Read Moba Luk 22 Bible Online

Luk 22 - Moba bible

Luk 22

¹Yuo nbɑ din tɑn pel nɑn bin tikl k di jɑɑnm, k ŋmɑn pɑɑnu nbɑ kɑɑ * dɑtinŋ nɑ, k b din yi jɑɑnm mɑnŋ *yuktgɑltiɑlu jɑɑnm,

²k Yennu mɑnntieb yudɑnm nɑn *senniwɑntieb din kol ɑ bin lɑ sɔnu nbɑ k b sɑɑ kpi Yiesu, ŋɑɑn b din tiin niib nɑ jɑŋmɑɑni.

³L yuo nɑ k *Sɑɑtɑn kuɑ Suudɑ ni, wun nbɑ k b din yi’u Iskɑɑliɑɔt k u biɑ din tie Yiesu tuomiinbɑ *piik nɑn bɑnle nɑ ni yenɔ.

⁴K ŋuɑ Suudɑ din sɑɑn k sɑɑ pɑk nɑn Yennu mɑnntieb yudɑnm nɑn Yennu jɑɑnti ŋɑsɑɑkɑk sejenm yudɑnm biɑnŋ nbɑ k u sɑɑ fit k kuɑt Yiesu k bin suol’ɔ.

⁵K b ji din mɔk pɑlpienn k gɑɑl ɑ b sɑɑ pɑ Suudɑ likli.

⁶K u sɑk b lol mɑnŋ k ji piin luon sɔnu nbɑ k u sɑɑ jii Yiesu k kubn’ɔ b nuu ni yuo nbɑ k niib nɑ ji kɑɑ nɑ.

⁷Pɑɑnu nbɑ kɑɑ dɑtinŋ nɑ jɑɑnm dɑɑl nbɑ k b yɑɑ bin kpi pebis k tien *yuktgɑltiɑlu jɑɑnm jiet nɑ,

⁸k Yiesu tun Piɑl nɑn Sɑn duo nɑ ni k yet’b ɑ: «Ii sɑɑ mɑn k sɑɑ tien *yuktgɑltiɑlu jiet nɑ siil k tul’t k tin di.»

⁹K b boi’ɔ ɑ: «Lee k ɑ luon k tin sɑɑn tien siil i?»

¹⁰K u yet’b ɑ: «Nnɑlɑ, yuo nbɑ k i bɑɑt duo nɑ ni, i sɑɑ cet jɑsuɑ k u jii nyunsuɑl. Ii wɑɑ’u nɑn ŋɑɑk nbɑ k u sɑɑ kuɑ,

¹¹k yin yet ŋɑɑdɑɑnɔ ɑ: ‹Wɑntuɑ nɑ yɑɑ ɑ t boi’ɑ ɑ dieok nbɑ k ŋuɑ nɑn u *puolpoweitieb yɑɑ bin kuɑ di *yuktgɑltiɑlu jɑɑnm jiet nɑ be lee?›

¹²K u sɑɑ wɑnn’i dituɑtuk nbɑ yɑb k ponŋ tien siil, k yin tien jiet mɑnŋ lenŋ.»

¹³K b din sɑɑn k set sɑɑ lɑ bonn kul nɑn Yiesu nbɑ yet’b biɑnŋ nbɑ nɑ, k b ji din tien jɑɑnm mɑnŋ jiet siil.

¹⁴Jɑɑnm jiet dinu nɑ yuo nbɑ tɑn bɑɑl, k Yiesu kɑl ɑ wun di, k u tuomiinbɑ nɑ mun kɑl ɑ bin di nɑn’ɔ.

¹⁵K u yet’b ɑ: «L mɑntk wɑnt n pɑl ni nɑn min nɑn yinm n lɑkn di *yuktgɑltiɑlu jɑɑnm dinu dɑɑnn e wɑɑ k fɑlɑ n ji tɑn bɑɑl’n.

¹⁶N yien’i e, n ji kɑn mi k di jɑɑnm nɑ mɔkmɔk nɑn yuo nbɑ k bɑlmɔni jɑɑnm nɑ tɑn sɑɑ tien Yennu nɑɑn ni.»

¹⁷Ŋɑnn e k u jii *kɔp nɑn dɑmunŋ, k tul Yennu niipuouk l pɑɑk, ŋɑɑn yet’b ɑ: «Gɑɑt nɑ mɑn k cent i lieb k nyu.

¹⁸N yien’i e nɑn lɑɑ jii dinnɑ k sɑɑ, n ji kɑn mi nyu dɑmunŋ nɑ, sie k Yennu nɑɑn tɑn bɑɑl.»

