Read Moba Luk 17 Bible Online

Luk 17 - Moba bible

Luk 17

¹Yiesu yet u *puolpoweitieb ɑ: «Jinjɑnmi nbɑ te k niib tuun biit nɑ sɑɑ bɑɑl, ŋɑɑn l sii bi k tien wun nbɑ te k jinjɑnmi bɑɑt niib pɑɑk.

²B i bo i jii nɑɑl k lɑnn u tulu ni k lu’u mɔkl ni, l bo sii sɔ nɑn wɑɑ bo sɑɑ te k wɑɑs nɑ yenɔ kuɑ n tun biit.

³Suot i mɔnŋ. «A nɑɑ bik i tun bonbiil, fɑn kpɑɑn’ɔ nɑn ninmɔnn, k l i tie k u yɑɑ ɑ u biil’ɑ, fɑn nyik u biit k cɑb’ɔ.

⁴L i tie k u tun k biil’ɑ tɑɑl munlole dɑɑl nuɑk ni, ŋɑɑn tuu bɑɑl ɑ buol ni tɑɑl munlole k yɑɑ ɑ u biil’ɑ k mɔ kuɑŋɑɑn, fɑn nyik cɑb’ɔ.»

⁵L yuo mɑnŋ k Yonmdɑɑnɔ tuomiinbɑ yet’ɔ ɑ: «Puknt’t yɑdɑ.»

⁶K u jiin k yet’b ɑ: «L i tie k i bo mɔk yɑdɑ k l yɑb k bɑɑl nɑn jinjuklu binn nɑ, i bo sɑɑ fit k yet tiik nbɑ k b yi siikomɔl nɑ ɑ: ‹Ŋɑbt ɑ mɔnŋ k sɑɑn wuu mɔkgbenŋl ni,› k siikomɔl mɑnŋ sɑɑ sɑk i mɔb.

⁷«Tɔn, i yenɔ i mɔk tuontunnɔ k u ko tɑnmɔnn ɑmi k kpɑɑl pei, k tuontunnɔ nɑ nyii kpɑɑb ni k kpen ŋɑɑk ni, u sɑɑ yet’ɔ ɑ bɑɑt yiɑn k tɑn kɑl k di jiet ii?

⁸U sɑɑ yet’ɔ ɑ: ‹Liɑtl ɑ kpɑkotiɑt k bil, ŋɑɑn liɑ tɑyieni, k tien n jiet k senn’n k n bɑɑl nɑ k tɑn di k nyu. L puolpo k ɑ mun sɑɑ di k nyu.›

⁹A duki nɑn cɑnbɑɑ mɑnŋ sɑɑ tul u tuontunnɔ nɑ niipuouk k mɑɑn wɑɑ sɑk u mɔb nɑ pɑɑk ii?

¹⁰L mun biɑ tie nnɑ e i buol ni. Yuo nbɑ k i tun tuonn nbɑ k b tul’i nɑ k gbenn, yin yet ɑ: ‹T tie dɑɑbɑ e. T kpɑn tuu tun lin nbɑ k t bo sɑɑ tun nɑ kuukuɑ e.› »

¹¹Yiesu nbɑ din sɑɑ Selusɑɑlenm yuo nbɑ nɑ, k u din gɑl *Sɑɑmɑɑli nɑn Gɑɑliile sinsuuk ni,

¹²k din tɑn bɑɑl digbɑnsiɑl, k gbɑɑtɑ piik din cet’ɔ lenŋ, k din set bɑnfɔkl ɑ,

¹³ŋɑɑn yikn sɑnpɑɑpo wɑɑ, k yien ɑ: «Cɑnbɑɑ Yiesu, tin’t ninbɑɑɔk.»

¹⁴K Yiesu nbɑ lɑ’b yuo nbɑ k u yet’b ɑ: «Ii sɑɑ mɑn Yennu mɑnntieb buol ni k bin bikn’i got.» L yuo mɑnŋ k b ŋmɑt sɑɑ, k b ŋɑɑt mɑnŋ ji sɑɑ gbenn sɔnu ni.

¹⁵K b yenɔ nbɑ bɑnn nɑn u ŋɑɑɔk gbenn nɑ, k u ŋmɑt Yiesu penŋ k sɑɑ pɑk Yennu nɑn kunkɔsɑɑkɑl,

¹⁶ŋɑɑn bɑɑl gbɑɑn finfɑbl Yiesu tuɑnn k tul’ɔ niipuouk. Juɑ mɑnŋ din tie Sɑɑmɑɑli nilɔ e.

¹⁷K Yiesu din boi ɑ: «Niib piik kɑɑ bo lɑ pɑɑku uu? Ŋɑɑn k niib bɑn-yiɑ nbɑ tenn nɑ be liɑ?

