Read Moba Luk 20 Bible Online

Luk 20 - Moba bible

Luk 20

¹Dɑsiɑl Yiesu nbɑ din be Yennu jɑɑnti ŋɑsɑɑkɑk ni k tumi niib k biɑ muɑntl lɑbɑmɑnn, k Yennu mɑnntieb yudɑnm nɑn *senniwɑntieb nɑn sɑɑkɑb din bɑɑl u buol

²k tɑn yet’ɔ ɑ: «Yet’t, ŋmee yiikuo ni e k ɑ tuun lin nbɑ nɑ? Ŋmee cɑb’ɑ yiikuo mɑnŋ i?»

³K u jiin ɑ: «N mun mɔk buboit k sɑɑ boi’i. Yetl’n mɑn,

⁴Sɑn nbɑ din wuul niib Yennu nyunwulu nɑ, Yennu e cɑb’ɔ l yiikuo ɑmi nisɑɑli ee?»

⁵K b ŋmɑnt fɑɑ l lɑbɑɑl nɑn b lieb k yien ɑ: «T i yet ɑ Yennu e cɑb’ɔ l yiikuo, u sɑɑ boi’t ɑ bee k t k tien u mɑɑn nɑ yɑdɑ?

⁶K t i biɑ kii yet ɑ nisɑɑli e din cɑb’ɔ, niib nɑ kul ɑ sɑɑ jɑɑt’t tɑnɑ wɑɑ, k mɑɑn b tien yɑdɑ nɑn Sɑn din tie *Yennu sɔkni e.»

⁷L pɑɑk, k b jiin k yet Yiesu ɑ: «T k mi u yiikuo nbɑ nyii siɑn.»

⁸K Yiesu mun yet’b ɑ: «Tɔn, n mun kɑn yet’i bɑnnu nbɑ k n lɑ l yiikuo k tuun lin nbɑ nɑ.»

⁹L puolpo k Yiesu yin niib nɑ bɑljouk ɑ: «Jɑsuɑ din wuu tilonti nbɑ k b yi *fiinyɑ nɑ u kpɑɑb ni, ŋɑɑn ji din jii kpɑɑb nɑ k tien kpɑɑlɑ nuu ni ɑ bii goli, ŋɑɑn tɑn yɑɑt sɑɑn siɑl po k sɑɑ wei.

¹⁰K puɑlyuo tɑn bɑɑl k u tun u tuontunnɔ ɑ wun sɑɑn kpɑɑlɑ nɑ buol ni, ɑ bin bɔkt tiluɑnɑ nbɑ tie kpɑdɑɑnɔ yɑl k tul’ɔ. Ŋɑɑn kpɑɑlɑ nɑ sɑɑ buo tuontunnɔ nɑ k jiin’ɔ yɑnn.

¹¹Ŋɑnn e k u biɑ tun tuontunluɑ, k kpɑɑlɑ nɑ biɑ sɑɑ buo’u k din’ɔ fei k biɑ jiin’ɔ yɑnn.

¹²K kpɑdɑɑnɔ mɑnŋ biɑ tun tuontunluɑ, k b sɑɑ tien’ɔ dɑnŋ k jii’u lu’u.

¹³Ŋɑnn e k kpɑdɑɑnɔ nɑ yet ɑ: ‹N sɑɑ tien nlee nɑ? Lɑɑ ji be nɑ, n sɑɑ tun n mɔnŋ mɔnŋ bilonkɑk e. Ŋuɑ ŋɑnin, pɑsiɑl b sɑɑ tul’ɔ nibɑɑkl ɑ.›

¹⁴Ŋɑɑn kpɑɑlɑ nɑ nbɑ din tun ninbinn k lɑ u bik nɑ k u bɑɑt nɑ, k b yet b lieb ɑ: ‹Kpɑdɑɑnɔ mɑnŋ fɑdiilɔ e nɑ. Ŋɑɑnt tin kpi’u mɑn, k u fɑɑl mɑnŋ n ji tien t yɑl.›

¹⁵K b suol’ɔ k nyii nɑn’ɔ kpɑɑb nɑ kpinŋ po k sɑɑ kpii’u. «Tɔn, kpɑɑlɑ mɑnŋ nbɑ tien biɑnŋ nbɑ nɑ, kpɑdɑɑnɔ nɑ sɑɑ tien’m nlee?