¹⁹Ŋɑnn e k u jii pɑɑnu k tul Yennu niipuouk l pɑɑk, k ŋmit ŋmit k tul’b ŋɑɑn yet’b ɑ: «Nɑ e tie n gbɑnɑnt, k n yɑɑ n jii’l k tul’i. Ii tun kii ŋmɑn mɑn kii tiɑn n po.»

²⁰K dinu nɑ puolpo e k u biɑ jii kɔp nɑ nɑn dɑmunŋ, ŋɑɑn yet’b ɑ: «Dɑmunŋ nɑ tie Yennu *lol pɑɑnn nbɑ lol nɑn n sɔn, k l muɑn i pɑɑk.

²¹«Gotl mɑn wun nbɑ yɑɑ wun kuɑt’n nɑ, ŋuɑ e kɑl k di nɑn’n nɑ.

²²*Nisɑɑlk Bijɑ set yɑɑ wun kpo nɑn Yennu nbɑ senn biɑnŋ nbɑ nɑ e, ŋɑɑn l sii bi k tul wun nbɑ yɑɑ wun kuɑt’ɔ nɑ pɑɑk.»

²³K b ji din piin k boi b lieb k yien ɑ: «T ŋmɑ po e yɑɑ wun tun lin nbɑ nɑ?»

²⁴L yuo k mɔniɑɔk bɑɑl u puolpoweitieb mɑnŋ sinsuuk ni, k b din noi k yien ɑ lɑnm e cie lieb.

²⁵K Yiesu yet’b ɑ: «Tingbounŋ nɑ ŋɑɑtieb kpɑnbɑlɑ diɑ b niib nɑn ninmɔnn, k b yudɑnm yi b mɔnŋ ‹b sonmtieb,›

²⁶ŋɑɑn yinm ŋɑnin, l k tie nnɑ. Wun nbɑ tie nijɑɑnn i ni, sie k u tien nɑn bik nɑ, k yudɑɑnɔ mun n tien nɑn tuontunnɔ nɑ.

²⁷Tɔn, ŋmee tie nijɑɑnn k gɑl u luɑ, wun nbɑ di jiet, ɑmi wun nbɑ tien e? L k tie wun nbɑ di nɑ kɑɑ ɑɑ? Ŋɑɑn min ŋɑnin be i sinsuuk ni nɑn tuontunnɔ nɑ e.

²⁸«Yinm ponŋ tun be nɑn’n n jinjɑnmi ni yuo kul.

²⁹N Bɑɑ nbɑ din’n nɑɑn biɑnŋ nbɑ nɑ, nnɑ e mun k n yɑɑ n din’i nɑɑn,

³⁰k yin di k nyu nɑn’n n nɑɑn ni, k i tɑn sɑɑ kɑl nɑɑngbɑnt pɑɑk k bu Islɑɑeltieb buolu piik nɑn bɑnle nɑ buut.»

³¹«Siimɔn, Siimɔn, gbiintl, Sɑɑtɑn bɑln ɑ wun lɑ yiikuo nbɑ k u sɑɑ bikn i kul k len’i nɑn dii nbɑ k b tuu lenn founŋ nɑ.

³²Ŋɑɑn fin Siimɔn, min e miɑl Yennu ɑ pɑɑk k ɑ yɑdɑ dɑɑ bɑɑ, k yuo nbɑ k ɑ ji jen n buol ni, ɑ tot ɑ nɑɑ wɑɑs.»

³³K Piɑl jiin yet’ɔ ɑ: «N Yonmdɑɑnɔ, l i tie dɑnsɑlk ɑmi kuun i e, n tien siil ɑ, nɑn min nɑn fin n sɑɑn.»

³⁴K Yiesu din jiin k yet’ɔ ɑ: «Piɑl, n yien’ɑ e, kojouk dɑɑ tɑn kɑn bui dinnɑ sinsinn dɑɑnn i k ɑ tɑn sɑɑ noi tɑɑl muntɑ ɑ ɑ k mi’n.»

³⁵Ŋɑnn e k Yiesu boi’b ɑ: «Mɑɑ din tun’i doi ni nɑ k i din k diɑ likbuɑli nɑn pɑkɑ nɑn tɑɑsɑliɑ nɑ, i din kɔnŋ siɑl ii?» K b jiin yet’ɔ ɑ: «Aɑi.»

