Read Moba Luk 24 Bible Online

Luk 24 - Moba bible

Luk 24

¹Lɑsl dɑɑl sɑn-nyɑfɑɑl, k puob mɑnŋ nyii sɑɑn kɑɑɔk mɑnŋ buol nɑn b kpɑnunubt nɑn tulɑɑli nbɑ k b ponŋ ŋɑnm nɑ.

²Bɑɑ bɑɑl lenŋ, k b lɑ k kɑtɑngbenŋl nɑ, k l nyɑkt kɑɑɔk nɑ mɔb pɑɑk, k bilnt k sɑɑ duɑ.

³Ŋɑɑn bɑɑ kuɑ kɑɑɔk mɑnŋ ni, b k lɑ Yonmdɑɑnɔ Yiesu gbɑnɑnt,

⁴k b ji biɑl sie jiiɑɑ, k l tɑɑkpɑɑk ni k jɑb bɑnle sie k liɑ liɑtfɔkt nbɑ nyili.

⁵Lɑɑ tien puob nɑ jɑŋmɑɑnsuoluk, k b gbɑɑn tinŋ ni, k jɑb nɑ boi’b ɑ: «Bee k i luon fuotɔ kpienm ni?

⁶U kɑɑ nnɑ. U fiil kuun ni wɑɑ. Tiɑt mɑn wɑɑ din yet’i biɑnŋ nbɑ, yuo nbɑ k u dɑɑ din be Gɑɑliile nɑ,

⁷ɑ l tie k bin suol *Nisɑɑlk Bijɑ k jii’u tien biitdɑnm nuu ni k bin kpɑɑ’u tɑbn’ɔ dɑpunpunn pɑɑk k wun kpo, k u tɑn sɑɑ fiil kuun ni dɑɑ ŋɑntɑ dɑɑl.»

⁸Ŋɑnn e k puob nɑ ji tiɑl u mɑɑn mɑnŋ po.

⁹K puob nɑ ji siet kɑɑɔk nɑ buol k ŋmɑt kun, k sɑɑ yet lin nbɑ kul tien, k tul u tuomiinbɑ piik nɑn yenɔ kuɑ, nɑn bin nbɑ be lenŋ nɑ kul ɑ.

¹⁰Puob mɑnŋ sɑnɑ e din tie Mɑgdɑɑlɑ puo Mɑɑli, nɑn Sɑɑnn, nɑn Mɑɑli nbɑ din tie Sɑɑk nɑɑ nɑ, k puolieb mun din pukn b pɑɑk k be b ni k b din yet Yiesu tuomiinbɑ mɑɑn mɑnŋ.

¹¹Ŋɑɑn tuomiinbɑ nɑ din duki nɑn l tie mɑyɑnɑ e, k b k tien’m yɑdɑ.

¹²Ŋɑɑn k Piɑl ŋɑnin din fiil k ciɑl sɑɑn kɑɑɔk nɑ buol, k sɑɑ tibn k got k lɑ kuun cincenn nɑ k l duɑ l kuukuɑ, k u ji ŋmɑt kun ŋɑɑk ni nɑn yɑɑl-lituk nɑn lin nbɑ tien mɑnŋ pɑɑk.

¹³L dɑɑl mɑnŋ e k Yiesu *puolpoweitieb bɑnle din sɑɑ digbɑnbik nbɑ k b yi Emɑus nɑ. Lenŋ nɑn Selusɑɑlenm din tie nɑn kiiluomiɑtɑ piik nɑn yen nɑ e.

¹⁴K b din sonm piɑk nɑn lieb lin nbɑ nɑ kul nbɑ tien mɑnŋ po.

¹⁵Bɑɑ piɑk k fɑɑ lɑbɑɑl nɑn lieb yuo nbɑ nɑ, k Yiesu mɔnŋ nɑkn’m k lɑkn nɑn’m sɑɑ,

¹⁶ŋɑɑn k Yiesu te k l liil’b k b k bɑnn’ɔ.

¹⁷K u boi’b ɑ: «I sonm piɑk ɑ bee?» K b set nɑn ninbiik.

¹⁸Ŋɑnn e k b yenɔ, wun nbɑ sɑnn yi Kleopɑɑs nɑ boi’ɔ ɑ: «A kuukuɑ e tie sɑɑmɔ nbɑ be Selusɑɑlenm nɑ k tɑn k gbɑt lin nbɑ tien dɑɑ ŋɑnlele nɑ ɑɑ?»