¹⁶U sɑɑ bɑɑl k kpi’b, ŋɑɑn biɑ jii kpɑɑb mɑnŋ k tul lieb.» Niib mɑnŋ nbɑ gbɑt lin nbɑ nɑ k b yet ɑ: «Yennu n bɔl ŋɑnn.»

¹⁷K Yiesu got’b ŋɑɑn yet’b ɑ: «Lin nbɑ diɑn Yennu lolkpel kɑdɑɑɔk nɑ ni pɑɑk tie bee? ‹Tɑnn nbɑ k tɑnmɑɑlɑ yet’ɔ nɑ, ŋɑnn e set tien ŋɑɑk nɑ pɑnŋ.›

¹⁸«Tɔn, wun nbɑ kul bɑɑ tɑnn mɑnŋ pɑɑk sɑɑ but but e, ŋɑɑn tɑnn mɑnŋ i bɑɑ wun nbɑ pɑɑk, binm, l sɑɑ mɑt mɑt’ɔ e.»

¹⁹K senniwɑntieb nɑn Yennu mɑnntieb yudɑnm bɑnn nɑn Yiesu nbɑ yin bɑljouk nɑ l sɑɑn gɑɑn b pɑɑk e. L pɑɑk, k b ji din kol ɑ bin suol’ɔ l tonton nɑ, ŋɑɑn tiin niib nɑ jɑŋmɑɑni.

²⁰Senni wɑntieb nɑn Yennu mɑnntieb yudɑnm ji din wɑɑ piki Yiesu, k tun pikiitieb bin nbɑ kpɑnn ɑ b tie mɔmɔnpɑklɑ e, ɑ bin lɑ u mɔbonkpetl nbɑ tie lin nbɑ, k ji fit suol’ɔ k tien’ɔ l tinŋ yudɑɑnɔ nuu ni nɑn u yiikuo ni.

²¹K pikiitieb mɑnŋ tɑn bɑɑl boi Yiesu buboit ɑ: «Wɑntuɑ, t mi nɑn fɑɑ yien lin nbɑ k biɑ wɑnt nɑ, l ŋɑn. A biɑ k tie luktn dɑɑnɔ, ŋɑɑn fin e biɑ wɑnt Yennu sɔnu nɑn bɑlmɔni.

²²Tɔn, t *senni cɑb’t nɑn tii pɑ lɑnpo kii tien Luonm tinŋ kpɑnbɑl Sesɑɑl ɑmi t dɑɑ pɑ?»

²³K Yiesu bɑnn b sel nbɑ k b tie nɑ k yet’b ɑ

²⁴«Wɑnt’n liklib. Tɔn, k ŋmee nɑɑɔnŋ nɑn sɑnn e be liklib nɑ pɑɑk i?» K b jiin ɑ: «Sesɑɑl yɑl e.»

²⁵K Yiesu yet’b ɑ: «Tɔn, ii yen i pɑ kii tien Sesɑɑl lin nbɑ tie u yɑl, ŋɑɑn mun i pɑ kii tien Yennu lin nbɑ tie Yennu yɑl.»

²⁶K pikiitieb nɑ lek k lɑ u mɔbonkpetl niib nɑ tuɑnn ni, k l tien’m yɑɑl-lituk nɑn Yiesu jiinu mɑnŋ k b ji ŋmin.

²⁷K *Sɑɑdiuseɑnbɑ siɑb din bɑɑl Yiesu buol ni. Ŋɑnm e din tuu yɑɑ ɑ niib tɑn kɑn fiil kuun ni, k b boi’ɔ ɑ

²⁸«Wɑntuɑ, Muois din diɑn senni k yet ɑ: ‹Nilɔ i kuɑn u ŋɑɑpuo k k mɑl wɑɑs ŋɑɑn tɑn kpo, ɑ l ŋɑn k u ninjɑ n fɑɑl pɑkuɑk nɑ k mɑl wɑɑs k tul kpiemɔ nɑ.›

²⁹Tɔn, jɑb bɑnlole din be k tɑɑ bɑɑ, k sɑɑkuɑ po tɑn kuɑn puo, k k mɑl wɑɑs, ŋɑɑn kpo,

³⁰k wun nbɑ mun pɑɑ u pɑɑk nɑ fɑɑl puo mɑnŋ, k mun biɑ k mɑl, ŋɑɑn kpo,

³¹k wun nbɑ wɑɑ muntɑ ni nɑ mun din fɑɑl puo mɑnŋ k bin nbɑ biɑl nɑ kul ɑ din tɑn fɑɑl puo nɑ ŋɑɑn mun tɑn kpo kpo, k k mɑl wɑɑs mun biɑk.