³⁶K Yiesu yet’b ɑ: «Mɔtɑɑnɑ jik lɑɑ, wun nbɑ mɔk likbuɑlk ɑmi pɑkl, wun jii’l, k wun nbɑ mun k mɔk juk-bɑnjiɑk, wun kɔi u liɑtfuouk k dɑɑ.

³⁷Min e yien’i nɑ, l tie k lin nbɑ diɑn Yennu lolkpel kɑdɑɑɔk ni nɑ n tɑn tien mɔni n ni ɑ: ‹B jii’u k pukn’ɔ biitdɑnm kɑnn ni.› Setk nɑn mɔni, lin nbɑ k b din diɑn k jiin n po yɑɑ lin bɑɑl n pɑɑk.»

³⁸K b din yet’ɔ ɑ: «Yonmdɑɑnɔ, gotl, juk-bɑnjɑi ŋɑnle nɑ.» K u yet’b ɑ: «L jɑnŋ ɑ.»

³⁹Yiesu din nyii lenŋ k sɑɑn *Oliifienbɑ jɑgbɑɑk pɑɑk, nɑn wɑɑ ponŋ tuu tie biɑnŋ nbɑ nɑ, k u puolpoweitieb wɑɑ’u sɑɑ.

⁴⁰Wɑɑ sɑɑ bɑɑl lenŋ k u yet’b ɑ: «Ii mei Yennu mɑn k i tɑn dɑɑ kuɑ jinjɑnmi ni.»

⁴¹Ŋɑnn e k u cɑt b buol ni k sɑɑn wɑɑnm-nnɑ, k sɑɑ gbɑɑn tinŋ ni k miɑl Yennu,

⁴²k yet ɑ: «N Bɑɑ, l i tie ɑ lonm, dɑɑ ŋɑɑnt k n kuɑ bonbiil nbɑ bɑɑt n pɑɑk nɑ ni, ŋɑɑn ŋɑɑnt k ɑ lonm o n tun, k l dɑɑ tie n lonm kɑɑ.»

⁴³K *mɑlɑkɑ nyii sɑnpɑɑpo k tɑn dɔkt u pɑɑk k tot’ɔ.

⁴⁴U din dii fɑlɑ bonciɑnn k miɑl Yennu nɑn u pɑnŋ kul, k nɑɑɔk tɑn pu u pɑɑk k tɑn tuot nɑɑn nɑn sɔn nɑ.

⁴⁵K u tɑn fiil Yenmiɑlu ni k ŋmɑt u puolpoweitieb nɑ buol, k sɑɑ lɑ k b guɑnt, k mɑɑn pɑlbiil nbɑ din be b pɑlɑ ni nɑ pɑɑk.

⁴⁶K u boi’b ɑ: «Bee tien k i guɑnt i? Fiit kii mei Yennu mɑn k i tɑn dɑɑ kuɑ jinjɑnmi ni.»

⁴⁷Yiesu nbɑ din dɑɑ piɑk nɑn u puolpoweitieb nɑ, k nibul dɔkt. K Suudɑ, wun nbɑ tie u tuomiinbɑ piik nɑn bɑnle nɑ ni yenɔ, gɑl b tuɑnn, k tɑn bɑɑl Yiesu buol ni ɑ wun muɑt u tɑnkpinn.

⁴⁸Ŋɑɑn k Yiesu boi’ɔ ɑ: «Suudɑ, ɑ muɑtl n tɑnkpinn ɑ ɑ kuɑt Nisɑɑlk Bijɑ ee?»

⁴⁹L yuo nɑ k u puolpoweitieb nɑ lɑ lin nbɑ yɑɑ lin tien nɑ, k b boi Yiesu ɑ: «Yonmdɑɑnɔ, t kɔn nɑn’m nɑn juk-bɑnjɑi ii?»

⁵⁰K b yenɔ tɑɑn kɑkt cuɑ Yennu mɑnntieb yudɑɑnɔ tuontunnɔ niidiitu tubl k pot.

⁵¹K Yiesu yet’b ɑ: «Nyikn mɑn,» ŋɑɑn sii juɑ nɑ tubl mɑnŋ k l lɑ lɑɑfiɑ.

⁵²Ŋɑnn e k Yiesu boi Yennu mɑnntieb yudɑnm nɑn Yennu jɑɑnti ŋɑsɑɑkɑk sejenm yudɑnm nɑn sɑɑkɑb nbɑ bɑɑl ɑ bin suol’ɔ nɑ ɑ: «N tie fɑt-tuɑ e k i bɑɑl nɑn juk-bɑnjɑi nɑn gbɑjɑlɑ ɑɑ?

