Read Moba Luk 15 Bible Online

Luk 15 - Moba bible

Luk 15

¹Siɑn yuo k *lɑnpogɑɑltieb nɑn biitdɑnm bonciɑnn din bɑɑt Yiesu buol ni k gbiintl u mɑɑn.

²K Fɑɑliisiɑnnbɑ nɑn *senniwɑntieb din buln k yien ɑ: «Juɑ nɑ gɑɑl biitdɑnm k biɑ di nɑn’m.»

³L pɑɑk, k Yiesu yin’m bɑljouk nɑ ɑ

⁴«I yenɔ i mɔk pei kobk, k yenɔ n tɑn bot, u sɑɑ tien nlee? Sie k u nyik pei piin-yiɑ nɑn bɑn-yiɑ nɑ muuk ni, ŋɑɑn sɑɑn lon peyeunŋ mɑnŋ nbɑ bot nɑ nɑn wɑɑ tɑn sɑɑ lɑ’u.

⁵Wɑɑ ji tɑn lɑ’u yuo nbɑ k u ji mɔk pɑlpienn. L yuo k u jii’u k buk’ɔ u bɔpiɑt pɑɑk

⁶k kun ŋɑɑk ni. L yuo nɑ k u yiin u yuɑsnbɑ nɑn u ŋɑkpiɑsnbɑ k lɑkn’m k yɑɑ ɑ: ‹Ii mɔk pɑlpienn mɑn, k mɑɑn n lɑ n pebotkɑɔk mɑnŋ ɑ.›

⁷«Ŋɑnn e mun, k n yien’i biɑk, biit dɑɑn-yenɔ i mɔ kuɑŋɑɑn k lebt binbenŋ, pɑlpienn sii be *Yendɔunŋ ni l dɑɑnɔ pɑɑk, k gɑl lɑɑ sii be biɑnŋ nbɑ bin nbɑ tie niŋɑnm Yennu buol ni piin-yiɑ nɑn bɑn-yiɑ nbɑ k l k siɑn nɑn b sii mɔ kuɑŋɑɑn k lebt binbenŋ nɑ pɑɑk.

⁸«K puo mun ii mɔk likbinɑ piik, k yenn tɑn bot, u sɑɑ tien nlee? Sie k u juo fitl k piɑl u dieok k lon fɑnu nɑn wɑɑ tɑn sɑɑ lɑ’l.

⁹Wɑɑ ji tɑn lɑ’l yuo nbɑ, k u ji yiin u yuɑsnbɑ nɑn u ŋɑkpiɑsnbɑ k lɑkn’m k yet’b ɑ: ‹Ii mɔk pɑlpienn mɑn, k mɑɑn n lɑ n likbin nɑ wɑɑ.›

¹⁰«Nnɑ e mun k n yien’i biɑk, l i tie k biitdɑɑn-yenɔ mɔ kuɑŋɑɑn k lebt binbenŋ, Yennu *mɑlɑkɑɑnbɑ sii mɔk pɑlpienn u pɑɑk e.»

¹¹Ŋɑnn e k Yiesu ŋɑnm yet ɑ: «Jɑsuɑ din mɔk bonjɑi bɑnle,

¹²k wɑɑlɔ po tɑn yet u bɑɑ ɑ: ‹N bɑɑ, n luon k ɑ jii fɑɑl nbɑ k n bo tɑn sɑɑ gɑɑl ɑ kuun puolpo nɑ e k tul’n.› L yuo mɑnŋ k u bɑɑ bɔkt b fɑɑl mɑnŋ k tul’b.

¹³Ŋɑnn e l k wei k wɑɑlɔ po nɑ jii u mɔktuk kul k yɑɑt sɑɑn digbɑnn bɑnfɔkl ɑ. Lenŋ e k u binbenŋ din k ŋɑn, k u biil u likli yiɑn yiɑn ɑ.

¹⁴Wɑɑ gbenn u likli yuo nbɑ nɑ, k kon bɑɑ tinŋ mɑnŋ ni bonciɑnn, k suol’ɔ hei.

¹⁵Ŋɑnn e k u ji sɑɑn be jɑsuɑ ŋɑɑk duo mɑnŋ ni, k u tuun’ɔ u kpɑɑb ni ɑ wuu dint u duoli.

¹⁶K u tuu luon wun di duoli dɑbint nɑ k gbuo, ŋɑɑn suɑ din k tien’ɔ siɑl.

