Read Moba Luk 2 Bible Online

Luk 2 - Moba bible

Luk 2

¹L yuo nɑ k kpɑnbɑlɑ yudɑɑnɔ Ogust din tul mɔb ɑ bin diɑn suɑ kul nikɑnt Luonmtieb yent kul ni.

²Ŋɑnn e din tie sinsinn nikɑnt diɑnu, k Kiiliinius din tie Siili tinŋ yudɑɑnɔ l yuo.

³L pɑɑk, suɑ kul din kun u duo ni ɑ bin sɑɑ diɑn u sɑnn.

⁴Suosiɑf mun din nyii Nɑɑsɑɑlet nbɑ be Gɑɑliile tingbounŋ ni, k sɑɑn Suude tingbounŋ ni, k kun Dɑɑfiid duo ni, Betlehenm. Setk nɑn mɔni, Suosiɑf din tie * Dɑɑfiid yɑɑbuonn e.

⁵U din kpen ɑ bin diɑn ŋuɑ nɑn u sɑlkpenŋ Mɑɑli sɑnɑ e. L yuo nɑ, k Mɑɑli mɔk puol.

⁶Bɑɑ din dɑɑ be Betlehenm nɑ, k Mɑɑli mɑtuk yuo tɑn bɑɑl.

⁷K u ji din mɑl bonjɑk, u sɑpɑɑnmɑl. U din jii cincenn k pɔbn’ɔ, k bil’ɔ bonkobluok ni, k mɑɑn dieok nbɑ k b din guun nikɑnt niib nɑ din gbie wɑɑ.

⁸Pekpɑɑli mun din be duo mɑnŋ ni k kpɑɑl b pei nyiɑɔk muuk ni.

⁹K Yonmdɑɑnɔ mɑlɑksuɑ din tɑn dɔkt b pɑɑk, k Yonmdɑɑnɔ yentsɑɑkɑl yent lint’b, k jɑŋmɑɑni mɑntk ji din suol’b bonciɑnn.

¹⁰Ŋɑɑn k *mɑlɑkɑ nɑ yet’b ɑ: «Dɑɑ tiin jɑŋmɑɑni mɑn, k mɑɑn n bɑɑl nɑn lɑbɑmɑnn e mɑɑ n wɑnn’i, lin nbɑ sɑɑ tul niib kul pɑlpienn bonciɑnn.

¹¹Dinnɑ nyiɑɔk nɑ, Dɑɑfiid duo ni, b mɑl i Fietuɑ wun nbɑ tie *Klistu, Yonmdɑɑnɔ nɑ.

¹²Nɑ e sii tie *nyinn k tul’i; I sɑɑ lɑ sɑnpɑntk nɑ puɑb cincenn ni k duɑ bonkobluok ni.»

¹³L yuo nɑ k *Yendɔunŋ ni mɑlɑkɑɑnbɑ bonciɑnn dɔkt k pukn mɑlɑkɑ nɑ po, k yiin dont Yennu sɑnn ɑ:

¹⁴«Yudɑnt tie Yennu nbɑ be sɑnpɑɑpo nɑ yɑl e, k mɑɑn mɑnu be Yennu nɑn niib sinsuuk ni, u lonm pɑɑk.»

¹⁵K mɑlɑkɑɑnbɑ nɑ tɑn nyik pekpɑɑli nɑ, ŋɑɑn ŋmɑt duo Yendɔunŋ ni. K pekpɑɑli yet b lieb ɑ: «Ŋɑɑnt mɑn k tin sɑɑn Betlehenm k sɑɑ got lɑ lin nbɑ tien, k Yonmdɑɑnɔ yien’t nɑ.»

¹⁶Ŋɑnn e k b fiil sɑɑn yiɑn yiɑn k sɑɑ bɑɑl k lɑ Mɑɑli nɑn Suosiɑf, k sɑnpɑntk mɑnŋ duɑ bonkobluok ni.

¹⁷Bɑɑ bɑɑl lɑ’u yuo nbɑ k b muɑnt lin nbɑ k mɑlɑkɑ nɑ yet’b bik mɑnŋ po nɑ.

¹⁸K bin nbɑ din gbɑt lin nbɑ k pekpɑɑli muɑnt nɑ, k l bɑkt b kul.

¹⁹Ŋɑɑn Mɑɑli din tiɑl lin nbɑ tien nɑ kul, k din duki l po u pɑl ni bonciɑnn.