⁵³N ponŋ tuu tun be nɑn’i dɑɑl kul Yennu jɑɑnti ŋɑsɑɑkɑk ni, ŋɑɑn k i k so’n. Tɔn, ŋɑɑn yuo nɑ lek tie i yɑl e, nɑn bunbɔnn yiikuo yɑl.»

⁵⁴L yuo nɑ k b ji din suol Yiesu k sɑɑn nɑn’ɔ Yennu mɑnntieb yudɑɑnɔ ŋɑɑk ni, k Piɑl ji sɑɑ wɑɑ u puolpo bɑnfɔkl ɑ.

⁵⁵Ŋɑɑk mɑnŋ ni, niib din juo muu dundonsinsuuk ni k kɑl lint ɑ, k Piɑl tɑn kuɑ k kɑl pukn’m.

⁵⁶Wɑɑ kɑl kpiɑ muu nɑ, k tuontunbipuoyenɔ lɑ’u k got’ɔ silll, k yet ɑ: «Juɑ nɑ tuu be nɑn’ɔ.»

⁵⁷K Piɑl noi ɑ: «Puo, n k mi’u.»

⁵⁸Lɑɑ yɑnn wɑɑnm-nnɑ, k jɑsuɑ mun lɑ’u k yet’ɔ ɑ: «Fin, ɑ mun tie u puolpoweitieb yenɔ e.» K Piɑl yet’ɔ ɑ: «Juɑ nɑ, kɑi, l k tie min kɑɑ.»

⁵⁹Lɑɑ biɑ yɑnn wɑɑnm-nnɑ, k jɑluɑ nnɑ mun biɑ yet ɑ: «Yɑunwɑ, bɑlmɔni e, juɑ nɑ tuu be nɑn’ɔ k mɑɑn u mun biɑ tie Gɑɑliile nilɔ e.»

⁶⁰K Piɑl jiin yet’ɔ ɑ: «Juɑ nɑ, min tɑɑn k mi lin nbɑ k ɑ yien nɑ kɑɑ wɑɑ.» Wɑɑ dɑɑ piɑk nɑ e k kojouk fɑn bui l tonton nɑ.

⁶¹K Yonmdɑɑnɔ jiɑnt got lɑ Piɑl, k Piɑl ji tiɑl ŋuɑ Yiesu mɔbonɑ nɑ po, wɑɑ yet biɑnŋ nbɑ ɑ: «Kojouk dɑɑ tɑn kɑn bui dinnɑ sinsinn dɑɑnn i k ɑ tɑn sɑɑ noi tɑɑl muntɑ e ɑ ɑ k mi’n.»

⁶²K Piɑl ji nyii k bui bonbiil.

⁶³L puolpo e k bin nbɑ guu Yiesu nɑ dɑɑn’ɔ nyɑtuk k buo’u,

⁶⁴ŋɑɑn jii cincenn k bobn u nunm po ŋɑɑn boi’ɔ ɑ: «Buntl wun nbɑ fɑɑ’ɑ nɑ.»

⁶⁵K b biɑ pɑk k biil u sɑnn bonciɑnn k suki’ɔ.

⁶⁶Lɑɑ yent sɑn-nyiɑɔk ni k *Suifnbɑ sɑɑkɑb nɑn Yennu mɑnntieb yudɑnm nɑn senniwɑntieb din tɑɑn kɑl b yudɑnm tituk kɑɑnu, k te k b bɑɑl nɑn Yiesu.

⁶⁷K b yet’ɔ ɑ: «Fin i e set kii tie *Klistu, fɑn yet’t.» K u jiin k yet’b ɑ: «Mi i yet’i, ŋɑɑn i ponŋ tɑn kɑn tien’n yɑdɑ gbɑɑ,

⁶⁸k mi i mun i biɑ kii boi’i buboit, i kɑn sɑk jiin’n buboit mɑnŋ.

⁶⁹Ŋɑɑn lɑɑ nyii mɔtɑɑnɑ k jii sɑɑ Nisɑɑlk Bijɑ tɑn sii kɑl Yɑbnt Yennu niidiitu po.»

⁷⁰K b kul ɑ boi’ɔ ɑ: «K ŋɑnn fin e tie Yennu Bijɑ ɑɑ?» K u jiin k yet’b ɑ: «Nɑn yɑɑ kpɑn yɑɑ nɑ.»

⁷¹K b yet b lieb ɑ: «T ponŋ ji luon siɑlɑɑdɑnm biɑ po e nɑ? T ponŋ gbɑt u mɔnŋ mɑɑn ɑ.»