¹⁸B suɑ k jen ɑ bin tɑn tul Yennu niipuouk sie Sɑɑmɑɑli juɑ nɑ kuukuɑ ee?»

¹⁹Ŋɑnn e k u yet juɑ mɑnŋ ɑ: «Fiit kii sɑɑ. A yɑdɑ nɑ pɑɑk e k ɑ lɑ pɑɑku.»

²⁰Tɔn, k Fɑɑliisiɑnnbɑ din boi Yiesu ɑ: «Yennu nɑɑn sɑɑ bɑɑl nlee yuo e?» Ŋɑnn e k u din jiin k yet’b ɑ: «Yennu nɑɑn kɑn bɑɑl bɑnnu nbɑ k i sɑɑ fit lɑ’l kɑɑ.

²¹Suɑ kɑn yet ɑ: ‹Gotl, ŋɑnn i nɑ,› ɑmi: ‹L be nɑ wɑɑ,› k mɑɑn Yennu nɑɑn be i ni.»

²²Ŋɑnn e k u yet u puolpoweitieb ɑ: «Yuo bɑɑt k i tɑn sii sunmɑn k i lɑ *Nisɑɑlk Bijɑ, ŋɑɑn kɑn lɑ.

²³B tɑn sɑɑ yet’i: ‹Gotl, u be lenŋ,› ɑmi: ‹Gotl, u be nnɑ nɑ.› I dɑɑ sɑɑ goli, k biɑ dɑɑ wɑɑ’b,

²⁴k mɑɑn Nisɑɑlk Bijɑ bɑɑlu tɑn sii tie nɑn sɑnyiknti nbɑ tuu nyiknt k yent sɑnpɑɑpo kul nɑ e.

²⁵Ŋɑɑn sinsinn, u tɑn sɑɑ di fɑlɑ bonciɑnn, k mɔtɑɑnɑ nigbounŋ biɑ tɑn sɑɑ yet’ɔ.

²⁶Noe yuo nbɑ din tie biɑnŋ nbɑ nɑ, l mun biɑ tɑn sii tie nnɑ e Nisɑɑlk Bijɑ bɑɑlu yuo.

²⁷Noe yuo e k b din di jiet k nyu, k kuɑnt puob, k jikt b wɑɑs k tien’m jɑb, k tɑn tuu dɑɑl nbɑ k Noe din kuɑ ŋɑlngbenŋl ni ŋɑɑn nyik’b, k nyunciɑɔnŋ bɑɑl k dii b kul ɑ.

²⁸Lɔt yuo nɑ mun biɑ din tie nnɑ e. B din di k nyu, k dɑɑ bonɑ k kɔi bonkukɔit, k buul tɑn, k mɑɑ ŋei,

²⁹ŋɑɑn dɑɑl nbɑ k Lɔt din tɑn nyii Suodonm, k sɑlwuutɑ nyii sɑnpɑɑpo k tɑn bɑɑ nɑn muu k dii b kul ɑ.

³⁰K dɑɑl nbɑ k Nisɑɑlk Bijɑ tɑn sɑɑ dɔkt, l mun tɑn sii tie nnɑ e.

³¹«L dɑɑl mɑnŋ, juɑ nbɑ be dituɑtuk pɑɑk, u dɑɑ siik k kuɑ u dieok ni ɑ wun sɑɑ jii u bonɑ, k wun nbɑ mun biɑ be kpɑɑb ni, u dɑɑ ŋmɑt lin nbɑ be puolpo nɑ buol.

³²Tiɑtl Lɔt ŋɑɑpuo mɑɑn po mɑn.

³³Tɔn, wun nbɑ k yit u mɔnŋ sɑlk n pɑɑk, u tɑn sɑɑ kɔnŋ u mɑnfuol, ŋɑɑn wun nbɑ yit u mɔnŋ sɑlk n pɑɑk, ŋuɑ e tɑn sɑɑ lɑ mɑnfuol nɑn bɑlmɔni.

³⁴N yien’i e, yuo nbɑ k n sɑɑ bɑɑl nɑ, niib bɑnle tɑn sii duɑ dunduɑn-yenu pɑɑk, k *mɑlɑkɑɑnbɑ tɑn sɑɑ jii yenɔ ŋɑɑn nyik luɑ.

³⁵Puob bɑnle tɑn sii be k nɑɑn dii, k b tɑn sɑɑ jii yenɔ ŋɑɑn nyik luɑ.

³⁶Jɑb bɑnle mun tɑn sii be kpɑɑb ni, k b tɑn sɑɑ jii yenɔ ŋɑɑn nyik luɑ.»

³⁷K u puolpoweitieb boi’ɔ ɑ: «Yonmdɑɑnɔ, lee?» K u jiin k yet’b ɑ: «Bonkpienn nbɑ be siɑn, lenŋ e k juut tiki.»