Read Moba Luk 19 Bible Online

Luk 19 - Moba bible

Luk 19

¹L puolpo e k Yiesu din bɑɑl Seliiko k gɑɑl.

²K jɑsuɑ din be lenŋ mɑnŋ k tie *lɑnpogɑɑltieb yudɑɑnɔ, k u sɑnn din yi Sɑɑse, k u din mɔk mɔktuk bonciɑnn.

³K u din kol ɑ wun lɑ Yiesu nbɑ tie wun nbɑ, ŋɑɑn k fit lɑ’u. Niib din yɑbt nɑn wun lɑ’u wɑɑ, k mɑɑn u din tie jɑjinjinŋ e.

⁴L pɑɑk k u ciɑl k gɑl tuɑnn po k sɑɑ duo tiik nbɑ k b yi siikomɔl nɑ ɑ wun lɑ Yiesu gɑlu, k mɑɑn u yɑɑ wun gɑl lenŋ e.

⁵K Yiesu nbɑ tɑn bɑɑl siikomɔl mɑnŋ buol, k u yɑɑt got’ɔ k yet’ɔ ɑ: «Sɑɑse, kɑktl k sik nɑ. Sie k n duɑl ɑ ŋɑɑk ni dinnɑ.»

⁶K Sɑɑse din kɑkt k sik yiɑn ɑ k gɑɑl’ɔ nɑn pɑlpienn, k b sɑɑn u ŋɑɑk ni.

⁷K niib nbɑ din lɑ lin nbɑ nɑ mɑnŋ, k b ji din buln k yien ɑ: «Juɑ nɑ sɑɑn kuɑ biitdɑɑnɔ ŋɑɑk ni.»

⁸K Sɑɑse fiil k set k yet Yonmdɑɑnɔ ɑ: «N Yonmdɑɑnɔ, gotl, n sɑɑ bɔkt n mɔktuk kul k tul tɑlɑs-dɑnm l bonjinn. L i tie k n mi dii suɑ fobt, n sɑɑ jiin’ɔ tɑɑl munnɑ.»

⁹K Yiesu yet’ɔ ɑ: «Dinnɑ ŋɑɑk nɑ niib bɑnn nɑn Yennu fiel’b ɑ, k mɑɑn juɑ mɑnŋ mun tie Ablɑɑhɑɑnm yɑɑbuonn e.

¹⁰*Nisɑɑlk Bijɑ bɑɑl ɑ u lon bin nbɑ bot nɑ k lɑ’b ŋɑɑn fiel’b.»

¹¹Ŋɑnn e k Yiesu yin niib nbɑ gbiintl mɑɑn mɑnŋ nɑ bɑljouk, k mɑɑn wɑɑ pel Selusɑɑlenm nɑ, k b duki ɑ l pɑɑk Yennu nɑɑn yɑɑ lin bɑɑl yiɑn e.

¹²K u yet’b ɑ: «Nijɑɑnsuɑ din be k din tɑn nyii k sɑɑn digbɑnn bɑnfɔkl ɑ, ɑ bin sɑɑ din’ɔ nɑɑn, k l puolpo k wun jen kpen ŋɑɑk ni.

¹³Wɑɑ dɑɑ din k nyii yuo nbɑ nɑ, k u yiin u tuontunnɑ piik k tul tul’b sɑlmɑ binn binn, k yet’b ɑ: ‹Ii sɑɑ mɑn k sɑɑ kpent kpinkpounŋ nɑn likli mɑnŋ nɑn mɑɑ tɑn sɑɑ jen.›

¹⁴Ŋɑɑn k u duo ni niib nɑ nɑn’ɔ. Wɑɑ sɑɑn yuo nbɑ k b tun *tuomi kpɑnbɑl nɑ buol ni, ɑ b k sɑk ɑ ŋuɑ n tien b kpɑnbɑl.

¹⁵«Tɔn, k nijɑɑnn nɑ sɑɑn sɑɑ set dii nɑɑn mɑnŋ k tɑn jen. Wɑɑ jen yuo nbɑ, k u te k b yiin u tuontunnɑ nbɑ k u dɑɑn tul’b likli nɑ, ɑ wun lɑ nyuɑt nbɑ k b lɑ likli nbɑ k u dɑɑn tul’b nɑ ni.