¹⁷L puolpo k u yɑn jen, k u yet u mɔnŋ ɑ: ‹N bɑɑ tuontunnɑ kul ɑ lɑɑt jiet di k l jɑnŋt’b, k biɑ tent, ŋɑɑn k n tɑn kpenn kon nnɑ nɑ.›

¹⁸Lɑɑ ji be nɑ, n sɑɑ kun n bɑɑ buol e k sɑɑ yet’ɔ ɑ: «N cɑnbɑɑ, n tun bonbiil k biil Yennu nɑn’ɑ wɑɑ.

¹⁹N ji k ŋɑn nɑn k ɑ yiin’n ɑ bijɑ. Tient’n ɑ tuontun-yenɔ.»

²⁰Ŋɑnn e k u ji fiil k ŋmɑt k kun u bɑɑ buol. «Yuo nbɑ k u dɑɑ din be bɑnfɔkl k kun nɑ, k u cɑnbɑɑ lɑ’u, k ninbɑɑɔk suol’ɔ bonciɑnn, k u ciɑl k bɑɑl suol u bik nɑ bɔpiɑt k puul wɔb’ɔ.

²¹Ŋɑnn e k bik nɑ yɑɑ ɑ: ‹N cɑnbɑɑ, n tun bonbiil k biil Yennu nɑn’ɑ wɑɑ. N ji k ŋɑn nɑn k ɑ yiin’n ɑ bijɑ.›

²²Ŋɑɑn k u bɑɑ yiin u tuontunnɑ, ‹Tient yiɑn ɑ k jii cincenŋɑnn, nɑn bɑnŋ, nɑn tɑɑsɑɑt nɑ, k tɑn gbɑbn’ɔ, ŋɑɑn piln’mɔ bɑnŋ nɑn tɑɑsɑɑt nɑ,

²³ŋɑɑn kii sɑɑ mɑn k sɑɑ suol nɑɑjɑkpɑnml nɑ nɑ k tɑn kpi’u k tin tien jɑɑnm.

²⁴N tuu miɑ n bijɑ nɑ kpo e, ŋɑɑn k u be, k biɑ miɑ u bot e, ŋɑɑn k u tɑn jen ɑ.› Ŋɑnn e k b ji piin b jɑɑnm dinu nɑn pɑlpienn.

²⁵«L yuo nɑ k u bijɑkpel nɑ dɑɑ din be kpɑɑb ni e, k ji din tɑn kpent k pel ŋɑɑk k gbɑt fuut, k siɑk wɑɑ k jinjeluk jeln.

²⁶K u yiin u bɑɑ tuontun-yenɔ k tɑn boi’ɔ ɑ: ‹Bee fuut e fu ŋɑɑk nnɑ?›

²⁷K tuontunnɔ nɑ yet’ɔ ɑ: ‹A wɑɑlɔ nɑ e kpen, k ɑ bɑɑ te k b kpii nɑɑjɑkpɑnml, k mɑɑn u jen nɑn lɑɑfiɑ e.›

²⁸Ŋɑnn e k u yuɑlɔ mɑnŋ wutuol ji duo hei, k u yet ŋɑɑk ni kuɑnu. K u cɑnbɑɑ nyii k bɑln’mɔ ɑ wun bɑɑl kuɑ.

²⁹Ŋɑɑn k u jiin u cɑnbɑɑ ɑ: ‹Nnɑlɑ, min e tuun’ɑ hei binɑ bonciɑnn. N biɑ k mi yet ɑ mɔb u, ŋɑɑn ɑ ponŋ tɑn k mi tul’n bubik k n kpii k yiin n nɑɑsin-yuɑsnbɑ k t tɑn dii k mɔk pɑlpienn.

³⁰Ŋɑɑn ɑ bijɑ nɑ e mɑntk biil ɑ fɑɑl kul k wei jɑntonɑ, k wɑɑ tɑn jen yuo nbɑ, k ɑ biɑ kpii nɑɑjɑkpɑnml k tul’ɔ.›

³¹K u bɑɑ yet’ɔ ɑ: ‹N bik, fin ŋɑnin ponŋ tuu be nɑn’n yuo kul ɑ, k lin nbɑ kul k n tuu mɔk, l tuu tie ɑ yɑl e.

³²L ponŋ ŋɑn nɑn tin tien jɑɑnm kii mɔk pɑlpienn, k mɑɑn, ɑ wɑɑlɔ dɑɑn kpo wɑɑ ŋɑɑn jen u mɑnfuol ni; u biɑ dɑɑn bot ɑ ŋɑɑn k n tɑn lɑ’u.› »