²⁰L puolpo e k pekpɑɑli nɑ ŋmɑt b pei buol muuk ni. Bɑɑ sɑɑ nɑ, k b piɑk dont Yennu sɑnn, lin nbɑ kul k b gbɑt k lɑ nɑ pɑɑk, k l set tie nɑn mɑlɑkɑ nbɑ yet’b biɑnŋ nbɑ nɑ.

²¹Yiesu mɑɑlu dɑɑ ŋɑnniin dɑɑl e, yuo nbɑ k b sɑɑ pot u punn nɑ, k b pul u sɑnn Yiesu, sɑnn nbɑ k mɑlɑkɑ din pul k suɑ u nɑɑ din dɑɑ k suol u puol nɑ.

²²Tɔn, l din tɑn jɑnŋ nɑn Mɑɑli nɑn Suosiɑf n tun nɑn Muois *senni nbɑ senn biɑnŋ nbɑ, k mɑnn *mɑlunŋ k ŋɑnm Mɑɑli Yennu buol ni. Ŋɑnn e k b ji din jii bik nɑ k sɑɑn nɑn’ɔ Selusɑɑlenm, ɑ bin sɑɑ jii’u k tul Yonmdɑɑnɔ

²³nɑn lɑɑ diɑn Yonmdɑɑnɔ senni ni ɑ: «Bikpelk kul nbɑ tie bonjɑk e tie Yonmdɑɑnɔ yuɑ.»

²⁴K b biɑ mɑnn mɑlunŋ nɑn Yonmdɑɑnɔ nbɑ din senn biɑnŋ nbɑ nɑ ɑ: «Bin lɑ lɑnjeli bɑnle ɑmi ŋmɑnbilɑ bɑnle k mɑnn.»

²⁵L yuo nɑ k jɑsuɑ nnɑ din be Selusɑɑlenm, k u sɑnn din tie Siimeɔn. U din be binbenŋ nbɑ gbuot Yennu nunm k din bɑɑkt Yennu bonciɑnn, k guu yuo nbɑ k Yennu sɑɑ fiel Islɑɑeltieb, k Foŋɑnm din be nɑn’ɔ.

²⁶K Foŋɑnm mɑnŋ ponŋ din fiit k wɑnn’ɔ ɑ u kɑn kpo sie k u tɑn lɑ Klistu, nbɑ k Yonmdɑɑnɔ tun’ɔ nɑ.

²⁷L yuo nɑ k Foŋɑnm mɑnŋ din te k Siimeɔn kuɑ Yennu jɑɑnti ŋɑsɑɑkɑk ni, k sɑɑ lɑ Yiesu bɑɑ nɑn u nɑɑ bɑɑl nɑn’ɔ ɑ bin tien’ɔ nɑn senni nbɑ senn biɑnŋ nbɑ.

²⁸K Siimeɔn din gɑɑl bik mɑnŋ ŋɑɑn pɑk Yennu k yet ɑ:

²⁹«N Yonmdɑɑnɔ, ɑ gbien ɑ mɔsonn nɑ wɑɑ. Lɑɑ tie bɑnnu nbɑ nɑ, ŋɑɑnt k ɑ dɑɑbl n kpo, k kun nɑn mɑnu,

³⁰k mɑɑn n mɔnŋ mɔnŋ ninbinn lɑ fɑɑ tun lin nbɑ k fiel ɑ niib ɑ,

³¹lin nbɑ k ɑ tien niib kul ninbinɑ ni.

³²L sii tie yentu nbɑ sɑɑ te k niib kul n bɑnn’ɑ, k l biɑ sɑɑ te k ɑ niib Islɑɑel n lɑ dontl.»

³³Tɔn, Siimeɔn nbɑ pɑk k jikt sɑɑ bik mɑnŋ po biɑnŋ nbɑ nɑ, k l bɑkt bik nɑ nɑɑ nɑn u bɑɑ bonciɑnn.

³⁴K Siimeɔn tul’b yetŋɑnm, ŋɑɑn yet bik nɑ nɑɑ Mɑɑli ɑ: «Nnɑlɑ, Yennu nyinn bik nɑ k senn’ɔ ɑ Islɑɑeltieb bonciɑnn n bɑɑ yɑnn u pɑɑk, k lieb bonciɑnn mun biɑ tɑn sɑɑ lɑ fielu u pɑɑk e. Ŋuɑ e tɑn sii tie nyinn nbɑ k niib bonciɑnn tɑn kɑn sɑk l mɑɑn.

³⁵Lin nbɑ nɑ sɑɑ te k b wuol ni dudukt n nyi pɑɑnu. Ŋɑɑn bonsiɑl tɑn sɑɑ tun k pint ɑ pɑl pɑɑk bonciɑnn.»