¹⁶K sinsinn yuɑ nɑ bɑɑl u buol k tɑn yet’ɔ ɑ: ‹Cɑnbɑɑ, sɑlmɑ binn nbɑ k ɑ dɑɑn tul’n nɑ, n kpent kpinkpounŋ k lɑ sɑlmɑ binɑ piik k pukn l pɑɑk.›

¹⁷K u cɑnbɑɑ yet’ɔ ɑ: ‹N fɑɑn, ɑ tie tuontunŋɑnɔ e. Fɑɑ diɑ bonmintk fɑnu biɑnŋ nbɑ nɑ, l pɑɑk, n sɑɑ tul’ɑ doi piik *yudɑnt.›

¹⁸K wun nbɑ mun pɑɑ u pɑɑk nɑ bɑɑl k tɑn yet’ɔ ɑ: ‹Cɑnbɑɑ, sɑlmɑ binn nbɑ k ɑ dɑɑn tul’n nɑ, n kpent kpinkpounŋ k lɑ sɑlmɑ binɑ ŋɑnŋmu e.›

¹⁹K u cɑnbɑɑ yet’ɔ ɑ: ‹N sɑɑ tul’ɑ doi ŋɑnŋmu yudɑnt e.›

²⁰«K luɑ mun biɑ bɑɑl k tɑn yet’ɔ ɑ: ‹Cɑnbɑɑ, gotl ɑ sɑlmɑ binn nɑ e nɑ. N dɑɑn gbin n ninfiɑnŋ ni e k bɔl,

²¹k mɑɑn n dɑɑn tiin’ɑ ɑ tonu nɑ pɑɑk e. A tuu jikt lin nbɑ k ɑ k bil, k biɑ jɑɑn lin nbɑ k ɑ k bul.›

²²K u cɑnbɑɑ yet’ɔ ɑ: ‹Fin tuontun-yuonn nɑ, n sɑɑ jii ɑ mɔnŋ mɔnŋ mɑɑn e k pɑk gbenn ɑ. A ponŋ mi nɑn n tuu tie nitounŋ o, k tuu jikt lin nbɑ k n k bil, k biɑ jɑɑn lin nbɑ k n k bul.

²³Bee tien k ɑ dɑɑn k jii n likli mɑnŋ k kuɑn bɑnŋ ni k nyuɑt n tɑn pɑɑn l pɑɑk i? Mɑɑ bo tɑn jen nɑ, n bo sɑɑ lɑ n likli pɑɑtl ɑ,›

²⁴k u yet bin nbɑ sie lenŋ nɑ ɑ: ‹Gɑɑt sɑlmɑ binn mɑnŋ u buol ni, k tul wun nbɑ mɔk sɑlmɑ binɑ piik nɑ.›

²⁵K b yet’ɔ ɑ: ‹Cɑnbɑɑ, u ponŋ mɔk sɑlmɑ binɑ piik.›

²⁶K u jiin’m ɑ: ‹N yien’i e, wun nbɑ mɔk bonɑ, b sɑɑ pukn’ɔ, ŋɑɑn wun nbɑ kɔnŋ bont, b biɑ sɑɑ tont bonmintk nbɑ k u ponŋ mɔk nɑ.

²⁷Tɔn, n dɑtɑi nɑ nbɑ k luon k n tien b kpɑnbɑl nɑ, ŋɑnn bɑɑt nɑn’m nnɑ nɑ k tɑn kpi’b n nunm nnɑ.› »

²⁸Yiesu nbɑ pɑk k gbenn nɑ, k ŋuɑ nɑn u *puolpoweitieb yɑɑ bin do Selusɑɑlenm, k Yiesu gɑl b tuɑnn.

²⁹K b tɑn pel Betfɑɑje nɑn Betɑɑni doi nbɑ kpiɑ jɑgbɑɑk nbɑ k b yi’l *Oliifienbɑ jɑgbɑɑk nɑ, k Yiesu tun u puolpoweitieb nɑ ni bɑnle,

³⁰k yet’b ɑ: «Ii sɑɑ digbɑnbik nbɑ be i tuɑnn po nɑ ni. I i sɑi bɑɑl, i sɑɑ lɑ bonsɑl k u lol, k suɑ dɑɑ k mi jɑk’ɔ. Yin lot’ɔ k bɑɑl nɑn’ɔ nɑ,

³¹k wun nbɑ i boi’i ɑ: ‹Bee tien k i lot’ɔ?› yin yet’ɔ ɑ: ‹Yonmdɑɑnɔ e luon’ɔ.› »

³²K b sɑɑn lɑ bonn kul nɑn Yiesu nbɑ pɑk’b biɑnŋ nbɑ nɑ.

