

³⁴«Yɑɑln mɑn, ŋɑɑn l mɑnu i tɑnŋ i biil, nlee k l ji sii mɑn i?

³⁵L lek k ŋɑn k ɑ jii’l k pɑk kpɑɑb ni, k biɑ k ŋɑn k ɑ pukn luln po. Sie k ɑ lu. Wun nbɑ mɔk tubɑ, wun gbiint.»