³⁶Tɔn, k *Yennu sɔkniiluɑ mun din be lenŋ k tie puo, k u sɑnn yi Aɑnn, wun nbɑ tie Fɑɑnuel bipuo, k biɑ tie Aɑsel[1] buolu ni nilɔ, k din tie puokpelcɑɑnwonŋ, wun nbɑ din yuo binɑ ŋɑnlole.

³⁷K l puolpo k u sɔlɔ tɑn kpo ŋɑɑn nyik’ɔ pɑkuɑk, k u ji mɔk binɑ piiniin nɑn ŋɑnnɑ. U din tuu k nyi Yennu jɑɑnti ŋɑsɑɑkɑk ni yennu nɑn nyiɑɔk, k jiɑntl Yennu k loln mɔb k mei’ɔ.

³⁸L yuo nɑ k u bɑɑl k tul Yennu niipuouk, k din piɑk bik nɑ po k tien bin nbɑ kul din guu yuo nbɑ k Yennu yɑɑ wun fiel Selusɑɑlenm tieb.

³⁹Yuo nbɑ k Mɑɑli nɑn Suosiɑf nbɑ din tun gbenn Yonmdɑɑnɔ senni nbɑ senn biɑnŋ nbɑ nɑ, k b ŋmɑt kun b duo Nɑɑsɑɑlet nbɑ be Gɑɑliile tinŋ ni.

⁴⁰K Yiesu tɑn kpɑɑt nɑn pɑnŋ nɑn subni bonciɑnn, k Yennu yetŋɑnm din be u pɑɑk.

⁴¹Tɔn, binn kul k Yiesu nɑɑ nɑn u bɑɑ din tuu do Selusɑɑlenm k sɑɑ di *yuktgɑltiɑlu jɑɑnm.

⁴²Yuo nbɑ k Yiesu din tɑn bɑɑl binɑ piik nɑn ŋɑnle, k b din duo ɑ bin sɑɑ di jɑɑnm mɑnŋ nɑn biɑnŋ nbɑ k b din tuu tie nɑ.

⁴³Jɑɑnm dɑɑ mɑnŋ nbɑ din tɑn gbenn yuo nbɑ, k b ji piin kunu, ŋɑɑn k bik nɑ, Yiesu, din biɑl k be Selusɑɑlenm, ŋɑɑn k Mɑɑli nɑn Suosiɑf k mi nɑn u biɑl.

⁴⁴B din duki mi ɑ u be nibul nɑ ni e, k b sonm dɑɑl mɑnŋ kul. L puolpo k b luon’ɔ b niib ni nɑn b lieb ni.

⁴⁵Bɑɑ k lɑ’u nɑ, k b din ŋmɑt sɑɑn Selusɑɑlenm k sɑɑ luon’ɔ lenŋ.

⁴⁶K dɑɑ ŋɑntɑ dɑɑl k b tɑn lɑ’u Yennu jɑɑnti ŋɑsɑɑkɑk ni, k u lɑkn kɑl nɑn wɑntieb k gbiintl b mɑɑn ŋɑɑn biɑ boi’b buboit.

⁴⁷K bin nbɑ kul din gbiintl u mɑɑn, l din bɑkt’b nɑn wɑɑ tien biɑnŋ nbɑ k mɔk bɑnnu k piɑk k jiint’b.

⁴⁸K u nɑɑ nɑn u bɑɑ nbɑ din lɑ’u lenŋ, k l bɑkt’b bonciɑnn, k u nɑɑ ji boi’ɔ ɑ: «N bik, bee k ɑ tien’t nnɑ? A k mi ɑ min nɑn ɑ bɑɑ lɑ pɑlbiil hei k luon’ɑ ni ii?»

⁴⁹K u jiin k boi’b ɑ: «Bee k i dɑɑn luon’n i? I k mi ɑ sie k n fɑbl kii be n Bɑɑ ŋɑɑk ni ii?»

⁵⁰Ŋɑɑn b din k gbɑt u mɑɑn mɑnŋ pɑɑk.

⁵¹Ŋɑnn e k b din ŋmɑt nɑn Yiesu k sik Nɑɑsɑɑlet, k u din sɑɑk b mɔb. K u nɑɑ din tiɑn lin nbɑ tien nɑ kul u pɑl ni.

⁵²K Yiesu kpɑɑtl k u yɑn puki, k Yennu nɑn nisɑɑli pɑlɑ din mei u pɑɑk.