¹⁹K u boi’b ɑ: «Lɑnn po e tien i?» K b jiin k yet’ɔ ɑ: «K jikt sɑɑ Nɑɑsɑɑlet nilɔ Yiesu po. Juɑ nɑ dɑɑn tie *Yennu sɔkni e, u bɑktnɔunŋ tuonjɑɑnɑ nɑn u mɑɑn dɑɑn mɔk pɑnŋ, Yennu nɑn niib tuɑnn.

²⁰K t yudɑnm nɑn Yennu mɑnntieb yudɑnm jii’u k tien’ɔ bɑlbuulɔ nuu ni, k yet ɑ u ŋɑn nɑn kuun e, k b tɑn kpɑɑ’u dɑpunpunn pɑɑk.

²¹Ŋɑɑn k t tuu dɑɑn nɑn ŋuɑ e tɑn sɑɑ nyinn tinm Islɑɑeltieb t dɑtɑi nuu ni, k lin nbɑ pukn, dinnɑ tie dɑɑ ŋɑntɑ e nɑ lɑɑ tien.

²²Ŋɑnn mɑnŋ e biɑk, k t ni puosiɑb pɑk’t u po k l yɑɑl ŋɑɑn lit’t, k mɑɑn bɑɑ sɑɑn kɑɑɔk mɑnŋ buol sɑn-nyɑfɑɑl nɑ,

²³b sɑɑ k lɑ u gbɑnɑnt. Bɑɑ jen yuo nbɑ k b yet’t ɑ ŋɑnm bo lɑ Yennu *mɑlɑkɑɑnbɑ, k mɑlɑkɑɑnbɑ mɑnŋ yet’b ɑ Yiesu jen u mɑnfuol ni wɑɑ.

²⁴Ŋɑnn e k t yenm tɑn sɑɑn kɑɑɔk mɑnŋ buol k sɑɑ lɑ nɑn puob nbɑ dɔnŋ yet’t nɑ, ŋɑɑn b k lɑ Yiesu.»

²⁵Ŋɑnn e k Yiesu yet’b ɑ: «Yɑnkpienɑ nɑ, bee k i tɑɑntl nɑn yin tien Yennu sɔkniinbɑ mɑɑn nɑ yɑdɑ?

²⁶L k kpɑɑ tɑlɑs nɑn *Klistu n di fɑlɑ mɑnŋ, k tɑn lɑ u *yudɑnt ii?»

²⁷Ŋɑnn e k u wɑnt’b u mɑɑn nbɑ diɑn Yennu lolkpel kɑdɑɑɔk kul ni nɑ pɑɑk, k piin Muois diɑni ni nɑn sɔkniinbɑ diɑni kul ɑ ni.

²⁸Tɔn, k b tɑn pel digbɑnbik nbɑ k b bɑɑt nɑ, k Yiesu tɑn tien nɑn u gɑɑl e nɑ.

²⁹Ŋɑɑn b guɑl’ɔ k yien ɑ: «Biɑt nɑn’t nnɑ, k mɑɑn yennu bɑɑ wɑɑ k l ji bɔnt e.» L pɑɑk, k u ji kuɑ k biɑl b buol ni.

³⁰K u tɑn kɑl ɑ wun di nɑn’m, k jii pɑɑnu nɑ k tul Yennu niipuouk l pɑɑk, ŋɑɑn ŋmit ŋmit k tul’b.

³¹L yuo nɑ k b nunm po ji yent k b ji bɑnn’ɔ. L tɑɑkpɑɑk ni k u biɑ lil bot b ni.

³²K b ji yien lieb ɑ: «Wɑɑ piɑk nɑn’t sɔnu pɑɑk k wɑnt’t lin nbɑ diɑn Yennu lolkpel kɑdɑɑɔk ni nɑ pɑɑk, l bo k tie nɑn muu nɑ kɑɑ k di t pɑlɑ ni ii?»

³³L tɑɑkpɑɑk ni k b fiil ŋmɑt Selusɑɑlenm, k sɑɑ lɑ u tuomiinbɑ piik nɑn yenɔ kuɑ nɑ nɑn siɑb k b lɑkn lieb.

³⁴Ŋɑnn e k u puolpoweitelieb nɑ yet’b ɑ: «Yonmdɑɑnɔ set fiil e nɑn bɑlmɔni. U dɔkt Siimɔn pɑɑk.»