³³Bɑɑ sɑɑn sɑɑ lot bonŋ mɑnŋ yuo nbɑ k bondɑnm lɑ’b k boi’b ɑ: «Bee k i lot bonŋ mɑnŋ i?»

³⁴K b jiin yet’b ɑ: «Yonmdɑɑnɔ e luon’ɔ,»

³⁵ŋɑɑn dɑt bonŋ mɑnŋ k bɑɑl nɑn’ɔ Yiesu buol ni. K u puolpoweitieb jii b cincenɑ nɑn tiɑt k pɑɑn bonŋ nɑ pɑɑk k jɑkn Yiesu.

³⁶Wɑɑ jɑk bonŋ nɑ yuo nbɑ k nisiɑb jikt b cincenɑ nɑn b tiɑt k lɑt sɔnu ni.

³⁷Wɑɑ tɑn pel Selusɑɑlenm k u bɑɑl sɔnsinsikl nbɑ nyi Oliifienbɑ jɑgbɑɑk pɑɑk nɑ. Lenŋ e k u puolpoweitieb kul libn piin k dont Yennu sɑnn nɑn pɑlpienn, bɑktnɔunŋ tuonjɑɑnɑ nbɑ kul nbɑ k b lɑ nɑ pɑɑk k b yien ɑ

³⁸«Yennu yetŋɑnm ii be Kpɑnbɑl nbɑ bɑɑt Yonmdɑɑnɔ sɑnn ni nɑ pɑɑk. Mɑnu i be *Yendɔunŋ ni k yudɑnt i tie Yennu yɑl.»

³⁹Ŋɑnn e k Fɑɑliisiɑnnbɑ siɑb nbɑ be nibul nɑ ni yet Yiesu, «Wɑntuɑ, yetl ɑ puolpoweitieb nɑ, ɑ bin ŋmin.»

⁴⁰K Yiesu jiin yet’b ɑ: «Nnɑlɑ, niib mɑnŋ i ŋmin, ŋɑɑn tɑnɑ nbɑ duɑ sɔnu ni nɑ sii yikn e.»

⁴¹Wɑɑ din pel k tɑn lɑ Selusɑɑlenm k u mɔ duo nɑ pɑɑk,

⁴²k yet ɑ: «L i bo i tie k ɑ bɑnn mɑnu sɔnu dinnɑ, l bo sii ŋɑn k tul’ɑ. Ŋɑɑn mɔtɑɑnɑ l liil ɑ yɑn, k ɑ kɑn fit bɑnn.

⁴³Yuo bɑɑt k ɑ dɑtɑi tɑn sɑɑ bɑɑl, k mɑɑ juonjɑl k lint’ɑ ŋɑɑn luon ɑ pɑɑk lokl kul po.

⁴⁴B tɑn sɑɑ biil’ɑ cɑin, fin nɑn niib kul. B kɑn nyik k tɑnn pɑɑ liel pɑɑk, k mɑɑn ɑ bo k bɑnn yuo nbɑ k Yennu bɑɑl ɑ buol ni.»

⁴⁵L Puol po e k Yiesu din sɑɑn kuɑ Yennu jɑɑnti ŋɑsɑɑkɑk ni, k din sɑɑ bel bin nbɑ kɔi bonɑ,

⁴⁶ŋɑɑn yet’b ɑ: «L diɑn Yennu lolkpel kɑdɑɑɔk ni ɑ: ‹N ŋɑɑk sii tie Yenmiɑlu ŋɑɑk e,› ŋɑɑn k yinm e kpint’l k tien’l nɑn-yukb kinkɑl buol.»

⁴⁷Tɔn, dɑɑl kul k Yiesu din be Yennu jɑɑnti ŋɑsɑɑkɑk ni, k tumi niib. K Yennu mɑnntieb yudɑnm nɑn *senniwɑntieb nɑn tinŋ mɑnŋ yudɑnm luon bin kpi’u,

⁴⁸ŋɑɑn k fit lɑ sɔnu nbɑ k b sɑɑ kpi’u, k mɑɑn niib nɑ kul din cɑɑn b tubɑ k gbiintl u mɑɑn.