³²K l juontu k puo mɑnŋ mun biɑ tɑn kpo.

³³K lɑɑ ji be nɑ, kuun fiilu dɑɑl, b ŋmee tɑn sii yen puo mɑnŋ i? K mɑɑn b bɑnlole kul ɑ din kuɑn’ɔ wɑɑ.»

³⁴K Yiesu jiin yet’b ɑ: «Tingbounŋ nɑ ŋɑɑtieb kuɑnt puob k biɑ ciɑnt b wɑɑs k tien’m jɑb,

³⁵ŋɑɑn k bin nbɑ ŋɑn nɑn kuun fiilu, k biɑ ŋɑn nɑn bii be *dulnyɑ pɑɑnn ni nɑ, b kii kuɑnt puob, k b biɑ kii ciɑnt b wɑɑs k tien jɑb,

³⁶k b ji kɑn mi k kpo, k mɑɑn b sii tie nɑn *mɑlɑkɑɑnbɑ nɑ e. B biɑ tie Yennu wɑɑs e k mɑɑn b fiil kuun ni wɑɑ.

³⁷Tɔn, Muois e mun din ponŋ wɑnn nɑn kpienm tɑn sɑɑ fiil kuun ni. Muois nbɑ din diɑn jɑgotkunkonŋ po nɑ, u din yi Yonmdɑɑnɔ ɑ Ablɑɑhɑɑnm Yennu, nɑn Isɑɑk Yennu, nɑn Sɑɑkɔb Yennu.

³⁸Ŋɑnn Yennu k tie kpienm Yennu kɑɑ, ŋɑɑn u tie fuotb Yennu e, k mɑɑn b kul tie fuotb e u tuɑnn ni.»

³⁹Ŋɑnn e k senniwɑntesiɑb yet Yiesu ɑ: «Wɑntuɑ, ɑ jiin bonŋɑnn ɑ.»

⁴⁰K b ji din jie nɑn bin boi Yiesu buboisiɑt.

⁴¹Ŋɑnn e k Yiesu boi’b ɑ: «Nlee k b yien ɑ *Klistu tie * Dɑɑfiid yɑɑbuonn i?

⁴²K mɑɑn Dɑɑfiid mɔnŋ mɔnŋ diɑn *yɑni kɑdɑɑɔk nuɑk ni ɑ: ‹Yonmdɑɑnɔ yet n Yonmdɑɑnɔ ɑ: Kɑln n niidiitu po

⁴³mɔkmɔk nɑn mɑɑ tɑn sɑɑ jii ɑ dɑtɑi k tien’m ɑ tɑɑkpɑktɑ.›

⁴⁴Dɑɑfiid nbɑ din yiin Klistu ɑ: ‹Yonmdɑɑnɔ› nɑ, nlee k Klistu nɑ tie ŋuɑ Dɑɑfiid yɑɑbuonn i?»

⁴⁵Niib kul nbɑ gbiintl Yiesu mɑɑn mɑnŋ nɑ, k u yet u *puolpoweitieb ɑ

⁴⁶«Suot i mɔnŋ mɑn nɑn senniwɑntieb. Ŋɑnm e luon bii liɑ liɑtbɑɑnt, kii lin kii sonm, k biɑ gɑɑn bulcinfuonti dɑi ni. B i kuɑ *Suifnbɑ jɑɑnti diet ni, b luon bii kɑɑl nijɑɑnɑ kɑɑni pɑɑk e. B i sɑɑn jɑɑnm ni, b biɑ luon yudɑnm kinkɑɑni buɑ.

⁴⁷Ŋɑnm e biɑ gɑɑn pɑkɔi nbɑ mɔk lin nbɑ kul, ŋɑɑn ji tuu jen ɑ k mei Yennu k wei ɑ bin kpɑnn ɑ b tie niŋɑnm e. B tubdɑtu tɑn sii bi bonciɑnn.»