³⁵K niib bɑnle nɑ mun yet’b lin nbɑ tien sɔnu pɑɑk, nɑn biɑnŋ nbɑ k b bɑnn Yiesu yuo nbɑ k u tɑn ŋmit ŋmit pɑɑnu nɑ.

³⁶Puolpoweitieb bɑnle nbɑ nyii Emɑus nɑ nbɑ yien’m lin nbɑ nɑ nɑ, l tɑɑkpɑɑk ni k Yiesu set b sinsuuk ni k yet’b ɑ: «Mɑnu ii be i pɑɑk.»

³⁷K gbɑnɑnjijekt nɑn jɑŋmɑɑni kuɑ’b hei, k mɑɑn b duki mi ɑ b lɑ siɑl ɑ funfɔntuk o.

³⁸Ŋɑnn e k u boi’b ɑ: «Bee k i yɑn pɑɑk put i? Bee k bilsuk be i ni?

³⁹Gotl n nii nɑn n tɑɑ mɑn, k bɑnn nɑn l set tie min e. Sii’n k bɑnn nɑn min e. Funfɔntuk k mɔk gbɑnɑnt nɑn kpɑbɑ nɑn yɑɑ lɑ mɑɑ mɔk’l biɑnŋ nbɑ.»

⁴⁰Wɑɑ yet nnɑ mɑnŋ k u wɑnn’b u nii nɑn u tɑɑ.

⁴¹Bɑɑ dɑɑ k fit tien yɑdɑ nɑn ŋuɑ e nɑ b pɑlpienn nɑn b yɑɑl-lituk pɑɑk nɑ, k u boi’b ɑ: «I mɔk jesiɑt nnɑ ɑɑ?»

⁴²K b jii jɑnpulkjinn k tul’ɔ,

⁴³k u gɑɑl k ŋmɑn b nunm ni.

⁴⁴Ŋɑnn e k u yet’b ɑ: «Gotl mɑɑ dɑɑn wɑnn’i lin nbɑ mɑɑ dɑɑ dɑɑn be nɑn’i. Lin nbɑ kul k b diɑn Muois *senni ni nɑn Yennu sɔkniinbɑ diɑni ni nɑn Yennu *yɑni ni k jiin n po nɑ, l kpɑɑ tɑlɑs nɑn l kul n tɑn mɑntk tun k gbenn.»

⁴⁵Ŋɑnn e k u ji yent b nunm ɑ bin bɑnn lin nbɑ diɑn Yennu lolkpel kɑdɑɑɔk ni nɑ pɑɑk,

⁴⁶k yet’b ɑ: «L diɑn ɑ Klistu sɑɑ di fɑlɑ k kpo k tɑn fiil kuun ni dɑɑ ŋɑntɑ dɑɑl,

⁴⁷k b sɑɑ piin Selusɑɑlenm ni k sɑɑn tuu nibuolu kul k muɑnt, u sɑnn ni, niib nbɑ sɑɑ mɔ kuɑŋɑɑn bɑnnu nbɑ nɑ nɑn biit nyikcɑbu lɑbɑɑl.»

⁴⁸K u biɑ yet’b ɑ: «Yinm e tie lin nbɑ nɑ siɑlɑɑdɑnm.

⁴⁹Nnɑlɑ, min e yɑɑ n tɑn tul’i lin nbɑ k n Bɑɑ senn mɔsonn ɑ u sɑɑ tul’i nɑ. Ŋɑɑn i dɑɑ biɑl kii be mɑn Selusɑɑlenm mɔkmɔk nɑn yuo nbɑ k yiikuo tɑn sɑɑ nyi sɑnpɑɑpo k sik i pɑɑk.»

⁵⁰Ŋɑnn e k Yiesu nyii nɑn’m duo mɑnŋ ni k sɑɑn nɑn’m Betɑɑni. Lenŋ e k u sɑɑ donn u nii sɑnpɑɑpo ŋɑɑn yɑt yetŋɑnm b pɑɑk.

⁵¹Wɑɑ yɑt yetŋɑnm nɑ yuo nbɑ nɑ, k u yɑɑt k nyik’b ŋɑɑn duo *Yendɔunŋ ni.

⁵²K b ji jiɑnt’ɔ k tɑn ŋmɑt Selusɑɑlenm nɑn pɑlpienn bonciɑnn.

⁵³K b ji din jii b yuo k be Yennu jɑɑnti ŋɑsɑɑkɑk ni yuo kul ɑ, k piɑk dont Yennu sɑnn.